Allah arye, Obet-Edom ap, el aik un ninye nirya ati, kanye deibukce, teleb kipdeibukba, yuk nang arye, “Allah el nyapdeiamuk yupu liamik kwemdina ara, Obet-Edom aik ulula ati, Allah arye anye ap, el aik unyak nang ap, el talilul ning nirya ap ati, pia teleb updeibuk,” nyabuka, Daud biti laka nyabikba, kekebukopura, bikbik abuka biyukce, aning Obet-Edom aik arye doprobikce, tuba tamubuka, el mutuku koprop bobiyuk. Ara, Daud el mutuku, Sion nyalamik mutuku noutam, amarikna boyanuka deibuk.
1 Tawarikh 15:3 - Eipomek3 Ati ara, Daud bira, Allah el si Yahweh arye yupu nyabukce, keil deice sekeibukba, yo marikna, el si Peti Perjanjian pum tam deiamik. Aning bobuka delina ati, Daud birye, teleb tenda doltakna aik domukce, akunum kintinip deiamice sukumuk, ‘Amarikna bobuka bobinamakʼ tenen, yukubukba, Yerusalem mutuku noutamakuk ulamik nang nirya, bulubuka wekelyayik. အခန်းကိုကြည့်ပါ။ |
1 Tawarikh 15:3
13 ပူးပေါင်းရင်းမြစ်များ
Allah arye nyapdeiamuk yupu, deiamik yo kwemdina ara, bobanmeka ani, Daud arye, ‘Aning deipnamap’ tenen, doltakne tenda aik domika pum bisik benduka deibik. Deibikopura, Daud arye Allah ati, kina ap, el si erena ap ati, kam ning obukce, uku dongobuk. Ton ning ara, ninye ap, Allah ap, ansinina ati ara, kam ning obuka, tup kalibukabukce, ton bokuka, Allah ati arebukce, ton tam ning, sik ninye arye dibik. Winibikce, Allah el si Yahweh ati arebukce, el si erebik.
Raja Salomo birye, Allah el si eren aik akunum dobuka sirya dakdongobukura, yupu nyapdeibukba, Israel ninye sik deiyok nang, wisi nang nirya ap, Israel yala deiyok nang ap, ati nyalbiyik. Ara, “Yerusalem anyuk bulubuka yalulume. Yamunce, minop talak Raja Daud ulamukak, anyaik si ara, Sion amutuku noutam arye, weik mambul ning doprobibirye, Yerusalem mutuku boyanuka deipnamabe. Ara, Allah el si Yahweh arye, ‘Wininamlume, tonda aning nyapsinye touk winipmunyopura, narye anggunti winibuka melinamsine,’ nyapdeiamukba, ninye arye ayupu kekebikce sekuka, yo lakase arye memamik marikna pum bisik deibik. Amarikna dobuka, Yerusalem mutuku noutam boyanuka deipnamabe. Ayo lakase arye memamik marikna ara, minop talak Raja Daud ulamukak, anyasik si ara, Sion. Mining dam mutuku, Sion mutuku noutam arye amarikna doprobibirye, boyanuka Yerusalem mutuku noutamak, Allah el si eren aik pum tam deipnamabe.” Salomo birye, Israel sik deiyok nang, wisi nang ati nyabuk.
Yupu talipmok talak ara, Daud birye el dam unmik Israel yala nang nirya ati, nyabuk. “Amapo, dipkoprob Anggun telebeʼ tenepnumunye touk, nun si erenyap Allah, nun ni koproba Allah Yahweh babye, ‘Telebe,’ tenepse touk, Wininamabe. Ara, nunce ninye wibuka dopkwetebibiba, nun kayapu nang tuba, Israel mutuku noutam daunmak nang nirya ati, ‘Nun yupu kekebuka, nun dam yanganamakʼ tenen, ninye wibuka deibibirye, anyapce yupu nyana ati, dopkweteptibye. Tonda, nuncuk, sik imam-imam nang dam ap, sik Lewi yala nang unyak mutuku noutam ap, weik asik ap, mitik asik unyak amutuku-amutuku nirya ap ati, yupu dopkwetebibiba, sik nirya nun dam yakirye, nun ap neika asukumuk yakceba, bulubuka unamabe. Atalak arye, yupu sisikinamabe.
Sik Israel yala nang, aning bulubuka wekmek nang ara, ‘Telebe tenebika ati, ninye deiyoknye Raja Daud birye nyapdeipmok touk, yupu dopkwetebukba, Israel yala nang, dana-dana tam mutuku noutam ulamik nang nirya, bulupdeibuk. Ara, Mesir mutuku bisik wililonak, Sihor mek dam arye dukdongobuka, iknapye tam arye dipdongobuka, Hamat mutuku weik asik domik tam arye dukdongopra, amutuku nirya noutam ulamik nang ara, nirya bulupdeibuk. Ara, Allah arye, ‘Aning ara, wininamlume. Aning ara, pia kum wininamlume,” nyapdeibukba, sekekuka deiamuk ning, el si ara, Peti Perjanjian, mambul yo marikna pum tam deiamik ara, Kiryat-Yearim mutuku deiamik arye bobuka, Yerusalem mutuku boyangana ati, anang nirya ara, bulupdeibuk.
Raja Daud Yerusalem mutuku noutamak ara, ninye deiyoknye Raja Daud birye nyabukba, amutuku nang arye, Daud el aik ara, weika arye dobik. Tonda, Daud bira, ‘Allah arye nyapdeibukba sekeiamik yupu, yo marikna, el si Peti Perjanjian pum tam dongamik ning ara, teleb sukum deipnuneʼ tenen, tenda arye doltakna aik dolamik ning kintibukce, ‘Amambul yo marikna ning ara, aweik tenda aik pum tam dongopnamne,’ tenelamukce, atenda aik kintinibuka, dopdeibuk.
Yukubuk nang yayikopura, Daud elce anang ati, nyabuk yupu ara, ani. “Anggun duweit tonok yala nang ara, Lewi yala nang, anggun duweit dem ululume. Ati, anggunce, ‘Allah Yahweh, el mambul pil dona ati, nun nong nirya ap, kanye noutam ap ara, pia teleb kibuka deipdabirye, Allah el si Yahweh arye nyabukba sekeiamuk yupu dobuka, dongamik yo marikna, el si Peti Perjanjianda, nun nirya arye, aning bobuka bana ara, teleb unamabeʼ tenen, kintinipnamlume. Ara, nun Israel nang arye, si erenyap Allah, nun ni koproba Allah Yahweh, elce yupu nyabukce, keil deice sekekuka arebukba, yo marikna pum tam dongobik ning bobuka, narye amambul ning delina ati, aik akunum kintipse sukumuk, delilbinamlume.
Sik Lewi yala imam-imam nang arye, Allah nyapdeiamukce, keil deice sekuka Musa arebukba, sikce marikna pum tam, el si ara Peti Perjanjian deiamik ning ara, bobanmeka ani, ninye deiyoknye Raja Daud elce, ‘Aning ara teleb sukumak deipnamapʼ tenen, Allah el si erena ati, kintinibuka domuk doltakne tenda aik binuka wekik. Anyaik ara, Allah ap, ninye ap, ansinibuka una ati, domik aik binuka wekikopura, anyaik pum tam deibik. Anyaik noutam boyanuka deibikura, sik imam-imam nang ara, ‘Allah arye nun malye un ning kum daneipnusilʼ tenen, domba ato ning obuka uku dongobik. Tonda, ‘Allah ap, nun Israel nang ap, teleb kibuka neika dukdongobuka, tonok kanye bobuka, epdanuka unamapʼ tenen, teleb arin ning boyanuka Allah ati arebik.
Salomo bira, ninye deiyoknye akunum ulamukce, el amu tam yin talin nang nirya, sik deiyok nang ati, yupu nyabuk. Ara, yin talina deiyok nang, sik amu tam yin nang yupa ara, 1.000 nang ati taleamik nang ap, tonda yin talina deiyok nang, sik amu tam yin nang kong ara, 100 nang ati taleamika deiyok nang ati, yupu nyabuk. Tonda, Israel nang arye, yu upnaba, yupu deice arye walanauk ulamikba, sik yupu lipsisikuka bokolina deiyok nang ap, tonda Israel mutuku noutam ulamik nang ati, deiyok-deiyok nang ap, tonda, Israel nang sik yala daulamik touk, sik ni yapu ap ati, adeiyok nang nirya ati, Salomo birye “Winipnamlume, winipnamlume,” nyapdeiamuk.
Bukni, Allah Yahweh arye, “Aning ara winipnamlume, aning ara pia kum winipnamlume,” nyapdeiamukce, pala keil deice sekuka arebukba, sikce aning dobuka marikna pum deiamik ning ara, ninye deiyoknye Raja Daud birye Yerusalem mutuku noutam cang baju arye doltakna tenda aik kintinibuka deiamukce, amarikna el si ara Peti Perjanjian, Kiryat-Yearim mutuku arye bobukabukce, Yerusalem mutuku tamubuka bobiyukce, atenda aik pum tam deibuk.
Raja Salomo birye, Allah si eren aik akunum dobuka sirya dakdongobukopura, yupu nyapdeibukba, Israel nang sik deiyok-deiyok nang dam ap, Israel yala-yala nang, yuk-yuk aulamik touk bukni, sik deiyok nang nirya ap ati nyalbiyik. Ara, Israel nang yala-yala nirya, sik apu yapu ap, sik ni yapu ap ati, “Yerusalem mutuku dem bulubuka yanamlume. Yamunyeura, minop talak Raja Daud ulamukak, amutuku si ara Sion mutuku, anoutam arye mambul weik ning doprobibyakarye, Yerusalem mutuku boyanuka deipnamabe. Ara, Allah el si Yahweh arye, ‘Aning ara wininamlume, aning ara, pia kum wininamlume. Winipmunyeba, narye anggunti winibuka-winibuka melinamsine,” nyabuka, nyalin yupu deice arye nyapdeiamukce, keil pala deice sekuka areamukba, ninye arye aning dobuka, marikna pum dongobuka deibik. Amarikna si ara, Peti Perjanjian dobuka, boyanuka Yerusalem mutuku deipnamabe. Ayo lakase arye dobik marikna, Peti Perjanjian ara, Daud ulamukak Sion mutuku arye dobibirye, Yerusalem mutuku Allah Yahweh si eren aik boyanuka deipnamabe,” Raja Salomo birye, Israel yala nang, sik wisi nang ap, deiyok-deiyok nang ap ati, nyabuk.
Winibukce, Allah arye, ‘Aning ara wininamlyame,’ nyapdeiamuk yupu bobuka, Allah yupu keil pala bitinye deibuka sekeiamuk ning ara, emas arye domik marikna pum bisik dongobuka, bublan tirikdongobuk. Abublan ara, ‘Allah arye nun malye ning kilipnamsil’ tenen, emas arye memamik ning ati nyapne. Amarikna akunum memebukopura, amarikna erena ati, dana-dana tam cang yo bukni, ayo deice emas deipmek ning ara, ketepdongobukce, erebuka Allah si kitipdongobuka aik, cang kain aik pum tam bobinuka deibuk.
Musa birye, sik aimam nang nirya ati, “Aninguk kintinibuka boyanamalume,” nyapdeibuk ning nirya ara, kekebikce, sik Israel nang nirya ati, laka nyabikura, sik anang-anang nirya arye, ‘Aning-aning bulubuka boyalulume,’ laka nyabik touk, Allah ap, ninye ap ansinilina ati, sapi basam bol arye dolamik tenda aik domika damuk bulubuka yayikce, ‘Asukum ara, nun ni Allah Yahweh arye dinmasilʼ tenen, el dam atonun, bulubuka wekikce, el siuk yanuka erebuka kibik.
ကြော်ငြာတွေ