Daud birye, amutuku sin dinina winiryuk dinipmokba, tonoknye el si Ziba eibuk. Ziba bira, ‘Daud ap epdanamnam’ tenen, asukum unmok. Anye Ziba bira, Mefiboset el pil melinanye ulamuk. Elce boyanmok ning ara, ani. Keledai basam weik boyayuk. Tonda, bona weik libuka, tapu koupdongobukce, akeledai basam deice deipmok ning ara, roti kwaning yupa dua ratus ap, tonda anggur duk sesal semuk ning arye, kue kintinip deibik ning ap, yo duk el si ara kue kintinip deibik ning, yupa weik seratus ap, anggur din mek dikdongobuk ning tonok ton kintinibuk. Aning nirya akunum kintinip deibukabukce, kintinipmoka, akeledai deice deibuka boyayuk.
1 Tawarikh 12:40 - Eipomek40 Aning atouk, sik Isakar yala nang ap, Zebulon yala nang ap, Naftali yala nang ap, meneng dam aulamik nang ara, kam ulul ning, Keledai basam balul deice arye, ayim ning yala-yala nirya kintinibuka deibikce, tapu arye kitibuka, adiparyuk Hebron mutuku boyayik. Tonda, unta basam ap, bagal ap, keledai basam ap, tonda el sapi basam aryuk, tepung atouk ning boyangalamuk. Tonda, Arah yo duk ap, kismis ap, anggur mek ap, minyak Zaitun mek ap, kikliman bobuka yayik. Anang nirya babye, sapi basam ap, domba basam ap obuka, sekekuka deipnarye, dobuka dilamik ning ap ati, sik Israel nang ara, pia kanye delilamik. အခန်းကိုကြည့်ပါ။ |
1 Tawarikh 12:40
14 ပူးပေါင်းရင်းမြစ်များ
Akunum erepdeibikopura, Salomo menekuka banmokba, sik atam nang nirya arye, el dong tam aminyan yanganmekce, pong-pong ana el si suling deice arye, pong-pong anmekba, yuk nang arye, mot teleb nyanmekopura, amutuku nirya ara, weik lelim nyapnin yanganmeka ati, atalak ara, mutuku nirya lelim weik ubuk.
Winibuka ati ara, amutuku noutam ulamik ninye nirya eibikce, weik arye pin-pin asa kanye deibuka aulamik. Ara, min talak amutuku taleamuka deiyok kil, ratu Atalye bira, el aik dam arye, akunum obikopura, aning deice arye, sik Yehuda mutuku noutam ulamik ninye nirya ara, weik kanye deibuka ulamikce, dakeiam asa telebuk ulamik.
Hebron mutuku yayik talak ara, sik ayin talin nang nirya ara, Daud ap neika amutuku noutamakuk unmekce, yin ap, mek ap nirya ara, sik kayapu nang, sik mutuku yuk-yuk ulamik Israel yala nang nirya arye, akunum kintinibuka deiamika ati, mek babye din babye, asukumuk dobuka, neika ulamikce, dilamikce dilamik.
Ninye deiyoknye Raja Daud birye, sik el yin talina deiyok nang nirya, bulubuka deibukce, yupu talibuk. Ayin talin nang ara, ton nang arye deiyok kibuka, sik amu tam yin talen nang yupa weik, 1.000 nang talilamikce, yupu nyalamik. Ton deiyok nang ara, deiyok kibuka, sik amu tam yin talen nang 100 nang talilamikce, yupu nyalamik.
Aning nirya akunum winibikce, aning-aning nirya, Allah ati akunum arebikopura, asum aryuk sik anang nirya arye, anggur mek ap, din ning yuk-yuk ning nirya ap, kanye deibikce din dinmek. Winibikopura, Allah Yahweh el damuk, weik tonun kanye deipmikce, elti, ‘Telebe,’ nyabuka, si erebuka kinmek. Winibikopura, like bitinye ara, asum ara, ‘Daud elce deiamuknye, el mi Salomo bira, el weik sum aniʼ tenen, tonda, ‘Anye bira, nun deiyoknye Raja kipnamsilʼ tenen, lak kina ati, weik sum kintinip deibikce, minyak zaitun mek dobuka, Salomo el kisok deice dikdeibik. Winibika deice arye, ‘Anye Salomo bira, Allah Yahweh el amu tam ulul bukni, weik deiyoknye unamsilʼ tenen, winibik. Tonda, atalak aryuk tonoknye el si Zadok, ‘Allah el si eren aik pum tam pil donamle. Elda, imamnye unamleʼ tenen ati, minyak zaitun mek, el kisok deice dikdeibik.
Dipkoprop ninguk, talibuka unyak ninye arye, pil dopra bakirye, sik winin ning nirya, teleb upra balyopura, amutuku noutamak unyak ninye nirya arye, kanye deibuka unyake. Aning atonun, sik malye ninguk, talibuka unyak ninye dibicopura, sik mutuku neika unyak ninye arye, kanye deibuka unyake. Ara, ‘Naie, nunti malye kililamsuknye bira, merekuka dipmale. Elda akunum kum danmala ati ara, wini talak ara, nunda telebuk upra banamabe,’ tenebikirye, kanye deibuka unamake.
Teleb uk ukirye, talima darapdongobuka pia diksukumuk ulamice ninye arye, ninye deiyok nang ukirye, sik talibuka unamak mutuku ara, diksukumuk ubuka, ninye yupu lipsisikuka bokolinamak talak noutamak nirya ara, sik amu tam unyak ninye nirya arye, kanye deibuka unamake. Bukni, malye winin ninguk talibuka ulamice nang arye, tonok mutuku nirya talibikirye, ninye deiyok nang kibuka unamak talak ara, sik amu tam unamak ninye nirya arye, ‘Se, ikin ning nun damak yanganamsil ning ara, nun like’ tenen, imun kanye bobuka engenamake.
Allah Yahweh arye, na Hosea biti nyapnuke. “An adiparyuk tamubuka bilyame. Bimince talye yolana ati pataliba, teninauk ulul kil, el dam bimince, elti kanye deipmince, akil ara, an kil unamle ati, dopnulyame. Dopnalama deiyok ara, ani. Ara, na Allah Yahweh arye, sik Israel ninye ati, kanye delinun bukni, Israel ninye arye, na yupu moubuka kekena kumce, lik tenebuka bataknikirye, talye ning atibuk, ‘Nun ni usulule,’ nyabuka, Isa Mutuku Dongonye si erenyake. Ati, lak lena ati ara, ance talye-talye yolamak kil dopnulyame,” Allah arye, na Hosea biti nyapnuke.
Anye ayupu yanuka nyabukba, Nabal el kil Abigail, aning akunum kekebukce, ‘Aminyan talakuk winipnune’ tenena kumce, atalak aryuk, roti kwaning yupa weik, dua ratus (200) ap, anggur mek lin ning bitinye ap, domba basam toupdoba pamubarye ap, yakong atonun ning, gandum el ikin ara, tiga puluh liter (30) ap, anggur sesal lemuk ning dobuka, roti tabakuka, dapmok ning seratus (100) ap, tonda mitik din kwarang yo duk atonun arye, telebto ubuka, dalamak din ning, dua ratus ap, aning-aning nirya, adiparyuk kintinibuka deibukce, aning nirya keledai basam balye deice deibuka, bobinuyik ati, kintinip deibuk.
ကြော်ငြာတွေ