Na nio, na dipkoprob nyapkine. Nun tukwak nang nirya ara, aminyan dipnamabe. Winipmanto, nunda mek tukwak deice diksaklirye, balibuk tamubuka, tonam kwebikirye, kum diklamaka atonun upnamsile. Bukni, Allah elce, ‘Anang ton optinye,’ kum tenelule. Aning kum bukni, yatanye do nirya, el dam tuba kum unyak nang, malye winipbikceba, elce yakliba, pera mutuku binuka unyak nang ati ara, elce, ‘Se, yata wiriptinyeba, anang nirya, na dam ton tamubuka yanganamak do?’ tuba tenesulule. Allah el pil dosilya deice arye, anang tamubuka boyangalule. Ati ara, na deiyoknye, ance yaklumba, yuk mutuku biyuknye bira, ‘Tamubuka yalule,’ nyaptumura, el adiparyuk tamubuka, an dam yanamle,” nyabuk.
1 Samuel 7:6 - Eipomek6 Israel ninye nirya, Misba mutuku bulubuka, wekik talak ara, mek kwebuka kintinibikce, Allah el si Yahweh, el si erena ati, tukwak dikdeibik. Tonda asum ara, din dina kumce, bulang asa unmekce, ‘Allah namin kipnamsil’ tenen, sik malye winilamik ning ati, “Kume, nunce nun ni Allah, el si Yahweh yaniptabuka, dipkoprob pia malye winilamupu ning ara, aning ton, aning ton,” nyabuka, laka nyabikce, aning nirya batakik. Israel ninye nirya arye, Allah ati si erenmekce, nyanmek talak ara, Samuel birye, sik yupu lipsisikuka bokolina deiyoknye kina ati, deiyok kibukce, Allah morobuk. အခန်းကိုကြည့်ပါ။ |
1 Samuel 7:6
47 ပူးပေါင်းရင်းမြစ်များ
Winibikiba, an mapu Israel nang arye, ‘Se, nun dipkoprob malye winibupa deice arye, Allah wenepmasilba awenen aik bukmabe’ tenen, sik bidamnye arye tenebikirye, talima noutam arye kel bikikirye wenen aik binuka deiamikce diparyuk, ‘Se nun dipkoprob malye winibupe. Nun ni Allah ati yanibupe. Pia malye-malye ulamupu ning ara, batakabe. Nun ni Allah lyepsilyame,’ nyabuka morobikcopura, ance kekenalam tenen, moropkine.”
Nyabukura, sik weik kel yin talin nang, sik ninye winilye nang arye, yupu tana kumce talye karin arye Pilistin yin talin nang, sik kalikmikbuk, bisibuka biyikce mek kwebuka, duknubuka tamubuka yayik. Amek kwebuka yayikopura, adiparyuk bobuka, Daud dam boyayik. Dobuka yayik bukni, Daud elce amek kum dibuk. Amek adiparyuk Allah Yahweh el arena ap, el si erena ap, bikilina ap ati diklobuk.
Ayupu ara Yosafat kekebukce, ilil ubuk ati, elce, “Allah Yahweh, ance na winipnamne ning ati, Aning winiplyame nyabuka, ance teleb kibuka nyapnilyame,” nyabuka, deiyok koubukce Allah ati morobuk. Yosafat birye, ‘Allah moropnuyapʼ tenen, kintinibuk talak ara, elce taleamukak ulamik nang nirya ati, “Na mutuku noutam ululum nang ati, nun nirya ara, din ning dina kumce, si tebuka bulang bukuka, Allah Yahweh el siuk erebuka ubirye, Yata wiripnuyap do?’ tenen, elti, moropnuyabe,” nyapdeibuk.
Winilamika ati, ance sik mal olan nang ati, mikip sik deice deipnaba, anang arye nun apu yapu yanuka olamik. Obuka sirya daklamikce, Israel nang sik nong deice ikin pil delilamikba, Israel ninye, sik kanye imun ulamukba, “Se, Nun ni Allah, ance melipsilyame,” nyabuka morolamik. Moropnopura, an im deice arye kekebuka kum bataklamlume. Sik ti pia bico tenelamlum ati, Israel nang melina ati, yuk nang deice mikip kipdeipnaba, Israel sik mal olan nang binuka, obuka sirya daklamik. Obuka sirya daklamika deice arye, Israel ninye lyelolamlume. Ara, tonok talak aryuk kume. Atalak-atalak nirya, aning atonun lyelamsulume.
“Atalak ara, na kwitcapu nang koproba arye nati, ‘Kume el Ayub bira, dipkoprob malye weik winilamuka ati, Allah arye wenelule. ‘Aning ara, mereukuka ikin weik ulule’ tenen, yap-yap nyabuka akutubuka, nalininyake. Wininikceba, na asok erebuka, Allah ati, ‘Melipnilyame’, nyabuka, engena deice arye, na asing meka weik sakanilirye, Allah ati pia moronune.
Anyapmana ara, urdem ati kum nyapne. Deiyok ara, winipmanto ning teleb din ning do, yuk teleb un ning do, na dam ton pia kum yanganulule anya arye, kanye imun pia weik unulule. Ati, ‘Se, na kanye imun unulule,’ nyabuka ngalukunune. Tonda, makau arye mek kwebikiba, langdipmalibuk, dikiltaklamak tonun, kanye imun weik unilye ning ati, ngalukunirye, malye nyanune.
Allah arye anye akunum ila tamubuka teleb kipdeiplyeura, anang nirya wekuka kekenmacak aryuk, el anye birye nyapnamle. “Narye teleb ning ara, malye kilamsirye, malye ning ara, ‘Aning telebe,’ nyabuka, talye yupu nyalamsirye, pia malye ulamse. Bukni, Allah elce nati kum wenebuka opnuke. Bico tenepnukce, na malye ulamse ning nirya ara, biknukce winipnuke,” nyabuka, laka nyanamle.
Ati ara, ayupu nyapmanilamba kekepmana deice arye, ‘Na nyalamse yupu ara, dipkoprob malye yupu nyalamse,’ kunum tenepne. Utenepmana ati, ‘Yata deiyok ati nyalamse do?’ tenen, ikin kanye bobuka, alye dakdana anya arye, arup malye nyanmanu ning ara, bataknirye atu dobuka, na kisok deice deipna arye, butbuta deice bukmane. Ara, pia walwal arye nyanmanuba, winira kel kipmana ati ara, na malye ning batakna arye, ikin kanye bobuka abukmane. Ayub birye nyabuk.
Se, na kele. Nun Israel yala nang, nun apu yapu nang, min talak ulamik nang ara, malye weik winilamik touk, nunda atalak unyap Israel nang babye, an yupu yanibibirye, malye winin ning weik wininyabe. Sik minop talak ulamik nang babye, nun atalak unyap Israel yala nang babye, ance, “Aning ara, wininamlume. Aning ara, pia kum wininamlume,” nyapdeiamsulum yupu batakuburye, malye weik winilamupu touk, tuba malye winin ning weik tonun tuba wininyabe.
Allah ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, yuk ninye batakikirye, yanibicopura, na eipnirye weik arye, engenmanye talak ara, na asing maka ara, mek pu dobuka balamle tonun unulule. Yuk ninye arye, an yupu yaninyaka anya arye, engena weik arye engenune. Ara, ‘Se, yata deiyok ati, Allah el nyalye yupu yaniltanyak do?’ tenen, engenune.
“Wini talak lyepnilyame,” nyabuka moropmakina deiyok ara, ani. Nun tukwak nang akunum dibipyopura, aminyan talak tonap nunce anti, pia kum tenenamkiaba ati, nyapne. Diba, ninye akunum diamik nang, tuku pum tam weiamikiba, unyakak ara, yupu nyana kumce, pia tunim abuka unyaka ati, an si tonap kum erepkitinge.
Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.
Tonda nyanyake. “Se, nunce Allah anti, akunum balye tam kiyamkupu. Bukni, nun amalye winilamupu ning ara, ‘Yata deiyok ati, nun ni koprop Allah batakamuburye, amalye ning winilamupu do?’ tenenyabe. Ara, nun malye winilamupu ning kel biksulumce, wenepsulum ati, Allah ance wenepsulum deice arye, kel bikupu. Winibupurye, ‘Diba, nunda weik malye ulamupu nang’ tenen, an amu tam unyabe. Adeice arye, nun kam ulamupu talak, malye winilamupu ning ati, ilil upsiliba, alye dakaldanyabe.” Israel ninye arye, nyakiba kekenune. Allah arye nyabuk.
Sik nirya daunmeka ani, Raja Yosia el mi, Yoyakin amutuku ninye deiyok kibuka taleamukba, keting tamun pamubarye noutamak, wala sembilan akunum kibukura, amutuku noutamak ulamik ninye arye nyabik. “Kume, nun ni koprop Allah, el si erena ati, din dina kumce, dina bulunguk ubirye, Yerusalem mutuku binuka bulubipyopura, Allah el si erenamabe,” nyabik. Nyabika ati, sik Yerusalem mutuku asik noutamak ulamik ninye ap, Yehuda mutuku noutamak asik yuk-yuk dobuka ulamik ninye ap, sik nirya bulubuka yayik. Ara, Yerusalem mutuku noutamak bukni, Allah el si eren aik dam bululyayik.
Na patapnil ning ara, ani. ‘Na kisok noutam ara, mek weik deibuka langdiptua deice arye, na asing maka mek durupna deibikiba, balamle touk kipnutueʼ tenen, patapnile. Aning atonun, ‘Na asing maka, mek pu dobuka balamle atonun kipnutuba, pia engeptinyeba, na asing maka pia saktueʼ tenen, patapnile. Winiptopura, lukunyan talak babye, keting noutam talak babye nirya, malye kanye bobuka, engena dem uptinye. Ara talye ati kum engenune. Bukni, nun olana nang ara, yuk mutuku yu nang arye, na mutuku nang yupa weik akunum obuka, sirya dakaca ati engenune.
Na Yeremia bira, kum batakanune. Tuba-tuba engenauk unune, na asing nenulule. Na talima uk dinilyeba, na talima dakalsanulule. Na mikip pia kum upnuke. Winipmanto, na talima ara, sekuka tukwak saklamle touk upnuke. Ara, talye ati kume. Deiyok ara, na mutuku nang nirya kum kibuka atia. Tonda, nun din ning kum ubsuka deice arye, nun mapu ap, mitik mapu nirya ap ara, sik mikip kum uplyeba, Yerusalem mutuku bisikak dipmanto unyakce, bobinuka sakanyake.
Min talak, nunda eren nang atonun ulamupubuk, nun mutuku ulamik nang arye, nunti si erelilamsikce, si erebuka kina ati, urasin teleb ning, nun kisok deice delilamsik. Bukni wini talak ara, nun babye malye una menenga arye, aning sakukba, nun dam ikin ning yayukba doprobupu. Ati, sikce nunti, kum si eresinyake. Akunum bataksike.
Ati, Yeheskiel anda, ninye koproba aryuk, deipkiknye aryuk, sik malye-malye weik winilamik ning ati, wenen yupu nyapmince, ‘Allah arye weik tonun wenebuka opnamsilca!’ nyabuka, sikti, laka nyapnulyame. Ara, min talak narye, ‘Aning ara, pia kum wininamlume. Awinin ning ara, pia meme,’ nyapdeipse bukni, Israel nang nirya, anggun apu yapu koproba arye, aninguk pia malye weik winilamik ning ara, ance ton ap tabakukapmince, sik kekena ati, moubuka lak nyapdeipnulyame.
Allah Yahweh arye, nabi Hosea biti, laka nyapdeibukba, sekuk. Allah arye nyabuk. “Na nyapsin yupu ara, moubuka kekeplulume. Se, anggun Allah el si eren aik pum tam pil dona deiyok nang, imam-imam nang nirya ap, Yakub birye deiamukba, dadeipdanin balulum nang, anggun Israel yala ninye deiyok talibuka, weik ululum nang nirya ara, aning moubuka kekepmunce, wininamlulume. Tonda, anggun ninye deiyoknye Raja, el mapu silip nirya ara, amul kunukulongona meme, anggun babye moubuka kekeplulume. Amol pakuka kekena telebe! Anggunce Israel ninye ati, ‘Mispa mutuku welebuka bibirye, talye ning isa si erebipyopura, ikin kum unamsile. Ilil tenena kume,’ nyalamlumba, sik Israel ninye kekelamikce, anggun nirya arye, Mispa mutuku ap, Tabor mutuku ap welebuka, isa si erelamlum talak ara, pia malye weik winilamlume. Winipmanto ara, wena webikibuk youlamle touk winipsuke. Aning atonun winipmanto ara, ‘Mekin pum tam ulul bal, el si ikan weklirye youpnamle’ tenen, weik aling el si ara, jaring delilamak touk, anggun imam nang arye Israel ninye ati, mek pum bal ikan yulamle tapu atonun, akunum winiplume. Ara, anggunce deiyok koubuka malye winilamumba, Israel ninye nirya babye, isa si erenyaka ati nyapsine. Amalye winilamik ning deiyok ara, anggun imam-imam nang aryuk, malye winin ning deiyok kouamluma ati nyapsine.
Allah Yahweh arye, “Yehuda tam unyak ninye, weik arye wenepnamne,” nyabuk bukni, ayupu nyabuk talak ara, nyabuk. “Anggun malye winilulum ning nirya, batakmumce, anggun kanye talima nirya, na deiceuk deipmunce, ‘Se nunda malye winilamupu ninye’ tenen, din dina kum arye, si tebuka umunce, nati ngalukuka engepnumunce, moropnumunyopura, kekepsinirye, lyepropnamsine,” nyabuk. Nyabukce ayupu ton nyabuk.
Allah arye Musa biti nyabuk. Wini talak anyapnusin yupu nirya ara, pia, adiparyuk wininamlulume. Apil nirya kum bataknamlulume. Ara, wala tekbarye ning, awala noutam like tagu barye sum (tanggal 10) deice arye outam sum, akunum uplyopura, anggun kanye nimalyap asa ubuka, Allah el amu tam umunce, din dina kum, pil babye ton dona kume. Awininamlum ning ara, anggun Israel ninye koproba babye, anggun dam tikilyangan nang babye, sik yuk mutuku ninye bukni, anggun neika umunye nang babye, anggun nirya ati nyapsine,” Allah arye nyabuk.
Ura, anggun malye-malyeuk ulamlum ara, arup nyapmakin ning atonun, ikin ning weik, anggun wenena ati wininamsine. Winibuka wenepsinyeura, daulamunya ani, doyanamle talak aning nirya tamubuka, tonap moubuka tenenalume. Ara, sik punun deiyok nang, sik minop talak ulamik nang arye, malye winilamik ning ap, sik anang arye delilamikce, dadeipdanin yangalamik nang ap arye, malye winilamik ning ap, ura, anggun anoutam talak babye, malye wininmalum ning ap ati, ‘Se, nun nirya ara, dipkoprob pia malye weik tonun winilamupu ati, wini talak ara, nun ni koproba Allah bikeipsilirye, nun malye winin ning nirya kum kipdeipsutue,’ tenenamlume. Tonda, aning atonun tenelamlum ning ara, anggunce na yupu yanibuka, mandipna kanye deibuka ulamlum ning ap, anggunce, ‘Kume, Allah ara, nun like,’ tenelamlum ning ap nirya ara, lak sukum arye laka nyanamlume. Aning nirya, tamubuka tenebuka bikinamlume.
Israel nang ara, pia malye kanye bobuka ulamik ati, sikce Allah Yahweh ati nyabik. “Se, nun ni Allah, anti ton pia malye wininmabe. Deiyok ara, nunce an tonok ati, an si kum erekinyapce, an dam arye batakuka biburye, talye ning isa Bahal, ayala isa-isa ati, si eremyaba deice arye, nun akunum malye ulilanyabe,” nyabuka morobik.
Nyabuka wenebukura, sik Israel nang arye tamubuka, Allah Yahweh ati nyabik. “Diba nyapmasilame. Nun ni Allah, an dam arye nunda akunum malye ubupe. Ati, Allah Yahweh, ance nun wenena ati ara, ‘Sik anang deice ara, aning winipnamane,’ tenepsiminye ninguk, ikin weik dauplye babye, aninguk wininamsilyame. Bukni, pia tuba moropkiyap ning ara, asum aryuk, sik ikin ning delisinyak nang talisinyak noutam ara, melibuka lyepsutume, na nie,” nyabuka morobik.
Benyamin yala nang arye, Israel yala nang weik tonun obikopura, sik tuba kam unmek Israel yala nang nirya ara, tamubuka Betel mutuku biyik. Biyikopura, sik ni koproba Allah Yahweh, el dam binuka, bukikce engebik. Amutuku noutam unmek talak ara, sik Israel nang nirya, din dina kumce, ‘Allah el siuk erepnmapʼ tenen, si tebuka unmek bukni, lukunyan akunum kibuk. Tonda, ‘Ninye ap, Allah ap, teleb kibuka neika utibyeʼ tenen, ‘Mining dam epdatibyeʼ tenena ap ati, kambing ato ning obikce, yanuka Allah Yahweh ati arebik. Tonda, ‘Nun malye unyap ning, namin kipsuturye, teleb kipdeipsutuʼ tenen, domba ato ning opnarye, Allah arena ati, aning dobuka el damuk u dongolyangalamik.
Otniel bira, Allah el Pia Teleb, Lek Dip Kanye, arye mikip weik arebukopura, adeice arye Otniel melibukba, Israel nang sik deiyoknye kibuk. Kibuk talak ara, yuk mutuku nang mal olalbana ati, elce deiyok kibukba, Mesopotamia mutuku ulamik nang olbiyik. Amal olalbiyik talak ara, Allah Yahweh arye, el deice mikip arebukba, sik Israel nang arye Mesopotamia nang, sik deiyoknye, el si Kusyan-Risyataim, obuka sirya dakikce, anye amutuku min arye taleamuk ara, Otniel biryuk talibuk.
Winibikba, anggun apu yapu arye, tamubuka, sik ni koproba, Yahweh ati, “Nun ni, nun an dam pia malye wininyabe,” nyabuka morolamik. “Nunda an batakuka, amutuku nang si erenyak Isa Mutuku Dongonye sik si Bahal ap, Asitoret ap, talibuka si erelamupe. Winilamupu bukni, wini talak nun mal olan nang arye, talipnusiyaka ati, ance lyepdopsiminyopura, an tamuk tamubuka yabirye, an tonok talibuka ubirye, an siuk erenamkiyabe,” nyabuka morolamik.
ကြော်ငြာတွေ