1 Samuel 6:17 - Eipomek

¹⁷ Aning akunum winibik deice, sik Pilistin nang malye ulamik ning ara, Allah Yahweh, elce pamubarye mutuku nirya ulamikce, sik pamubarye ninye deiyok nang, Raja Pilistin mutuku ulamik nang nirya, sik wenena ati, kanye imun weik suse areamuk ning ap, kub mana weik areamuk ning ap, ‘Kum daneipnamsilʼ tenen, Allah ati arebik. Ara, sik malye ulamik ning ap, malye yupu nyalamik ning ap ara, ‘Allah arye, tuba wenepsilyakʼ tenen ati, aning nirya arebik ara, ‘Tonap tamubuka telebuk uptibyeʼ tenen ati, Allah ati arebik. Aninye deiyok nang winilamik touk, emas arye, puturubuka deibik suse urasin atonun, puturubuka deibik ning ara, ani. Sik pamubarye mutuku nirya awamuk touk, emas ton puturubuka arebik. Amutuku si ara, Asdad mutuku ap, Gasa mutuku ap, Askelon mutuku ap, Kat mutuku ap, tonda Ekron mutuku ap, sik malye ulamik ning dekna ap, pununa ap ati, emas ton arebik.

1 Samuel 6:17 ပူးပေါင်းရင်းမြစ်များ

2 Samuel 1:20

“Ayupu ara, Kat mutuku ninye ap, Askelon mutuku unyak ninye nirya ap ati, kum nyalbinamlume. Nyapmunba kekebikcopura, sik kanye deipnamak tenena atie. Ara, sik den mouse bol kum sekenyak nang, Pilistin nang nirya ap, sik kilmapu ap, kanye deipnamak tenen atie,” nyabuk.

2 Samuel 21:22

Ninye deiyoknye, Raja Daud ap, el mapu yin talin nang nirya ap arye, sik nong weik cang ap, mikip weik ap ulamik nang, raksasa yala nang arye deiamik nang, dumbarye nang obik. Adumbarye obik nang nirya ara, sikda raksasa nyalamik nang ati, ayala nang danyapce deibikba, deipdanin yangalamika, Kat mutuku yanuka ulamik nang obik.

2 Raja-Raja 1:2

Tonok sum ara, ninye deiyoknye, Ahab punyamuknye, Israel yala ninye talibuka ulamuka, sik deiyoknye Raja Ahasia bira, el mutuku koproba, Samaria mutuku noutam, el ulamuk aik, alip aik unmokbuk, anyaik amsuna yo lyuamuka arye, el amsuna yo daksakukce, eitam arye sakuk. Sakukce, el obuk dila ara, kanye imun weik ning kibuk. Winibuka ati, Raja Ahasia birye, ninye wibuka dopdeibukba, sik amutuku noutam arye, si erelamik isa, Bahal-Zebub, el si erelamik aik sukum ati, asilbiyik. Ara, Pilistin mutuku noutam bukni, Ekron mutuku noutam arye, Bahal isa si sibuka, si erelamik isa ati, “Se nun ninye deiyoknye Raja Ahasia bira, kam buknamle do, kum do?” nyabuka, asilbiyik.

2 Tawarikh 26:6

Uzia birye, Pilistin yala nang mutuku binuka obuka kum danaibuk talak ara, sik Pilistin nang arye weik asik dolamikce, kat keil arye cang weik poka dobuka ulamik mutuku ara, malye kibikce, amutuku-amutuku nirya antanap dongobuka domik keil poka nirya, ulubuka batakuk. Ara, Kat mutuku weik asik ap, Yabne mutuku weik asik ap, Asdod mutuku weik asik dam, ap nirya ara, dakuka batakuk. Akunum uluplobikura, elce Asdod mutuku tam ara, sik asik dam, winiryuk weik asik dobukce, cang keil poka ton dobuka antapdongobuk. Tonda aning atouk, Pilistin yala nang ulamik mutuku yuk tam babye, asik dobukce, cang keil poka dobuka antapdongobuk.

Yeremia 25:20

Tonda, Us mutuku Raja kibuka, taleamik ninye deiyok nang nirya ap, Pilistin mutuku noutam, weik asik dobuka, unyak nang ati, talinyak Raja-Raja nang nirya, ara, Askelon mutuku ap, Gasa mutuku ap, Ekron mutuku ap, tonda, Asdod mutuku tuba unyak nang nirya ap,

Imamat 5:7

Bukni winipmanto, amalye upmalinye bira, pia talye kan-kan nye ulirye, el domba basam do, kambing basam do, dipkoprob kum uplya ati, kum deklyopura, aning ara, pia kumnye bira, el anye malye winipmalye ning kum danalina ati, pununa ning bobuka, arelyangana ati ara, yalma maka bitinye bobuka arena telebe. Akumopura, tekukur maka bitinye arena babye, telebe. Ara, ayala maka bitinye tomobukaplirye, bobuka el malye winin ning kilina ati, Allah Yahweh ati, arelyanganamlule. Ara, tonok ning ara, imamnye elcuk, ‘Aning ara, el malye winibuk ning kilina ati, kintinipneʼ tenen, minopce Allah ati arepnamlule. Aning atouk, ton ning ara obuka, mesba deice uku dongopnamlule.

Amos 1:6

Allah el si Yahweh arye, ayupu ton nyabuk. “Sik Gasa mutuku ninye arye, tup-tupa weik arye malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiamsirye adiparyuk wenebuka kum omse bukni, wini talak ara, sik malye winin ning weik, wininyaka ati, aninye wenebuka opnamne. Aninye ati opnamne ning ara, pia dipkoprob kum bataknamne. Deiyok ara, sik Gasa ninye ara, ‘Naʼ tenen, ninye, sirya obikce, tapu koubuka boyanamikce, bobuka yuk ninye dam, uang yo bok deklamik. Abobinamik nang ara, sik Edom mutuku nang ati, ‘Anang obuka, sirya dakupurye boyapu nang ara, deksululume,’ nyabikba, Edom mutuku ninye arye, ‘Naʼ tenen, ninye ati, deklamik. Akunum Edom mutuku nang arye dekikopura, sik pil dona ati bobuka, sik mutuku bobinamika ati, sik Pilistin yala ninye nirya wenebuka opnamne.

Amos 6:2

Ayupu ara, urdem ati kum nyapsine. Anggunce, ‘Ikin ning nun dam kum yanamsile,’ tenelulum bukni, moubuka tenenamlulume. ‘Aminyan talak ara, yata ikin ning yanamsil do?’ tenebuka, kel bikna ati, anggun min pola mutuku si, Kalne mutuku dilbilulume. Amutuku dipdemunyopura, abisikuk banmamunya ani, bimunce, weik asik dolamik mutuku, el si ara, Hamat mutuku binuka eipnamlulume. Winipmunce, anirye Pilistin ninye unyak mutuku noutam ara, mutuku si Kat mutuku ton, dilbinamlulume. Amutuku-amutuku ulamik ninye nirya ara, Allah wenebukce, obuka sirya daklamuk. Winilamuk bukni, anggunce yata ning tenelulum do? Anggunce tenemumnya ara, ‘Kume, Kalne mutuku ap, weik kota mutuku el si ara, Hamat mutuku ap, Pilistin ninye sik weik kota mutuku, el si ara Kat mutuku ap ara, amutuku noutam ulamik ninye nirya ara, malye ninye ulamik bukni, nunuk ara, teleb ninye unyabe,’ tenelulume. Tonda, anggunce, ‘Kume, sik yuk mutuku ulamik nang ara, sik mutuku ara, mitik pala mutuku uk taleamik bukni, nun mutuku ara, pia lo weik pala mutuku talinyaba anya arye, nun mutuku ara, min kum kum dasutue,’ teneluluma arye, talye kanye bolulum do? Narye dipkoprob nyapsine. Allah arye kum daneiamuk ninye ara, malye winilamik touk, anggun Israel ninye babye, malyeuk winilulume. Allah arye amutuku-amutuku ulamik ninye nirya, kum daneiamuk ning ara, moubuka tenenamlulume. Anggun babye, atonun winipnamsile.

Ulangan 28:27

Tonda, Allah Yahweh arye, minop talak Mesir mutuku nang, sik wenena ati, sik nong deice areamukba, torok moulamuk atonun, anggun babye atouk winipnamsile. Tonda, anggun nong bola deice ara, pukle korodoma aryuk amupnamsile. Atouk tonda, nong bola deice nirya ara, kice uk arepnamsile. Winipnamsil talak ara, akorodoma kwetelina ati, obat ton dinamluma babye, pia kum lopnamsile.

Hakim-Hakim 1:18

Tonda, Yehuda yala nang arye, weik asik dolamikak ara, weik tonun alubuka doprobik. Ara, Gasa mutuku ap, Askelon mutuku ap, Ekron mutuku ap, tonda amutuku noutam ulamik ninye ap, amutuku tam mitik-mitik asik dobuka ulamikce, awamuk ning nirya ara, obuka sirya dakikce, amutuku ton alubuka doprobik.

Hakim-Hakim 14:19

Nyabuk talak uk, talye karin arye Allah el Dib Kanye mikip weik Simson talimak wekukba, adiparyuk Pilistin nang mutuku noutam bukni, mining dam mutuku Askelon mutuku biyukce, ninye yupa winilye tiga puluh (30) nang binuka obuk. Obukopura, sik taleamik ning nirya doprobukce, sik teleb baju ongolamik ning nirya dalubuka doprobuk. Doprobukce, tuba tamubuka Timna mutuku yayukce, asum oplopmok nang baju dopropmok ning ara, Timna nang yupa winilye 30 nang ati arebuk. Ara, elce yupu domon nyapmok ning deiyok laka nyabik nang ati arebuk. Arebukba, yu weik ubuk. Yu ubuk ning ara, uku buk dilamle touk unmokba, el dobuk kil asukumuk batakukce, el li asik ap, tonda el mutuku koproba tamubuka biyuk.

Hakim-Hakim 16:1

Tonok talak ara, Simson birye Pilistin ninye tam noutamak bukni, mutuku si Gasa mutuku biyuk. Gasa mutuku ara, Pilistin ninye sik tam noutamak uamuk. Amutuku noutamak ara, talye-talye yolamik kil ton eibukce, aminyan sik eipdarikce, el ap neika mabuka daunmarik.

Hakim-Hakim 16:21

Winibikopura, Pilistin nang arye talipdongobukabikce, Simson el asing duk kotokuka lukdobik. Winibikopura, bopdakuka Gasa mutuku bobiyik. Bobiyikopura, weik kat ning tembaga rantai tapu bitinye kirikuka, tapu koubuka wenena aik pum bisik dongobikce, pil dilamik. Apil ara, gandum duk teikna pil diamikba, apiluk weik dolamuk.

1 Samuel 5:1

Pilistin nang arye, Allah el nyalin yupu dongobuka deiamik marikna, el si ara Peti Perjanjian, Haezer mutuku arye alubuka doprobikce, sik mutuku koproba Asdod mutuku binuka deibik.

1 Samuel 5:10

Aning akunum winibukopura, Gad mutuku ulamik ninye arye, ikin kanye bolamikce, Allah nyalilamuk yupu dongamik marikna dobuka, Pilistin mutuku buk, yuk pera mutuku ton, el si Ekron mutuku delilbiyik. Allah el nyalilamuk yupu dongamik marikna, Peti Perjanjian, Ekron mutuku delilbiyik talak ara, amutuku asik dam wekelbanuyik ati, sik Ekron mutuku ulamik ninye nirya arye, weik malye yupu nyabuka ngaluklamikce, nyalamik yupu ara, ani. “Se, Allah arye, sik Israel ninye ati, moulin yupu areamukba, Peti Perjanjian pum libik ning ara, nun dam boyanmasuluma ara, yata ati do? Nun amutuku noutamak unyap ninye nirya, opnamsiaka ati, aning nun dam benelyanganmasulum do?” nyabik.

1 Samuel 5:8

Ati ara, sik amutuku ulamik deiyok nang nirya arye, Pilistin mutuku atam-atam nirya, sik ninye deiyok kibuka taleamik nang, sik Raja pamubarye nang ati, yukubikba bulubuka yayik. Sik Pilistin mutuku noutamak pamubarye ninye deiyok Raja nang nirya ati, akilisal arye asipdeyik. Asipdeyik yupu ara, ani. “Israel ninye arye, si erenyak Allah arye nyapdeiamuk nyalin yupu deibik Peti Perjanjian ati, nunce yata wiripnamap do?” nyabuka asipdeyik. Asipdeiyikbuk, sik ninye deiyok Raja nang arye nyabik. “Israel kili sal, sik ni Allah arye nyalilamukba, ayupu dobuka amarikna pum bisik deibik ning ara, sik isa si eren aik noutam arye, dobukapmunce, takupdakuka, Gad mutuku delilbilulume. Ara, Pilistin mutuku bukni, yuk pera mutuku ton, amutuku si ara, Gad mutuku takupdakuka delilbilulume,” nyabik.

1 Samuel 6:4

Nyabikba, sik Pilistin deiyok nang arye, tuba tamubuka, “Nun malye unyap ning, kum daneibuka teleb kilina ati, nunce Allah elti, yata deken ning areptibye do” nyabuka, sik Pilistin deiyok nang arye asipdeiyik. Nyabikba, sik imam-imam nang arye, tamubuka nyabik, “Nun ap, nun pamubarye ninye deiyok nang ap, kanye imun weik suse dilamsuk touk, aning urasin atonun ubuka, dekena weik ning, emas arye puturubuka deipnamlume. Winipmunce, pamubarye weik torok atonun suse, weik tonun nelamle ning ap, tonda kub mana urasin atonun ubuka, pamubarye ap, kat ning emas arye puturubuka deipnamlume. Deiyok ara, anggun ninye deiyok kibuka, ululum nang nirya ap, anggun talye Pilistin mutuku noutam daumunye ninye ap, anggun deice, aning weik awamuka anya arye, aning urasin atonun puturubuka bobinamlume. Allah arye ikin ning, sik nong deice deibuk ning ara, suse weik tonun nelamukce, bukuka dilamuk ning ap, kub mana weik ton ap areamuk. Ati, kat ning emas arye, aning urasin atonun ubuka puturupdeimunce, Allah yukuna ati, bobinuka arepnamlume,” nyabik.