1 Samuel 31:4 - Eipomek

⁴ Dipna dam ubuka ati, Saul birye, el mapu yin talinanye, el ninye olan ning bobana ati, melibuka balamuknye, tonok ati nyabuk. “Wini talak ara, an bopmalam parang ya arye, dobuka lukdongobuka, opnilyame. Kum opniminyeura, sik Pilistin yala nang, pia malye unyakce, den bol mouse kum sekenyak yala nang arye, opnicake. Sikce opnicopura, na nong dobuka, arikal dolamaka atonun, winipnicake. Tonda, ‘Na nong dobuka, pia malye kipdeipnicak,’ tenepne. Aning ara, pia malye ati, nun babye nun yalanye, ancuk an parang ya dobuka, opnilyame,” nyabuka morobuk. Nyabuka morobuk bukni, el melinanye, ilil weik ubuka ati, Saul kum obuk. Tonda, anye birye, Saul biti, weik arye si erebukce, ‘Na ni kum optinye,’ tenebuk. Winibukba, Saul el bidamang aniryuk, cang parang ya dobuka, tukwak ikdeibukce, itam arye sakuka, lumupdayukba dibuk.

1 Samuel 31:4 ပူးပေါင်းရင်းမြစ်များ

2 Samuel 1:1

Saul akunum dibukopura, Daud birye Amalek mutuku nang, obuka kum danaibukce, tamubuka Ziklak mutuku dam yanuka, like bitinye mabuk.

2 Samuel 1:14

Nyabukopura, Daud birye, awelnye biti nyabuk, “An taruk arye erebuka, Allah arye, ‘Naʼ tenen nang, Israel nang talipnamle’ tenen, minop talak arye wipdeiamuknye, Saul obuka bataklumnye bira, yata ati do? Anda ilil kum asa aryuk, talye kanye bobuka Saul oplum do?” nyabuk.

2 Samuel 1:20

“Ayupu ara, Kat mutuku ninye ap, Askelon mutuku unyak ninye nirya ap ati, kum nyalbinamlume. Nyapmunba kekebikcopura, sik kanye deipnamak tenena atie. Ara, sik den mouse bol kum sekenyak nang, Pilistin nang nirya ap, sik kilmapu ap, kanye deipnamak tenen atie,” nyabuk.

2 Samuel 1:6

Ayupu boyanmoknye, kamnye birye, Daud biti nyabuk. “Na dipkoprob Gilboa mutuku deice unmanurye dimanubuk, sik Pilistin mutuku yin nang arye, ‘Saul opnuyap’ tenen, kereta basam balye deice bukuka, bikbik abuka yanguba, Saul bira, minopce bindopman kum upua ati, el ninye on kama taice ketebuk ning, talibuka tekmoba eipmanue.

2 Samuel 17:23

Winibikba, sikti, ‘Winipnamrurume,’ nyananye, Ahitofel bikukopura, ‘Sik ti yupu nyapdeipmase ning ara, kum kekepmanike,’ tenebukce, el keledai basam deice bukukce, el mapu silip, sik ulamik aikuk biyuk. Biyukopura, el winilamuk ning nirya ap, el mapu ap, kilapu ap ati, “Na taleamse ning ara, anya akunum kintinibuka deipne,” nyabuk. Adiparyuk, tapu yupdanuka opdayukba, akunum dibukba, sikce el nong dobukabikce, el li koproba weiamikak binuka, el nong weibik.

2 Samuel 21:12

Nyabikura, Raja Daud kekebukce, adiparyuk bikbik abuka, minop talak weiamik nang, Saul el yoka ap, Yonatan el yoka ap, Yabesh mutuku bukni, Gilead mutuku nang ulamik sukum binuka dolbiyuk. (Sik anang arye, ayoka nirya ara, Bet-San asikak, amutuku noutam arye, akunum ubula dopromik. Ara, sik Pilistin nang arye, Gilboa mutuku dup arye, Raja Saul obikce, el nong ap, Yonatan el nong ap, dirilkwetelyanamik sukum ara, Gilboa mutuku dup, Raja Saul akunum obuka, sirya dakik. Obuka sirya dakik arye, sik nong dobuka, amutuku Bet-San asik noutam deiplobik.) Daud birye, ayoka nirya anyak arye doprobuk.

1 Raja-Raja 16:18

Warikil biyikba, Zimri eibukce, ‘Se, na unye mutuku nirya warikuka olyanmasiyake,’ tenebukce, ilil ubukba, el ninye deiyoknye aik pum tam biyukce, ‘Anyaik nirya uku dipnul’ tenen, elcuk uku dongobuk. Uku dongobukba, anyaik pum tam ara, yuk nang kum binmantoak wekuk. Winibuk talak ara, anyaik nirya uku dinmokce, el nong babye, uku dibukba dibuk.

1 Raja-Raja 16:27

Ura, ninye deiyoknye Raja Omri, Israel ninye talibuka ulamuk talak noutam winilamuk ning nirya ap, el pil dolamuk ning ap ara, Israel ninye sik buku noutam sekuka deibik. Abuku ara, sik ninye deiyok nang winilamik ning nirya sekuka deiamik buku ati nyapne.

1 Tawarikh 10:4

Winimikura, Saul dipmanto upmok bukni, ninye olan ati, el melibuka ikin ning ap, el yin ap talibuka balamuk welnye biti nyabuk. “An ninye ona ati bopmalam parang ya arye dopmince, adiparyuk lukuka opnilyame. Pilistin nang ara, Allah el si walwal nang unyak ati, sik den bam bola deice tam ning kum sekenyake. Ati, Allah el dam yanmanto kum nang unyake. Tonda, sik amalye weik unyak nang arye, na ati, ‘Elda talinyeʼ tenen, nati malye kipnikirye, opnamniyake. Winipnikcak ati, parang ya dopmince, adiparyuk lukuka opnilyame,” nyabuka morobuk. Nyabuka morobu bukni, awelnye bira, ilil pia weik ubuka ati, Saul kum lukuka obuk. Awel nye, el weik ilil ubukba batakuk. Winibukopura, Saul el mining liamuk yu weik parang ya dobuka ikupce, aya si deice poulbiyukba, adiparyuk lukdanuka opdayukce, dibuk.

Hakim-Hakim 14:3

Nyabuk bukni, el lin ap, el li ap arye nyapdik, “Yata ati an Timna mutuku binmomce, Pilistin yala kil eibuka, ‘Akil anyuk dolbinurume,’ nyapmasilam do? Aninye ara, Allah arye, ‘Den bam bol mouse sekenamlulume,’ nyapdeiamsuk ning ara, sik kum wininyake. Tonda, anang ara, Allah arye, ‘Wininamlulume,’ nyapdeiamsuk yupu ara, sik Pilistin ninye ara kum kekenyake. Sikda, nun yala nang kume. Nun yala ninye noutamak ara, urasin teleb kil tonok babye ton kum unyaka ati, ‘Kum doptinye,’ tenepmalamce, nyapmalam do? Tonda, nun Israel ninye noutamak teleb kil tonok babye ton kum unyaka ati nyapmalam do? Tonok kil babye kum upliba, kum doproptum do?” nyabuka weneprik. Nyaprik bukni, Simson birye tamubuka el li koproba ati, “Kume, ‘Akil ara na doptinye’ tenen, pia se tenenuna ati, morolbimince, nati boyanamnilyame, na nio,” nyabuk.

Hakim-Hakim 9:54

Winibuk ati, Abimelek birye, el yin talinanye kamnye tonok ati nyabuk. “Se amio, minopce yalyame,” nyabuka, yupu weik arye yukubuk. Tonda nyabuk, ‘An ninye on parang talipmalam ya aryuk, boyanuka luknimince opnilyame. Deiyok ara, yuk nang arye, na Abimelek biti, ‘El anye bira, talye kil arye obuke,’ nyabuka nalipnikcake. Aning ara, na pia like,” nyabuk. Nyabuka morobukba, ayin talinanye kamnye birye, lukuka obukba, dibuk.

1 Samuel 14:6

Yonatan birye akamnye, el yin melibuka bobanmok kamnye biti, nyabuk, “An adiparyuk minop yaminba, nun neika binimirye, Allah el si kum bikikce, kum erenyak nang, sik Pilistin nang arye, sik kalikina ati, yaka kin asik dobuka yan unyaka dam binuname. Binimnyopura, nun ni Allah Yahweh, elce nunti melipsilirye, ninye obuka, sirya dakan ning, nun deice deipnamsile. Melipsilyopura, Allah elce, sik Pilistin nang dobuka, nun taruk deice deipsiliba, sik anang nirya opnuname. Ara, ninye mitik tonun do, weik tonun do, kum teneipnuname. Allah el mikip deice arye, ninye weik aunyaka babye, ‘Opnirye sirya daknamne,’ teneplyopura, akunuma elce olule. Ati, elce melipsilya deice, obinimirye binuka, anang nirya obuka, sirya daknuname,” Yonatan birye, el melipmok kamnye biti nyabuk.

1 Samuel 17:26

Ura, Daud birye, asum sik dam tikilbiyukce, sik dam atikilyanmek nang ati asipdeyuk. “Se, sik Pilistin nang ara, pia teleb ning ton kum wininyake. Allah arye, ‘Aning ara, wininamlume, aning ara, pia kum wininamlume,’ nyapsuk yupu, pia kum kekekirye, Allah arye nyapdeipsuk touk, sik mapu den bam bola deice tam, kum sekenyaka anya arye, Allah dam kum bitinge. Nun ni Allah ara, pia kamuk ululnye binya arye, yata deiyok ati, amalye ning Goliat bira, nun si erenyap Allah ap, elce wipdeiamsuk ninye ap atibuk, ngalukuka nyalirye, malye kibuka, malye yupu nyapsutu do? Aning ara, pia malye ulule,” nyabuk. Nyabukopura, Daud birye atikmok yin telenanye tonok ati, asipdeyuk. “Raja Saul birye, Pilistin nang oplinye biti, yata dengna arepnamle do? Tonda, anye birye, Israel ninye ati, ‘Likʼ tenen, yupu nyamuk ning ara, anye opmalya deice arye, malye nyasulul yupu kilipnamle. Ati, Goliat oplinye doproptu dengna ara, nun ninye deiyoknye, Raja Saul birye, yata ning arepnamle do?” nyabuka asipdeyuk.

1 Samuel 17:36

Ati ara, na an pil melinanye birye, bai ulamle kam do, weik yu kuse do, yuk yu ning do, naryuk aning nirya onune. Ati, anye Goliat bira, talye bai tam, yu ning oltakalamse atonun oploptinye. Elda, Pilistinye anya arye, sik den bam bol kum sekenyak nang ara, talye nang ati ara, elti, oploptinye. Deiyok ara, ani. Ara, elce aning-aning nirya, deice tam ulul Allah, Kam Una Deiyoknye ulirye, Israel sik yin talin nang nirya wiamukce, kalikuka melilule. Bukni, Goliat birye, Allah el ‘Naʼ tenen, ninye ati, malye yupu tanmalce, Israel yin talin nang ati, ‘Obuka, sirya daknamne’ tenen, yanmala ati ara, Allah melipnilaba, anye oploptinye.

1 Samuel 26:10

Nuncuk kum opnuname. Allah Yahweh, kam pia ululnye, el si deice arye, dipkoprob nyapkine. Na kele, yuk talak ara, Allah elcuk, ‘Wini talak Saul opnune,’ teneplyopura, opnamlarya. Aning kumopura, narye, ‘Atalak ani,’ kum teneptinye bukni, Allah el kanye aryuk, ‘Saul bira, asum dipnamle,’ tenebuk talak kiplyopura, dipnamlarya. Aning kumopura, mal olan dam banmalye talak ara, ‘Yuk mutuku nang arye, obikiba dipnamle,’ tenyamlyopura, mal olan dam arye obikiba, dipnamlarya,” Daud birye nyabuk.

1 Samuel 31:5

Dibukopura, el ap melipmokba, banmarik yin talin welnye, Saul dibukba eibukopura, el babye atonun, el bidamang cang parang dobuka, tuku deice ikdeibukce, aning deice sakukce opdayuk. Winibuka asum aniryuk, Saul dipmokakuk, anye babye dibuk.