1 Samuel 3:19 - Eipomek

¹⁹ Ura, atalak arye dipdongobuka, dotalak noutamak nirya ara, Allah arye, Samuel biti melilamukba, nepnin balamuk talak noutamak nirya ara, Allah arye nyalamuk yupu nirya, tonok babye kum batakuke. Samuel ayupu nirya kekebukce, laka nyalamukopura, Allah arye, ‘Winipnamne. Winipniba aning ton winipnamle,’ nyapdeibukba, Samuel birye, Israel ninye ati, laka nyalamuk yupu nirya ara, dipkoprob winilamuk.

1 Samuel 3:19 ပူးပေါင်းရင်းမြစ်များ

Kejadian 21:22

Ura, atalak noutamuk, ninye deiyoknye, el si ara Abimelek ap, el yin talin nang sik deiyoknye, el si ara Pikol ap arye, Abraham biti nyapdik. “An winilyam ning ara, kel bikamnume. Yata winin ning do nirya, an winiminye ning nirya ara, Allah arye melikulule,” nyapdik.

Kejadian 28:15

Aninguk kum bukni, tonda an unalam talak nirya ara, na ap neika unaname. An binalam mutuku nirya ara, na ap neika binaname. ‘Malye winipdeipkicak’ tenen, narye anti, pia melilamkinya ani, sirya talak ara, amutuku noutamakuk teleb kibuka tuba tamubuka boyanamkine. Narye anti, ‘Winipnamkine, aning arenamkine,’ nyabuka nyalinmakin ning nirya, min kum dopropmaminye talak ara, na ap pia neika unaname. Kum bataknamkine. Allah arye, Yakub biti nyabuk.

Kejadian 39:2

Potipar birye Yusup taleamuk bukni, Allah el si Yahweh arye Yusup biti weika arye melilamukba, Yusup elce pil dolamuk ning ap, el winilamuk ning ap nirya ara, telebuk winilamuk. Tonda, elti, taleamuknye el aik pum dem ulamuk.

Kejadian 39:3

Neika ulamrik bukni, Allah el si Yahweh arye Yusup biti weik arye melilamuk deice arye, el winilamuk ning nirya pia telebuk winilamukba, el taleamuknye Potipar birye aning nirya bikamuk ati, Yusup binyak kanye deiamuk.

1 Raja-Raja 8:56

“Nun ni Allah, el si Yahweh ati, pia telebe nyapkiabe. Na nio, diba ance Musa biti nyapdeiamlum atonun, ance nun Israel ninye ati talibuka lyepsilyame. Winipminyeba, wini talak ara, nun talye kanye bobuka unamabe. Kanye imun ning ton pia kum upmasilba, telebuk unyabe. Ance an amu tam pil dolamuknye Musa deice arye, nyapdeipsulum yupu, pia teleb nyalin yupu nirya ara, akunum winipmasilame. Anyalin yupu nirya ara, nong akunum uple. Tonok yupu babye kum bataksuke, aning nirya sirya akunum dakasulule.

2 Raja-Raja 10:10

Bukni, aning dipkoprob nyapsine. Anggun akekenmalum ninye nirya arye biknulume. Ara, Allah Yahweh arye deiamuknye, ninye deiyoknye Raja Ahab biti, min talak nabi Elia deice arye, ‘Winipnamle,’ nyabuka, laka nyapdeiamuk yupu ton, min kum kum danmanto ulule. Allah Yahweh arye nyapdeiamuk yupu, dipkoprob nong akunum winipmala atia. Allah Yahweh arye, nabi Elia deice arye, ‘Aminyan talak Ahab biti ara, weik arye wenepnirye, el tam nang nirya, kum kipdeipnamnarya,’ nyapdeiamuk ning ara, talye kum nyamuk. Winyamuk ning nirya ara, Allah Yahweh arye aning nirya ati, nong akunum upmala atia.” Yehu birye nyabuk.

2 Raja-Raja 15:12

Awinibuk ning nirya ara, talye ati kum winibuk. Deiyok ara, minop talak ara, Allah Yahweh arye, Raja Yehu biti, nyalin yupu deice arye akunum nyapdeiamuk. Ara, “Ance deipminba, dadeipdanin balamikca ani, generasi dumbarye nang arye, binuka deipnamak mapu, an yala nang arye, ninye deiyok kibuka, Israel nang talipnamake. Sikce talipnamak talak ara, narye aning winipnamle,” nyapdeiamuk touk winibuk.

2 Raja-Raja 22:16

Allah el si Yahweh arye, nyapdeipmasil yupu ara, ani. Na Allah arye, dipkoprob nyapsine. Yerusalem mutuku ap, amutuku unyak ninye nirya ara, narye, piripnirya weik arye, wenepnamsine. Weik kanye imun ning arepnamsine. Ara, minop talak arye, narye nyapdeiamsiba, abuku noutam sekuka deiamik bukni, wini talak ara, Yehuda yala ninye talibuka ninye deiyoknye Raja Yosia birye, winiryuk eibukce yinibuka nyapmok yupu, abuku noutam nyalye touk, narye, dipkoprob winipnamsine.

Yesaya 43:2

“Ati, anggunce weik mek koubuka banamlum bukni, mek noutam banumunye talak babye, narye melipnamsina deice arye, amek optua babye, mek koubuka banmamunye talak arye, kum dopnamsile. Tonda, weik uku buk pakanmalyak banamlum bukni, uku buk noutam banmamunye talak babye, narye melipnamsina deice arye, auku weik arye diptua babye, uku noutam bamunyeba, auku arye kum dipnamsile. Atonun ton, yuk asilen ning nirya anggun dam yangasilya babye, malye kum kipnamsine.

Yesaya 44:26

Bukni, na amu tam pil donyak nang, sikce nyanyak yupu ara, narye melipniba dipkoprob nong ulule. Aning atonun, narye wipdeipsiba, na nyanye yupu laka nyana deiyok nang, sik dipkoprob nabi nang ara, anang arye nyanyak yupu ara, narye melipniba dipkoprob nong ulule. Ati, na Allah Yahweh arye, “Yerusalem mutuku ati, minop talak ara, yu nang yanuka obuka sirya dakikba, amutuku batakamik bukni, ila tamubuka ‘Naʼ tenen, ninye tamubuka yakirye, Yerusalem mutuku noutam yanuka unamake,” nyabuka nyalinune. Tonda, “Yehuda tam noutam ulamik mutuku domik aik daklomik ning ara, tuba tonap tamubuka dopnamake,” nyabuka nyalinune. Yehuda mutuku noutam domik aik, yuk nang arye daklomikba, kum danamuk ning ara, naryuk lipsisikuka donamsine,” nyabuka nyalisunune.

Yesaya 55:11

Awinilul atonun, na Allah arye anggunti nyalisinye yupu ara, talye urdemuk tamubuka na dam kum yanamle. Aning kum bukni, narye, ‘Winipnamle, aning ara nong upnamlarya,’ tenebuka nyalisinye ning ara, dipkoprob atenenirye nyanun touk nong unamle. Tonda narye, ‘Ayupu dopkwetepniba, nong ara winipnamle,’ tenenye touk dipkoprob nong unamle.

Matius 1:23

Yesaya arye nyalilamuk yupu ara ani. ‘Ninye dona kum kil arye, mi bomlya ani, sal mi deipnamle. Deiplyopura, el si ati Imanuel nyanamake. Imanuel nyanamaka ara, ‘Allah ap, nun ap, neika unyapnye’ tenen, nyanamake.’ (Yesaya 7:14)

Lukas 1:28

Amalaikat Gabriel arye, Maria dam biyukce ayupu nyabuk. “Na ka kilo telebe. Allah arye anti kanye deipkukce, pia mambul pil dopnamkile. Allah ara an ap urumunce pia melinamkile,” nyabuk.

Lukas 1:80

Yohanes el nong nepnin balamuk talak ara, el kanye talima mikip weik arye wisipnin balamuk. Akunum nepnin balamuk talak ara, ninye ap, mek ap, pia kumak dabinuka ulamuka ani, Allah arye ‘Wininamle,’ tenyamuk pil, el pil lakak deiyok koubuk talakuk, yuk Israel ninye ulamikak biyukba, Israel kili sal nirya elilamikce, er ti kil bikamik.

Lukas 2:40

Birikce, sik daulamika ani, Allah arye Yesus ati, kanye deililamukce melilamukura, weik arye nepnin balamukce, el nong mikip ap, Allah winin ning kel bikna deiyok ning ap, el kanye talima noutamak, weik upnin balamuk.

Lukas 2:52

Allah arye Yesus ati, kanye deibukce, pia melilamukura, Yesus el nong ap, Allah arye winin ning kel kina deiyok ning ap, weik winilamukura, ninye nirya arye elti, kanye delilamik.

2 Korintus 13:11

Ara, Yesus dib teneluluma ati, nun du weit atonun ululum ninyeo, anggun sal babye, kilapu ababye kekepnululume. Narye anggunti, ‘Se, winibuka, winibuka winipting’ tenen, patapnil ning ara nyapsinibuk, anggun kekebuka wininamlulume. Ara, ‘Allah arye nun malye winin ning nirya kum daneipsuturye, pia diksukumuk updeipsilibuk, kanye talima wisipnamsile’ tenen, patasilibuk, unamlulume. Tonda, tonok kanyeuk tenebuka, teleb ubuka neika unamlulume. Walana ap, oldana ap, malye winilana ap kumce, nimalye arye teleb ubuka neika unamlulume. Aning-aning nirya akunum upmunyopura, nun Ni Koprop Allah ap, anggun ap kanye talima dukdongobuka unamlulume. Anggunti bataksilirye, el Allah yuk kum unamle. Allah elda, yuk nang ati bico tenebuka melildana deiyok ning aresulule. Tonda, nun ap, yuk nang ap, kanye talima namin ubuka teleb ubuka neika una ati, deiyok ning aresulule. ‘El ap, anggun ap neika unamlum’ tenen, Allah morosunune.

2 Korintus 13:14

Narye anggun Korintus mutuku ululum ninye ati Allah morosunun ning ara ani. Ara, ‘Nun weik Ninye Deiyoknye Yesus bico tenepsilirye, el kanye aryuk talye melibuka arisilye ning ara, weik arye arenamsile’ tenen, Allah moronune. Tonda, nun Ni Koprop Allah arye bico tenepsilirye, melisilye ning ap, Allah El Dib Kanye arye nun talimak usilirye, melisilyeba, ‘Anggun ap, yuk dib tenenyak nang ap, kanye talima dukdongobuka unamlum’ tenen, Allah morosunune. ‘Anirya ara pia unamsil’ tenen, Allah morosunune. Ati, na Paulus arye telebe nyapsine. Asukumuk deipsine.

Ulangan 18:22

Yata nang do nirya, ‘Allah arye nyapnuka ati, mambul ning winipnamle ning ara ani, ani,’ nyabuka, laka nyanyak bukni, sik nyanyak ning, nong kum kiplyopura, akunuma. Adeice arye kel kipnamlulume. Anang ara, sik nyanyak ning nong kum upmala ati, Allah arye el pil dona ati, anang kum wipdeibuk. Sik nyanyak yupu ara, nong kum kipnamle. Sikda, talye nang unyake. Sida, tilila nang uka. Sik bidamang kanye aniryuk nyanyake. Allah el si deice, ‘Winipnamle,’ nyace nang bukni, sik nyanyak yupu nong kum uplyopura, aning ara, Yahweh arye dipkoprob kum dopdeipsuk ati, ato nang ati ara, ‘Mambule,’ kum tenenamlulume. ‘Allah arye nyalye yupu kum nyanyake. Sik dem aryuk nyanyake,’ tenenamlulume. Ato nang ara, oplopnamlulume. Allah arye nyapnuke. Musa birye Israel ninye ati, nyabuk.

2 Timotius 4:22

Nun Deiyoknye Yesus ap, an ap, talima dukdongobuka neika unamkil talak noutam, ‘Melinamkil’ tenen, Allah morokunune. Tonda, ‘Allah el kanye aryuk bico tenekilirye, talye melinamkile,’ tenen, Allah morokunune. Telebe, na Paulus arye nyapkine. Asukum anyuk deipkine.

Yosua 21:45

Ati ara, Allah Yahweh arye, sik Israel nang, el mapu koproba ati nyabuk. “Aning ara, winipnamsine,” nyapdeiamuk yupu ara, tonok ning babye, ton kum bataklamuke. Anyalin yupu nyapdeiamuk touk, winipnin yangalamuk. Tonok yupu babye, pia kum kumdanamle.” Anyapdeiamuk touk winilule.”

Hakim-Hakim 13:24

Sik bitinye daunmarika ani, aminyan talak ara, Manoa el kil sal mi deibuk. Deibukopura, “Ami el si ara Simson,” nyabuka si dobuk. Ami akunum nepnin balamuk talak ara, Allah arye meliamuka deice arye, teleb ubuka nepnin balamuk.

1 Samuel 10:7

Aning nirya akunum winipliba, eipminyopura, Saul ancuk, ‘Aning ara telebe, winipnamne,’ tenepminye ninguk, wininamlame. Deiyok ara, Allah ap, an na ap, neika unamduma ati ara, Allah arye melikiliba, neika urumunce, an tenepminye ninguk, wininalame.

1 Samuel 12:2

Ati ara, wini talak anggun ninye deiyoknye, Raja Saul birye talipnamsile. Nati ara, anyapnusine. Anggunce akunum elinululume. Nara, akunum wisi dase. Na kul potong akunum papnuke. Na min kum wisi danamse talak ara, wel talak arye, anggun taleamsise. Winira, na akunum wisi dasa ati, anggun kele, na deiamse mapu ara, akunum neprobike,” nyabuk.

1 Samuel 16:18

Nyabukopura, el pil donanye kekebukce, nyabuk. “Isai Betlehem mutuku ululnye, el sal mi ton ulule. Ami ara, na akunum eibuka, kel bikse. Ami ara, bilkong ona, el si ara kecapi (gitar atonun ning) talina ara, pia kel mi ulule. Tonda, elda mikip pia weiknye ulule. El ilil pia kum ululnye. Tonda, el yupu nyalula babye ara, teleb yupu uk nyalule. El urasin ara, urasin telebnye ulule. Tonda, Allah el si Yahweh arye, anye biti weika arye melilulce, el ap neika ulule,” nyabuk.

1 Samuel 18:12

Saul birye, aning winibuka deiyok ara, Saul birye Daud biti, ilil ulamuka ati ara, winibuk. El tenebuk ning ara, ani. ‘Ara, dipkoprob Daud bira, Allah el si Yahweh arye, melilul bukni, nati ara, akunum batakuka bindopnile,’ tenebukce, Daud biti, yu kanye bobuk.

1 Samuel 18:14

Atalak nirya ara, yata ning do nirya, Daud birye, pil dolamuk ning nirya ara, pia teleb ubuka dolamukba, teleb ubuk. Deiyok ara, Allah el si Yahweh arye, Daud biti, weika arye melilamuka deice arye, telebuk ulamuk.

1 Samuel 18:5

Akunum tonok kanye boprikopura, anyapce dipdongobuka, otalak nirya, Saul birye Daud biti, “Winipnulyame, aning ton winipnulyame,” nyalilamuk ning nirya ara, Daud birye, pia teleb ubuka, apiluk dolamuk. Winilamuka ati ara, Saul birye, el yin talin nang ati, ninye deiyoknye kina ati, wibuka tikeibuk. Winibukba, Saul el yin talin deiyok nang, yuk nang nirya ap, el taleamuk ninye nirya ap arye, ‘Naie, Daud bira, bita merekuka wipdeiple. Aning ara, nun kanye deibabe,’ tenelamik.

1 Samuel 2:21

Ati ara, Allah Yahweh arye, Hana biti teleb kipdeibuk. Teleb kipdeibuk ati ara, atalak aryuk, Allah arye, mapu weik arelamukba, Hana birye, sal mapu winilye ap, kilmapu bitinye ap, deiamuk. Winilamuk talak babye, Allah el si Yahweh, el si eren aik yangalamuk talak ara, Samuel bira, anyaik dam bukni, Elia melibuka, moubuka pil dolamukce, el nong tonap nepnin balamuk.

1 Samuel 2:26

Bukni, awinilamrik talak ara, Samuel bira akunum nemukce, kanye akunum wisamuk. Tonda, Israel ninye ap, Yahweh ap arye, el Samuel biti, ‘E, elda telebnye,’ tenelamikce, kanye el deice delilamik.

1 Samuel 9:6

Nyabuk buk, Saul el melinanye birye nyabuk. “Yo telebe binamanam bukni, amutuku noutamak ara, Allah el pil donanye, tonok ululba, ninye yuk ninye nirya arye, elti, kanye delinyake. Tonda elce, ‘Aning winipnamle, aning ara, ton kum winipnamle,’ nyalul yupu nirya ara, dipkoprob el nyalul touk winilule. Ati ara, el aik dam binimirye, asipdeniminyebuk, nun keledai basam walwalapmasil ning ara, laka nyapsiliba, ‘Abisikuk elbirurume,’ nyapsutuba, elbitinimnye,” nyabuk.