1 Samuel 29:6 - Eipomek

⁶ Nyabikopura, atalak aryuk, Akhis birye, Daud biti yukubukba, yayukopura, ayupu nyabuk. “Nara, Allah el si Yahweh, an deiyoknye si deice arye, nyapkine. Dib tenepse. Anda, na ap neika ulamnumu talak ara, malye kum kipdeipnulumce, diksukumuk ulamlume. Na kanye deipkina anya arye, an ap, nun ap, neika mal olan dam bana ara, teleb uka. Tonda, anda minop talak, na dam yanamlumba, ulamnumak arye, dipdongobuka, wini talak nirya ara, ance malye uplum ning ton, narye kum bikse. Bukni, wini talak ara, na tam yuk ninye deiyok nang nirya arye, anti ara, ‘Nun ap neika bana ara, kume,’ tenepmakiyake,” nyabuk.

1 Samuel 29:6 ပူးပေါင်းရင်းမြစ်များ

Kejadian 16:6

Sara birye, Abram biti nyabukba, Abram birye, tamubuka nyabuk. “Kume, akilo, Hagar bira, an pil melin kil ulula anya arye, ‘Akil ati winipnamne,’ tenepminye touk, aninguk wininalame. Wenepnalam do, kum do, an kanye arya,” nyabuk. Abram birye, nyabuka ati, Sara birye Hagar biti, malye yupu nyabuka, wenenalamukce, ikin ning weik, el nong deice delilamuk. Winilamuka ati, Hagar bira, malye kanye bobuka, sik batakuka buru saka biyuk.

2 Samuel 3:25

Nun deiyoknye an kele, Abnar birye an dam yanmu ning ara, talye minin yupu nyalyanmakue. Tonda, elce anti, ‘Daud el ulul ning ap, el tenelul ning ap ara, yata wirilul do? Yata winipnamle do?’ tenen, dilyanmakuke.” Abnar birye, Daud ati nyabuk.

2 Raja-Raja 19:27

Bukni, an winiminye ning nirya ara, na kele. Ara, ance, ‘Amutuku unamne,’ teneminye mutuku, na kele. Ance, ‘Amutuku batakuka amutuku binamne,’ teneminye mutuku ap, tonda, ‘Amutuku batakuka, yuk mutuku binamne. Amutuku yanamne,’ teneminyak nirya ara, na akunum kel bikinune. Aning atonun, ance nati, ‘Allah ara na like’ tenen, yu upkiliba, weik arye, kwalibuka malye yupu weik nati nyaniminye yupu babye, na akunum kel bikinune.

Mazmur 121:8

Allah Yahweh arye, nun ban talak babye, yangan talak babye, pia teleb ubuka kalikinamsile. Ara, wini talak arye dipdongobuka, yuk dotalak babye, pia ati kalikinamsile.

Yesaya 37:28

Bukni, na Allah ara, an Sanherib birye mapmaminya bukuka baminye talak babye, tuba tonap bukuka dikdik sepminye talak babye, na kele. Tonda, ance bai baminye talak babye, an aik tamubuka yanuminye talak babye, na kele. Anda winiminye ning nirya ap, pil dominye ning nirya ap ara, na kele. Dipkoprop na Akunum kel bikikununa anya arye, ance nati weik tonun dereniminye ning babye, na kele.

Yesaya 65:16

Aning nirya akunum winipnyopura, amutuku noutam unamak ninye ara, ‘Yatanye birye melipsutuba, nun un ning nirya teleb kipdeipsutu do?’ teninamak talak nirya ara, na Allah pia diksukum yupu nyanunye biti moronamniyake. Narye, ‘Wininamne’ nyanun touk, batakna kumce aninguk wininunye biti moronamniyake. Aning atonun, amutuku unamak ninye arye, yuk nang ati, ‘Wininamsiyabe,’ nyabuka nyalin yupu nyanamak talak nirya ara, na Allah pia diksukum yupu nyanunye, na si deice arye nyalin yupu nyanamake. Wininamaka deiyok ara, minop talak malye ululum ning nirya ara, akunum kum kipdeipsinirye, tuba tonap pia kum teninamne. Aning nirya kum kipreipnirye, bataknamne.” Allah arye Israel ninye ati nyabuk.

Yeremia 12:16

Winipnyopura, sik dana-dana tam unyak yuk-yuk yala nang, yuk mutuku unyak nang nirya, sik talima noutam arye, moubuka tenebikirye, na mapu koproba, sik Israel nang, sikce nati, si erenikirye, teleb kibuka unyakce, dipkoprob bisik balamak touk, bikikcopura, ayuk-yuk yala nang babye, teleb kipdeipnamne. Ara, na mapu koproba, ‘Naʼ tenen nang arye, ‘Nun ni koproba Allah Yahweh, el si deice aryuk wininamabe,’ nyalin yupu arye nyapne touk, sik yuk yala nang arye, aning bikikirye, talibuka winibikopura, narye anang babye melinamne. Tonda, sik yuk-yuk yala nang arye, minop talak, na mapu koproba, Israel nang ati, ‘Nun ni koproba isa Bahal, el si deice aryuk nyalin yupu nyanamlume. Eluk talibuka unamlume,’ nyabuka petelamik touk, sikce isa Bahal batakikirye, na siuk erepnikcopura, ayuk yala nang babye melinamnarya. Ara, sik nirya arye, “Allah Yahweh anda, kam una deiyoknye pia ulyame,” nyapnamniake. Nyapnikirye, na siuk erepnikcopura, narye sik anang babye, na mapu Israel nang kan-kan uk, boyanuka tabakdeipniba, neika unamake.

Bilangan 27:17

Ati ance wibuka deipminba, anye birye minopce menekuka balibuk, sik Israel ninye eibikirye, el bilye bisikuk aminyan binamake. Aning atonun, el tamubuka yangaliba, sik eibikirye el amu tam kibuka tamubuka yanamake. Ara, el balye tam ara, sik nirya melibuka abisikuk dobolbanamake. Winipra banamlanye ‘Wipdeipnusilam’ tenen, moropkine na nio. Atonye kum wibuka deipminba, aninye ara, ance batakminba, domba basam wein nang kum ati, sik domba talye urdemuk unyakce, ‘Dan binuyab do?’ tenen, talye-talye ayanapna, obinapna winilamak touk, Israel ninye babye wininamake.” Musa birye Allah ati, nyabuka morobuk.

Matius 5:16

Ati ara, ‘Ninye eipnamak’ tenen, upna delilamak touk, anggunda ninye dinak nirya, weik dirina atonun unamlulume. Winimunyopura, yuk nang arye, anggun teleb winilulum ning eibikirye, anggun ni Allah im deice ululnye ati, kel kibuka el siuk erenamake. Yesus arye, el mapu ati nyabuk.

Ulangan 10:20

Winibuka anggun unalum talak nirya ara, anggun ni koproba Allah ati, ‘Elda pia mambule’ tenen, el siuk erenamlulume. Allah ati, el amu tam ulamunce, el pil donamlulume. El tibuk, ilil tenebuka, eluk talibuka ulamunce, anggun kanye talima, el deiceuk delinamlulume. Anggun nyalin yupu nyanamlum talak ara, Allah el siuk nyanamlume. Ati, anggun kanye lamapdongobuka arye, el amu tam unamlulume.

Yosua 22:30

Yordan mek duman, keting panalyangan tam ulamik Israel yala nang ara, Ruben yala nang ap, Gad yala nang ap, tonda Manasye yala nang bukni, dana tam nang ap, sik nirya arye, ayupu nyabikura, keting kumulban tam ulamik Israel yala nang kekebik. Ara, imam Pineas ap, Israel yala yuk-yuk yupa takubarye ulamik touk, sik deiyok nang yuk-yuk ati, deiyok kibuka, taleamik nang takubarye (10) nang ap, sik nirya ara, ayupu kekebik. Ayupu kekebikura, ‘Yo, aning ara, pia dipkoprob nyabaka ati, aning ara, telebe,’ tenebikce, kanye deibik.

1 Peterus 2:12

Sik dib kum tenenyak ninye kan-kan ululum talak ara, anang arye anggunti, “Anang ara, malye ninye,” nyabuka lululinamsiak bukni, anggun pia dipkoprop diksukumuk ulamunyopura, anggun teleb ululum ning eipsikirye, Allah dolyanamsil talak ara, anang arye lopdeipsikirye, Allah el si ereipnamake.

1 Peterus 3:16

Allah diba tenelulum ning, laka nyabuka deilinamlum talak nirya ara, weik yupu weika arye nyana kum bukni, yuk nang nirya ati, si erebuka nimalye arye, laka nyanamlulume. Yesus Kristus talima dukdongobuka teleb ubuka, diksukumuk unamlulum bukni, malye yupu nyabuka lululinamsiak ninye ara, ‘Ailye upnamle’ tenen, anggun kanye talima noutamak ara, malye ning duknuna kum arye, diksukumuk unamlulume. Winilulumopura, yu arye lululinamsiak bukni, anggun ap, Kristus ap talima dukdongobuka ululumba, teleb winin ning eipsikcopura, alye unamle.

1 Samuel 20:3

Nyabuk bukni, Daud birye, “Allah el si deice arye nyapkine. An ni birye, akunum kel bikuke. Ance nati bico tenenilyamce, kanye delinilyame. Ati ara, na kanye ara, elce akunum tenelule. ‘Kume, na mi Yonatan biti, Daud opnamne ning ara, kum laka nyapnamne. ‘Aning kekeplyopura, el ilil kanye boplyakʼ tenen ati, elti, lak kum nyapnamne, akunum,’ tenelule, tenepne. Ati ara, na dipkoprob nyapkine, an ap nun ni koproba Allah ap, kam tuba ururume. Aning dib ulul touk, teniltona kum unulule. Na dipkoprob kel bikse. Saul birye opnamnil anya arye, na dipna dam upnile,” Daud birye Yonatan biti nyabuk.

1 Samuel 28:10

Nyabuk bukni, Saul birye, “Kume dipkoprob nyalin yupu nyapkine. Allah, el si Yahweh, kam pia ululnye, el si deice arye, dipkoprob nyapkine. Na moropmakin ning melipniminyopura, dipkoprob yuk nang arye, wenebuka kum opnamkiyake. Allah el si deice arye nyapkine,” nyabuka, nyalin yupu nyabuk.

1 Samuel 29:3

Sik aminyan tam banmekbuk, Pilistin yin talina deiyok nang arye, eibikce asipdeiyik. “Yata deiyok ati, anggun Ibrani yala nang ara, nun ap banmap do?” nyabikura, Akhis birye tamubuka, sikti, nyabuk. “Kume, anye Daud bira, Israel ninye talibuknye, Raja Saul, el pil donanye ulamuk. Tonda, el anye bira, Raja Saul batakukabukce, na dam yayukba, na ap, neika weik ulamnume. Yayukba ulamnumu talak arye, dipdongobuka, wini talak nirya ara, el malye ulamuk ning ton, kum ubukba, narye kum bikse,” nyabuk.

1 Samuel 29:7

Ati ara, anda adiparyuk, teleb kanye bopmince, an mutuku tamubuka, binulyame. Tonda, Pilistin mutuku arye, talibuka unyak nang, sik dinmak noutam arye, banumunye talak ara, ance malye ton winipminba, malye-malye nyapsikcak ati, ‘Teleb aryuk binulyamʼ tenen, nyapkine,” nyabuk.

1 Samuel 5:8

Ati ara, sik amutuku ulamik deiyok nang nirya arye, Pilistin mutuku atam-atam nirya, sik ninye deiyok kibuka taleamik nang, sik Raja pamubarye nang ati, yukubikba bulubuka yayik. Sik Pilistin mutuku noutamak pamubarye ninye deiyok Raja nang nirya ati, akilisal arye asipdeyik. Asipdeyik yupu ara, ani. “Israel ninye arye, si erenyak Allah arye nyapdeiamuk nyalin yupu deibik Peti Perjanjian ati, nunce yata wiripnamap do?” nyabuka asipdeyik. Asipdeiyikbuk, sik ninye deiyok Raja nang arye nyabik. “Israel kili sal, sik ni Allah arye nyalilamukba, ayupu dobuka amarikna pum bisik deibik ning ara, sik isa si eren aik noutam arye, dobukapmunce, takupdakuka, Gad mutuku delilbilulume. Ara, Pilistin mutuku bukni, yuk pera mutuku ton, amutuku si ara, Gad mutuku takupdakuka delilbilulume,” nyabik.