1 Samuel 22:4 - Eipomek

⁴ Akunum binuka morobukopura, Raja Moab birye, ‘Telebe, amutuku ur unamdake,’ nyabukopura, Daud tamubuka biyukura, el li ap, el lin ap dobuka, Moab mutuku ninye deiyoknye, talibuka ulamuknye dam deibukba, sik neika ulamik. Daud tuba keil deiya pum tam, tamubuka yanuka, ulamuk talak nirya ara, el li ap, el lin ap, Moab mutuku noutamak ulamdik.

1 Samuel 22:4 ပူးပေါင်းရင်းမြစ်များ

2 Samuel 24:11

Nyabuka morobukura, mapmuka, berekukopura, asum beren tam koproba arye, Allah Yahweh ara, el yupu nyapdeipnyeura, laka nyana deiyoknye, nabi Kat ati, yupu nyabuk. Anye bira, Daud biti aminyan winipnamuk ning, laka nyan pil dolamuk. Apil dolamuka ati, Allah arye anye, nabi Kat biti yanuka nyabuk.

2 Samuel 8:2

Tonda, ninye deiyoknye Raja Daud ap, el yin talin nang ap arye, Moab mutuku ulamik nang ton, obuka sirya dakuk. Obuka sirya dakukopura, elce, “Sikda tuku deiceuk mapnamalume,” nyabukura mabik. Nyabukura, tuku deice mabik talak ara, sik winilye nang amapmik kan-kan arye, ninye bitinye-bitinye nang wibuka, opnin banmokba dibinmek. Ati ara, sik awinilye nang kan-kan arye, bokuka bitinye nang obik bukni, tonoknye bira, batakikba kam tuba unmok. Winipnin banmoka ani, ninye weik tam ara, obuk bukni, ninye mitik tam ara, kam tuba unmek. Ninye tonok-tonok wibuka batakaldongonmok, abatakdongopmok nang anyuk, kam tuba ulamik. Ati, sik Moab nang ara, ninye deiyoknye Raja Daud, el amu tam tamubuka ulamikce, el dekna ati ara, elti, yo bok weik tonun arelyangalamik.

1 Tawarikh 12:16

Utouk tonok talak ara, ton tam nang, sik Benyamin yala nang ap, tonda sik Yehuda yala nang ap, yu nang kum wekmanto sukum, el ninye deiyoknye Daud, mikip kina ati ulamik sukum atouk, pata mutuku noutam keil deiya dam biyik.

1 Tawarikh 21:9

Nyabuka morobukopura, Allah arye Raja Daud dam yupu nyalina ati ara, nabi Gad, el dam yanuka, yupu nyapdeibuk.

1 Tawarikh 29:29

Ninye deiyoknye Raja Daud, el ulamukce pil deiyok koubuka dolamuk ning arye dipdongobuka, sirya dakdongobuk ning nirya, lak lena ati, si sekna buku el si ati nyabuka sekik ning ara, ani. Ara “Nabi Samuel ap, nabi Natan ap, nabi Kat ap nyabuka sekebik.

2 Tawarikh 29:25

Allah Yahweh arye, Raja Daud el dam lak nyana ati, Allah el yupu laka nyana deiyok nang, nabi Gad ap, nabi Natan ap, sik deice nyapdeiamukba, yanuka nyapdikopura, “Lewi yala nang ara, Allah el si eren aik noutam bung-bung ana el si ara, kecapi ap, gambus ap, bobana ati wipdeipnamlume,” nyapdeiamukba, wipdeiamuk touk, atalak Raja Hizkia babye, Lewi yala nanguk wipdeibukba, Allah el si eren aik pum tam kintinibuka tikik.

Nehemia 6:11

Nyapnuk bukni, narye anye Semaya biti tamubuka nyapse. “Kume nara, ninye ati ilil upniliba, bai kum sakuka binamne. Nara anang atonun pia kum unune. Ati, Nun ni koprop Allah Yahweh el si eren aik pum tam pia kum wekuka duknupnamne. Ara, ‘Yuk nang arye na opnicak’ tenen, dipkoprob pia kum duknupnamne,” nyapse.

Mazmur 11:1

Raja Daud birye, Mazmur yupu sekuk. Ara, Allah yupu mot nyana deiyoknye arepnamuka ati, sekukce arebuk. ‘Ikin ning, na dam yalirye, opnilyak’ tenen, na ni Allah Yahweh, el damuk unune. Ati ara, yata ati, anggunce nati, ‘Yukak bilyame,’ nyapnutum do? Anggunce nati, “Mitik maka arye, ‘Ninye opsikcak’ tenen, ilil upliba, minopce mutuku kon lakuka balolamle touk, binulyame,” nyamnulum ning ara, yata ati do?

Matius 10:23

Na diba tenemunce, na yupu peterelbanamluma ati, na yupu peterepmunyeba, yuk ninye arye malye yupu nyabukapsikirye, anggun nong deice ikin ning deipsikcopura, amutuku batakuka, omutuku peterelamunyebuk, amutuku babye bataksikcopura, ila yuk mutuku ton binuka peterepra banamlulume. Atonun ton binuka, Israel ninye sik asik dobuka ulamak ak ap, unamakak ap, amutuku nirya min kum binuka peterepmanunye talak ara, aminyan ara na Ninye Mi Koprop Atonunye yanamne. Yesus arye ayupu nirya nyabuk.

1 Samuel 22:3

Daud akeil deiya, aulamuka ani batakuka, Moab tam noutamak bukni, Mispa mutuku biyuk. Amutuku akunum biyukopura, Moab mutuku talibuka ulamuk deiyoknye, Raja Moab biti, binuka morobukce, nyabuk. “Naio, ance na ni ap, na nin ap, an taliplum mutuku ayana uptiring do? An mutuku noutamak aulamdice ani, Allah arye, na melina ati tenepnuk ning ara, ‘Yatato wiripnamnil do?’ tenen, kel biknyopura, sikda na dam, tamubuka yatiringe. Aning ati, yanuka moropkine,” Daud birye, Moab mutuku taleamuknye biti nyabuk.

1 Samuel 22:5

Daud bira, tamubuka keil deiya pum tam biyukura, daulamuka ani, tonok sum ton, Allah el yupu laka nyananye, el si ara Gad, Daud dam yayuk. Yayukce, Daud biti nyabuk. “Anda keil deiya auna meme. Adiparyuk Yehuda yala nang, sik unyak mutuku binulyame,” nyabukba, Daud adiparyuk, Keret mutuku yo noutamak arye, duknulbiyuk.