Sikda min talak ara, tukwak mutuku noutam dirinak ulamik bukni, Allah arye anang dirinak arye dopdeiplyeba, unyakak binuka unamake. Ara, Allah arye, amalye unyak nang ara, kam tuba unyak nang unyak mutuku nirya dam arye, donoklyeba, pia pera binuka unamake. Ara, akunum dibikcopura, pia unyakak binuka unamake.
1 Samuel 2:9 - Eipomek9 Ninye ton, Allah ati, ‘Nun ni koproba ani,’ tenekirye, batakna kumce, el yupu moubuka talibikirye, dobolbanyak ninye ara, sik pia namin kanye bobuka ulamak ninye ara, Allah Yahweh arye, sikti, kalikilirye, pia teleb ubuka melinamle. Bukni, malye un ninguk, pia talibuka unyak ninye ara, amu tam deipliba, sikda kuna sukumuk pia unamakeʼ. Aning kum kipdeiplyopura, ninye arye kum elinamake. Aning ara, talye ati kume. Ninye nirya ara, sik mikip deice aryuk, teleb ubuka kum unamakeʼ. Allah arye melisilya deice arye, teleb unamabe. အခန်းကိုကြည့်ပါ။ |
1 Samuel 2:9
41 ပူးပေါင်းရင်းမြစ်များ
Anyapmasin yupu ara, talye ati kum nyapsine. Deiyok ara, el kanye talima lamapdongobuka arye, Allah amu tam ulirye, diksukumuk winilulnye bira, Allah Yahweh arye melibuka kalikilirye, aninye ati, teleb winililule. Bukni, malye winin ninguk tenebuka, upre bace ninye ara, wenebuka opnamle ati, kintinililule. Sik malye winin ninguk talibuka, wininyak ninye ap, sik wininyak ning ap nirya ara, Allah Yahweh arye kum daneipnamle.
Weik ikin ning aning-aning nirya, Mesir mutuku ninye, sik deice akunum deibukura, Allah Yahweh el mapu Israel ninye ara, Mesir mutuku arye bobuka biyuk. Abobuka banuyik talak ara, Mesir mutuku ninye arye, ‘Minop bitinge’ tenen, Israel ninye ati, urasin teleb ning, dekna weik ning emas ap, perak ap arebikba, bobiyik. Ara, sik mikip weik ap, kil-kil deice ap aniryuk biyik. Israel ninye ayala-ayala nang nirya, neika biyik talak ara, tonoknye babye, anye bira mikip kume, mitang ati, nyabuka kum batakuk. Sik nirya mikip arye bindobik.
Allah Yahweh arye, nun damak ausilirye, melibuka dinamsile. Tonda, nun ni Allah Yahweh aniryuk, nun dobukapsilirye, nun diksukum tamuk kalikinamsile. Ara, winipmanto ara, keting deiplye talak, weik yo tikamlyak, amu tam keting koak bulamaka atonun, Allah Yahweh arye, erebuka deice tam uliba, nunda el amu tam unamabe.
Ati na nio anda, ‘Weik tonun bico tenepnutumce, an amu tam pil donanye, nati, kanye deipnutumce, lyepnutum’ tenen, moropkine. Ance, nati, ‘Bico tenyamnulumce, tuba-tuba melinamkine,’ nyabuka, ‘Nyalin yupu deice arye, nyapdeipnulum ning nirya ara, anyapnulum touk winibuka, lyepdopnutum’ tenen, moropkine.
Aning ara, talye ati kum nyapsine. Deiyok ara, ani. Sik diksukumuk wininyak ninye ara, Allah el si Yahweh arye, sik aninye ati, weik arye bico tenelirye, pia melilule. Tonda, yata ninye do nirya, nun ni koproba Allah ati, ‘Elda weik mambulnye ulula anya arye, el amu tamuk ubirye, elce nyalul yupu moubuka talibibirye, diksukumuk wininamabe’ tenen, telebuk wininyak ninye nirya ara, Allah arye, pia kum bataknamle. Aninye ap, sikce deibikceba, dadeipdanin banamak ninye babye, Allah arye aninye nirya ati, pia kalikuka melinamle. Bukni, sik malye winin ninguk, talibuka malyeuk wininyak ninye ap, sikce deibikceba, dadeipdanin banamak ninye nirya babye, Allah arye aninye ati, wenebuka oplyopura, sik nirya kum upra banamake.
Min talak ara, narye, ‘Se na mitanguk ununa ati, narye diba tenyamse ning nirya ara, akunum kum danin banmanile,’ tenepse. Aning tenepsirye, kum winipmanto unmase bukni, na ni Yahweh ance, “Nara anggunti, weik tonun bico tenesinirye, pia telebuk kilinamsine.” “Pia kum bataknamsine!” nyalin yupu deice nyapdeiamsulum yupu, tonap tenipsa deice arye, aning ara, kum batakse. Ayupu deice arye, na mikip tonap arepnuluma ati, kum batakse. Tuba kamuk unune.
Ati ara, yata nang do nirya, sikce, Allah Yahweh ati, ‘Nun ni koproba ani’ tenen, diba tenebuka, elti, kanye deipmunce, bico tenelulum nang nirya ara, anggun nirya arye, malye un ning nirya ati, anggunce, ‘Nun like’ tenenamlume. Allah el tibuk, anggun kanye talima, el deiceuk delinamlume. Allah arye, ‘Naʼ tenen nang, ‘Winibuka wininamak’ tenen, akunum wipdeiamsuk nang ati, “Aning ara, wininamlume. Aning ara, pia kum wininamlume. Winipmunyopura, narye anggunti, pia teleb kilinamsine,” nyapdeiamsuk yupu, moubuka talinyak nang ara, Allah arye, pia melibuka kalikisulule. Winilula ati, anggun mal olan nang ap, sik pia malye ning talibuka, wininyak nang ap ati, obuka sirya daklyopura, el ‘Naʼ tenen nang anggunti dobuka, teleb kipdeipnamsile.
“Ilil kum unamsile,” nyapmasina ara, urdem ati kum nyapsine. Ara, nun ni koproba Allah Yahweh arye, anggunti melibuka kalikinamsile. Winipmanto ara, mana wena wemicak kapang mana mangkau arye banmalyak, wena tapu pum bisik wekliba youlamle atonun, kum upnamsile. Allah arye anggunti, moubuka kalikinamsile ati, nyapsine.
Tonda, aning ton tenipse. Sikda, ‘Bona taliptinyeʼ tenen, pia motona talin nang atonun unyak nang nirya ara, sik kam tuba ulamik talak ara, lukunyan noutam nirya, teleb ubuka kum malamik. Sikda mambul kiriklamak nang atonun ulamik. Ati sik anang arye tenilamik ning nirya ara, ‘Se, na dengna weik ning kum upnuka ati, yata wiripnamne do?’ tenen, sikce ‘Seʼ tenen ning ap, ‘Na likʼ tenen ning ap, sik talima noutam arye, ‘Se, yuk nang arye, yata deiyok ati malye ulamnik do?’ tenen, uk taleamukba, se tenen pia piribuka tenilamik. Ati, sik anang arye winilamik touk, pia kum wininamlume.
Tonda, ‘Aning nirya kel biknamneʼ tenen, epra balamse talak ara, tukwak mutuku noutam ulamik nang ati, dipdesirye bikse. Ara bikbik an ning ati, mikip arye bikbik abuka banyak talak ara, mikip weik arye bikbik abuka banman nang arye, atalak nirya kum bisinyake. Aning atonun, yuk-yuk mutuku nang arye mal olan talak babye, sik mikip pia weik nang arye, yuk daunyak mutuku nang ati, adiparyuk kum oltakanyake. Tonda, sik kel weik bikamik nang ara, atalak nirya sikda din ning dobuka kum dinyake. Tonda, ‘Deiyok aniʼ tenen, mambul ning ati, weik tonun akunum kum bikamik nang arye, pil weik donyak bukni, atalak nirya ara sikce sik dengna ati, dengna weik ning ap, bona ap ton kum dolonyake. Aning atonun, pil pia teleb ubuka donyaka deiyok nang ara, sik pil dona deiyok nang arye, sikti, kanye deibuka, teleb ning kum arenyake. Deiyok ara ani. Nunce kum tenipmanto ning, nun dam ikin weik ning yanamsil talak ara, pia kum biktibirye, kum teneptibye. Nun tukwak nang nirya arye, ‘Winipnamabʼ tenen, piriptibye bukni, ikin ning nun dam yalyopura, aning deice arye winipmanto kum usulule.
Anggun Kasdim mutuku ululum nang nirya ara, yupu nyana kumce, tunim abuka pia unyakak binuka buklulume! Ara, anggun Babel mutuku nang nirya ati ara, yuk mutuku-mutuku nirya unyak nang arye anggunti, ‘Se, sikda pia telebe unyake. Urasin pia teleb wel kilapu atonun unyake. Sikda, ninye deiyok kilapu atonun unyaka anya arye, yuk mutuku-mutuku nirya sikce talisinyake,’ nyabuka, anggunti si erelamsik bukni, atalak arye dipdongobuka, do unamle talak nirya ara, anggunti ayupu ton pia kum nyapnamake.
Winibuka nyapmasina ati, anggun amutuku ululum nang arye, atalak ara, winibuka nyapnamnululume. “Se, imun kanye bobuka unamaba ati, yata ati, nunce asukumuk talye bukmap do? Anggun dana-dana tam ululum nang nirya ara, nun dam yamunyeba, nun nirya neikauk, yuk mutuku weik asik dobuka ukirye, ‘Nun mal olan nang arye, talye luparabuka, yana opsikcakʼ tenen, cang keil poka dobibyak arye, amutuku binuka, ulamepye bukni, amutuku arye dibibyeura, telebe uka. Deiyok ara ani. Nun ni koproba Allah, min arye melibuka kaliklamsuk bukni, nun ni koproba Allah el dam malye winilamupu buk, wini talak ara, elce nunti, “Sikda dandobikirye, kum kipnamake,” akunum nyapdeipsuk atia. Bukni, aning awinipnamsil ning deiyok ara, nunca!
Allah arye ayupu nyabukopura, ayupu ton dukdongobuka nyabuk. Nara Allah Yahweh arye, nyapsine. Sik kel weik bikamik nang arye, ‘E, nunda kel weik bikupu ati, nunda mambul weik nang,’ tenena kume. Winibuka tenebikirye, sik talima babye erebuka, kwalina kume. Tonda aning atonun, anggun mikip weik nang ara, “E, nunda mikip weik nang unyaba, ati, nunda mambul weike,” nyabuka, maknya kintina kume. Aning atonun, sik bona weik talin nang babye, ‘E, nunda aning-aning yala-yala nirya talinyabe. Tonda, bona weik talin nang unyabe. Tonda, nunda mambul weik nang unyabe,’ tenebuka, maknya kintina ap, kwalina ap, pia meme.
Dipkoprob asum ara, Allah Yahweh, el yu weik uplyeba, wenen sum upnamsile. Winiplyopura, tukwak nang nirya arye, ikin kanye bopnamake. Allah Yahweh arye, tukwak nang nirya ati, wenebuka opnamle sum yanamla ati, engena weik sum ap, ikin ning yanamle sum ap, kanye imun ning upnamle sum ap, ton yanamle. Asum ara, aning-aning nirya ulubuka, sikce buklopnamle sum kipnamle. Tonda, lokuka poulban sum bereknamle. Asum noutam ara, mirin dua weik yanuka sikniplyopura, tukwak mutuku nirya kunuknamle. Tonda, kunuklirye, lukunyan atonun kipnamle.
Amalaikat arye, na Zakaria biti, nyapnuke. “Anda, ninye si Zerubabel dam binuka, elti, Allah Yahweh arye, nyapdeibuk yupu ara laka nyapnulyame,” nyapnuke. Ara, ance elti, nyapnalam yupu ara, ani. “Zerubabel an teleb winipnamlam ning ara, an mutuku yin talen nang, sik mikip weik deice arye, mambul pil kum dopnamlame. Aning atonun, ancuk mikip deice arye, kum winipnamlame. Aning kum bukni, na Allah Yahweh arye, na mikip weik ulul Pia Teleb, Lek Dip Kanye, el mikip weik, an deice deipkiniba, aning aryuk, narye, ‘Anye apil dopnamnile,’ tenepkise mambul ning ara, winipnamlame. Nara, Allah Yahweh, im deice unyak yin talen malaikat nirya, sik deiyoknye ununa ati, anyapmakin yupu ara, dipkoprob nong upnamlarya!
Aninye nirya ara, Allah arye el kwalina dina ati, kintinibuka deipsukak, anyuk bukikirye dipnamak bukni, Allah arye, ‘Na tenen ninye unamake’ tenen, min arye wiamuk ninye, Yahudi yala ninye ara, nati diba kum teninyaka ati, sikda kum wekenamake. Allah arye aninye dobuka buru tam kunuk kuna noutamak donokliba, aninye ara kanye imun upliba, weik arye ngalukuka engenamake,” Yesus arye nyabuk.
Ura, nun nirya akunum kel kiyamupe. Allah arye el mem yupu nyabuka areamukba, Yahudi yala ninye doprobikce, ayupu uk talibuka, ayupu amu tam unyake. Ayupu noutamak nyasilye ning nirya ara, anggunti nyasulula anya arye, anggun kan-kan noutamak arye, tonoknye babye, “Nara, malye kum unune,” kum nyaptue. Yahudi yala ninyeuk kum bukni, ninye mutuku-mutuku nirya atonun, malye nanguk unyaba anya arye, Allah arye yupu lepsisikuka bokeipsilirye, wenepnamsila ati, nunce elti, yupu ton tamubuka kum nyaptibye. Allah ati tamubuka yupu nyana kumce unamabe.
Dipkoprop, Allah elda, ninye tukwak ninye ati, bico tenelule. Allah arye, pia diksukum ninye nirya ara, el mapu kibice nang ara, elce talibuka melilule. Sik nirya ara, Allah el yan dam gutam tuku dipdongobuka, el si erenyake. Tonda Allah arye, ‘Wininamlulume,’ nyapdeiamuk yupu ati, dib tenebuka talibikirye, dobolbanyake.
Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.
Ura, atilila yupu peteren nang ati, winipmanto yupu ton nyapnusine. Ara, mek pu awamlya awamuk ati, ‘Dipnuyap’ tenen, ninye arye dilbikibuk, mek cepromliba, mek kum dipmanto unyaka atouk, atilila yupu nyanyak nang ton wininyake. Tonda, mok cepnulya ati, dua deiplibuk, ‘Mok yanule,’ tenebikcebuk, kumanya mikip arye dopliba bindoplyeura, dou maplyeak mok kum celul touk, siktilila yupu nyanyak nang atonun wininyake. Atilila yupu nyan nang arye, talye yupu nyaplobikibuk, sik nyanyak ning nong pia kum ulul ning ati, arup nyapmasin ning atonun wininyake. Wininyaka anya arye, Allah arye, ‘Amalye nang wenebuka, malye sukum dongopnamne’ tenen, pia kunuknak akunum kintinibuk.
Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.
Ton atilila nang ara, mokceplirye, mek delilyalye talak ara, mek mikip arye lonting-lonting nyalirye, mek wiya ap, yo linglinga ap, lyabuka erepdoplirye, lakak elelamle touk, amalye winin nang sik malye winilamica deice arye, sik pia malye winin ning lakak kililule. Ara sik alye ati laka kum nyapmanto ning unyake. Tonda, anang ara, lukunyan noutamak im deice arye talye-talye balye kurya atonun unyake. Anang wininyak ning deice arye, ‘Dipkoprop teleb bisik ani’ tenen, kum kel biktibye. Allah arye minop talak tenyamuk touk, anang dobuka weneplirye, pia kuna bisik kintinipdeibukak dopkwetepnamle. Winiplibuk dapia upnamake.
Na kayapum, anggunti, bico tenesunune. Otalak arye, ‘Anang ati surat seknamne,’ tenyamsise. Asurat noutamak ara, Allah lyepsukce, el ap, kanye talima dukdongobuka neika unyap ning ati, ‘Laka nyabuka seknamne,’ tenyamsise bukni, yuk nang arye, “Tilila yupu peterena nang anggun kan-kan noutamak yanmake,” nyapmekbuk, kekepsirye, ‘Aning ara, weik mambul anya arye,’ winira utenepne. Ara, ‘Aminyan talak kume, tilila yupu peterena ati, ayupu ara, adiparyuk yupu seknune’ tenen, asurat sekeipmasine. Wini talak sekmasin yupu deiyok ara, ani. Ara, tilila nang yupu peteresiceura, malye ning yuk tenena deice arye, Allah yupu akunum diba tenemunye ning batakmunyeura, malye upsilyake. Malye upsilyak anya arye, ‘Allah arepsuk yupu uk, pia moubuka talibuka unamlulum’ tenen, ayupu sekeipmasine. Allah yupu diba tenebupu ning ara, tonok talak aniryuk Allah arye nun diba tenenyap ninye ati akunum arepsuka ati, yuk talak arye, yuk yupu tonap, kum tabakalinamsile. Akunum arepsuk ninguk diba tenebuka talinamlulume. Yuk yupu tabakuka diba tenena meme.
“Ati ara, na deiyoknye, an ni koproba Allah, el si Yahweh arye, ‘Namin asa arye, ninye oplyak’ tenen, kalikmakilba, minopce ninye kum oplopmalame. Ara, ance teleb yupu, na akanye biti nyapmomba, elce dib kum tenepmakirye, malye yupu uk, nyapmakua ati ara, an taruk koproba arye, anye kwang dakuka, kum oplopmalame. Nun ni Allah, el si Yahweh ara, dipkoprob Kam Una Deiyoknye ulule. An babye, tuba kam ulyame. Ayupu bitinye, dib nyapman atonun, anyapnukin yupu, ‘Dipkoprop winipnamle’ tenen, Allah moronune. Ara, yata nang do nirya, ‘Daud optibye,’ tenenyak nang nirya ati, ara, ‘Allah arye wenepnamle’ tenen, ‘Se,’ tenepne. Ara, na akanye Nabal biti, Allah arye, Nabal wenepnamle touk, anti yaniltakinyak nang babye, ‘Allah arye weneptu’ tenen, nyapkine.
ကြော်ငြာတွေ