Na ni Allah, na ilil unilye talak nirya ara, keil deiya wekuka, dungnunye touk, ikin unilye talak nirya ara, ancuk melibuka lelildongonilyama anya arye, an aminyan tam dungnubuka banune. Yin talin nang arye, ‘Mal oldan talak ara, mal dobikceura, biklyak’ tenen, kelapye lilibuka winilamak touk, ance melibuka kalikinilyame. Na melina ati, kelapye atonun lelinilyame. Na lyena deiyoknye bira, an uka. Na ni Allah, anda keil bukamlye mutuku dup amu tam dungnul banun atonun, an mikip deice arye lelilamnilame. Pia yu nang arye, ‘Anye bira opnuyap,’ tenebikirye, mal wiyanganinyak bukni, na ni koprop ance lyenilyame.
1 Samuel 2:2 - Eipomek2 Tonda, Allah Yahweh el lek koprop, pia teleb ulye touk, yuk nang ton atonun, pia kum unyake! Aning ara, Allah elcuk, nati melin ning ara, pia tuba arenulule. Ninye arye, ‘Nun mal olan nang arye opsikcakʼ tenen, weik mutuku bulamle keil dam, keil deia pum, binuka duknunyak touk, Allah elcuk erebuka deice tam ulirye, el mikip deice arye kalikisiliba, el amu tamuk unyabe. အခန်းကိုကြည့်ပါ။ |
1 Samuel 2:2
37 ပူးပေါင်းရင်းမြစ်များ
Na nio, anda Yahweh ulyame. Aning-aning talibuka, deice tam Weik Erena Deiyoknye umince, an tenelyam ning nirya, ninye winipmanto kum pil dolyamnye. Yuk tukwak mutuku nang noutamak, an atonunye ton kum ulule. Anda Allah tonoka, Yahweh ulyame. Yuk nang ton nyanyakba, nun amul arye, ton kum kekenyabe. Yuk Allah ton pia kum ulule. Ati, nun kele, nun ni Allah atonunye, ton kum ulule, an tonoka.
“Na ni Allah, an si Yahweh ati, an si erepkine. Na nio, Israel ninye ati pia kalikuka melisilyame. Nun deiyoknye an tonok ulyame. Im deice babye, tukwak mutuku babye, an atonunye ton pia kum ulule. Anda Allah tonoka. Anti pia tuba diba tenekinyak nang arye, yuk talye ning patana kumce, an nyalyam yupu moubuka talibikirye dobolbanyak nang ati ara, ance pia bico tenesilyame. An amu tam unyak nang ati, ‘Wininamsine,’ nyapdeiamsulum yupu ara, dipkoprob tuba winisilyame. Ati tukwak mutuku babye, im deice babye, an atonunye ton pia kum ulule.
Allah arye, ‘Anggunda, ‘Naʼ tenen nang’ tenen, wipdeiamuk Israel yala nang ara, Mesir mutuku noutam, ikin weik ulamik bukni, elce, ‘Anang lobuka lyepropnamne’ tenen, sik melinanye ton dopdeibuk. Winipmanto ara, anang nirya dekukce, lyeprobuk. Tonda, Allah arye, el tenen nang ati, ‘Anggunda, pia kum batakanamsine. Pia ati teleb kilinamsina ati, anggunce, wininamlume,” nyabuka, nyalin yupu deice nyadeipyamsuk yupu nirya ara, pia min kum datue. Aning nirya ara, pia aupnamlarya! Allah ara, malye winin ning tonok babye, kum winilula ati, pia Teleb Lek Ninguk winilule. Ati ara, el ap, el si ap ati, ninye tukwak nang nirya arye, ‘Se’ tenen, ilil ubikirye, el siuk erenamake. Dipkoprop teleb ning ara, sik kanye talima noutam nirya ara, el deiceuk deiptinge.
Se, Allah ance winilyam ning nirya ara, pia diksukumuk winilyame. Ance pil dolyam ning ara, malye ning tonok babye kum ulule. Teleb winin ninguk winilyame. Tonda, Allah Yahweh ance, “Winipnamne, winibuka teleb kilinamsine,” nyabuka, nyalin yupu deice arye nyasilyam yupu nirya ara, dipkoprob nong upnamle. Tonok babye kum batakalyame. Yata nang do nirya, sikce anti, ‘Allah elcuk melibuka lyepnamnil’ tenen, an damuk yanuka unyak nang ara, ance anang ati, pia melibuka kalikinalyame. Winipmanto ara, anda nun nong lelin ning, el si ara perisai atonun usilyama ati nyapne.
Se nun ni Allah, an pia teleb diksukumuk winilyam ning ap, an weik mikip deice pil dolyam ning nirya ap ara, nun tukwak nang arye kum nuktibye. Tukwak mutuku arye deice tam dipdongobuka, im deice weik karen ak upnilyeba, anoutam lo ara, ninye arye kiklipdebuka, laka kum nyaptibye toura, an weik mikip arye, pil dolamlum ning ap, diksukumuk winilyam ning ap ara, kum nukuka laka nyaptibye. Allah anda, pia mambul weik, mikip pil akunum dolyama ati, yatanye ton, an winilyam atonun winilul do? Kume, an winilyam touk nye ton, pia kum ulule.
Winipmanto ning ara, ‘Na mal olan nang arye, yanuka opnikcak’ tenen, weik mutuku deice tam, keil dam binuka duknubuka, lelipdanirye, teleb kilamle touk, ‘Ancuk nati, melibuka kalikinamnilyam’ tenen, moropkine. Ara, ‘Na ikin unulul talak nirya ara, an damuk bibik abuka yanirye, telebuk unamne’ tenen, moropkine. Allah ance nati, “Anye tuba-tuba melibuka lyepropnamne,” nyabuka, akunum tenepnulumce, kalikinilyame. Deiyok ara ani. Winipmanto ara, ‘Ikin ning na dam yanilyak’ tenen, weik mutuku bukamlye keil do, ninye arye domikce keil aik do, aning damuk binuka duknupyeba, telebuk unamne. Aning atonun, an damuk unirye, ikin ning na dam kum yanganamle, winiplyeba, nara pia telebuk unune.
Se na ni Allah, anda im deice uminyeba, antibuk patanulula anya arye, akunuma. Yatato ning ton patapnutu do, kume. Kume, an ap neika unanam ca. An tonok ati, ‘Seʼ tenenune. Aning atouk, tukwak mutuku unamne talak ara, antibuk pataniliba, ‘Seʼ tenekunune. Tukwak mutuku noutamak aunamne talak ara, yuk ning ton, pia kum ‘Seʼ tenenune. Allah antibuk, pia mambulnye ulyama ati, ‘Seʼ tenekinirye, antibuk pia patanulule.
Yuk yala ninye nirya arye, yuk talye ning ati, Nun ni bira ani,’ nyabuka, isa si erenyak bukni, sik si erenyak ning ara, talye ninguk ulule. Bukni, an tonok ara, dipkoprob Allah ulyame. Ara, anda aning-aning nirya talimince, deice tam erebuka, Pia Mikip Weik Deiyoknye ulyama ati, anda Allah pia mikipnye ulyame! Tonda, an mikip arye weik mambul pil dolyam ning ara, yuk nang arye, ton pia kum winiptinge.
Nun ni Allah Yahweh, ance weik mambul pil weik donyaka ati ara, im deice tam kwepdeaimlum ning ap, im deice unyak nang, malaikat ap arye, an siuk pia erekinyake. Im deice umince, ninye kum winipmanto ning nirya ulyamnye ati, im deice unyak nang nirya arye, kanye deipkikirye, antibuk si erekinyake. ‘Allah Yahweh arye, ‘Wininamsine,’ nyasilye yupu nirya ara, tonok ning babye batakna kumce, aning nirya, pil dosulule. Nun tibuk moubuka kalikisilirye, teleb ulisulule,’ tenebikirye, an siuk pia erekinyake.
Allah an pil donyak malaikat, pia mikip weik nang, im deice unyakce, Allah antibuk ilil ululba, diba tenekinyakce, an siuk erebuka, si erekinyake. Sik im deice unyak malaikat nirya ara, weik mambul nang unyak bukni, nun ni Allah Yahweh anda, pia weik mambulnye ulyame. Sik im deice unyak malaikat nirya ara, an dam anyuk antanap dongobuka unyakce, an siuk erekinyake.
Ati ara, sik yuk-yuk mutuku yala nang nirya babye, sikce Allah el siuk erebikirye, ‘Anda pia telebe,’ nyanamake. Allah Yahweh ara, pia mikip weiknye ulula ati, ninye tukwak nang nirya arye elti, ilil weik unamle. Allah ara, malye winin ning tonok babye, pia kum winilule. Elda pia yuke, tonda pia teleb lek weiknye ulule.
Nun Israel yala nang nirya arye, Allah Yahweh, el siuk erenyaba ati, elti, ara, “Naio anda pia telebuk ulyame,” nyabuka, el si tuba erenamabe. Tonda, winipmanto ara, dikdik sena ati, el yan erebuka delilula dam, anggun nirya arye, kutam tuku deice dipdongobuka, kisok kanubuka, el siuk erenamlume. Nun ni koproba Allah, elda pia yuke. Malye winin ning tonok babye, pia kum winilirye. Teleb, lek dem ulule.
Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.
Yatanye do? Ninye arye, ‘Aning ara Allah atonun’ tenebikirye, yuk ning si erenyak ning nirya ara, an Yahweh uminya atonun kum uptinge. An winilyam touk, yuk Isa Mutuku Dongonye, sik mikip koproba deice arye, kum winiptinge. Tonda, yuk nang nirya ara, an winiminya atonun kum wininyake. An tonok ara, pia diksukumuk ulyame. Pia telebuk ulyame. Pia telebnye, dirina weiknye umince, ninye kum winipmanto ning, mambul pil, ninye winipmanto kum pil weik dolyame. Yata ning do nirya, an winiminya atonun kum wininyake.
Ati ara, sikda yatanye birye Allah el ulul touk uptuba, ‘El anye bira atonun ulule,’ nyaptum do? Tonda, ninye taruk arye puturubuka delilamak ning ara, urasin pia teleb ning babye, Allah asum-asum teleb ulul touk ulul do? Kume, aning ara, dipkoprob kum winipmanto. Allah el tonok anya arye, yata ning ton Allah el ulul touk uptu do? Kume.
Nara aning-aning nirya talibuka deice tam unirye, Weik Erebuka mikipnye birye nyapnukine. “Nara, Yahweh arye nyapkine. Nara, Israel ninye anggun ninye deiyoknye, Raja unune. Israel ninye anggun malye winina ati, opsitinye bukni, anggun malye ning pununa ati, namin kipsisirye, deksise. Na amu tamuk unamake. Nara, Weik Erenanye bira, na tonok unune. Na Allah Yahweh, aning-aning nirya talinirye, im deice yin talin malaikat nirya, sik weik deiyoknye ununa ati, nara deiyok kouna ap, sirya dakna ap nirya ara, weik deiyoknye, na uka. Yuk Allah ton kum ulule. Allah na tonok unune.
Ati, na mapu anggunda ilil una meme. Minop talak do winipnin yangalamuka ani, wini talak winilul ning nirya ara, narye ‘Winipnamle’ tenen, pia moubuka kel bikamsirye, kintinip deipse ning kum winilula ati do? Anggunce na winilamse ning eibuka kel bikamnuluma ati, wini talak babye eibuka kel kinululume. Anggun patasulye ning ati melin nang ara, yuk nang ton usinyak ak, kel bikamtinyeura, dipkoprob kum ulula ati, bita kel kum bikse.” Allah arye nyabuk. Nara weik mutuku yangan keil pia abukukce, bukuk touk unamne. Aning atonun, na babye pia aunune. Na aryuk kalikuka melinamsine.” Allah arye nyabuk.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Winibuka banmekce, tonye ap, ton yuknye ap, yupu nyalanmekba kekepse. Ara, sikce, sik bidamnye ati, lakuka balsusunmekce, nyanmek yupu ara, ani. “Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyame. Allah Yahweh, anda, malye ning tonok babye kum ukilya ati, anda Pia Telebnye, Pia Telebnye, Pia Telebnye ulyame. Anda dikdik senauk umince, aning-aning nirya talibuka deice tam, Weik Erenanye ulyame. Ati, an pia mambul ap, pia teleb ap, weik dirina ap, uminye ning ara, tukwak mutuku unyak ninye nirya arye elikinyake. Aning-aning nirya elinyaka deice arye, an pia mambul uminye ning nirya ara, laka ululba, eibuka kel bikinyake,” nyanmekba eipse.
Nabi Yeremia birye Allah el si erena ati, ayupu ton nyabuk. Se, Allah Yahweh, anda pia Weik Erenanye ulyame. An atonunye ton, pia kum ulule. An tonoka. Ninye pia weika arye, an si pia weik erekinyake. Tonda, anda pia mikip weiknye ulyama ati, an si babye, ninye nirya kekebikirye, ‘Se, elda weik mambul deiyoknyeʼ tenen, an siuk erekinyake.
Aning nyapmasin yupu ara, talye ati kum nyapsine. Deiyok ara, nara Allah Yahweh, anggun ni koproba Allah unune. Nara pia teleb, pia etekdopnye, leknye unune. Ati anggunce moubuka kalikilanauk umunyopura, ‘Nunda, Allah el ninguk unyabeʼ tenen, unamlume. Nara, pia teleb, etekdopnye, leknye ununa ati, anggun babye, ‘Naʼ tenen, nang ululuma ati, anggunce malye una pia kum aryuk, pia teleb kibuka umunce, etekdop lek nang unamlume.
Anyapmasin yupu deiyok ton ani. Ara, nara Allah Yahweh unune. Anggunda, Mesir mutuku ulamlum bukni, narye anggun lopdeipsisirye, telebak bobuka yanamsise. Ati, nara anggun ni Allah Yahweh unune. Ati anggunce, ‘Nunda, Allah el ninguk unyaba ati, malye winina kum aryuk, pia teleb winin nang, etekdop nanguk unamabe,’ tenepmunce, telebuk wininamlume. Na Allah ara, malye winina pia kum aryuk, pia teleb wininye, etekdop leknye ununa ati, anggun babye, ‘Naʼ tenen, nang ululuma ati, anggunce malye winina pia kum aryuk, pia teleb kibuka umunce, etekdop lek nang unamlume. Na lek pia unye touk, anggun babye atonun, pia teleb lek nanguk unamlume.
Ance Israel ninye nirya ati, nyapnamlyame. “Anggunda, malye winin ning nirya batakuka, diksukumuk winimunce, telebuk unamlulume. Nara, Yahweh unune. Nara, anggun ni Allah, malye ning ara, tonok babye kum uniliba, diksukumuk winibuka, teleb unun touk, anggun babye, malye ning nirya batakuka, diksukumuk winibuka, teleb unamlulume.
Sik minop talak seklamik yupu nirya ara, nun kel kina ap, peterena ap ati seklamik. Ara, Allah arye nunti, ‘Winibuka wininamak,’ tenyamsuke. ‘Allah yupu nirya kekebikca deice arye, sik kanye talima kwa dibleba, sikce, ‘Ikin upmasilya babye, Allah dipkoprop lyebuka melinamsile’ tenen, batakna kum, pia pi dobuka wininamake. Na Allah ati ara kum wininamake,’ tenyamsukce, el yupu nyalilamukba seklamik.
“Diba na ni Allah Yahweh, anda aning-aning nirya erebuka, deice tam Weik Erenanye ulyame. Ance mikip weik arye winilyam ning ara, na an amu tam pil donanye birye, akunum elinirye bikinun bukni, weik tonun tonap bikmanto ning tuba aupmal buk, nara, mitik anunuk akunum bikamse. Anda, ninye kum winipmanto ning, minop talak arye deiyok koubuka winilamlum ning ap, tonda anoutam arye kanye imun weik ning winiminye ning nirya ara, ancuk winilyame. Yuk mikip weik ning, allah-allah nirya ap, isa ap, mikip ulye ning ap nirya ara, im deice do, tukwak mutuku do nirya, an uminya atonun ton, pia kum unyake. Ancuk weik mambul pil nirya dolyame.
Yu ubuka ati ara, Allah arye nyapsuk. Sik dam arye, na nong ara duknupniba, sik tonap kum eipnamniake. Winipniba, sikda upra balamikca, sirya talak ara, ‘Yata wiripnamak do?’ tenen, dinamne. Sik bataknamna ara, talye ati kum bukni, deiyok ara, sik wini talak unyak nang ara, dipkoprob ning ton, kum wininyake. Malye mapu arye, sik ni yapu kum kekekirye, malye ninguk winilamak touk, atalak ninye arye, na batakuka, na nyapse atonun kum dukdongobuka unyaka ati, narye sik bataknamne.
Wini talak ara, anggun nirya arye, na kel biknululume. Dipkoprop anggun ni Allah ara, na tonok unune. Yuk Allah ton, pia kum ulule. Ati ara, naryuk kam una deiyok ap, dipna deiyok ap, aresunune. Aning atonun, teleb winina ap, malye winina deiyok ap nirya ara, naryuk aresunune. Narye, ‘Opnamsine,’ tenepnyopura, opnamsine. ‘Kwetepnamsine,’ tenepnyopura, aninguk wininune. Yata ning do nirya, ‘Naryuk talibuka wenepnamne,’ tenepnyopura, yatanye birye lyepsutu do? Kume, yuk nang arye ton, yupu kum seknitingce, kum lyepsitinge.
Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.
Tonda, Allah arye minop talak, el mikip deice arye winipra yangalamuk ning nirya babye, wini talak winilul ning nirya, yupu nyasilye ning nirya deice arye, akunum laka nyamsukce, tuba nyasulule. Ara, ‘Nun ni koproba Allah, el si ara Yahweh, el tonok ulule. Yuk Allah ton pia kume. Yuk Allah ton kum unyake, el uka,’ tenepmunce, ‘Kel kinamlulumeʼ tenen, mambul pil weik dolamsuke.
Nyabukopura, ayupu ton dukdongobuka nyabuk. “Arup arye dipdongobuka, yuk talak nirya ara, luba kina kume. Pia teninamlulume. Anggun ni koproba Allah, el si Yahweh, el tonok im deice ap, im noutamak ap, tukwak mutuku im sirya, mutuku sirya nirya ap, eluk talibuka ulule. Yuknye ton, Allah atonun pia kum ulule.
ကြော်ငြာတွေ