1 Samuel 15:11 - Eipomek11 “Se, narye Saul biti, ‘Yata ati do?’ tenen, malye kanye bopmane. Ara narye, ‘Saul bira, ninye deiyoknye Raja unamle’ tenen, erepdeipse bukni, elce tuba tamubuka, malye kipdeipmanilce, batakmanile. Narye elti, ‘Wininamlyame,’ nyapdeipse yupu, na nyapse touk, kum winipmanile ati, el bataknune,” nyabuk. Nyabukopura, Samuel el talima pia uk dibukba, Allah ati lukunyan noutamak nirya, pia malye yupu nyanmokce, moronmok. အခန်းကိုကြည့်ပါ။ |
1 Samuel 15:11
44 ပူးပေါင်းရင်းမြစ်များ
“Ninye tukwak kwepdeibseba, tukwak mutuku noutamak unyak nang ara, kum daneipniba, tukwak mutuku ara, talye lo diamuk upnamle. Tonda, sal diamuk kum bukni, kilapu ap, tuku deice balamle ning, kam un ning ayala-yala nirya ap, kwising ap, kwatima ap, maka ap, aning-aning nirya ap, kum daneipnamne. Aning-aning nirya kwepdeipsa ara, lik weik upnilye ati, malye kanye bopne,” Allah el si Yahweh arye, nyabuk.
Bukni, Allah Yahweh, el im deice pil melibuka donanye malaikat arye, weik kanye ikin uk, yala deiyok ning arena ap, tonda ‘Ninye dipnamakʼ tenen, wininanye birye, atalak ara, sik Yerusalem asik noutam ulamik nang nirya ara, obuka kum daneipnun tenebukce, kintinipmuk ning nirya, Allah Yahweh arye, dinmokce eibuk. Eibuka ati, Allah Yahweh arye, amalaikat ati, “Kume, bataknulyame. Adiparyuk winina kume,” nyabuka, yupu sekdobuk. Ara, Allah arye, ‘Amutuku noutam unyak nang nirya ara, akunum kum kipdeipnaman,’ tenepmok kanye nirya ara, adiparyuk batakuk. Winibukce, amalaikat ati nyabuk, “Ara akunuma, asukumuk deipnulyame nyabuk!” Allah arye, ayupu nyabuk talak ara, ninye ona deiyok malaikat ara, akunum Yebus mutukunye, el si Arauna, el ulamukak bukni, sik kouamik ning gandum, duk dobuka, bola kokoltalamik dam yayuk talak ara, batakuk.
Aning nirya winilamik talak ara, Israel ninye kalikuka ulamuk Allah ara, el si Yahweh arye like bitinye sum arye Salomo biti, lak kibuka nyalyayuk. Allah el si Yahweh arye, Salomo biti yu ubuk. Deiyok ara, Salomo el kanye talima nirya, Allah el si Yahweh deice kum deibukce, Allah el yupu nirya ara, moubuka kekena kumce, kum dobolbalamuk.
Saul dibuka deiyok ara ani. Ara, Saul birye Allah ati, “Winipnamne,” nyamuk ning ara dukdongobuka kum winilamukce, batakuk. Aning ara, Allah Yahweh nyamuk yupu ati, dukdongopra kum ulamuka deice arye dibuk. Tonda, Allah Yahweh arye, “Wininamlume, aning ara, pia kum wininamlume,” nyapdeiamuk mem yupu ati ara, Saul birye ayupu kekebuka kum ulamuka deice arye dibuk. Aninguk kum bukni, Saul bira, Allah ati, “Na walwal upnil ning ara, ance lake nyapnilyame, aninguk unamne,” nyabuka, kum moryamuk bukni, elda ninye diamik nang, sik kanya ap, yupu nyana kel nang, sik dam bin morobuk. Elce, ‘Aning winipnamne do, aning winipnamne do?’ tenena kum arye, walwal ulamuk talak ara, amalye pil dobuka ulamaik nang, sik dam binuka, morobuka ati, Allah Yahweh arye Raja Saul el wenen ati, arebukba dibuk. Dibukopura, el pununa ati, Allah Yahweh arye Saul elce Israel nang ati, ninye deiyok kibuka, Raja kiamukce, amutuku nirya talilamuk ning pununa ati, aning nirya dobuka, Isai el mi Daud ati arebuk.
Tonda, Allah arye, ‘Yerusalem mutuku nang obuka sirya daknamne,’ tenebukce, el pil amu tam donanye, ninye opmanto malaikat wipdeibukba, Yerusalem mutuku noutam ulamik nang olyangana ati yayuk. Bukni, amalaikat yanuka kintinip deibuk talak noutam arye, gandum duk daklamikce, duk teleb ning wina ati pil dolamikak ara, Yebus mutukunye el si Arauna, el ulamukak arye, ‘Ninye opnunʼ tenen, malaikat arye akunum kintinip deibuk. Winibuk talak ara, Allah Yahweh arye, tuba ton ap kintinip deibukce,’ Se, Yerusalem mutuku unyak nang nirya obuka sirya daknuneʼ tenepmana ara, bataknirye kum winipnune,’ tenebuk. Utenebukce, el pil don malaikat ati, “Winina meme, bataknulyame. Asukumuk deipnulyame,” nyabuka yupu sekuk. ‘Amutuku noutam nirya ara, akunum kum kipdeipnamne,’ tenepmok kanye nirya ara, adiparyuk batakuk. Winibukce, yupu nyapdeibukba, amalaikat kekebukce, batakuk. Ninye ton ap kum oplobuk.
Winilula deiyok ara, ani. Ara, sik adeiyok-deiyok nang ara, Allah elce, “Aning wininamlume, aning ara pia kum wininamlume. Teleb un ning ara, ani,” nyapdeiamsuk ning nirya ara, anang arye akunum yaniltaklamik ati, olule. Diba, Allah arye nyalul yupu, moubuka kum talikirye, ‘Aning ara, talye yupu uka, dauplye,’ tenenyak ninye ara, Allah arye wenebuka olule.
Dipkoprop Allah Yahweh arye, na deiyoknye ati nyabuk. Na Allah Yahweh arye, akunum nyapkisa ati, anyapkise ning ara, tonap tenepnirye, yuk ning ton kum punubuka nyapnamne. Ara, na Allah ap, ninye ap, teleb ubuka neika una ati, ansinilina deiyoknye pil talibuka pia donamlyame. Ara, minop talak ulamuknye, el si ara Melkisedek birye, apiluk talibuka dolamuk touk, an babye, apiluk talibuka pia donamlyame.
Allah ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, yuk ninye batakikirye, yanibicopura, na eipnirye weik arye, engenmanye talak ara, na asing maka ara, mek pu dobuka balamle tonun unulule. Yuk ninye arye, an yupu yaninyaka anya arye, engena weik arye engenune. Ara, ‘Se, yata deiyok ati, Allah el nyalye yupu yaniltanyak do?’ tenen, engenune.
Bukni, yuk nang arye, sik kanye deice aryuk, ‘Malye winin ninguk talibuka wininamap’ tenen, teleb winin bisik ara, batakikirye, kwalin bisikuk banyak nang ara, Allah Yahweh arye, anang nirya ara, dobukaplirye, pia malye-malye ning weik wininyak nang ap, tabaklirye, pia yukak, pera mutuku bobinamle! Bukni, nun Israel yala nang ara, ‘Allah arye pia teleb kipdeipsilirye, ansinip deipsiliba, pia kanye deibuka, telebuk wininamap’ tenen, Allah ati moronyabe.
Sikda, pia mek kum sukum balamik talak ara, malye weik winilamika deice arye, Allah el kanye ara, ‘Se, yata ati, na bataknikirye, malye-malyeuk tuba wininyak do?’ tenelamukce, mambul kanye bobuka, el kanye bouku sukulamuk. Israel nang arye amalye weik ulamika deice, Allah arye sikti, malye kanye bobuka, wanauk ulamuk. Allah elda, Pia Teleb Lek dem Ululnye birye, Israel nang ati pia kalekuka meliamuk. Elce sik Israel nang ati, pia melinauk ulamuk bukni, sik malye ulamika deice, Allah arye sikti, malye kanye bomukce, yu ulamuk.
Ara, sik apu yapu arye, malye weik winilamik touk, atalak ulamik Israel nang babye, Allah ati tuba diba kum tenelamikce, elti, batakuka, malyeuk winilamik. Winipmanto ara, ninye on kwatima ara, kwalipmalye mal arye dobikiba, moubuka, kum bikilbitue atonun, sik anang, sik kanye talima nirya ara, akunum kwalibukba, Allah ati, diba kum tenelamikce, el yupu tuba talibuka kum dobolbalamik.
Ayupu nyabukba, Musa birye, Allah el si Yahweh arye, ‘El tenepmal kanye ara, namin kipturye bataktue’ tenen, ayupu nyabuka, Allah ati morobuk. “Se na ni Yahweh, an yu weik upkiliba, ‘Israel ninye wenebuka opnamne,’ tenepmalam ning ara, yata deiyok ati do? ‘Yu upmakil ning ara, bataktum do?’ tenen, moropkine. Aninye nirya ara, Mesir mutuku noutamak ulamik ani, an taruk mikip deice arye boyanamsulume. Tonda, ninye kum winipmanto ning, mikip weik pil dopluma deice, dalubuka boyanamlum ninye ati, ‘An yu aninye deice kum deipnamlyam’ tenen, moropkine,” Musa birye Allah ati nyabuk.
Musa birye, Allah el si Yahweh ati, ayupu nyabuka ati ara, Yahweh arye, ‘Yo, amalye ning wininmak ninye nirya wenepnirye, obuka sirya daknamane,’ tenepmanua ara, bataknirye, ‘Akilisal kum opnamane,’ tenebuk. Utenebukce, Allah arye yu upmok ning nirya ara, aninye sik nong deice ikin ning kum deibuk. Winibukce, Allah el yu upmok ning ara, batakukce, tonap teleb kanye bobuk.
Ura, min talak anggun apu yapu arye, na nyapdeiamse yupu moubuka kum taleamikce, malye kanye doubuka, malye-malye winilamik touk, sik asukum unyak nang babye, atonun akunum malye wininyake. Ara, sik anang arye talye ning ati, ‘Nun ni koproba ani,’ nyabuka, isa si erenyaka deice arye, narye sik apu yapu ati, ‘Aninguk winilnamlume,’ nyapdeiamse nyalin yupu ara, akunum yaniltaknuk wininyake. Sik ayupu moubuka talibikirye, kum dobolyanganyake. Ara, sik Israel yala nang babye, Yehuda yala nang babye, sik apu yapu ati, “Aning-aning talibuka, wininamlume,” nyapdeiamse yupu ara, sik asukum unyak nang arye, akunum batakuka yanilongonyake. Wininyaka deice arye, narye nyapdeiamse yupu akunum yanibuka bataknike.
Anggunce na Yeremia nyapdeipsin yupu, kum kekepnumunyopura, na adiparyuk, ninye babye kum banyakak dabinirye engenamne. Ara, sik kanye talima erena deice arye, maknya kilanyaka ati, nyapne. Na asing maka langdipnilirye, saknamnile. Ara, winipmanto ara, anggunda, Allah el weilul domba atonun ululum bukni, yu nang arye anggunti opsikirye, tomobuka sik mutuku tamubuka bobicak arye, wenen aik dongopnamsiaka ati, aning eipnirye engenamne, nyapsine. Nabi Yeremia birye, nyabuk.
Nyaplum bukni, mitik tonun aminyan talak ara, anggun nirya arye, na si ati, malye kipdeipnulume. Ara, anggun pil melibuka don nang, sik anang sik babye tuba, ‘Aning patapsile,’ tenelamik touk, akunum bataklumba, binamik bukni, anang nirya ara, tuba tamubuka doproplumce, pil tamubuka aruklumba, tuba ikin piluk donyake. Aning winipluma deice arye, na si malye kipdeipnulume.
Na patapnil ning ara, ani. ‘Na kisok noutam ara, mek weik deibuka langdiptua deice arye, na asing maka mek durupna deibikiba, balamle touk kipnutueʼ tenen, patapnile. Aning atonun, ‘Na asing maka, mek pu dobuka balamle atonun kipnutuba, pia engeptinyeba, na asing maka pia saktueʼ tenen, patapnile. Winiptopura, lukunyan talak babye, keting noutam talak babye nirya, malye kanye bobuka, engena dem uptinye. Ara talye ati kum engenune. Bukni, nun olana nang ara, yuk mutuku yu nang arye, na mutuku nang yupa weik akunum obuka, sirya dakaca ati engenune.
Bukni, ninye ton teleb ninguk, winipnin balamlya ani, aminyan talak ara, aning nirya batakuka, malyeuk uplyopura, kam pia unamle do? Kume, elce diksukum ninguk, winilamlye bukni, aning nirya bataklirye, elda pia malye-malyeuk, unyak ninye winilamak touk, pia winiplinye bira, dipkoprob kam unamle do? Kume, elda kam kum unamle. Teleb ulamlye bukni, tuba tamubuka, malye winin ninguk, deiyok kouplirye, tabakuka weik arye, malye upnin balyopura, min arye teleb winilamuk ning ara, tuba kum tenenamne. Aning kum bukni, malye-malye un ning, yala-yala weik winipnin balye ning ap, nati, ‘Se, na ni koproba, an amu tamuk, pia unamkine,’ nyapnuk bukni, bataknilye ning ap ati, wenebuka opnyopura, dipnamle.
Nyabuka moropsebuk, Allah Yahweh arye, ‘Winibuka wenepnamsine’ tenen, kintinip deibukce, laka kipdeibuk ning ara, batakuk. Allah arye tamubuka tenibukce, ‘Aning ara, tuba kum winipnamne’ tenen, batakuk. Batakukce, tuba tamubuka nati nyapnuke. “Narye ‘Israel ninye wenena ati winipnamne,’ tenepse ning ara, kum winipnamane,” nyapnuk.
Sik Niniwe mutuku ninye nirya, aninye nyanmik ning nirya ara, Allah eibuk. Tonda, sik malye winilamik ning nirya batakikba, aning ton eibuk. Winibikba eibuka ati ara, ‘Niniwe mutuku ninye nirya opnamne,’ tenebuka, nyalamuk ning ara, akunum batakuke. Bicoe tenebuka, kum oplobukce, Niniwe mutuku ninye nirya ara, tonoknye babye ton, obuka sirya kum dakuk.
Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.
Tonda yata nang do nirya, sikce, ‘Se, nun ni Allah arye, yata yupu nyapnamsil do?’ Tonda, ‘Nai ance nunti, kalikuka melinamsilamʼ tenen, na dam ton yanuka, kum moroninyake. Tonda, sik anang arye, ‘Se, nun yata wiripnamap do? Teleb ning ara, aning do, aning do?’ tenen, na Allah ati, tuba kum asininyak nang nirya babye, wenebuka opnirye, sirya dakuka, kum daneipnamne. Ara, sik anang nirya ara, na Allah ati, melibuka kum dobolyanganinyakce, akunum bataknika ati, opnirye pia kum daneipnamne. Tonda, ‘Allah arye, yata yupu nyapsiliryeba, aninguk talebuka dobolyanganamap do?’ tenen, na dam yanuka, na yupu kum kekenenyake. Wininyaka ati, anang nirya opnirye, pia kum kipdeipnamne.
“Kume, Allah el mapu, nun Israel yala nang nirya arye, anggunti nyapsiabe. Anggun Ruben yala nang ap, Gad yala nang ap, tonda Manasye yala nang bukni, dana tam nang ap, anggunda yata deiyok ati, nun Israel nang arye, si erenyab Allah, el dam malye pil dopmalum do?” nyabuka asibik. “Ara, anggun kanye aryuk tenebuka, Allah si erena ap, arena ap ati, mesba ton memepdeipmaluma deice arye, Allah el si yanipmalume. Nun Israel yala nang nirya arye, el siuk erenyab Allah Yahweh ara, anggunce akunum batakmalumce, amesba ning deipmalum do? Nun kanye ara, apil dopmaluma deice ara, Allah arye, ‘Aning ara, wininamlume, aning ara, pia kum wininamlume. Aning ara, ur talipmunce, wininamlume,’ nyabuka, sekeiamsuk ning ara, anggunce, el yupu malye kipmalumce, yaniplopmalume, tenepmabe,” nyabik.
Tonda, narye wininamne ning ara, nyapnusine. Narye anggunti, Allah kum moropnyopura, pia malye uptinye. Amalye winin ning, pia kum winipnamne,’ tenenuna ati ara, narye pia kum bataknamsine. Narye anggunti, tuba-tuba Allah moronauk unamsine. Tonda ‘Israel ninye arye, teleb diksukum una bisik anye, tenebuka, kel kinamlum’ tenen, narye diksukum winin ning, tuba peterenamsine.
Nyabukba, Samuel birye tamubuka, Saul biti nyabuk. “Kume, pia moupmince, unamlyame. Walwal arye, pia malye winipmalame. Nun ni koproba Allah, el si Yahweh arye, ‘Winipnamlulume,’ nyalisulul ning atonun, ance kum winipmalame. Ura, aning kum bukni, an kanye aniryuk tenepmalam ning ara, akunum winipmalame. Allah arye ‘Winipnamlulume,’ nyalisulul ning atonun, akunum winipmatum toura, Allah arye, Israel ninye unamak mutuku noutamak ati, melipkutuba, an ap, an mapu ap, an yala nang ap arye, Israel ninye, sik ninye deiyok nang pia unamtinge.
Ati wini talak ara, anggun nirya bimunce, ‘Bico,’ tenena kum diparyuk, Amalek ninye nirya opnamlulume. Tonda, sik talibik ning nirya ara, tonok ning babye, ton kum bataknamlulume. Aning nirya obuka, sirya daknamlulume. Sal ap, kilapu ap mapu ap, kilmapu ap, moum din mapu, aling pum lin mapu ap opnamlulume. Tonda, Amalek nang, sik sapi ap, domba ap, unta basam ap, keledai basam ap, nirya obuka, sirya daknamalulume,’ Allah arye nyapmakile,” Samuel birye nyabuk.
Atalak arye, deiyok koubuka, doketing tamun noutamak nirya ara, Samuel el yuk daulamuk. El kam tuba ulamuk talak nirya, tuba tonap tamubuka, Saul el dam kum balamuk. El dipnamuk talak babye, Saul ap ton kum elilalamdik. Bukni, Samuel birye, Saul biti, pia tenelamukce, engelamuk. Tonda, Allah arye Saul biti, ‘Se, anye wipdeipsiba, Israel ninye talibuka, sik weiknye Raja ulamuk ara, na kanye malye upnile,’ tenebuk.
Bukni, Saul ap, el mapu ap arye, Raja Agag bira, urdem tongobik. Aning atonun, atam ninye, sik pia teleb domba ap, sapi ap, kambing ap, sapi mi nong pia teleb weik ning ap, domba mi urasin teleb ning nirya ap, yuk yala ning, dekna weik ning teleb ning nirya ara, kum obik. Aning-aning nirya, urasin malye ning ap, mikip kum ning ap ara, obik bukni, urasin pia teleb ning ara, doprobik.
Allah el si Yahweh arye, Samuel biti nyabuk. “Like yata barye atonun mapmince, Saul biti engenalam do? Ara, urdem ati kume. Saul birye, Israel ninye deiyok talina ati, weik Raja kiamuk ning ara, na akunum bataksa atie. Tonda, wini talak ance minyak zaitun mek kwebuka bopmince, Betlehem mutuku binulyame. Ara, ninye deiyok nang kina ati, bikilin ning ati ara, aminyak mek, sik kisok deice likibikirye, erenyake. Amutuku noutamak bukni, mutuku si Betlehem mutuku ara, tonoknye el si Isai, el dam binulyame. Deiyok ara, Isai el mapu noutamak, tonok mi ara, narye akunum wipdeipsa ati, ance ninye deiyoknye, Raja wipdeipnamlyame,” Allah arye, Samuel biti nyabuk.
ကြော်ငြာတွေ