1 Samuel 14:6 - Eipomek6 Yonatan birye akamnye, el yin melibuka bobanmok kamnye biti, nyabuk, “An adiparyuk minop yaminba, nun neika binimirye, Allah el si kum bikikce, kum erenyak nang, sik Pilistin nang arye, sik kalikina ati, yaka kin asik dobuka yan unyaka dam binuname. Binimnyopura, nun ni Allah Yahweh, elce nunti melipsilirye, ninye obuka, sirya dakan ning, nun deice deipnamsile. Melipsilyopura, Allah elce, sik Pilistin nang dobuka, nun taruk deice deipsiliba, sik anang nirya opnuname. Ara, ninye mitik tonun do, weik tonun do, kum teneipnuname. Allah el mikip deice arye, ninye weik aunyaka babye, ‘Opnirye sirya daknamne,’ teneplyopura, akunuma elce olule. Ati, elce melipsilya deice, obinimirye binuka, anang nirya obuka, sirya daknuname,” Yonatan birye, el melipmok kamnye biti nyabuk. အခန်းကိုကြည့်ပါ။ |
1 Samuel 14:6
31 ပူးပေါင်းရင်းမြစ်များ
Dipkoprop ara, Allah arye nyabukba ulul kum danya? Anye birye malye yupu na deice deipmanilba, Allah el si Yahweh arye kanye imun ning arepnil ning ara, eiplirye bico tenepnilyopura, amalye ning nong pununa ati, teleb kipdeipnamnil do, kum do? Dina uk unamne. Pirildenilye ning punubuka Allah arye tamubuka teleb upnamnil ca, tenepne,” Raja Daud birye nyabuk.
Tonda Asyur mutuku ninye deiyoknye birye, yin talina deiyoknye biti nyalinmoba, nyapdeipmasil yupu nirya ara, Allah el si Yahweh arye, kekenmal do, kum do? Allah ara kam pia ulamlanye ulul bukni, Asyur mutuku weik deiyoknye birye, Allah elti, pia malye yupu nyabuka nalinmoke. Aning ara, Allah akunum kekepmalce bikmal do? Na kanye ara, ance el si erebuka el piluk dolyam Allah arye, amalye yupu kekeptopura, ‘Dipkoprop Asyur mutuku talibuka deiyoknye biti wenepnamlarya,’ tenepne. Na walwal bukni, Allah elda kele. Ati ara, ‘Allah el si Yahweh arye, wenen ning el nong deice deipnamimile. Tonda anye birye, bisibuka opsilyopura, Allah ati moronamsulum’ tenen, nyapkine. Tonda, opsiliba, mitik anun tuba kam unamak nang ati, ‘Allah arye, anang meliptue’ tenen, Nun ni Allah ati moropnamsulume. “Nun ni koproba Hizkia birye ayupu nyapdeipmalba, nunce nyapkiyabe,” nyabik.
Wininmarik talak ara, Yudea mutuku ninye deiyoknye Asa birye,el si erelamuk Allah, Yahweh ati morobukce nyabuk. “Se, na ni koproba Allah Yahweh, ancuk ninye mikip kum nang ati melisilyame. Nun babye, mikip kum nang unyap bukni, otam mikip weik nang dam binuka opdanuyap ati, ancuk nunti Melipsimince, mikip arepnusilam tenen, moropkine. Ati wini talak ara, nun melipsilyame. Ara talye ati kum nyapne. Nunce an tonok, ‘Allah Yahweh aryuk melipsutueʼ tenen, unyaba ati moropkine. Tonda, nun ni koproba Allah Yahweh, wini talak ara, nunce ‘Ancuk melipsutumʼ tenen, dinauk ukinyaba ati, nun ni koproba, an si deice arye yanuka, otam yin talen nang, mikip weik nang, sik yupa nukmanto kum arye kintinibuka, otikmakce, kama ap, yuk ninye olan ning nirya ap bobuka tikmake. Ati, Allah Yahweh, anda nun ni koproba ulyama ati, ‘Naio, otikmak nang arye, obuka malye kipsicakʼ tenen, tonda an tenen nang ap, an ap ati, ‘Malye kipsitingce, obuka sirya kum daksitingʼ tenen ati, moropkine. Tonda, ‘Ance mikip arepsiminyeba, nunce anang obuka sirya daktibyeʼ tenen, moropkine na nie.” Raja Asa birye nyabuka morobuk.
Allah arye ayupu nyabukopura, ayupu ton dukdongobuka nyabuk. Nara Allah Yahweh arye, nyapsine. Sik kel weik bikamik nang arye, ‘E, nunda kel weik bikupu ati, nunda mambul weik nang,’ tenena kume. Winibuka tenebikirye, sik talima babye erebuka, kwalina kume. Tonda aning atonun, anggun mikip weik nang ara, “E, nunda mikip weik nang unyaba, ati, nunda mambul weike,” nyabuka, maknya kintina kume. Aning atonun, sik bona weik talin nang babye, ‘E, nunda aning-aning yala-yala nirya talinyabe. Tonda, bona weik talin nang unyabe. Tonda, nunda mambul weik nang unyabe,’ tenebuka, maknya kintina ap, kwalina ap, pia meme.
Nyabukopura, ayupu ton dukdongobuka nyabuk. Nara, Allah Yahweh arye nyapsine. “Na dipkoprob nyapsine. Aminyan talak ara, sik tuba malyeuk wininyak nang nirya ati, weik tonun wenepnamsine. Sikda, yuk nang arye, nunti, ‘Allah el ‘Naʼ tenen nang unyake, ‘Tenenansiak’ tenen, min arye nyalamsise touk, anggun ninye den bol mouse tam sekelulum bukni, anggun talima noutam ara, malye winin ning, aupmasili buk winilulume. Aning atonun winilulum nang ara, aminyan talak anggun dengna dopropnalume.
Tonda, narye, ‘Winina kume,’ nyapdeisise bukni, anggun amul dam kisok potong akunum koplirye, Mesir mutuku ap, Yudea mutuku ap, Edom mutuku ap, Amon mutuku yala nang ap, Moab mutuku noutam ululum nang ap ati, nyapsine. Tonda, anggun mek kum ati, ninye kum unyak mutuku bukni, pala weik pata mutuku noutam ululum nang arye, ‘Nun isa mer arye, kanye deipsiting’ tenen, anggun amul deice tam, kisok potong kolulum nang babye, anggun Israel nang yala nirya, amutuku noutam nirya ululum nang babye, anggun nirya ati, weik tonun wenepnamsine. Deiyok ara, anggunce, ‘Yuk nang arye nunti, ‘Allah el mapu koproba unyake, tenenansiak’ tenen, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba upsuka ati, nyapsine. Aning atonun, anggun Israel yala nang nirya babye, anggun mapu den bol mouse ning sekelulum bukni, dipkoprob anggun talima noutam ara, malye winin ning pia tuba aupsukba, malye ululume. Anggun nirya ati, wenepnamsinarya, nyapsine.” Allah arye nyabuk.
Aning atouk, ‘Malye winin ning ara, nun like’ tenen, pia diksukumuk unamlume. Yata malye winin ning do nirya, malye ning nirya batakmunce, ‘Aning ara, nun like’ tenen, malye ning pia kum wininamlulume. Winibuka umunyopura, dinamlume. Winipmunyopura, nara, Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggunti, melinamsine. Telebuk winimunyopura, narye minopce wenebuka kum opsinirye, tuba tamubuka, tonap bico tenepsinyopura, Yusup el yala ninye ati, teleb updeipnamsine. Ara, anggun apu koproba, Yusup birye deiamukba, dadeipdanin yangalamika ani, wini talak babye ululum Israel ninye ati, na Allah Yahweh arye anggunti, bico tenesipnirye, melinamsine.
Se, anggun amutuku noutam ululum nang kan-kan arye, anggun kanye amu tam kibuka ululum nango, anggun adiparyuk, Allah Yahweh el dam tamubuka yalulume. Tonda Allah arye, ‘Aning ara, wininamlume, bukni aning ara, pia kum wininamlume,’ nyabuk ning, talibuka winilulum nang ara, tamubuka Allah dam yamunce, Allah elce tenelul touk, winipnamlume. Tonda, ‘Atalak ara, nun ni Allah arye, yata nyapnamsil do?’ tenen, Allah dam tamubuka yamumce, moubuka kekedenamlume. Ara, kanye lamapdongobuka, Allah dam yamunce, kanye erelana kum aryuk, namin kanye bonamlume. Tonda, Allah arye, ‘Wininamlume, wininamlume. Diksukum winin ning ara, ani, aninguk talibuka, telebuk wininamlume,’ nyabuka laka nyapdeiamsuk yupu kekebuka, aninguk talibuka, telebuk wininamlume. Winipmunyopura, Allah Yahweh el yu, ‘Anggun Israel nang deice deipnamsin,’ tenebuk sum ara, anggun telebuk winilulum nang deice, ‘Bico tenepsuturye, wenen ning kum arepnamsil do? Arepnamsil do?’ tenena atia. Bukni, el kanye ara, nun walwale.
Amalaikat arye, na Zakaria biti, nyapnuke. “Anda, ninye si Zerubabel dam binuka, elti, Allah Yahweh arye, nyapdeibuk yupu ara laka nyapnulyame,” nyapnuke. Ara, ance elti, nyapnalam yupu ara, ani. “Zerubabel an teleb winipnamlam ning ara, an mutuku yin talen nang, sik mikip weik deice arye, mambul pil kum dopnamlame. Aning atonun, ancuk mikip deice arye, kum winipnamlame. Aning kum bukni, na Allah Yahweh arye, na mikip weik ulul Pia Teleb, Lek Dip Kanye, el mikip weik, an deice deipkiniba, aning aryuk, narye, ‘Anye apil dopnamnile,’ tenepkise mambul ning ara, winipnamlame. Nara, Allah Yahweh, im deice unyak yin talen malaikat nirya, sik deiyoknye ununa ati, anyapmakin yupu ara, dipkoprob nong upnamlarya!
Asilanmek ati, Yesus arye tamubuka nyabuk. “Ninye mikip ap, ninye arye wininyak ning ap, adeice arye ninye kum lyepdatinge. Bukni, ninye arye kum winipmanto ning nirya ara, Allah elda, kanam aryuk apil dolule. Allah elcuk malye ninye babye, teleb ninye babye, kanam aryuk lyelule. Aning-aning nirya, Allah el mikip deice aryuk, kanam aryuk pil dolule. Allah ara ikin kum uptua ati, Allah arye lyepnamle ninye ara, kanam diparyuk lyepnamle. Ikin kum uptue.” Yesus arye nyabuk.
Arup talak, “Allah arye akunum teleb kipdeipsuk ning ani,” nyabuka laka nyapmasin yupu ati ara, yata yupu ton tabakuka nyaptibye do? Kume, Allah arye akunum bico tenyamsukce, nunti wipdeipsukce, melibuka pil dosulula anya arye, yatanye ap, yata ikin ning ap arye, malye kipsutu do? Aning nirya ara, malye kum kipsutue.
Tonoknye biryuk, seribu yin nang ati, dobol bitu do? Aning atonun, bitinye nang aryuk, 10.000 yin nang ati, obisiptiringce, ‘Minopce bindoplulume,’ nyaptiring do? Kume, aning ara, kum winipmanto. Dipkoprop sikti, Allah arye anang ara, ‘Dauaplye, sik oploptinge’ tenen, kum nyaplyopura, aning kum winipmanto. Anggun ni Yahweh arye, ‘Israel ninye oploptinge’ tenen, kum nyaplyopura, yuk mutuku nang arye, kum obuka sirya daktinge. Weik mutuku tikne keil, pia aulamle touk, sik ni koproba Allah babye, pia kaliklamuk bukni, Israel ninye, sik wenena ati, Allah arye sikti batakamukba, sik mal olan nang arye, obuka sirya daklamike.
Bukni, nunda dipkoprop malye ning batakuka, Allah el na tenen ninye unyabe. Ati, ‘Sik Yahudi yala nang ninye ara, malye updeipsicak’ tenen, memelonamlulume. Nunda, Allah El Dib Kanye arye, el mikip arisilya deice arye, Allah el si erenyabe. Nun kanye talima teleb ulin ning ati ara, nun bidamnye mikip ap, nun nong winilamap ning ap, adeice arye, ‘Telebuk winilinamabe,’ pia kum tenenyabe. Aning tenena kumce, ‘Yesus Kristus elda weik mambule’ tenen, ‘Elce pil dopsuka deice aryuk, teleb ulisulule’ tenen, dib tenenyabe.
Ati ara, Allah Yahweh arye, “Kalep biti, amutuku dobuka arepnamlyame,” nyabuka, nyalina yupu deice arye, nyapdeiamuk mutuku ara, iknapye tam ara, na ap, na melina nang nun nirya ap, neika unmaburye, laka nyana yupu bobuka, laka nyalyanamupu nang ati, amutuku bokuka arepnusilyame. Atalak ara, nunce nyapdeibupu ati, an Yosua birye, kekenmalum ning ara, tuba biknulyame. Ara, nunce nyapmapu ara, ‘Pia teleb mutuku oulul bukni, amutuku noutam unyak ninye ara, nong cang weik nang unyake. Sik si ara, Enak nang unyake. Tonda, sik aninye nirya ara, keil pala kat keil deice arye, aik dobuka, poka dobikce unyak ara, sik asik dobuka, antanap dongamika ati, sik asik ara, ulubuka daklopmanto kum ninye unyake. Dipkoprob, mikip weik nang unyake. Na walwal bukni, na kanye ara, Allah Yahweh arye, nati melipnilyopura, winipniliba, narye sik aninye nirya ara, obuka sirya daknirye, yaknamne. Ara, Allah Yahweh, elce nyapdeiamuk touk, winipnamabe tenepne. Kalep birye, Yosua biti nyabuk.
Atalak ara, Simson bira mek pia patabukba, Allah el si Yahweh ati weik arye moronmok. “Se na nio, nara an amu tam unirye, an piluk donune. Arup ara, an mikip weik arye na deice deipmanilamba, ninye weike opmanu bukni, ‘Wini talak na weik arye mek teleb ton diptinye,’ tenepmana deice arye, mitanguk upnila ati dipnaman do? Dipnyopura, sik Pilistin nang arye, na nong dopropnamniyak do? Sikda anti dib kum tenenyaka anya arye, den bol mouse sekna kum nang unyak bukni, amalye nang noutamak dipnamne do?” Simson birye nyabuk.
Ura, Daud birye, asum sik dam tikilbiyukce, sik dam atikilyanmek nang ati asipdeyuk. “Se, sik Pilistin nang ara, pia teleb ning ton kum wininyake. Allah arye, ‘Aning ara, wininamlume, aning ara, pia kum wininamlume,’ nyapsuk yupu, pia kum kekekirye, Allah arye nyapdeipsuk touk, sik mapu den bam bola deice tam, kum sekenyaka anya arye, Allah dam kum bitinge. Nun ni Allah ara, pia kamuk ululnye binya arye, yata deiyok ati, amalye ning Goliat bira, nun si erenyap Allah ap, elce wipdeiamsuk ninye ap atibuk, ngalukuka nyalirye, malye kibuka, malye yupu nyapsutu do? Aning ara, pia malye ulule,” nyabuk. Nyabukopura, Daud birye atikmok yin telenanye tonok ati, asipdeyuk. “Raja Saul birye, Pilistin nang oplinye biti, yata dengna arepnamle do? Tonda, anye birye, Israel ninye ati, ‘Likʼ tenen, yupu nyamuk ning ara, anye opmalya deice arye, malye nyasulul yupu kilipnamle. Ati, Goliat oplinye doproptu dengna ara, nun ninye deiyoknye, Raja Saul birye, yata ning arepnamle do?” nyabuka asipdeyuk.
Ati ara, na an pil melinanye birye, bai ulamle kam do, weik yu kuse do, yuk yu ning do, naryuk aning nirya onune. Ati, anye Goliat bira, talye bai tam, yu ning oltakalamse atonun oploptinye. Elda, Pilistinye anya arye, sik den bam bol kum sekenyak nang ara, talye nang ati ara, elti, oploptinye. Deiyok ara, ani. Ara, elce aning-aning nirya, deice tam ulul Allah, Kam Una Deiyoknye ulirye, Israel sik yin talin nang nirya wiamukce, kalikuka melilule. Bukni, Goliat birye, Allah el ‘Naʼ tenen, ninye ati, malye yupu tanmalce, Israel yin talin nang ati, ‘Obuka, sirya daknamne’ tenen, yanmala ati ara, Allah melipnilaba, anye oploptinye.
Tonda arup Allah arye, anti opnamakilarye, akunum kintinipmakile. Allah arye melipnilaba, an akunum opnamakine. An kisok duk daklopnamakine. Opkinirye, an nong ap, Pilistin yin talin deiyok nang ap, anggun nong nirya babye, oplopkinyeba, maka ap, tukwak talye ulamle ning nirya arye dipnamakiyake. Winipkilyopura, mutuku-mutuku nirya unyak ninye arye, kel biksikirye, ‘Diba Israel ninye ara, Allah ap unyake’ tenen, kel kibikirye, Allah elti, si erepnamake.
Ati ara, aunmak ninye nirya eibikirye, kel biknamake. Ara diba, Allah el si Yahweh, elda talye ning yo taca ap, parang ya ap deice arye, ninye kum lyesulule. Ninye nirya, olanyak bukni, olbisina ap, lyena ap ara, Allah el si Yahweh, el mikip deice aryuk aresulule. Elcuk lyesulule. Utenebikirye, kel biknamake. Arup olanamaba ara, Allah elcuk melisulula anya arye, aolan talak ara, Allah el mikip nun deice deipsiliba, anggun Pilistin ninye obuka, sirya daknamasiyabe,” Daud birye nyabuk.
Dipna dam ubuka ati, Saul birye, el mapu yin talinanye, el ninye olan ning bobana ati, melibuka balamuknye, tonok ati nyabuk. “Wini talak ara, an bopmalam parang ya arye, dobuka lukdongobuka, opnilyame. Kum opniminyeura, sik Pilistin yala nang, pia malye unyakce, den bol mouse kum sekenyak yala nang arye, opnicake. Sikce opnicopura, na nong dobuka, arikal dolamaka atonun, winipnicake. Tonda, ‘Na nong dobuka, pia malye kipdeipnicak,’ tenepne. Aning ara, pia malye ati, nun babye nun yalanye, ancuk an parang ya dobuka, opnilyame,” nyabuka morobuk. Nyabuka morobuk bukni, el melinanye, ilil weik ubuka ati, Saul kum obuk. Tonda, anye birye, Saul biti, weik arye si erebukce, ‘Na ni kum optinye,’ tenebuk. Winibukba, Saul el bidamang aniryuk, cang parang ya dobuka, tukwak ikdeibukce, itam arye sakuka, lumupdayukba dibuk.
ကြော်ငြာတွေ