Aning ara, urdem ati kum nyapne. Na ni koprop Allah, el si Yahweh arye, ‘Wininalyame,’ nyapdeiamsuk yupu moubuka kekelamsirye, el yupu talibuka ulamse. Nara, binan arye ulamsirye, Allah elce, ‘Wininamlume, aning ara, kum wininamlume,’ nyamsuk yupu uk, kekebuka dobolbalamsirye, Allah batakuka, malye kum winilamse. Ati ara, dekna weik ning arepnuke.
1 Samuel 12:3 - Eipomek3 “Ati, wini talak ara, na anggun dam atikmane. Tonda, nun ni koproba Allah, el si Yahweh arye, dinmasile. Tonda, nun ninye deiyok talina ati, Allah arye wipdeipmasilnye, Raja Saul ap arye dinmanile. Sik bitinye dinmasiraka ati ara, winipmanto, narye anggun dam malye winipse ning ton, auplyopura, adiparyuk laka nyapnamlulume. Winipmanto ara, narye yatanye sapi basam ubula dopromse do? Tonda, yatanye el keledai basam ton, ubula dopramsise do? Tonda, anggun dam tilila yupu ap, malye yupu ap, duknubuka nyapsisa deice arye, namin kilongona yo bok ap ton dopromsise do? Yatanye anggun nong deice, ikin ning deiamsise do? Tonda, malye nang ulamik ning, yupu lipsisikuka bokolina deiyoknye, ulamse talak noutamak ara, yatanye birye, yo bok arepnuka deice arye, malye nang ati kum wenepse. ‘Ninye arye, malye wininyak ning kum eipnamne’ tenen, na asing pia kum kuamnuke. Dipkoprop yupu bokolilamsirye, malye nang ati, wenelamsise. Anyapmasin ning tonok ning babye, winyamtinyopura, awinyamsa ati, anggunce ‘Aning ton winiplume,’ nyapnumunba, narye wini talak aryuk tamubuka punupnamasine,” nyabuk. အခန်းကိုကြည့်ပါ။ |
1 Samuel 12:3
29 ပူးပေါင်းရင်းမြစ်များ
Aning atonun, sik aninye nirya babye minop talak arye anggun kwit capu ning doproplumce, ‘Ila tuba tamubuka punupnamsin ja,’ nyaltakamunye ning nirya babye, adiparyuk punupmunce, kililtakanamlulume. Ara, uang yo bok do, gandum do, anggur tapu duk do, zaitun yo duk mek do, aning nirya ara tuba tamubuka arenamlulume. Tonda, sik wa win tuku ap, anggur tapu wa winak ap, zaitun yo duk mek wa winak ap, sik aik nirya ap ara, adiparyuk tamubuka arenamlume,” nyapse.
Winilirye, uang yo bok dobuka, yuk nang ati areplirye, ‘Sikce ton tabakuka arepnamniak,’ kum tenelulnye bira, Allah un dam yatue. Tonda, malye kum winipmace nang ati, ‘Anye opdeipnamnile’ tenen, dekna arin ning arebikceba, kum dololulnye bira, Allah un dam yatue. Ateleb pil donyak ninye ara, pia pi dobuka, telebuk wininamake.
“Yuk nang sik ning nirya ati, ‘Se, na uk doproptinye,’ tenena meme. Ara sik aik ap, sik kilapu ap, sik pil melina nang ap, pil melina kilapu ap, el sapi basam ap, el keledai basam ap, el weilul ning yuk ning ap, tonda, yata ning do, el talilye ning nirya ati, ‘Na doproptinye,’ tenena meme,” Allah arye nyabuk.
Aupula donye birye, yuk nang sik weilamice ning, sapi basam do, domba basam do, keledai basam do, upula dopropmalirye, daunmalibuk, yuk nang arye eibikirye, aupula dopropmalye ning, kam tupa unmaliba eibicopura, el anye birye aning pununa ati, tonap tabakuka bitinye arepnamlule. Ara, kam ning tonok dopropmalye bukni, tuba tonap ton ap tabakukaplirye, aning pununa ati, aning atonun bitinye arepnamlule.
Malye winipmalinye birye, ‘Na tam uk kepnutueʼ tenen, namin kina ati, yo bok arebicopura, sik yupu bokolina deiyok nang arye, ayo bok doprobikirye, amalye winipmace nang ati, ‘Sikda teleb winipmaka ati, kum wenepnamabe,’ nyabuka, tilila yupu dem nyabicopura, ara pia malye weik unyake. Aning ara, pia kum wininamlume. Deiyok ara, ani. Namin kina ati arelamak yo bok doprobica deice arye, asing teleb nang bukni, asing kulamle nang atouk kililanyake. Tonda, namin kina ati dopropmace yo bok dopropmaca deice arye, diksukum winipmace ning nirya babye, malye-malye kililulume. Winimunya deice arye, malye winipmalinye, teleb kipdeipmunye bukni, teleb winipmalinye bira, malye kililulume. Ati, aning ara, pia kum wininamlume.
Yatanye do, ‘Yo bok weik arye koproptinirye, bona weik talinanye kiptinye’ tenen, tilila yupu nyabuka ubula dololulnye bira, aning-aning nirya, winibuka dololya deice arye, el ap, el mapu silip nirya ap ati, malye kililule. El malye ulya deice arye, bona ning weik dolonamle bukni, adeice arye, el mapu silip nirya malye winililulba, ikin ning weik unamake. Ton nang ara, ‘Ubula dopropnamne’ tenen, mambul ning bokuka arepmantonye ati, morolbalule. ‘Anye bira kanye deipnilirye, kum arepnamnutu ning bukni, dungnubuka arepnamnil’ tenen, amorolbalulnye birye, teleb ning dobuka, weik deiyoknye ati dungnubuka arelbalule. Winilul bukni, Allah arye amalye ululnye ati, aminyan sirya talak, wenebuka oplopnamle. Ati ara, yatanye do, ‘Ayo bok ara dungnubuka dolona na like,’ teneplirye, binuka moroplirye, kum dolbalulnye bira, teleb ubuka kam pia unamle.
Aning atonun ning akunum winipmalce, aminyan talak, ‘Se, na dipkoprob malye winipseʼ tenen, kel biklyopura, el kwit birye, el aik tia ati, deipmalye bukni, ubula dolul ning ap, tonda “Tia ati bopnamakine,” nyaplobuka, pia dolul ning ap, tonda yuk nang ning wangapmikba, bukmalye bukni, dipkoprob katak arye, “Dopropmanue,” nyana pia kum aryuk, aning dobuka, el babye kilolul ning ap, nirya ara, yuk nang ning ubula dolul ning ap deice arye, malye winilamle ning ara, tamubuka arenamlule.
Tonda, yata ning do nirya, dungnubuka ubula dololul bukni, na kume, dipkoprob na kum dopropmane,” nyapliba, yuk nang arye aubula dopropmalye ning akunum bikikirye, “Kume, anye birye, el ubula dopromukce, duknyamuk,” nyabikiba, anirya bikikcopura, aubula domlye ning nirya ara, tamubuka aning deiyoknye binyuk arenamlule. Bukni, pia malye winibuka ati, tonap dua puluh persen (20%) tabakuka weik tonun aning deiyoknye binyuk arenamlule. Ara, yuk sum kume, elce ubula dololul ning nirya tamubuka, arepnamle sumuk, el malye winipmalye ning pununa ap, dekna ap ati, Allah el aren ning ton arelyanganamle. Ara, ‘Na malye winipse ning punubuka dekna ati, Allah dam teleb aren ning boyanuka deiplyeura, Allah namin kipnilirye, lyepropnamnilʼ tenen, arelyanamle. Anye birye, asum apil bitinye donamle.
Nyaprika ati, Musa pia yu weik ubukba, Allah Yahweh ati nyabuk. “Sik anang arye, Allah an si erebuka kina ati, yanuka arepmakiyak ning ara, dolon kume. Aning atonun, narye sik anang weinyak kambing ato ning, sik keledai basam tonok babye, kum dopropse. Tonda, sik anang nong deice, ikin ning tonok babye, kum deipse. Sikti malye kum kipdeipse. Musa birye, Allah ati nyabuk.
‘Anye bira, pia malinye aik binmale’ tenen, nyanmekura, Yesus ap, Zakeus ap, aik birikopura, Zakeus arye Yesus ati ayupu nyabuk. “Se naio, na pia malye ulamse ning ara akunum batakne. Wini talak ara, na talinye ning nirya bokuka noutam dopdopnirye, talye bona utotoa talina kum ninye ati arenamne. Tonda, yuk nang yo bok ubula dololamse, atonun kume, tonap tabakuka arenamne. Ati, tonok dopromsinye bira, dumbarye arepnamne. Dumbarye dopromsinye bira, takudekin 16 arepnamne. Aning atonun, na ubula dopropse atonun, sik yo bok dololamse nang nirya ati, tabakuka yo bok empat kali arye tamubuka arepnamne.” Zakeus arye Yesus ati nyabuk.
Min arye like bitinye talak anggun dam yanuka peterelamsise. Wini talak ara, ‘Like winilye ning sik dam binuka peterenamne’ tenen, akunum kintinipmane. Na patapnile ning ara, anggun bona ning ati kum bukni, anggunti bico tenesunune. Ati, ‘Anggun nong deice ikin ning kum deipnun’ tenen, na patana ati anggun ning kum moronamsine. Ara, anggun ton tenipdelulume. Mapu arye sik ni yapu ap, sik nin yapu ap ati, aning-aning nirya bulubuka kum inibikirye, aminyan bokuka arenyak do? Kume. Sik ni yapu arye sik kintinibuka delinyak ning bokuka sik mapu ati arinyake.
Anggun awipdeipnamlum nang arye, ‘Aning ara dipkoprob malye ninge. Aning ara, dipkoprob teleb ning,’ tenebikirye, yupu bokeipnamsiyake. Anggunce, ‘Anye na kwit ulula anya arye, dauaplye,’ kum tenenamake. Sik kanye aryuk, ‘Aning ara, winipnamabe,’ tenebikce touk, ubuka yupu lipsisikuka kum bokeipnamsiyake. Tonda, ‘Tonye bitibuk, ikin ning kum deipnuyabeʼ tenen, elce uang areplyopura, elce malye winibuk ning, lubuka, namin kum kipnamake. Tonda, malye ning arebice ning ara, kum dolonamnyake. Deiyok ara, amalye ning arepmacopura, kel weik bikilirye, dipkoprob teleb winin ninguk wililamlanye babye, tamubuka malye ninguk wininamle. Malye ning ati, kum winilule. Teleb winin ning ati, wenelula anya arye, asing kum nang atonun unyake. Adeice arye, malye pil donyake. Dipkoprop ning ton, kum pil donyake. Ati ara, malye ning dopropmanto nang ara, kum wipdeipnamlume.
Anggun Allah ati dib tenelulum ninye ap, nun ap, neika ulamubu talak nirya ara, Allah arye dilamsuke. Tonda, anggun babye, elilamluma anya arye, anggun kele. Allah funguk ulye touk, malye winin ning tonok ning babye, una kum arye, pia diksukumuk winilamsupu, yuk nang arye nunti, “Anang malye wininyak ning ara, ani-ani,” nyabuka, kum nyapmanto nang ulamubu.
Tonda, Allah arye nun winilamap ning nirya kekebuka disulula anya arye, nun talye kum nyapnyabe. Anggun kele, nunce anggunti, ‘Teleb yupu nyaplopmabibuk, anang arye kanye deipnamsiak’ tenen, kum winilamubu. Tonda, ‘Bon ning weika arye doproptibye’ tenen, tenepce arye, tilila yupu kum nyalamubu. Tonda, ‘Anggun ning ubula doproptibye,’ tenenyaba ara, ‘Biksicak’ tenen, duknuna yupu pia kum nyalamsupu. Aning nirya ara, pia kum winilamubu.
Domba basam weina deiyok nang arye, sik domba basam ati bico tenebuka, teleb ubuka weilamak touk, anggun babye, Allah el mapu sik amutamak unyak ninye ati, bico tenebuka nimalye arye melinamlulume. Ara, sik amutamak unyak ninye ati, ‘Sik kanye malye ubicak’ tenen, melipmunce, ‘Kalikuka dilanamlulum’ tenen, nyapsine. Wininamluma ara, ‘Na lik,’ tenenun bukni, ‘Allah arye pia pi donilya ati, wininamne,’ tenena kume. Aning kum bukni, Allah arye, ‘Na mapu melina ati teniltona kum arye, kanye deibuka melinamak’ tenen, ‘Patalul ak tenesilye touk wininamlum’ tenen, nyapsine. Tonda, ‘Yo bok weik arepsiting ak, teleb ubuka utibye,’ tenena kum arye, kanye deibuka talye luba kibuka melilanamlulume.
‘Ninye deiyoknye, Raja unamle’ tenen, Samuel birye Saul biti, wipdeibuk. Tonda, atalak sik Israel ninye ulamik touk, Samuel birye, zaitun yo duk, mek teleb cang makau arye, libuka deiamika dobukabukce, Saul kisok deice dikeibukce, Saul biti, taruk talibukce, ‘Telebe, akunum teleb kipdeipkine,’ nyabukce, amutuku nang ulamik touk, Saul mutubuk. Samuel winibukce nyabuk. “Allah el si Yahweh arye, Israel ninye, sik ninye deiyoknye kina ati, akunum wipdeiamkuke. Ance Israel ninye ati, sik ninye deiyoknye, Raja kipmince, talipnamlyame. Aning ati ara, aminyak mek an kisok deice dikeipmakina ara, Allah arye bikilina ati, narye an kisok deice dikeipmakine,” nyabuk.
Samuel birye nyabukba, Israel ninye nirya arye, tamubuka nyabik. “Kume na nio, ance ton, nun dam anyapmalam ning, pia ton kum winyamsulume. Ikin ning, nun nong deice, pia kum deiamsulume. Kunusa don yupu deice arye, nun ning ubula pia kum dololamsulume. Tonok ning babye, yuk nang talilamik ning, ance ubula kum dololamsulume. Aning nirya ara, pia kume,” nyabik.
Nyabikba, Samuel birye, tamubuka nyabuk. “Ati ara, nun ni Allah, el si Yahweh ap, tonda elce wipdeipsukba, nun weik deiyoknye unamsilanye, Saul ap arye, sik bitinye kekenmasirake. Anggunce nati, ‘Malye winipsulum ning ara, pia kum upmasile,’ akunum nyapdeipmanulume,” nyabuk. Nyabuk buk, sik nirya arye, “Diba nyaplame, Allah arye dinmasilce, kekenmasile,” nyabik.
Winipyopura, na aik pil dona deiyoknye bira, yuknye ton wibuka erepdeipniba, nati moubuka pil donamnile. Na kanye talima noutamak tenenye touk, awinipnamnanye birye, aninguk moubuka wininamle. Tonok ning babye, kum bataknamle. Winiplyeopura, narye el yala nang ati, kalikuka melipnyopura, el deipkiridop nang nirya, telebuk unamake. Ereipnamnanye birye, na si eren aik pum tam, pil tuba donamlak ara, narye wipdeipniba, ninye deiyoknye dam unamle.
Na ni Saul elinilyame. An baju mouse tam sekuka abopmakin atia. An mining dam winipmanu bukni, an nong ara, kum opmakune. Ati ara, moubuka tenepmince kel biknamnilyame. Na dipkoprob malye kum kipreipkunune. Tonda, anda nun deiyoknye ulyama anya arye, an kum yanikunune. An amu tam tuba ununa nyapkine. Narye anti malye kum upkise bukni, ance ‘Daud opnaman’ tenen, nati dobolbanilyame. Narye ‘Yata malye ning winipkisiba olyanganilyam do?’ tenen, asipdekine,” Daud birye Saul biti nyabuk.
Ikin kanye bobukce, el yin talin nang ati nyabuk. “Kume nun ni Allah el si Yahweh arye, minop talak arye, ‘Israel ninye sik Raja unamle’ tenen, Saul wipdeiamsuka ati ara, Saul bira Allah elce erepdeibuknye tuba ulula ati, na deiyoknye ulule. Nara el amu tamnye unune. Ati ara, narye Raja Saul biti malye kum kipdeiptinye. Tonda narye Saul biti kum optinye. Winipnyopura, Allah arye nati wenepnilyake. Ati, Saul el baju mouse tam sekmanu ning ara, dipkoprob malye winipmana anya arye, ‘Allah arye wenepnilyak’ tenen, na malye kanye bopne,” nyabuk.
Daud birye ayupu nyabukace sik, el yin talin nang ati, “Anggun, ‘Raja Saul opnuyabe,’ kum tenenamlulume,” nyabuka wenebukce yupu sekukba, sikce Saul kum obik. Ati ara, Saul talye mangkau kanye bobukabukce, lin akunum labukopura, akeil deiya pum tam batakukabukce bisik dukdongobuka bai tam bisik biyuk.
Ati ara, na ni Allah ati moropmane. Elce melipniliba, el Yahweh arye, ‘Anye bira, Israel ninye, sik ninye deiyok kibuka unamleʼ tenen, wipdeiamuknye bira, narye kum opnune,” nyabuk. Nyabukopura, ayupu ton Abisai biti nyabuk. “Kum opnamlam bukni, Saul el kisok dam tuku ikmal ning, tombak kama ap, el mek lin makau ap, dopdakuka binuname,” nyabuk.
Bukni, Daud birye tamubuka, Abisai biti nyabuk. “Kume, ance aning tenepmalama ara, kume. Anyapkina ara, talye ati kume. Deiyok ara, ani. Ara, Allah Yahweh arye, ‘Raja kipnamleʼ tenen, akunum wipdeibuknye, opminyopura, Allah elce awinipminye ning ati, ‘Dawaplye,’ kum tenepnamle. Aning kum bukni, ‘Dipkoprop tamubuka, wenepkilyakʼ tenen ati, winina kume.
ကြော်ငြာတွေ