1 Peterus 5:14 - Eipomek

¹⁴ Anggunce yuk diba tenenyak ninye ati, pia dipkoprop bico tenebuka, taruk arepdamunce, kildanamlulume. Anggun ap, Yesus Kristus ap, talima dukdongobuka umunye ninye nirya ara, ‘Kanye deipdamunce neiktoto teleb ubuka unamak’ tenen, Allah morosunune. Telebe, na Peterus arye asurat sekeipsene. Asukum anyuk deipne.

1 Peterus 5:14 ပူးပေါင်းရင်းမြစ်များ

Matius 5:47

Anggun kayapu nang, yuk dib tenena nang tonok, si erebuka telebe nyapmunyopura, ‘Aning ara, teleb unamabe,’ kum tenenamlulume. Yuk nang nirya atonun unyake. Allah diba kum tenenyak nang ababye, sik bidam nang ati, si erebuka telebe nyanyake.

Yohanes 14:27

Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.

Yohanes 16:33

Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.

Yohanes 20:19

Asum bukni, akunum inibukba, Yesus el wipdeiyamuk nang nirya, tonok aik bulubuka unmek. Sikce, ‘Se, Yahudi yala deiyok nang arye wenebuka opsicak’ tenen, ilil weik ubuka ati, anyaik buplan tirikdongobikce, kunci dakik. Anyaik pum daunmeka ani, Yesus ara sik kan-kan noutamak talye karin panabuka tikilyayuk. Panabuka tikilyayukce, anang ati nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk.

Yohanes 20:26

Tomas arye, nyabukba, sik nirya minggu tonok talye daunmeka ani, like tekbarye sum akunum ubukura, sik mince ulamik aik pumuk bulubuka wekmek. Wekmek ak arye, buplan tirikdongobuka kunci dakmek. Tomas ap, sik nirya anyaik pum neika unmeka ani, buplan tirikdongopmeka babye, Yesus arye sik kan-kan noutamak panabuka tikilyayuk. Panabuka tikilyayukce, nyabuk. “Anggun ilil kanye bona kume. Ilil asa una kumce, kanye deibuka telebuk unamlume,” nyabuk.

Roma 1:7

Ati na kayapo, anggun Roma mutuku ululum nang kan-kan arye, Allah bico tenepsukce, ‘Na mapu unamak’ tenen, wibuka deiamsuk ninye, anggun nirya ati, asurat sekeipsine. Nun ni Allah ap, nun Deiyoknye Yesus Kristus ap, ‘Sik bitinye arye bico tenesirikirye, sik kanye aryuk melisirikirye arenamsil’ tenen, Allah morosunune. Tonda, nun ni Allah ap, nun Deiyoknye Yesus Kristus ap arye, anggunti melisirica deice arye, olana ap, walana ap, ikin kanye bona ap nirya, kum upliba, ‘Sik nirya kanye deibuka, lamapdongobuka neika unamak’ tenen, anggun Roma mutuku umunyak arye, dib tenelulum ninye nirya ati, Allah morosunune. Na Paulus birye nyapsine.

Roma 16:16

Aning atonun, batakna kumce, anggun Roma mutuku diba tenelulum ninye nirya arye, elanamlum talak nirya babye, bico tenebuka, “Telebe,” nyalanamlulume. Anggun Roma ninye ati ara, yuk mutuku unyakce, Kristus ati diba tenebuka, el ap kanye talima dukdongobuka unyak ninye nirya arye anggunti, “Telebe,” nyasinyake.

Roma 8:1

Ura, na kayapo, weik mambul yupu ara nyapnusine. Yata ninye do nirya, Yesus Kristus ati diba tenebikirye, el ap kanye talima dukdongobuka neika unyak ninye nirya ati ara, Allah arye, “Anggunda malye winilulume,” nyabuka kum wenepnamsile. Yesus ap kanye talima dukdongobuka unyak ninye nirya ati ara, Allah arye, kum bataknamsile.

1 Korintus 1:30

Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.

1 Korintus 16:20

Na unyak Efesus mutuku dib tenekirye, nun weit yapu atonun ninye, sal babye, kilapu babye, sik nirya arye, anggun Korintus mutuku ululum ninye ati, “Telebe,” nyalisinyake. Nun dib tenenyap ninye nirya arye, yuk dib tenenyak ninye ati eipdabirye, ‘Na kwit koprop’ tenen, talima melisiliba, si erebuka mutulanyap touk, anggun Korintus mutuku ululum ninye babye, yuk dib tenenyak ninye nirya ati aning atonun wininamlume.

2 Korintus 13:12

Anggun ap, yuk dib tenena nang ap, eipdamunyopura, taruk talipdamunce, “Telebe,” nyanamlulume.

2 Korintus 5:17

Aning atonun tuba kum tenenyaba anya arye, ayupu nyapsine. Yatanye do nirya, Kristus ati dib teneplirye, kanye talima dukdongobuka neika urikcopura, elda pia winiryuknye atonun ulule. El kanye tenena ap, el talima ap, el ulul ning ap nirya ara, Allah arye, anye bira minop arye winilamuk ning nirya kum daneiplirye, winiryuk ninguk arilule.

Efesus 6:23

Telebe, sik dib tenebik ati, nun weit yapu atonun ninye nirya ati, Allah moronun ning ara nyapnusine. Ara, ‘Nun Ni Koprop Allah ap, nun Deiyoknye Yesus Kristus ap, sik bitinye arye, anggun nirya ati, mambul ning arenamsirak’ tenen, Allah morosunune. Arinamsirak ning ara, ani. Ara, yuk nang ap kanye deibuka, nimalye arye neika una deiyok ning ap, yuk nang ati bico tenebuka melildana deiyok ning ap, Allah ati weik arye diba tenena deiyok ning ap, ‘Adeiyok ning nirya arepsirikceura, pia telebuk unamak’ tenen, narye anggunti, Allah morosunune.

1 Tesalonika 5:26

Anggunce yuk dib tenen ninye nirya ati ara, eibuka eibramunye talak nirya ara, kanye deibuka, si erebuka iribuka mutunamlulume.

1 Peterus 1:2

Nun ni Allah arye minop talak akunum wiamsukce tenyamsuk touk, Allah El Dib Kanye arye, anggun talima noutamak malye ning kum deipsukce, teleb kipdeilisulul deice, Allah arye wibuka deipsuke. ‘Wininamak’ tenen, Allah arye wibuka deiamsuka deiyok ara, nyapnusine. Ara, ‘Yesus Kristus el ining biyuka deice arye, anggun malye ning kum danyaipsilirce, lyepsiliryopura, el yupu uk talibuka dobolbanamak’ tenen, wibuka deipsuke. Allah arye bico tenepsilirye, nun patapsilye ning talye arisulul ning ap, Allah ap kanye dukdongobuka umunce, yuk ninye ap kanye deibuka, teleb ubuka neika unamlulum ap, ‘Aning nirya weik upnin banamsil’ tenen, Allah morosunune.

3 Yohanes 1:14

Deiyok ara, ani. ‘Anggun dam yanirye, sik nong ton eipnamsine,’ tenebuka patanulul ati, anggun dam yanamne talak ara, neika bukibirye yupu sisikinamabe.