1 Peterus 5:1 - Eipomek

¹ Anggun kan-kan unyak ati, Allah yupu aik talina deiyok nang ati, ayupu ton nyapnusine. Ara, na babye Allah yupu aik talina deiyoknye birye, na nyapnusin yupu kekebuka, ‘Wininamlulum’ tenen, moropsine. Tonda, Kristus nong deice ikin ning deibikbuk donmoka ani, obikbuk dibuka ara, na asing arye akunum eipse. Tonda, Yesus tamubuka yanamle talak, Allah arye weik teleb ubuka mambul ning ap, dirina weik ap, upnamsil talak ara, na ap unamabe. Aning nirya wininye deice arye, na Peterus arye moropsine.

1 Peterus 5:1 ပူးပေါင်းရင်းမြစ်များ

Lukas 24:48

“Anyapmasin ning nirya ara, akunum winibukak elilulum nang anye arye, aning ara ninye kekenak ati, ‘Dipkoprop akunum uple,’ nyabuka nyalinamlume.

Rasul 1:8

Bukni, Allah El Dib Kanye anggun talima ak yanuka weksilirye, mikip weik arepsilyopura, dopropnamlume. Dopropmunyak arye, Yerusalem unyak ninye ap, Yudea tam unyak ninye ap, Samaria tam unyak ninye ap, mutuku sirya im sirya unyak ninye ap, na winilamse ning ap, peterelamsibuk kekelamlum ning ap, dobuka peterepra banamlume,” Yesus arye nyabuk.

Rasul 14:23

Nyaprik akarye Paulus ap, Barnabas ap arye, ‘Apiluk donamak’ tenen, sik Allah diba tenebik nang, ‘Sik deiyok nang unamak’ tenen, ninye yuk-yuk amutuku nang, amutuku nang, nirya wibuka deipnin balamrik. Anang wibuka deiprik talak ara, sik bitinye nang arye winiprik. Allah morona ap, Allah si erena ati, din si tebuka kwaning dina kum bulang arye, amutuku nang nun ni Yesus diba tenebika ati, adiba tenebik nang dobuka, ‘Yesus elcuk sik pataplye ning pia melinamle’ tenen, wibuka deipnin balamrikce, Yesus ati areprik.

Rasul 15:4

Anang wideibikce, dopkwetebikba balamika ani, Yerusalem mutuku biyikura, Yerusalem mutuku diba tenelamik nang ap, Yesus arye wibuka deiamuk Rasul nang ap, amutuku diba tenebik nang, sik deiyok nang ap, sik nirya arye ayayik nang ati, “Telebe,” nyabuka kibik. Kibikopura, Barnabas ap, Paulus ap arye, awekmek nang ati, Allah arye sik bitinya ati melyamuka deice arye, sik dolamrik pil nirya laka nyaprik.

Rasul 15:6

Sik nirya nyabikura, Peterus ap, ton yuk nang, Yesus arye wibuka deiamuk Rasul nang ap, amutuku diba tenebik nang, sik deiyok nang ap, ‘Yahudi yala kum nang ara, den bam bol mouse ning adiparyuk sekenamak do? Kum do?’ tenebikce, ‘Ayupu moubuka tenipdebirye yupu talipnamap’ tenen, bulubuka wekik.

Rasul 2:32

Yesus dibuk bukni, el li Allah arye Yesus erebuka kam bukibuk ak, nun nirya eibupe.

Rasul 20:17

Miletus mutuku akunum beipu ura, Paulus arye Efesus mutuku dib tenebik nang, sik deiyok nang wisi nang ara, yakceura, ‘Na ap, yupu talipnamabe’ tenen, yuk nang ati nyapdeibukura, ayupu laka bobuka Efesus mutuku nyalbiyik.

Rasul 20:28

‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.

Rasul 21:18

Mapmapua, berekukura, Paulus ap, nun nirya arye, Yakobus el ap, ‘Yupu talipnamap’ tenen, el dam binuka wekupu. Tonda Yerusalem mutuku Yesus dib tenyamik ninye, sik deiyok nang babye awekmek.

Rasul 3:15

Anggunce yupu nyapdeiplumura, kam una deiyok teleb ning arisulula deiyoknye, sik malye nang arye dobuka obik. Sik obik bukni, Allah arye anye Yesus el kam bukeibuk. Nunda, anirya dilamubu nang unmabe.

2 Korintus 5:1

Ara, yuk yupu ton nyapnusine. Nun nirya kele. Tukwak mutuku unyap talak ara, nun nong ara, baju aik, el si ara tenda, atonun tia ninguk ulule. Nun nong ara, tia talakuk ulula anya arye, malye upliba dibibyopura, anong kum upsilyopura, yuk ning dopropnamabe. Wininamap ning ati, winipmanto yupu ara, aik nyapnune. Allah arye akunum dipkoprop pia aupnamle aik kintinipsuk ning ara, aupmale. Anyaik ara, ninye taruk deice kum dobik. Anyaik ara im deice ulirye, pia atalak nirya aupnamle.

2 Korintus 5:8

Arup nyapmasin touk, nun kanye teniltona kum aniryuk, dib tenebuka lamapdongobuka unyabe. Nun kanye patapsilye ning ara, tukwak ninye nong unyaba ara, dawaptubuk aning batakuka, nun Deiyoknye Yesus ulyak neika uptibyetoura, ‘Aning ara, pia telebe,’ tenenyabe.

Pilipi 1:19

Ara, talye ati kume. Anggunce nati, Allah moronululum ning ap, Yesus Kristus el Kanye arye, melinulul ning ap, deice arye, aikin ning upnilye ning nirya ara, na kanye talima wisinilya deice arye, teleb ulinamnila ati, na kanye deipne nyapsine.

1 Timotius 5:1

Ara, yuk yupu ton nyapnukine. Wisi nang ati ara, mikip arye wenena ap, derelana ap, meme. Aning kum bukni, ‘Anang ara, na ni yapu atonun unyak,’ tenebuka, nimalye arye, “Naio, winina telebe,” nyabuka, peterenalyame.

1 Timotius 5:19

Ara, yuk nang arye, “Kume, Allah yupu aik deiyoknye, el malye winilul ning ara, ani,” nyabuka, el nong deice ikin ning deibikcopura, talye kanye bobuka kekena kume. Kekena kum bukni, el malye winilye ning, yuk nang ton bitinye do, winilye do? Sik babye, ton eibikirye, neiktoto atonun nyaptingtoura, adeice aryuk kekenamlulume.

2 Timotius 4:8

Winibuka ulamsa ani, wini talak babye, tuba wininune anya arye, Allah arye dekna ning kintinibuka ara, dipkoprop dopropnamne. Ara, Yesus arye ninye mutuku-mutuku nirya ati, yupu bokeipnamsil sum ara, pia diksukum yupu bokolina deiyoknye Allah arye nati, malye ning nirya kilipnilirye, pia diksukumnye kipnamnile. Dekna ning dopropnamne ara, aninguka. Pia teleb updeipnamnil ara, nauk ati kume. Aning kum bukni, yata nang do nirya, ‘Se, nun Deiyoknye Yesus arye, ila tamubuka tonap, tukwak mutuku tamubuka yasutue’ tenen, buku sukubuka, kintinibuka dinauk unyak nang nirya ati, dekni ning arepnamsil ning ara, diksukum kili sal daneipnamsile. Na Paulus arye nyapkine.

Titus 1:5

Tituso, Kerit mutuku dopdeipkisa deiyok ara, ‘Pil akunum deiyok koubuka, pil dopnin basiryuk batakse ning ara, tuba tonap, sirya daknamle’ tenen, dopdeipkiseura, batakuka bikise. Ara, “Winipnulyam,” nyabuka lak nyalamse touk, anyasik nang, mutuku-mutuku nirya, dib tenebik nang, ‘Sik Yesus ati dib tenebik nang, sik Allah yupu asik deiyok nang wibuka deipnin banamlyam,’ tenen ati nyapkine.

Pilemon 1:9

Aning kum bukni, anda Allah el mapu nirya pia talima aribuka, teleb ning winiminya ak, kel kipkisa ati, bico tenekununa deice, nimalye arye moropkine. Nara, akunum wisi dase. Tonda, Yesus Kristus el yupu, ninye lyen yupu peterenuna ati, tapu koubuka wenena aik dongopnikba, tuba anyaikuk unune.

Ibrani 12:1

Aning ati ara, na kayapo, sik minop talak ulamikce, diba tenebuka diksukumuk ulamik ninye, wini nyapmasin ninye ara, dana-dana tam nirya, yupa weik aunyakce, nunti dinauk usinyake. Disinyaka ati ara, Allah arye, ‘Winibuka diksukum bisikuk banamak’ tenyamsuk touk, ikin upsilya babye, batakna kum, pia pi dobuka, abisik deiceuk mikip arye banamabe. Sik biklamak nang arye, ‘Ikin upnilyak’ tenen, talye ning nirya batakuka, tonok bisikuk mikip arye bik-bik abuka balamak touk, nun babye atonun, ‘Ikin upsilyak’ tenen, talye winin ning nirya batakibirye, Allah tenepsuk bisikuk binamabe. Aning atonun, weik mambul ning ara, malye ning patasilya deice, kanam asa arye tapu koulongona atonun ulamsil ning nirya batakibirye, Allah tenyamsuk bisikuk binamabe.

1 Peterus 1:12

Atalak ara, Allah arye el yupu laka nyalamik nang, sik nabi nang ati, sik talima noutam arye laka nyabuk. “Kume, na Dib Kanye arye anggun talima noutamak nyapdeipsilyeura, aminyan talak winipnamle ning ati, yupu laka nyalulum ning ara, anggun wini talak ululum ninye ati kume. Aning ara, aminyan talak unamak ninye ati winipnamle,” Allah arye nyabuk. Allah arye apia teleb kilinamsil ning nirya ara, Allah el im deice pil don nang, sik malaikat babye, ‘Se, Allah arye apil dolye ning ara, pia teleb ulule’ tenen, kanye deibikirye moubuka dinyake.

1 Peterus 1:7

Kanye winilden ning usilye ning ara, deiyok nyapnusine. Ara, anggun diba tenebuka, Yesus talibuka umunye ning nirya ara, winilesilyebuk, talima wisipsilye, ‘Dipkoprop pia gat uk, dipkoprop ninguk unamsil’ tenen, yangalule. Dekna weik ning emas ara, ‘Malye ning ubuk ning, kum uptue’ tenen, uku dongopmacebuk, malye ning diplyopura, teleb ubuka delinyak bukni, emas babye kum uptue. Emas ara, dekna weik ning ulul bukni, mitik mambul ninguk ulule. Anggunce diba tenebuka, Yesus talibuka umunye ning nirya ara, weik dekna weik ning atonun, weik mambul ulule. Diba tenelulum ning winilesilyebuk, akunum teleb uplyopura, Allah arye nyapdeiplibuk, Yesus Kristus tamubuka lakak yanamle talak ara, Allah arye telebe nyana ap, si erena ap, weik dirina ap, weik si ap, arepsilirye, erelinamsile.

1 Peterus 4:13

Mambul kanye bobuka, ‘Se,’ kum tenenamlulume bukni, Yesus Kristus nong deice, ikin ning deibikbuk, ikin kanye bobuk touk, nun babye atonun, ‘Ikin ning, nun nong deice deipsikca babye, telebuka’ tenen, kanye weik arye delinamlulume. Yesus, ikin ning weik ulamuk touk, upsiliba, kanye deibuka umunyopura, aminyan talak Allah arye, Yesus el weik mambul ulul ning ap, pia teleb-teleb ubuka ulul ning ap, dirina weik uplibuk, lakak nyapnamsil talak ara, kanye pia weik arye deibuka, pin-pin asa unamlulume.

1 Peterus 5:4

Anyapmasin touk akunum winipmunyopura, nun Domba basam weina Deiyoknye atonunye, Yesus Kristus tamubuka yalyopura, elce anggunti, pia teleb mingne ning, pia teleb ulirye, min kum danmanto kum ning arepsiliba, dopropnamlume.

1 Yohanes 3:2

Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.

2 Yohanes 1:1

Na anggun deiyoknye birye, anggunti ayupu seksine. Anggunda Allah arye, melyamsukba, diba tenebuka, Allah yupu aik, neika wekelulum nang nirya babye, anggun diba tenelulum nang babye ati, ayupu seksine. Na ni Allah, el dipkoprop yupu talibuka unirye, kanye delisunune. Tonda, yuk mutuku nang bukni, Allah nyasulul yupu, el dipkoprop yupu ati, kanye delinyak nang nirya arye, anggunti bico tenenyake.

3 Yohanes 1:1

Nara, an deiyoknye Yohanes arye, na ka Gaius ati, yupu seknukine. Allah el yupu dib tenebuka talinirye, anti kanye delikunune.

Wahyu 1:9

Ura, nara diba tenepsa ati, anggun du kopropa atonun usunune. Tonda, anggun ap, na ap, diba tenebupa deice, Yesus arye talisiliba, el ap kanye talima dukdongobuka ubirye, el pil donyapa ati, ikin ning, nun nong deice weika arye delisinyake. Delisinyakba, kanye imun kanye usilya babye, batakna kum, pia pi dobuka, lamapdongobuka arye, el pil tuba donyabe. Anggun babye, na babye, anisibuka unyabe. Ura, Allah el yupu ap, Yesus arye dipkoprop nyalamsuk yupu ap, dobuka peterelamsa ati ara, tapu koubukapnikce, laut mekwen arye sekdongamuk mutuku, mek dum-dumak, el si Pulau Patmos mutuku deipnikba, ulamse.