Aning kum wininun bukni, na kanye talima noutam nirya ara, ‘Se, yata wiriptinye do?’ tenen, kum wininuna ati, talye tunim abuka unune. Winipmanto ara, mitik mapu arye, moum akunum dibikcopura, sik nin yapu dam bukikirye, talye kanye dobuka, winilamak touk, na babye atouk unune. Diba, na kanye talima noutam, mitik mapu, moum akunum dibikirye, akunum bouplyopura, talye kanye bobuka, ulamak touk unune. Ati, ‘Se,’ tenen, ilil kum unulule.
1 Peterus 3:4 - Eipomek4 Aning ara, kum bukni, anggun kanye talima noutam, teleb-teleb ubuka ulamunye deice arye, dipkoprop teleb kilapu unamlulume. Anggun nimalye arye tunim abuka una ap, yupu weik arye nyana kum, kanye dukdongobuka nimalye arye una ap ara, talima noutam usulul ning anya arye, nong bol deice usilye ning, wisi dakirye suruklamsil ato kume. Aning ara, talima noutam pia usilibuk, Allah el kanye ara, ‘Aning ara, pia mambule,’ tenelirye, kanye deilisulule. အခန်းကိုကြည့်ပါ။ |
1 Peterus 3:4
40 ပူးပေါင်းရင်းမြစ်များ
Deiyok ara, Yahweh arye wipdeiamsuk nang, el ‘Naʼ tenen nang ara, kanye deibuka unyabe. Tonda, yata nang do nirya, sikce sik bidamang kanye erelana kumce, sik talima namin asa ukirye, ‘Allah aryuk melipsutue,’ tenenyak nang ati, Allah arye teleb kilisululce, nun ikin usulul noutam ara, lobuka lyelosulule.
Tonda, sik talima erelana kumce, amu tam kibuka talima namina asa unyak nang ara, Allah arye, ‘Teleb winin bisik ani, diksukum winin ning ara, ani,’ nyabuka peteresulule. Atonun, sik maknya kintinina kumce, talima namin asa wininyak nang ati, ‘Na diksukum ban bisik ara, ani. Teleb winin ning ara, ani,’ nyabuka, peterelule.
Na ni Allah, na malye winipse ning nirya ara, an dam malye winipsirye, antibuk yanipkise. Ance, ‘Aning ara, winina meme,’ nyapdeiamsulum bukni, amalye teneminye ninguk, narye talye luba kibuka winipse. Ati ara, ance nati, “Pia malye winiplume,” nyabuka, wenepnimince, opnutuma babye, anda pia diksukumuk ulyame. Na dipkoprob malye winipsa ati, narye yata yupu tamubuka nyapkitinye do? Kume, ance, “Aning ara, malye ning, aning ara teleb ning,” nyabuka, yupu lipsisikuka bokolina deiyoknye ulyame. Anda pia diksukumnye uminya ati, wenebuka opnetuma babye, anda dipkoprob ulyame, nyapkine.
Aning kum bukni, elce bona utotoa talina kum ninye ap, mikip kum ninye ap ati, el diksukum ulye deice arye, yupu lipsisikuka bokolinamle. Bona weik talin nang arye, talye bona utotoa talina kum ninye ati, yaniltanyakba, bona kum ninye arye, ‘Se yata wiriptibye do?’ tenen, malye kanye bobuka moronyak ninye ati, pia telebuk ulinamle. Winipmanto ning ara, kama mikip asa arye, tuku deice olamak touk, sik malye wininyak ninye ati, weneplirye oplopnamle. Malye winibuka ulamikce ninye ara, el yupu nyanamla deice arye, wenebuka oplopnamle.
Mikip nang arye yanibikiba, ikin kanye bobuka, talye kankan unyak nang ap, tonda bona kum talibikceba, yuk nang arye, ‘Sikda talye nang unyaka,’ nyabuka, malye kinyak nang ara, Allah Yahweh arye, sik kanye tamubuka teleb kipdeipliba, sik kanye delinamake. Ara, Pia Teleb, Lek Deiyoknye, Israel nang sik ni koproba Allah arye, sik pia talye kankan Israel nang ati, tamubuka teleb kipdeiplyeba, kanye teleb deice arye unamake. Sikce elti, ‘Allah ara, pia telebe,’ nyabikirye, pin-pin asa arye, el siuk erenamake.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Nabi Yesaya birye nyabuk. Allah aning-aning deice tam talibuka Weik Mikip Deiyok ululnye, Allah Yahweh arye, ‘Wininamne,’ tenelye touk winilule. El Sambala mikip weik ning na deice deipnuke. Allah Yahweh winipnukce, nati ‘Elce laka teleb yupu nyalbanamle’ tenen, wipdeipnuke. Ara, bona utotoa kum talinyak ninye ap, imun kanye bobuka, unyak ninye ap ati, nyanamlyame. Kanye talima uk dipliba ikin kanye bobuka unyak ninye ati, ‘Allah arye anggun kwa dibuka melinamsile,’ nyabuka laka nyanamlyame. Tonda malye kum winilamik buk, wenen aik noutam bunyak nang ati, ‘Allah arye lolinamsile,’ nyabuka laka nyanamlume. Tonda sik asing kubukba kwelakirye, kunukna noutamak unyak ninye ati, “Allah arye anggun asing laipnamsile,” nyabuka laka nyanamlyame. Anggun nirya ati, “Allah arye lyepnamsile,” nyabuka, ‘Nyalbanamle’ tenen, Allah Yahweh arye na wipdeipnuke. Nabi Yesaya birye nyabuk.
Yehuda tam taleamuk ninye deiyoknye, Raja Zedekia bira, Yehuda mutuku taleamuk, keting tamun dumbarye (4) akunum kibuk talak ara, el ap, yuknye ap, sik bitinye arye, Babel mutuku birik. Babel mutuku binuyuk talak ara, ninye si Seraya, el li birye deiamuknye, el si ara Neria ulamuk. Tonda Neria, el li koproba ara, Mahseia ulamuk. Seraya bira, Babel mutuku ninye deiyoknye Raja ati, el amu tam pil melinanye ulamuk. Ati ara, atalak Seraya ap, Raja Yudea Zedekia ap, neika melibukba, Babel mutuku birik. Winiprik talak ara, na nabi Yeremia birye, el Seraya biti, narye sekeipse yupu arepsirye, “Ayupu ara, Raja Babel dam arelbinulyame,” nyapdeipse.
Anggun asing kun nang atonun ululuma ati, kum tenipmalum do? Anggun mek makau pum mek ilikmunyeba, bola deice tam teleb ulamle touk, anggun talima malye usilye ning ara batakmunce kum upsilyopura, anggun winimunye ning nirya ara teleb upnamsile. Bukni, anggun talima noutamak malye ning tuba awabsilyopura, teleb kum uptume.
Sik kanye deibuka, telebuk unyak nang ara, wininyake. Ara, sik kanye erena kumce, mitang arye unyak nang ara, Allah arye ninye weike lyeplirye, sik talima talinamle talak ara, mutuku-mutuku nirya wiryuk ning, kintinibuka arepliba, anang arye talinamake. Aning ati ara, sik kanye deibuka, telebuk unyaka atonun, aminyan talak babye, apia unamake.
Anggun pia walwal nang ululume. Lakak ulul ning ap ninye asing arye kum eipmanto ning ap, aning-aning nirya kwepdeibuknye bira, Allah uka. Ati ara, nong bol deice ning babye, ninye talima noutamak ulye ning babye, kwepdeibuka ati ninye talima noutam ulye ning nirya ara disulule. Aning tenilena kum arye malye tuba winilulum do?
Wininmekura, Yesus arye aFarisi nang ati ayupu nyabuk. “Anggun Farisi nang ara, ‘Yuk nang arye malye nang tenepsicak’ tenen, anggun malye winimunye ning duknumunce, nong bol deiceuk teleb pil dolulum bukni, anggun kanye talima noutamak tenebuka duknulum ning ara, malye ning weik tuba aupmalye ning ara, Allah arye kel biksulule. Tuku ak ninye arye, ‘Aning ara mambul’ tenen, pataplibuk kanye delinyak ning ara, Allah aning ati, el kanye ara, ‘Aning ara pia malye, tenebuka like,’ tenelule.
Winibuka malyeuk winilamika deice arye, Allah kum dipmantonye, pia Kam Una Deiyoknye biti, ‘Elda pia mambulnye utua babye, elda nun like,’ tenebuka, bataklamikce, talye ninguk puturubuka delilamikce, atalya ning siuk erelamik. Sik puturubuka delilamik ning ara, ani. Ninye urasin atonun ap, maka ap, basam yala-yala nirya ap, kwatima yala nirya ap, urasin atonun puturubuka delilamikce, “Nun ni kopropa,” nyabuka, atalya ning ati si erelamik.
Nong bol deiceuk kum bukni, Allah arye, ‘Na tenenye unamle,’ tenelye ning ara ani. ‘Dipkoprop Yahudi yalanye bira aululue,’ tenelulnye bira, el talima pum tam ara teleb ubuka un ning aulule. Diksukum winilulnye biti, Allah arye, ‘Anye bira na tenenye anya arye, na mi kopropa ulule,’ tenelule. Tonda, Allah arye, ‘Na mapu koprop’ tenen, laka kilin ning dipkoprop ning ara, Allah El Dib Kanye ara, nun talima pum tam usilirye, nun urasin yuk kilisululce, teleb kibuka delisulule. Talye mem yupu ap, nong bol deice pil dolamikce nang ap, wininyaka deice arye, Allah el mapu kopropa kum unyabe. Aning ara kume. Allah El Dib Kanye arye, nun talima pum tam pil dosilya arye, nun kanye talima teleb kibuka deipsilya deice arye, winiryuk ninye atonun kilisulule. Winisilya nang nirya ati, Allah arye kanye deiplirye, ereipnamle. Bukni, talye kanye bobuka daunyak ninye arye, diksukumuk wininyak ninye ati, si kum erenamake.
Akunum kel kinyabe. Minop talak ara, nun kanye tenen ning ap, talima ap, pia malyeuk wamsuk bukni, Yesus wanwanun yo deice obikba dibuka deice, Allah arye Yesus ap, nun ap, dukdongopsuk deice arye, nun min arye malye wamsuk ning nirya kum kipdeipsuke. Ara, Allah arye nun malye wamsuk ning nirya dobuka, Yesus deice deibuka ati, nun babye akunum diamik ninye atonun kipdeipsuke. Winipsuka deiyok ara ani. Ara, Allah arye nunti, ‘Kume, sik kanye talima nirya arye, malye winin ning ati mikip weik uamuk ning ara, narye malye kibuka lyepnirye loplopnamne. Aninye sik malye winilamik ning noutamak arye loplopnyopura, aminyan talak telebuk unamake. Ara, malye una deiyok ning arye, sikti, tapu koubuka deipliba, malye un ning amu tam ton pia kum unamake. Telebuk unamak,’ tenyamsuk. Ati, Allah arye Yesus dibuka deice arye, nun ap dukdongopsuke.
Ara, yuk yupu ton nyapnusine. Kristus el bidamnye kanye erena kumce, talima mitang ubuka una ap, ‘Na kwit malye kanye boplyak’ tenen, nimalye arye una ap arisilya deice arye, ayupu ton nyabuka moropnusine. Na Paulus arye nyapsine. Na kele, anggun kan-kan ton nang arye nyaninyake. “Kume, Paulus ara, neika bukuka dilanyap talak ara, ilil asa unyak nang atonun ulul bukni, nun neika kum unyap talak ara, mikip weik nang ulye touk, mikip arye nyasulule,” nyaninyake.
Aning-aning nirya wininamla ati, nunda, ‘Se, yata wiripnuyap do?’ tenen, ilil arye malye kanye bobuka, bouku kum sukupnamsile. Nun nong bola deice ara, dipkoprop asum-asum nirya ikin usilibuk, malye bol bopnamap bukni, nun kanye talima noutamak ara, Allah arye asum-asum nirya teleb kibuka winiryuk ninye atonun mikip kilisulule.
Yuk nang ati, ‘Se, tenebicak’ tenen, namin asa arye teleb yupu nyana ap, ‘Malye winipyak’ tenen, talima kalikdanuka una ap, aning-aning nirya ara, Allah El Dib Kanye el mikip arye melisilyeba, telebuk unyabe. Awinin ning nirya ati ara, pia teleb un ning anya arye, ‘Ninye im sirya, mutuku sirya nirya arye, winibicak’ tenen, ninye nirya arye yupu kum sekenyake. ‘Winina ara telebuka,’ tenenyake.
Aning ati ara, Allah arye anggun nirya ati, bico tenenyamsukce, ‘Aninye ara, na tenen, ninye na mapu unamak’ tenen, wibuka deiamsuka anya arye, malye una pia kum aryuk, anggun teleb-teleb ubuka wininamlum ning ara, nyapnusine. Ara, winiryuk baju ongolamaka atonun, bico tenebuka melilana ap, yuk nang ati namin kibuka melina ap, yuk nang ati kanye talima lamabuka amu tam una ap, ting-tingana kumce, namin asa arye unamlulume.
Anyapmasina ara, urdem ati kum nyapsine. Deiyok ara, akunum diamik ninye atonun, anggun minop talak winilalum ning nirya ara, akunum bataklumce, wini talak tamubuka tuba kum winilulume. Anggunda, Kristus ap, talima dukdongobuka neika akunum ululume. Yesus ap, Allah ap, neika ururake. Ati anggun kam unamlum talak nirya, Yesus arye kalekuka melisilirye, Allah dam ulule. Anggun ap, Yesus ap, talima dukdongobuka umunyeura, ‘Allah disulul akarye, talibuka usulul anya arye, im deice ulul ninguk patapsiliba’ tenenauk unamlulume.
Nunce anggunti peterena deice arye, nyapsupu touk, anoutam talak nirya arye, anggunce yuk nang ati, “Anggunda yata ati aning wininmalum do? Winipnamlulum, winipnamlulum,” nyabuka nyalina kume. ‘Nun bidamnye taruk aniryuk pil dobibirye, kanye lamabuka ubibirye, kanye deibuka, nimalye arye unamap’ tenen, pia pi dobuka wininamlulume.
Aning atonun wininyak ninye nirya ati ara, nun Deiyoknye Yesus Kristus si deice arye nyanyabe. “Winina meme. Talya-talya winina ap, talye bana ap, yuk nang winin ning ati yupu nyana ap, kum wininamlulume. Dipkoprop piluk talibuka wininamlulume. Anggunce dimunye ning nirya ara, pil dopmunyeura, dekna ning arepsikcopura, adeice aryuk dina dekuka dinamlulume. Talya morona meme.” Sik talye-talyeuk unyak ninye ati, ayupu nyanyabe.
Mambul ning ara, weik ninye deiyok nang, Sisin nang ap, ninye deice tam unyak nang yala-yala nirya ap ati, Allah moronamlulume. Ara, talye ati kume. Ara, nun nirya arye ninye deiyok nang ati, Allah morobibyopura, anang Allah arye anang ati meliplye deice arye, teleb wininamsiyake. Ara, ‘Talye kanye deibuka, nimalye arye teleb ubuka neiktoto una ap, Allah diksukum ulye touk, nun babye, diksukum una ap, kanye malye una kum aryuk, etekdop utibye’ tenen, Allah moronamlume.
Yuk nang arye, Allah el yupu peteren nang ati, ‘Nun lik’ tenen, el yupu yanibikirye, malye kibuka bisibikcopura, elce anang ati, teleb yupu nyabuka, nimalye arye peterenamle. Sik walwal arye wininyak ning ati lipsisikuka peterenamlyame. Ara, talye ati kume. Ara, ‘Allah arye anang ati, sik kanye noutamak pil melibuka doptubuk, sikce, “Nun malye un ning batakape,” nyaptingce, Allah el bisikuk tamubuka yanamak do?’ tenen, nimalye arye peterenamlume. ‘Sik malye ning batakikcopura, Allah el dipkoprop yupu kel biktingce, teleb uptinge,’ tenenamlame.
Tonda, “Yuk ninye ati, yuk nang arye, ‘Aninye ara, malye nang tenepnamak’ tenen, yupu malye nyabuka, deililana meme. Yupu deice waldana ap, ninye nong oldana ap, pia kum wininamlulume. Aning kum wininamlum bukni, yuk nang, sik patalye ning tenebuka, nimalye arye, melibuka unamlulume. Yata ninye do nirya, tenepce arye winina ap, kanye talima eremna ap kum bukni, dipkoprop sik amutamuk umunce, nimalye arye telebuk wininamlume,” nyabuka, peterenalyame.
Aning ati ara, anggun kanye malye tenelulum ning nirya ap, anggun kan-kan malye un ning weik aupmalye ning nirya ap, batakanamlulume. Batakmunce, Allah arye, ‘Na yupu sik talima noutam duk moupnamle’ tenen, arepsuk ning ara, kanye talima dukdongopmunce, nimalye umunyak arye, kekebuka dolonamlume. Allah el yupu arepsuk ning ara, lyepnamsila atia.
Ilil kum unamsil bukni, anggun talima noutamak ara, ‘Yesus Kristus na Deiyoknye eluk unamnile’ tenen, wibuka kintinilinamlulume. Anggun kanye talima ara, Yesus deiceuk delinamlulume. Sik asilenamsiak nang nirya ati ara, ‘Allah arye lyepnamnil’ tenen, ‘El deice kanye delinuna ara, laka nyabuka deipnamne’ tenen, kintinilinamlulume. Yesus el lyen yupu laka nyanamlum bukni, yuk nang nirya ati, si erebuka, nimalye aryuk nyanamlulume.
Utenebuk bukni, Allah el si Yahweh arye tamubuka, Samuel biti nyabuk. “Ancuk eipmince, ‘Anye bira, el urasin teleb, el nong ara, cang weik ati, pia telebnye ulule,’ tenebuka, wibuka erelina kume. Narye, anye akunum batakmana ati, kum wipdeipnune. Deiyok ara, nyapnukine. Ara, na Allah arye, ninye nong ap, sik urasin ap, eipnirye kum erelinune. Ninye arye, nong bol deice ning eibikirye, ‘Aning mambule, anye bira telebe,’ tenelamaka atonun, kum tenenune. Tonda, ninye arye urasin ara, elilalulum bukni, nara Allah, na Yahweh arye, anggun talima pum tam moubuka elisunune,” nyabuk.
ကြော်ငြာတွေ