Anyaik alip tam dona ati ara, yuk yala urasin teleb keil ton, pia teleb-teleb ning uamuk. Akeil nirya ara, ninye yupa weik aryuk, akeil memelilamika ati, akeil nirya ara, dekna weik, tonda urasin pia teleb keil, uamuk. Akeil nirya, moubuka kiklibuka memebikce, kintinip deiamik. Winibikce, adice tam siknina ati ara, Libanon mutuku cemara yo arye, siknipdongobuka delina ati, cemara yo kintinip deiamik.
1 Peterus 2:5 - Eipomek5 Anggun babye, kam keil atonun ululuma anya arye, Yesus ap kanye dukdongobuka ululum talak nirya ara, el dopropsilirye, aik atonun dobuka teleb updeipnamsile. Tonda, ‘Allah ap, malye winin ninye ap, ansinibuka neika utibye’ tenen, ansinilina deiyok nang ati, Allah arena deiyok nang atonun kilisulule. Winisilyopura, Yesus Kristus ap, talima dukdongobuka diksukum umunye deice arye, Allah ati teleb ning arenamlume. Ara asing elinyap ning kum bukni, tonda nong kipman talye ning ati arenamlulum bukni, Allah arye, ‘Aning teleb,’ tenelye ning uk, anggun kanye talima noutam arye arilulum ning, elti, arenamlume. Winipmunyopura, kanye delinamsile. အခန်းကိုကြည့်ပါ။ |
1 Peterus 2:5
34 ပူးပေါင်းရင်းမြစ်များ
Winipmanto ara, sik imam nang arye, nintong teleb nyan ning, uku dongobikiba, atulum ara, an dam yaliba kekelyam touk, ‘Narye moropmakin yupu babye, an dam yatuba, kekeptum’ tenen, moropkine na nio. Tonda, winipmanto ara, nun Israel yala imam nang arye, ‘Nun malye winin ning, namin kipsilirye, tamubuka teleb kipdeipnamil’ tenen, lukunyan talak nirya, kam ning obikirye, an arena ati, uku dongolamak touk, narye na taruk erepnirye, anti moropkine na nio.
Aning ati ara, anggun nirya arye, na Allah arena ati, anggunce, “Se, nun ni Allah, anti pia telebe nyakinyabe!” nyabuka, na siuk erenamnululume. Kam ning opnarye, arenululum ning nirya ara, na patana kum ati, anggunce nati, ‘Telebe’ nyan ning ara, akunuma. Aninguk arenamnulume. Tonda, nara aning-aning nirya, deice tam erebuka, Pia Mikip Weik Deiyoknye unune. Anggunce nati, ‘Naio, an si erebuka nyana ati, winibuka-winibuka wininamabe,’ nyabuka, nyalin yupu deice arye, nyanululum ning nirya ara, dipkoprob winipnamlume. Anyapnulum yupu nirya ara, ‘Talye dauplye’ tenen, kum bataknamlume.
Na Allah arye nyapsine. Yata nang do nirya, na Allah ati, “Naio, anda pia telebuk ulyame,” nyabuka, na si erebuka, kininyak nang ara, narye sikti, kanye deipnamne. Winipmanto ara, min arye na si erebuka, kina ati, kam ning obuka, uku dongobuka arelamnik touk, wini talak ara, narye nyapsine. Anggunce nati, “Telebe,” nyapnumunyeura, akunuma. Tonda, yata nang do nirya, teleb diksukum winina ati, narye, “Teleb winin ning ara, ani. Ati aninguk talibuka wininamlume,” nyabuka, akunum laka nyapsise ning, dipkoprob winibikce nang ara, na Allah arye, anggunti dipkoprob lyepropnamsine.
Ati ara, anggunce na yupu moubuka kekepmunyopura, narye anggunti, ‘Sikda weik mambule. Aning ara na si erena ati, Allah ap, ninye ap ansinilina deiyok nang atonun unyake. Anggunda, na balye tam bukmunba, na akwamse ninye, sikda pia telebe,’ tenenamsine.” Allah arye Musa biti nyabuk. Nyabukopura, ayupu ton nyabuk. “Anyapmakin yupu nirya bobuka, sik Israel ninye ati nyalbinamlyame,” Allah arye Musa biti nyabuk.
Ura, winipmanto yupu ton nyapnusine. Ninye arye sik kwit capu melina ati, yukubikirye, teleb ning arelbalamak touk, ‘Kel pia weik kina deiyok ning ara, ninye nirya dopropnamaka’ tenen, akunum kintinip deipsuke. Ninye arye, ‘Pia teleb aik dopnuyap’ tenen, kintinina ati, ayukumna yo tekbarye ikikirye dobikiba, anyaik pia tunim alamle touk, ‘Kel pia weik kina deiyok ning ara, ninye nirya yanuka dopropnamaka’ tenen, akunum kintinip deipsuke.
Yuk nang arye anggun Israel yala ninye ati, ‘Sikda Allah ap, ninye ap, ansinilina deiyok nang unyake,’ nyanamsiyake. Nyapsikirye, ‘Sikda Allah el si eren aik pum tam pil dona deiyok nang unyake,’ nyanamsiyake. Yuk pera mutuku ninye nirya arye, sik aninye talibuka unyak dekna weik ning nirya ap, sikce talinyak ning ap nirya dobuka, anggun Israel ninye ati arelyanganamsiyake. Winipsikcopura, anggun aning nirya talipmunce, pia kanye deibuka unamlume.
Tonda sik pera mutuku arye tamubuka boyanamak nang noutam ara, narye, ‘Imam-imam pil dona deiyok nang ap, imam pil melibuka dona ati Lewi yala nang ap, atonun kipdeipniba, anang arye na si eren aik pum tam pil donamniakʼ tenen, wipdeipnamne. Na Allah Yahweh arye nyapsina ati, aning ara dipkoprob winipnamne.
Tonda tamubuka Allah el dam yamunce, anggun kanye imun usilye ning nirya boyamunce, Allah ati moronamlulume. Moronamlum ning ara ani. “Se, nun ni Allah, ‘Nunce anti moropnuyap yupu ara kekepsutume’ tenen, moropnukiyabe. Ara, nun malye wininyap ning ap, tenepye ning ap nirya ara, ‘Ance namin kipsimince, nun malye winin ning kum daneipsiminyopura, nunti teleb kipdeipnamsilam’ tenen, moropkiyabe. Winibuka teleb kipdeipsiminyopura, nun nirya arye tuba tonap, an siuk erenamkiabe. Aning ara, nyalina yupu deice arye nyapkipye touk, dipkoprob wininamabe.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
Na kayapo, malye unyaba ati, Allah arye adiparyuk talye wenebuka oplopsutu bukni, weik arye bico tenesulule. Bico tenesilirye, pia teleb kibuka melisulule. Aning ati ara, minop talak Allah el si erena ati, kam ning obuka arilamik touk, ‘Anggun kanye talima ap, nong ap nirya ara, Allah ati arepmunce, diksukumuk unamlum’ tenen, mikip arye nyapsine. Wininamlum ning ara, talye yupu deiceuk nyabuka, nong bol deice atonun una kum bukni, anggun kanye talima pum tam ara, dipkopropa pia diksukumuk umunce, ‘Allah el pil dobuka, el siuk erenamnap’ tenen, unamlume. Winibuka upmunyopura, Allah arye kanye delinamsile.
Allah arye bico tenyamnukce nati, ‘Apil donamle’ tenen, wibuka deiamnukce, pil dona deiyok ning areamanuk ning ara, laka nyapnusine. Ara, ‘Paulus ara, Kristus el pil melinanye ulirye, Allah el si erena aik pum tam talibuka, pil dona deiyok nang, imam arye Allah el yupu peterenyak touk, Paulus babye ninye lyena ati, Allah el laka teleb ninye lyen yupu dobuka, Yahudi yala kum ninye unyak mutuku peterelbinamle’ tenen, Allah arye wibuka deipnuke. Yahudi yala kum ninye unyak mutuku noutamak dopreipnuka deiyok ara, ani. Ara, ‘Allah El Dib Kanye arye, Yahudi yala ninye kum bukni, diba tenenamak ninye nirya ati, teleb kiplirye, Allah el na tenen ninye unamak’ tenena ati, wipdeipnamle. ‘Aninye wibuka delinamla deice, Allah arye sikti, kanye delinamle’ tenen, Allah arye na Paulus ati, wibuka deipnuk. Ura, minop talak, Allah el si kina ati, kam ning obuka Allah ati arilbalamikba, Allah arye aninye ati, kanye delilamuk touk, Allah El Dib Kanye arye, Yahudi yala kum ninye ati, wiplirye, akunum teleb kiplyopura, Allah arye sik Yahudi yala kum ninye ati, el kanye delinamle.
Anggun Korintus mutuku ninye ara, Allah el wa dam atonun ululume. Tonda, anggunda, Allah el asik atonun ululume. Anggun Korintus mutuku ululum ninye ara, na ning kum ululume. Aning atonun Apolos, el ning kum ululume. Na ap, Apolos ap ara, Allah el amu tam pil melin nanguk unyame. Ati, na ap, Apolos ap, neika pil melibuka donyame.
Na kayapu, anggun moubuka kum kel kiplum do? Anggun nong ara, Allah El Dib Kanye arye, wekuka usulula anya arye, el aik atonun ululume. Allah arye, el Dib Kanye arepsukbuk, nun talima ak wekuka usulula ati, anggunda, el aik atonun ululume nyapsine. Aning ati ara, anggun nong ara, anggun kanye aniryuk tenelulum ning, ‘Talye luparakuka winiptibye’ tenen, kum wininamlulume. Allah arye, anggun nong talisilya anya arye, anggun nong ara, anggun ninguk kume. Allah el ninguk ululume.
Tonda, Allah el si erena ati, weik mambul aik ap, talye ning isa si erenyak aik ap, neika atonun ning do? Kume. Nun kanye talima ap, nong ap ara, Allah el wekna aik atonun unyabe. Allah arye nyabuk. ‘Na ap, anggun ap neika ubirye, anggun ap neika banamnyabe. Nara, sik Ni Koprop Allah unamne. Sikda na mapu unamniyake.’ (Imamat 26:12) Allah arye nyabuk yupu nyapsine. Tonda, Allah yupu noutamak sekik yupu ton ani.
Aning ara, lo tuba upmasilye talak ara, yuk nang sik patan ning do, ikin uplye talak do, eibibyopura, aninye ati bico tenebuka melinamabe. Ninye nirya ati bico tenebuka melinamap bukni, pia weika arye bico tenebuka melinamap ninye ara, Yesus ati diba tenenyak ara, nun du weit atonun kipdeipsuk ninye ati, bico tenebuka melinamabe.
Narye yuk yala Israel ninye nirya ati, sik wa win tuku ap, yuk ayala-ayala ning nirya ap, bokuka arepnamne. Bukni, sik Lewi yala nang ati ara, aning-aning nirya bokuka, kum arenamne. Na Allah Yahweh aniryuk, sik Lewi yala nang ati, kalikuka melinamne. Sik patan ning nirya ara, na deice aryuk dolonamake. Ara, na Allah arye, sik Lewi yala nang ati, ‘Naryuk anggun patan ning kintinibuka arenamsine,’ nyabuka, nyalilamse atonun wininamake.
Atalak noutam nirya ara, anggun ap, Yesus Kristus ap, talima dukdongobuka neika ululumbuk, Kristus el mikip deice melisiliba, pia diksukumuk winilamlum ani, ‘Teleb winina ati, duk weik moupnamsile’ tenen, Allah morosunune. Diksukumuk winilamunyebuk, duk weik moupsilyopura, ninye nirya eipsikirye, “Allah elda pia telebe,” nyabuka, el si erebikibuk, Allah el si weik upnamle. Winiplyopura, ‘Ninye weik el si kel kibikirye, el siuk erepnamak’ tenen, Allah morosunune.
Bukni, na opnikca babye, telebe uka. Anggun nirya ati, teleb kanyeuk bobuka unamne. Anggun babye, atonun, nati teleb kanyeuk bobuka unamlulume. Ara, winipmanto yupu nyapnusine. Allah si erena ati, kam ning obuka arilamibirye, ‘Pia teleb upnul’ tenen, sirya dakana ati, aning deice teleb mek dikuka delilamap atouk ning ton nyapnusine. Ara, Allah diba teneluluma deice, el piluk dolulum ara, Allah ati arinyap ning atouk ulule. Malye nang opnicopura, Allah ati arinyap ning deice dikilongolamap mek atouk ulule. Ara, ‘Allah arin ning pia teleb upnul’ tenen, teleb mek dikuka, delilamap ning ara, na opnicopura, amek atonun uptinye.
Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.
Ara, yata ning do nirya, anggun pil donamlum ning nirya ap, yupu nyanamlum ning nirya ap, nun Deiyoknye Yesus Kristus, el amu tam ubuka, el si deiceuk pil donamlulume. Ara, elce tenesilye touk, diksukumuk wininamlulume. Winibuka wininamlum talak nirya ara, Yesus arye melisilyebuk, el ap, talima dukdongobuka umunya deice arye, nun ni Allah ati fia, “Telebe,” nyanamlulume.
Aminyan arye yatinya babye, asurat deice arye, Allah elti, dib tenen ninye adiparyuk wininamak ning, ‘Teleb ning ara, ani,’ tenepnamlum tenena ati, ayupu sekeibkine. Allah dib tenebupu ura, kanye dukdongopsuk ninye nirya ara, Allah el mapu silip atonun unyabe. Ninye aik ayukumna yo ikuka dobiceura, adeice arye gat ding abuka tiklamle atonun, Allah Pia Kwemdinanye, el mapu arye el si erebuka, el dipkoprop yupu moubuka talibibirye kalikinyabe.
Musa ara, Allah el pil melinanye ulamuk bukni, Yesus Kristus ara, talye pil melinanye kume. El Yesus ara, Allah el mi kopropa ulirye, Allah el mapu nirya ati, anggun weik deiyoknye usulule. Apil dona babye, Kristus arye batakna kum, pia teleb ubuka dolule. Ura, Allah el mapu nyapmasina ara, nunti nyapsine. Ara, nun diba tenenyap nang arye, ilil una pia kum arye, ‘Allah dipkoprop lyesulule’ tenen, diba tenebuka kanye teniltona kum arye, pia talibuka ubibyopura, ‘Allah el mapu dipkoprop unyabe,’ teneptibye. Allah arye dipkoprop lyepnamsil ati, el laka teleb yupu, ninye lyen yupu teleb asa arye, kanye deibuka peterenyabe.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Winipmanto ning ara, yatanye do, Allah yupu nyalulnye bira, Allah el dam yaturye, nyaptubuk elce ila tamubuka nyapsutu touk, pia mikip deice arye peternamsile. Aning atonun, yuk ninye ati, melibuka pil dolulnye bira, Allah arye el mikip arisilya deice arye, yuk ninye ati melibuka pil donamle. Allah arye, ‘Na pil donamak’ tenen, talye arisilye pil dona deiyok ning deice arye, Yesus Kristus ap, kanye dukdongobuka umunce, anggun wininamlulum ning nirya ara, teleb ubuka unamlulume. Winibuka umunyopura, yuk nang eipsikirye, Allah el si weik arye erebikirye, elti, “Telebe,” nyanamake. Ninye mutuku-mutuku nirya arye, Allah el si erebikirye, ‘Weik mikip ululnye bira, Allah eluk,’ tenebuka, ‘Pia unamak’ tenen, Allah moronune. Akunuma.
Allah arye ninye mutuku sirya im sirya nirya ati, yupu yuk-yuk bokeiplirye, wenepnamla ara, el mapu kan-kan arye deiyok koupnamla anya arye, ikin ning anggun nong deice deipsikce talak ara, kanye deibuka, Allah el siuk erenamlulume. Tonda, el mapu kan-kan arye deiyok koupsilyeura, mitik ikin usilye bukni, aminyan daknamle talak ara, diba tenena kum arye, Allah el laka teleb yupu ati, yaniltanyak ninye ati ara, yupu bokeiplirye, wenepnamle ning ara, weik mambule. Sik pia ikin weik unamake.
Lyepsuka deiyok ara, ‘Na ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, Allah el yupu kekenamak’ tenen, Yesus teleb updeipsukba, Allah arye, ‘Anggunda na tenen ninye’ tenen, talisulule. Ati, ‘Ninye nirya arye Yesus el siuk pia erenamak’ tenen, Allah moronune. Ninye im sirya, mutuku sirya nirya arye, Yesus ati, “Elda weik mikipnye ulule. Dotalak nirya ara el siuk weik arye erenamabe,” nyabuka, ‘El ti si pia erenamak’ tenen, ‘Se,’ tenenune. ‘Aning ara dipkoprop nong upnamle’ tenen, “Amin,” nyapsine.
Sik minyuma talak kam buknamak ninye ara, Allah arye teleb updeipliba, pia kanye deibuka unamake. Sikda pia mambule. Allah arye aninye ati webuka deiamuk ati, sikda malye winin ning tonok babye kum talinyakce, pia diksukum ninyeuk unyake. Aninye ara, Allah arye minyuma talak kam bukeipnamle. Bukni, yuk malye ninye nirya ara, dipna bitinye talak ton dipnamak bukni, atalak minyuma kam bukuka unamak ninye ara, like bitinye talak kum dipnamake. Telebuk pia kam unamake. Sikda, keting tamun yupa weik 1.000 tahun deice arye Allah ap, Kristus ap, sik amu tam buknamak bukni, sik bitinye ap, aninye ap ninye deiyok ning talibuka, aning-aning nirya talibuka unamake. Sik aninye ara, Allah el mambul pil don nang pia unamake.
Malye winin ning ati, ‘Nun like’ tenen, malye kilamice ninye ati ara, pia teleb kipdeipniba, mikip weik ubikirye, darabuka unamake. Ara, na ni el si erena aik, weik arye domik aik ara, el ayukumna yo pia darabuka, kat asa tiklamle touk, aninye sik kanye talima nirya mikip kipniba, pia darabuka kat asa, telebuk unamake. Allah el ulya im deice ara, bikirye batakuka kum binamake. El ap pia neika unamake. Anggunce malye winin ning ati, malye kibuka bisinamlum ninye ati ara, narye winiryuk si winilye si nyabuka, anggun asok deice sekeipnamsine. Tonok ning ara, na ni Allah el si ap, bitinye ning el unamlak Yerusalem Winiryuk mutuku si ap, winilye ning ara, na si winiryuk si ap, anggun asok deice sekeipnamsine. Allah arye weik asik el si ara Yerusalem Winiryuk mutuku kintinipsilirye, im deice arye dopkwetepliba, yanamle.
Ance dekuka lyeplum ninye nirya ara, “Nun ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, ‘Allah el yupu kekenamak’ tenen, teleb kipdeiplume. Teleb kipdeiplumba, Allah arye, ‘Sikda na tenen ninye’ tenen, aninye nirya talilule. Talilirye, sik dobuka, ‘Weik ninye deiyok nang unamak’ tenen, ninye deiyok kina ati deiyok ning areplumba, tukwak mutuku nirya talibuka unamake,” nyabuka mot nyanmekba, kekepse.
ကြော်ငြာတွေ