Yata nang do nirya, sik kanye talima pum tam arye, ‘Allah ara, nun lik, elce nyasilye yupu, pia kum bolonamabe,’ tenebikirye, yu kanye teninamak nanguk patalyeba unyake. Sik wenena ap, kel bikna ap ati, Allah arye lo areplyeba, deiyok nang arye, anang tomobuka tapu kounyak bukni, atalak ara, sik anang pia moubuka kum bikinyake. Sik kanye talima pum tam ara, yu tenina ap, malye winin ning ap ati, kanye delinyake. Ati ara, yu nang arye anang tomobuka, tapu kounyak talak ara, sikce Allah ati, ‘Nun ni Allah arye, melibuka lyepnamsileʼ tenen, Allah ati pia kum moronyake.
1 Peterus 2:1 - Eipomek1 Allah el pia ati, upnamle yupu peterelamsika ati, malye winin ning nirya ara, batakanamlulume. Ara, yuk nang ati, yu una ap, ‘Na’ tenen arye, talye nyana ap, ‘Yuk nang ning, na ton doproptinye’ tenen, talima noutamak pataplibuk tenena ap, malye winin ning aupmalye bukni, nong bol deiceuk teleb una ap, yuk nang ati talye yupu nyabuka lulundana ap, amalye winin ning yala-yala nirya ara, batakanamlulume. အခန်းကိုကြည့်ပါ။ |
1 Peterus 2:1
50 ပူးပေါင်းရင်းမြစ်များ
Allah arye melipliba, telebuk wininamak ninye ara ani. Ara, ninye malye ning wininyak ninye, Allah dam yakirye, “Se, nunda malye wininyap ning ani. An ap, an yupu ap ati, yanikinyabe,” nyabuka, yanuka laka lebikiba, Allah arye, sik malye winin ning nirya, namin kilirye, kum kipdeiplirye, aninye nirya ara, pia kanye delinamake. Allah arye, sik malye wininyak ning, tuba kum tenenamla ati ara, sikda pia kanye deibuka unamake.
Dan ninye do nirya, anggun kan-kan noutamak arye, ‘Nunda lo tuba upsiliba, kam unamap talak nirya, teleb kanye deibuka unamabe. Tonda, nun kam unamap talak ara, weik lo arepsutuba, keting tamun weika arye, tonap kam uptibye,’ tenen, patasulul ninye nirya ara, narye nyapnusin yupu, moubuka kekenamlume. Anggunce teleb wininamlum ning ara, ani.
Raja Daud arye nyabuk. Sik malye winin ninguk, talibuka wininyak ninye arye, malye winibikiba eipmunyopura, anggunce, ‘Se, yata wiripnamap do?’ tenen, malye kanye bobuka, kum unamlulume. Aning atonun, sik malye ninguk talibuka, malye weik wininyak ninye, eipmunce, ‘Se, sik malye wininyaka deice arye, talinyak ning ara, nun babye ton taleptibye’ tenen, ‘Seʼ tenen, mambul kirikna meme. Sik malye wininyak ninye arye, wininyak ning nirya ap, talinyak ning nirya ap ati, ‘Se, na babye ton doproptinye,’ tenena pia meme.
Winilamsa deiyok ara, ani. Narye, sik kanye talima erebuka, kwalinauk unyak ninye, pil dobuka, dolon ning weika dolokirye, kanye deibuka telebuk unyakba, elinunce, ‘Se, sik anang ara, kanam asa uk unyak bukni, nara yata deiyok ati, ikin asa uk unun do?’ tenelamsa deice arye, yu upnukce, na dib tenepse ning, walwalapmanto upnuke.
Ninye ton, kanye teleb ubuka ukirye, kanye lamapdongobuka unyak nang ara, sik nong nirya babye, telebuk ukirye kanye deibuka, kam unamak talak ara, lo weik upnamle. Bukni, ninye ton tuba-tuba kanye talima yu uliba, sik kayapu nang ati, ‘Se, sik talinyak ning ara, naryuk taliptinye’ tenen, derenyak nang ara, sikcuk olilanyaka anya arye, minopce dibinamake. Winipmanto ara, ninye arye din ning talye ak deipmakibuk, minopce lyulamle touk, anang sik kanye talima malye upnin baliba, minopce dibinamake.
Sik pia malye winin ninguk talibuka malye weik unyak ninye ati ara, ‘Se, sik anang ati, yata winipnamap do?’ tenen, mambul kanye bona kume. Aning atonun, sik malye unyak ninye arye talinyak ning ap, wininyak ning ap ati, ‘Se, na babye ateleb ning talibuka uptinye. Winipnirye, sik wininyak touk winiptinye’ tenen, patana pia meme.
Tonda, asum akunum winiplyopura, ninye nirya ara, sikce talilamik dekna weik kat ning, perak ap, emas ap, dopromikce, ‘Isa si erepnamapʼ tenen, aning deice arye, ninye urasin atonun kibuka, memepdeiamik ning, isa si erena ati, talye ning nirya ara, adiparyuk batakuka bindopnamake. Winipnamaka ara, sik anang ulamicak ara, yamba maka ap, bai tam balamle ayam mana ap ulyakuk, isa si erena ati, memebuka delinyak patung ara, batakuka bindopnamake.
Anggunce, ‘Nun ni koproba ani,’ tenen, kam kum ulul ning, isa si erena ati, isa urasin atonun puturubuka deipmunce, si erelulum ning nirya ara, malye kipdeipmunce, donoknamlume. Ara, aisa si eren ning patung-patung ara, sik bol deice ara, urasin pia teleb dekna weik ning, el si emas ap, tonda perak ap arye, taplakuka deipmunce, si erelulu ning ara, pia malye kipdeipnamlame. Ati, anggunce, ‘Aning ara pia malye ning,’ tenepmunce, aning dobuka donokmunce, “Sik isa ap, patung ap ara, nun dam pia kum deipnamabe. Sik isa mer nirya ara nun dam batakuka yukak bilulume” nyabuka, donoknamlume. Kwalye bok boyanuka, pia malye ning kilipmunce, bai tam donokolulum touk, aisa si eren ning babye, bobinuka yukak donoknamlume.
Nyabukopura, ayupu ton nyabuk. “Allah el yupu laka nyalamuknye Yesaya arye anggunti nyapdeiamsuk ning ara, dipkoprop nyapsuke. Anggunda talye yupu nyabuka, malye ululum nang anya arye, Yesaya arye anggun malye winilulum touk wininyak nang ati, sekdeiyamuk yupu ara anyapnusine. Allah arye nyapdeibukba, nabi Yesaya arye sekamuk yupu atia.”
Akeil deiya buru tam urasin teleb ulul bukni, pum tam ara, malye ning ulamla atonun, anggun babye atonun ululume. Anggunda yuk nang asing eipsikirye, ‘Anang ara diksukum teleb ubuka wininyak nang,’ tenesinyak bukni, dipkoprop anggun talima noutamak ara, pia malye ning aupsukba, bola deiceuk teleb pil dobuka winilulume. Bukni, anggun talima noutamak ara, pia malye ning aupmasil bukni, malye ninguk winilulume. Yesus arye nyabuk. Nyabukopura, ayupu ton nyabuk.
Adeiyoknye tamubuka yalyopura, amalye winilamlinye, el nong oplirye, seklopnamle. Winiplirye, anye el kanye ara, Allah diba tenena kumce, pia malye winin ninye unamakak, uku din mutuku dongoplye talak ara, kanye imun unamle. Kanye imun upliba, el ap, sik kanye talima noutam malye ning upmalibuk, aning tenena kum diparyuk, bola deice teleb ninguk unyak ninye ap, pia engebuka unamake. Yesus arye nyabuk.
Anggun kanye talima noutamak pia malye ning tuba aupmasilabuk, ‘Teleb ning winibibiba, yuk nang eipsikirye, sikda teleb nang tenenamsiyake,’ tenelulum nang ani. Minop ara, weik yo touku anggun asing noutamak aupmasilya doproptumopura, anggun kayapu asing tulukmatu ning teleb wiribuka eiptumce doptume. Anggun asing noutam weik ning, kum dobuka batakmunyopura, yata wiribuka eiptumce, anggun kayapu nang asing noutam, mitik upmalye ning doproptum do? Yesus arye nyabuk.
Anang arye, ‘Yesus malye nyaptue’ tenen, nyabuka tenepce arye asipdeyikopura, Yesus arye anang sik talima ak duknublobuka nyapmek ning bikukce, ayupu nyabuk. “Anggunda, ‘El yupu nyaptua deice arye malye uptue’ tenen, tenebuka asipdenmanulum ning ara, yata ati do? Anggun keil uang dobuka bebdenumunba, dipdenune,” nyabuk.
Se, anggunda, pia malye ulalume. Ninye arye dipne ninye weina ati, tuku palibuka ninye baya yo akunum deibikceura, tuku singnina kum arye, bataktingopura, yuk nang mangkau arye yanibuka atuku pum bisik sakuka opdatinge. ‘Winibikcak’ tenen, bata delilamak ning kum deibikcopura, aminyan ara yuk nang mangkau kanye bobuka banmakce ani, aweipmakce ning mangkau arye yaninyake. Aning atonun, anggun babye winilulume. Ara, anggun malye winimunye ning ap, tenepce arye peteremunye ning ap deice arye peteremunyebuk, yuk ninye arye talye mangkau kanye bobuka, malye winin ning kel bikuka unyake. Yesus arye Farisi nang ati nyabuk.
Yuk talak ara, ninye yupa weike pia kum nukmanto Yesus dam yanmek anya arye, lipmokce min nang nong deicauk yanildanmekura, Yesus arye el mapu 12 nang ati nyabuk. “Sik Farisi nang ara, sik malye unyak ning ara, nong bol ati teleb unyak bukni, dipkoprop sik talima noutamak ara malye ning weik atupa aulule. ‘Farisi nang winiyak touk, nun babye aning malye wininyap’ tenen, pia kalikuka dilanamlulume. Winipmanto yupu nyapnusine. Roti nena deiyok ning mitik anunuk, roti bun noutam aupmalibuk, weik upnin balamle atonun, sik Farisi nang malye wininyak ning ara weik upnin balamlyeura, ninye weik malye wininyake. Ati sik Farisi nang wininyak ning ati pia kalikuka dinamlulume,” nyabuk.
Yata wiribuka arye anggun asing noutam weik yo gu aupmasilyebuk, anggun kayapu ati, “An asing noutamak yo kita sung-sunga atonun ning dopropnamkine,” nyaptum do? Anggun talima noutamak pia malye ning tuba upmasilyebuk, ‘Teleb ning winibibye ati, yuk nang eipsikirye, sikda teleb nang tenepnamsiyak,’ tenelulum nang atia. Minopce ara, weik yo gu, anggun asing noutam upmasilya doproptumopura, anggun kayapu asing ak tulukmatu ning, teleb arye eibuka doproptume. Anggun asing noutam weik ning kum doplopmunyopura, yata wiribuka eiptumce, anggun kayapu ning doproptum do? Yesus arye el yupu kekenmek nang ati nyabuk.
Aninye arye pia malyeuk ulamik touk, wini talak babye aninye atonun unyak ninye arye, tuba malyeuk wininyake. Yata malye winin ning do nirya, malye winin ning aning-aning nirya talibuka wininyake. Sik kanye talima pum tam nirya ara, malye ninguk langdibukba, ninye kum winipmanto, pia malye winin ning weika arye wininyake. Tonda yuk malye wininyak ning ara ani. Yata bona ning do nirya, sikce aning-aning nirya ati, ‘Se, nuncuk aning yala-yala nirya weika arye doproptibye’ tenen, kanye talima lilolulba unyake. Tonda, yuk nang arye talinyak ning ati, ‘Se nuncuk taliptibye’ tenen, kanye talima engena ap; yu upliba ninye oltakana ap, walana ap; tenepce arye tilila yupu nyaltakana ap; yu upliba yuk ninye ati malye ulina ap; yuk nang arye wininyak ning ati, malye yupu nyabuka murmur ana ap; awininyak ning nirya ara malyeuk wininyake.
Ura, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Mitik mapu tenelamak touk tenemunya ara, bataklulume. Ura, malye ning pataplyeba, malye winina ati ara, pia mitik aling pum lin mapu arye, aning-aning kum tenebikirye, malye kum winilamak touk, anggun adiparyuk telebuk unamlulume. Bukni, anggun kanye tenen ning noutamak nirya ara, teleb nang, wisi akunum deibik ninye arye, kanye bobuka diksukum ninguk tenyak touk, anggun Korintus mutuku ululum ninye babye adiparyuk tenenamlulume. Malye winina ati ara, mitik mapu atonun unamlume. Teleb winina ati ara, wisi ninye atonun tenepmunce, telebuk wininamlume.
Aning ati ara, minop talak, sik Yahudi yala ninye Kaplina ati Kwalina yulamik talak arye, nena deiyok ning uamuk roti dopkwetebik touk, nunda yu una ap, malye winin ning yala nirya ap, bataknamabe. Tonda, sik minop Yahudi yala ninye arye, nena deiyok ning kum uamuk roti, nena kum roti, winiryuk ninguk dabuka dilamik touk, nun wini talak ara, tenebuka winina pia kum aryuk, diksukumuk ubirye, Kristus pil dopsuk ning ati ara, kanye deibuka unamabe. Na Paulus arye, nyapsine.
Na ilil upmanil ning ara nyapnusine. Narye anggun dam yanyopura, min arye ‘Winibuka, winibuka winiptinge,’ tenyamse touk kum upmunyopura, malye kanye donamne do? Aning atonun, anggunce nati, ‘Paulus ara, winibuka, winibuka winiptue,’ tenenululum touk kum winipnyopura, anggunce ton malye kanye bopnamnulum do? Tonda, na yanyopura, yupu deice waldana ap, kanye talima wililana ap, yu weik upliba, weik arye yupu nyana ap, yuk-yuk tenelamunce, yuk-yuk kilongona ap, lululina ap, kanye erelana ap, kwalina ap, yuk nang arye, ‘Anang ara, malye nang tenepnamak’ tenen, ‘Malye yupu nyalina ap, winipnamlum do? Na yanamne talak ara, sik Korintus mutuku ninye tuba malye winibicak’ tenen, ilil unulule.
Tonda, yu usilye ning ap, yuk nang malye upsikiba yu usilye ning ap, derelana ap, yupu deice walana ap, anirya ara, batakanamlulume. Tonda, yuk nang arye, ‘Anang ara, malye nang, tenepnamak’ tenen, lulupdeibuka nyalulum yupu ap, yu usiliba, yuk nang ati malye-malye winina ap, nirya ara, batakanamlulume.
Aning atonun, anang sik kilapu wininyak ning ati yupu ton nyapnune. Anang sik kilapu ati, yuk nang arye, “Akilapu ara, teleb winin kilapu uka,” nyalamak nanguk, apil dona ati erelina telebe. Sik kilapu arye, yuk ninye ati, yu uplibuk lulubuka minildana kum bukni, yata pil do, yata winin ning do nirya, talye kanye bobuka una kum arye, kanye moubuka tenebikirye, diksukumuk winin kilapu, sik akanye yapu erelina telebe.
Aning atonun, sik wisi kilapu ati, ayupu nyabuka peterenamlyame. Sik wininyak ning noutamak nirya ara, ‘Allah el mambule’ tenen, malye winin ning nirya batakikirye, diksukumuk ubikirye, pia mingne teleb kili-saluk unamake. Ati ara, yuk nang arye sikti, ‘Sik malye winipmake,’ kum nyapmanto. Teleb ninguk wininamaka atia. Tonda, sikce yuk ninye ati, malye yupu nyabuka, pia kum lulunamake. Tonda, sikce yu mek, kanye wangalamak mek pataplibuk, weik arye kum dinamake. Anirya kum wininamak bukni, pia teleb winin ninguk tenebuka, mitik kam kilapu ati, peterepnamake.
Aning ati ara, na kayapo, sik minop talak ulamikce, diba tenebuka diksukumuk ulamik ninye, wini nyapmasin ninye ara, dana-dana tam nirya, yupa weik aunyakce, nunti dinauk usinyake. Disinyaka ati ara, Allah arye, ‘Winibuka diksukum bisikuk banamak’ tenyamsuk touk, ikin upsilya babye, batakna kum, pia pi dobuka, abisik deiceuk mikip arye banamabe. Sik biklamak nang arye, ‘Ikin upnilyak’ tenen, talye ning nirya batakuka, tonok bisikuk mikip arye bik-bik abuka balamak touk, nun babye atonun, ‘Ikin upsilyak’ tenen, talye winin ning nirya batakibirye, Allah tenepsuk bisikuk binamabe. Aning atonun, weik mambul ning ara, malye ning patasilya deice, kanam asa arye tapu koulongona atonun ulamsil ning nirya batakibirye, Allah tenyamsuk bisikuk binamabe.
Aning ati ara, anggun kanye malye tenelulum ning nirya ap, anggun kan-kan malye un ning weik aupmalye ning nirya ap, batakanamlulume. Batakmunce, Allah arye, ‘Na yupu sik talima noutam duk moupnamle’ tenen, arepsuk ning ara, kanye talima dukdongopmunce, nimalye umunyak arye, kekebuka dolonamlume. Allah el yupu arepsuk ning ara, lyepnamsila atia.
Na kayapu nang, nun dib tenen nang unyaba anya arye, anggunce anggun kayapu nang ati, minina yupu kum nyalanamlulume. Anggun diba teneplum nang arye, yuk diba tenebik nang ati, malye yupu ap, minina yupu ap nyapmunce, sik nong deice deipmunyopura, ara Allah arye, ‘Wininamlulume, aning ara, kum wininamlulume,’ tenen, nyapsuk yupu yanina atonun ululume. Ara talye ati kume. Anggun babye diba teneplum nang arye, yuk diba tenenyak nang ati, “Anggunda malye nang ululume,” nyabuka, malye yupu nyalalulumopura, ara anggunda yupu bokolina deiyok nang atonun ululume. Aning ara, pia malye winilulume. Allah el yupu deice arye, “Malye yupu kum nyalanamlulume,” nyapsuk bukni, aning akunum winipmunyopura, el yupu akunum yaniplume. Allah arye nyapsuk yupu noutam bukni, ayupu nirya dobolbana kum arye, ton yupu yaniltana, ton yupu kekena kum umunya deice arye, yupu bokolina deiyok nang atonun akunum umunce, el yupu nirya yaniltalulume. Ati aning ara winina meme nyapsine.
Allah el yupu deice arye nyasulule. “Allah arye arepsukbuk nun talima ak Dib Kanye usilya arye, ‘Anang ara na’ tenen, tenepsilirye, ‘Yuk ning pataplibuk na bataknicak’ tenen, pia kalikisulule.” Ayupu nyapsuka ara, talye yupu uk nyapsuka tenelulum do? Kume, Allah El Dib Kanye arye, ‘Yuk malye ning talibuka bicak’ tenen, pia kalikisulul ati, Allah arye, ‘Sik malye ubicak’ tenen, el mikip arisilya deice arye, pia tuba-tuba talibuka melisulule.
Anggunda, malye winin ning noutamak, Allah arye lyebuka lopdeipsuk nang, diksukum una nang atonun unamlulume. Winibuka unamlulum bukni, ‘Nunda Allah arye akunum lyebuka lopdeipsuka anya arye, nun tenepmabye ninguk, talye luba kibuka unamabe,’ tenena meme. Malye un ning duknubuka kum unamlulume. Allah el yupu kekebuka, el piluk dobuka, diksukum unyak nang ulamak touk, anggun babye, wininamlulume.
Malye winin ning akunum batakanyak ninye ara, kanye imun kanye bobuka, akunum ulamik ati, sik tukwak mutuku tuba unamak talak noutamak nirya ara, ninye talima ak, malye un ning pataplibuk kum wininamake. Malye un ning pataplibuk, ‘Malye winipnuyap’ tenen, kum unyak bukni, Allah arye, ‘Wininamak,’ tenesulul ninguk tenebuka, aninguk talibuka diksukumuk unamake.
Sik yupa weik 144.000 ninye kan-kan nirya, tilila yupu tonok babye pia kum nyalamik atonun, atalak babye tilila yupu pia kum nyanmek. Dipkoprop yupu nyalamik touk tuba nyanyake. Yuk ninye nirya arye anang ati, “Sik malye winilamik ning ara, ani, anye nyabuka, sik nong deice, malye yupu lulubuka kum nyaptinge. Malye winin ning tonok babye, kum winilamika anya arye, deiyok kum ulula ati, yuk nang arye, sik 144.000 nang ati, malye yupu kum nyaptinge. Na Yohanes arye nyapsine.
ကြော်ငြာတွေ