1 Korintus 9:5 - Eipomek

⁵ Tonda, sik Allah yupu peterena deiyok nang bukni, yuk Rasul nang ap, Yesus el weit yapu ap, Peterus ap sik nirya ara, sik domik kilapu ap, neika peterelbanyake. Sikda sik kilapu ap peterepra banyak touk, narye ton, ato kil Yesus dib tenebuk kil ton kum dopnamtinya ati, nyanululum do? Kume, na deiyok ati, ‘Dopnune,’ teneptinyopura, kil doptinye.

1 Korintus 9:5 ပူးပေါင်းရင်းမြစ်များ

Kidung Agung 4:12

Se, narye dopnamkin kilo, anda na weit kil atonun ulyame. Tonda, narye anti, ‘Akil dopnamneʼ tenen, anti moun dikunun bukni, wini talak ara, narye anda min kum dopkitinye. Ati neika min kum uptinimnye. Ati ara, winipmanto ning ara, ninye arye pia teleb wa akunum wibikirye, yala akunum koubikcopura, ‘Talye nang wekelbikirye, awa noutam akunum koupmap ning ara, ubula dopropsicakʼ tenen, awa dana-dana tam nirya ara, cang keil poka ton, dobuka antanalongonyake. Aning atonun ton, ninye arye mek pu pia teleb ning, pu dobuka balamukak ara, ‘Malye nang arye yanuka, ateleb mek nirya talye luparabuka kwebikirye, dipsikcakʼ tenen, amek puak nirya kalikna ati, poka dobikirye, amek pu deice tam ara, keil arye bisik bublan botobuka tirikilongonyake.

Matius 13:55

“Anye bira, ara nun mutukunye birye, Yusuf elce deibuk mi do? Anye bira yo cakuka marikna memebuka dolinye koprop ulule. Diba de, nun makal kil Maria arye deibuk mi ara, el akunum atia. El weit kopropa capu ara, Yakobus ap, Yoses ap, Yudas ap, Simon ap, sik amutuku unyake.

Matius 8:14

Yesus arye nyabukopura, banmoka ani, Peterus aik binuka wekuk. Anyaik wekukce, Peterus el yamal kil weik nong bupu uk dinmokba, mapmoka eibuk.

Markus 1:30

Simon el yamal kil yun dilamuka ati, mapmok aik ara, Yesus ati laka nyabik.

Markus 6:3

Tonda ayupu ton nyabik. “Kume anye bira, nun mutukunye binye, yo cakuka marikna memelinye, eluk do? Diba de, Maria arye deibuk mi, el akunum atia. El weit yapu, Yakobus ap, Yoses ap, Yudas ap, Simon ap, sik aunyake. Tonda, el weit kilapu babye, nun ap, aunmabe,” nyanmek. Nyabikce, ‘Yesus ati yu weik ubuka ati ara, elda talinye binya’ tenen, elti, lik ubukura, ‘Nun like’ tenen, batakik.

Lukas 6:15

Tonda, Matius ap, Tomas ap, Alpeus el mi Yakobus ap, tonda Simon ara, yuk nang arye elti, ‘Patriot’ nyalamiknye ap, wipdeibuk.

Lukas 8:20

Winibukura, yuk nang arye, Yesus ati nyabik. “An nin ap, an weitcapu ap, aik lilun dam tikelyanmakce, ‘Yesus ap yupu taliptibye’ tenen, enmakiake,” nyabik.

Yohanes 1:42

Nyabukce, el du Simon bobuka Yesus dam boyayuk. Boyayukopura, Yesus arye Simon biti dipdeyukce, ayupu nyapdeibuk. “Anda, wisinye an ni kopropa, Yohanes birye deipkuk mi Simon ulyame. Bukni, wini talak arye dipdongobuka, oyanamle talak ara, Aramaik yupu deice arye Kefas nyanamake.” Yesus arye nyabuk. (Yunani yupu deice arye Kefas biti ara Peterus nyalamake.)

Yohanes 2:12

Yesus arye Kana mutuku noutamak arye, ninye kum winipmanto kum pil, minyuma yubukap ning akunum dobukopura, amutuku batakuka, Kapernaum mutuku koluku biyuk. Yesus ap, el lin ap el weitcapu ap, elce wipdeiyamuk nang ap, neika biyikce Kapernaum mutuku like winilye atonun, like dumbarye atonun mapmek.

Rasul 1:14

Anang nirya ap, Yesus el lin Maria ap, Yesus el weit yapu ap, ton yuk kilapu tonap, sik nirya asum-asum nirya bulubuka Allah pia moronauk ulamik.

Roma 16:1

Ura amapo, yuk yupu ton nyapnusine. Tonok kil el si ara Febe akunum diba tenebuka anya arye, Yesus ap talima dukdongobuka unyaba ati, akil ara nun weit kil kopropa atonun ulirye, mutuku si Kengkeria mutuku asik dobuka unyak mutuku noutamak diba tenebuka unyak ninye ati, Allah yupu aik talibuka melina deiyok kil atonun ulirye, melilule.

1 Korintus 1:12

“Kanye wilildamunce, pakalilalulume,” nyapmasina ara, ani. Anggun kan-kan bukni, ton nang ara, yuk nang ati, “Kume, nunda Paulus el yupu kekebuka dobolbanyabe. El mapu unyabe,” nyanyake. Aning atonun, yuk nang ara, “Kume, nunda Apolos el yupu kekebuka dobolbabirye, el mapu unyabe,” nyakiba, ton nang ara, “Nunda, Kefas el mapu unyabe,” nyakiba, ton nang ara, “Kume, nunda Kristus el yupu kekebuka dobolbabirye, el mapu unyabe,” nyabuka bokoldanyake. Winilulume ati, nyapsine.

1 Korintus 7:15

Sal do, kilapu do, dib kum tenenyak bukni, anggun dib tenelulum ninye min arye akunum domlumba, “Nun neika una ara, telebe,” nyaptingopura, telebuka. Batakana meme. Bukni, sik dib kum tenenyak kilapu do, sal do, sikda anggunce, “Nun kume, sikda batakuka yuk bindopnamabe,” nyabuka bataksikcopura, anggun dib tenelulum ninye arye, “Telebe dabilulume,” nyanamlulume. Pia pi kwatibuka kum donamlulume. Allah arye, nunti, ‘Yu ubuka waldana kum aniryuk, kanye deibuka telebuk unamake,’ tenepsuke. Ati, atonun nang arye, bicopura, tonap pi dobuka dobolbinamlum do, kum do? Kum nyapsine. Anggun kanye aryuka.

1 Korintus 7:39

Yata kilapu do nirya, sik domikce ninye akunum dibicopura, akunuma. Akunum dipmala anya arye, akil el teneplinye binyuk doptue. Yuknye doptu bukni, talye ululnye, dib kum tenelulnye kume. Allah akunum dib tenebuknye binyuk dona telebe.

1 Korintus 7:7

“Kil dona ara, telebuka,” nyapmasin bukni, na kanye ara, Allah el mikip arepnuka deice arye, kil kum dopse bukni, mikip ubuka diksukumuk tuba unye touk, ‘Ninye nirya atonun winiptingtoura, telebe,’ tenenune. Utenenun bukni, Allah arye, yuk ninye nirya ati, ‘Kam nanguk pia unamak’ tenen, el mikip na arepnuka atonun kum arilule. Ton nang ara, amikip aresulule. Yuk nang ati ara, ‘Yuk Pil donamniak’ tenen, yuk mikip deiyok ning arilule.

1 Korintus 7:8

Ara, sik kil kum domikce nang ap, ninye kum domikce kilapu ap, tonda youwak kilapu ap ati, ayupu nyapnusine. “Na kamnye binyuk unye touk, anggun babye, kam ninye atonun utibirye, Allah el piluk doptumopura, aning telebe,” nyanune. Na Paulus arye, nyapsine.

Galatia 1:19

Atalak ara, nun Deiyoknye Yesus el weit kopropa Yakobus ap eibdanumu bukni, Allah el yupu peterena ati deiyok kouna deiyok nang, Yesus arye wipdeiyamuk Rasul nang, sik sebelas nang ara, anang kan-kan tonoknye babye, ton kum epdapu.

1 Timotius 3:2

Ara, Allah yupu peteren nang. Sik deiyok talibuka pil dopmanto ninye adiparyuk wininyak ning lak nyapnukine. Sikda, malye winina pia kum winilamikibuk, yuk nang arye, “Anang wininyak ning ara, ani-ani,” kum nyapmanto nanguk, wibuka delina telebe. Sikda, kilapu tonokuk dobuka unyakce, ‘Talye kanye bobuka unune,’ tenena kum aryuk, sik bidamnye ati bita dilakirye, teleb winina ap, ninye minop wana ap, yu pola una kumce, nimalye arye una ap, anirya wininamak nang ara, apil dopnamtinge. Ato nang ati ara, yuk ninye arye, “Anang ara, dipkoprop teleb wininyake,” nyabuka, tenelamak nanguk apil dopnamtinge. Tonda, yuk ninye do, ninye asik nang do, sik aik buplan kukulinyak nang wibuka delina telebe. Tonda, yuk nang bikna ati, teleb kibuka peterepting nang wilina telebe. Winilamice ninye uka. Yuk unyak ninye ara, wilina kume.

1 Timotius 4:3

Sikce peterenyak yupu ara, ani. “Ninye kil dona malye, adiparyuk kil dona kum nang ara, kamuk kil dona kum unamlulume. Din ning dina ati ara, ton din ning yala adiparyuk kum dinamlume, ton din ning yala dinamlume,” nyabuka, peterenyake. Nyanyak bukni, Allah ati dib tenebuka, el dipkoprop teleb yupu akunum kel bikinyak ninye ara, Allah arye aninye ati, ‘Din ning yala-yala nirya ara, telebe nyabuka, doprobikirye talye mangkau arye dinamak’ tenen, aning-aning nirya kwepdeipsuke.

1 Timotius 5:2

Yuk kam nang atonun unyak ninye ara, ‘Na weit yapu atonun,’ tenebuka unamlyame. ‘Wisi kilapu ara, na nin yapu atonun,’ tenebuka, namin arye unamlyame. Yuk kam kilapu ati ara, malye tenena ap, malye winina ap, pia kum arye, ‘Na weit kilapu atonun unyake,’ tenepmince, telebuk wininamlyame.

Titus 1:6

Ara, Allah yupu aik deiyok nang, dib tenen nang, sik deiyok nang ara, anyapnukin ning wininyak nanguk wipnamlyame. Sik adiparyuk wininamake. Sik malye winina pia kum arye, telebuk unyakbuk, yuk ninye arye, “Anye bira malye winilule,” nyapmanto kum nanguk, wipnalyame. Tonda, sik kil weik arye dona kum, tonok kiluk dobuka, telebuk unamake. Sik mapu ara, dipkoprop Allah dib tenebikirye, telebuk wininyakbuk, yuk ninye arye, “Kume, sik mapu ara, sik kanye pia malye ninguk pataplibuk, malye-malye wininyake. Kanye pi dobuka, sik ni yapu nyanyak yupu ara, pia kum kekenyake,” nyapmanto kum nanguk, wipnalyame. Teleb ning ara, sik nyapu teleb ubuka winin nanguk, wipnalyame.

Ibrani 13:4

Ura, kil dobuka una ati, yupu nyapnusine. Kilapu dobuka unamlum talak nirya ara, ‘Aning ara, weik mambul anya arye, malye kum wininamap’ tenen, yuk kilapu dobuka talye-talye neika kum manamlulume. Aning ara meme. “Winina meme,” nyapmasina ara, talye ati kum nyapsine. Kume. Kil akunum domlye bukni, yuk nang kilapu ubula neika malamak nang ap, tonda kam nang bukni, malye-malye winibikirye, talye kilapu ubula neika malamak nang nirya ap, Allah arye sikti, yupu lipsisikuka, wenebuka opnamle ati, nyapsine.