“Anggunda, ‘Yupu talina deiyok nang arye wenebuka opnamak’ tenen, tapu koubuka arel binamsiake. Tonda, Allah yupu peterena aik noutamak bobinamsiak ap ura, nati diba tenepmanuluma ati, ‘Anang arye opnamak’ tenen, weik ninye deiyok nang, Gubernur nang ap, sisinanye weik ninye deiyok nang, Raja nang ap, sik dam bobinamsiak ap ati, ilil una meme. Yata talak do nirya, anggun tapu koubukapsikirye, yupu bokolin nang dam bobisikcopura, yupu kabul nyapnumunye talak ara, ‘Yata ubuka nyapnuyap do?’ tenen, mambul kanye kum bopnamlulume.
1 Korintus 9:3 - Eipomek3 Sik yuk nang arye nati, “El Paulus ara kume. Talinye atonun ulule,” nyaninyak ninye ati, arup nyapmasin yupu uk laka nyalinune. Ayupu nyapnyopura, kekebikcopura, adeice aryuk kel kipnitinge. Dipkoprop Allah arye, wipdeipnukba, el yupu dobuka peterelbanauk unune. အခန်းကိုကြည့်ပါ။ |
1 Korintus 9:3
14 ပူးပေါင်းရင်းမြစ်များ
Moropnikopura, anang ati nyapse. “Yuk nang arye tonoknye ati, ‘El malye winibuke,’ nyabikceura, anyup arye ton el yupu lipsisikuka nyaptue. Ara, sik nyalanmarikce nang mening damak bulubikceura, sik mince nyamikce yupu ara, kekeplirye, ‘Kume nara winilamse, winilamse,’ nyabuka, sikce elti, nyanyak yupu lepsisikuka nyana ati, yupu tonok babye kum nyapmalye talak ara, nun Roma ninye arye anye bira, talye dalubuka kum optibye. Yuk nang ati, ‘Anye bira opnamak’ tenen, minopce kum arepnamabe,” nyapse.
Tonda ayupu ton nyapsine. Yatanye do nirya, ‘Kume. Allah arye, nyasilye yupu laka nyabuka peterena ap, aminyan winipnamle ning laka nyana ap ati, deiyok ning akunum arepnuka anya arye, aning laka nyananye nabi unune’ tenen, nyalinye ap, ‘Nara, Allah El Dib Kanye arye, el pil dona ati, pil dona deiyok mikip weik arye arepnukbuk, el Pil donune’ tenen, nyalinye ap ati, anggun kekenululume. Narye nyapmasin yupu ati ara, ayupu nyapsine. Na Paulus arye, sekeipsin yupu ara, talye yupu kume. Nun Deiyoknye Yesus arye, nyasilye yupu uk peteresunune. Na kanye aryuk ayupu kum nyanune. Ati, aninguk tenepmunce unamlume.
Ara, yuk mutuku ninye ati ara, “Elce deiyok koubuka kum peterelamsukba, dib kum tenebupe. Nun Allah yupu peterena deiyoknye kum usulule,” nyapniting bukni, anggun Korintus mutuku ninye ati ara, dipkoprop Allah yupu peterelamsibuk, dib teneluluma anya arye, nara anggunti, anggun ni koprop atonun usunune. Na ap, Kristus ap kanye talima dukdongobuka unyamce, anggun Korintus mutuku ninye ati, el yupu peterelamsisiba, dib teneluluma ati, apil dolamsa nong lakak ubuka deice arye, nun nirya kele, ‘Paulus ara, dipkoprop Allah el yupu peterena ati, deiya kouna deiyoknye, Rasulnye ulule’ tenen, bikinyabe.
Adeiyok ati ara, na ap, anggun ap neika kum unyap talak noutamak arye, asurat deice nyapmasin touk, ayupu wenebuka sekeisunune. Tonda, ‘Na yupu kekebikirye, sik malye winin ning nirya bataktingopura, narye sik dam binuka unamap talak ara, nimalye aryuk utinyeba, talye kanye deibuka neika unamap’ tenen, ayupu atonun yupu sekuka surat dolkwetesunune. Nun Ninye Deiyoknye Yesus arye, ‘Na ti dib tenenyak ninye ati, deiyoknye unamle’ tenen, pil areamnuka deiyok ning ara, ‘Aripniba, elce sik dib tenenyak ninye ati, sik talima mikip kipdeipliba kanye talima wisipnamle’ tenen, arenulule. ‘Anggun nong deice ikin ning deiplibuk, sik kanye talima sukunamle’ tenen, pil dona deiyok ning arepnilibuk, kum pil donune.
Ura, anggunce nati, ‘Kume, Kristus arye Paulus ati, el mikip ariliba, dipkoprop Paulus arye Kristus el yupu dobuka peteresulul do? talyeuk ulul do?’ tenen, ‘Nong auptuba, eiptibyopura, dib tenepnamabe,’ tenenululume. ‘Dip do, tilila do?’ tenenululuma anya arye, anggun dam yanirye, sik mince malye-malye winilamik ninye eipnyopura, nimalye arye kum, mikip arye wenebuka yupu lipsisikuka bokeipsiniba, adeice arye kel kipnamnulume. Deiyok ara, Kristus arye anggun kan-kan noutamak pil dosilya ara, mikip ara nimalye arye kum pil dosulule. Anggun kanye talima noutamak ara, mikip arye pil dosulule.
Anggunce anggun bidamnye ati, moubuka kalikdamunce, tenelanamlulume. Winilanamluma deiyok ara ani. Ara, ‘Nunda dipkoprop Kristus ap, kanye talima dukdongobuka neika unyap do? Talye yupu uk peterenyap do?’ tenen, winipdamunce, anggun winin ning nirya ara dilalinamlulume. Diba tenyamluma deice arye, Kristus anggun talima ak weksukce, el ap kanye talima dukdongobuka akunum ululum ning ara, moubuka min kum tenipmalum do? Ayupu nyapman bukni, anggunce anggun bidamnye ati, winipdamunyeba, nong kum winipsilirye, dipkoprop Kristus ap, anggun ap, kanye talima dukdongobuka kum umunce sakmunyopura, anggunce, “Kristus ara, nun talima noutamak ulule,” kum nyaptume.
Wininyak bukni, sikce nati talima wilipnikce, ‘Paulus bira, nun like,’ teneninyak ninyeuk ara, ‘Ninye nirya nun tamuk kipsikirye, nun tibuk weik nang tenenamsiyak’ tenen, Kristus el yupu peterenyake. Anang ara, talye luba kibuka peterena kum, sikce, ‘Paulus bira kawat rantai tapu arye, tapu koupdabikce, wenena aik dongamikura, anyaik tuba ulul talak ara, nunce Kristus yupu peterebibyebuk, amutuku talina deiyok nang arye, Paulus el nong deice, ikin ning weik tonap, deipnamak’ tenen, tenepce arye peterenyake.
Narye anggunti bico tenesununa ati, arup asurat deice nyapmasin yupu ara, telebe uka. Ara, na kele, tapu koubuka wenena aik dongopnikbuk, aunye talak, Allah el laka teleb yupu, ninye lyen yupu ati peterenye talak babye, Allah arye melinulule. Atouk, malye nang lik tenebuka, Allah yupu ati, “Ayupu ara, talye yupu uka,” nyaninyak bukni, narye, “Kume, deiyok ara ani,” nyabuka, lipsisikuka peterenun talak babye, Allah pia bico tenenululce melinulule. Allah arye, nati wininulul touk, anggun babye atouk, anggun ati pia bico tenebuka, melisulula anya arye, na weik arye kanye delisunune. Allah arye, anggunti melisulule, akunum kel kiyamsise. Ati, ‘Allah arye, anggun talima ak pil dosilye ning ara, teleb ubuka sirya daknamsile,’ tenesunun ara, telebe uka.
“Paulus malye winibuk ning ani,” nyabuka, ‘Yupu bokeipnamap’ tenen, yu nang arye na dobuka, yupu bokolina deiyok nang dam bobinik talak, minopce aning ara, na yupu melina ati, tonoknye babye, yupu nyabuka kum melipnuke. Sik nirya arye na batakuka bindopnik. Winipnik bukni, ‘Allah arye aninye na bataknik ning ati, kum weneplirye, talye namin kipnamle’ tenen, Allah moronune.
ကြော်ငြာတွေ