1 Korintus 6:9 - Eipomek9 Na kayapu, anyapnusin yupu ara, kel kum biklum do? Kume, sik tuba-tuba malye wininyak ninye ara, Allah lyepsilirye, talinamsil ning ara, kum doproptinge. Lyepsilirye, aning-aning nirya pia talinamsil talak ara, el ap pia teleb unamap bukni, sik awininyak nang ara, kume. Tilila yupu nyapdamunce, talye dib kum tenenamlulume. Pia dipkoprop ninguk nyapsine. Sik talye-talye yolanyak ninye ap, yuk talye ning si erenyak ninye ap, kil akunum domiki bukni, yuk kilapu talye yolamak nang ap, ‘Yo bok arepnamsiak’ tenen, sal arye, sal mamunuk yolanyak nang ap, tonda, kilapu arye, akilapu mamunuk yoldalamak ninye ap ara, Allah lyepsilirye, talinamsilak kum wektinge. အခန်းကိုကြည့်ပါ။ |
1 Korintus 6:9
51 ပူးပေါင်းရင်းမြစ်များ
Sikce minina yupu nyapmakiba, kekelalum ning ara, talye-talye kum nyapnin banamlume. Tonda, tonoknye birye, dipkoprob malye upmalye bukni, yupu lipsisikuka bokolin talak ara, ‘Malye upmalinye bira, teleb upmale, tenepnamakʼ tenen, anye el melina ati, ‘Elda, teleb winipmal,’ tenebuka, melibuka yupu kum nyanamlulume.
Ura ninye arye, ‘Dekna ning ati, ikin yata barye do?’ tenen, kiklilen ning, timbangan malye kibuka kiklinyaka ara, Allah arye, ‘Aning ara pia na like,’ tenelule. Bukni, ninye arye, ikin kiklilen ning el si ara timbangan, kiklipdekirye, timbangan dipkoprob ulamle touk nyabikirye, auang yo bok dipkoprob ning arinyak nang ara, ateleb wininyak ninye ati ara, Allah arye el kanye weik delilule.
Winipmanto ara, ninye arye malye yala ninguk koululnye bira, nong lin talak nirya ara malye ninguk kinamle. Aning atonun, yata nang do nirya, sik malye winin ninguk talibuka upra balamica ani, aminyan talak ara, ikin ning weik sik nong deice yanamle. Tia talak ati, amalye unyak ninye arye, yuk kili sal ati, yu kanye bobuka, sik nong deice ikin ning weik delinamak bukni, aminyan talak ara, Allah arye amalye unyak kili sal wenebuka oplopnamle. Winipnamle talak ara, aninye nirya kum daneipnamle.
Anggun malye winin ninguk tenebuka ululum nang ara, ‘Nun malye unyabe,’ tenepmunce bataknamlulume. Aning atonun anggun diksukum un ning bataklum nang ara, anggun malye tenelulum ning nirya batakuka teleb ninguk tenenamlume. Winipmunyopura, anggun ni Allah, el si Yahweh dam tamubuka yanamlulume. Ara, ‘Nun malye wininyap ning ati, talye opsutu bukni, el kanye aryuk bico tenesilirye lyepnamsil’ tenen, unamlume. Anggun ni koproba Allah el dam tamubuka yamunyeba, weik tonun bico tenepsilirye, anggun malye ning weik aupmalya babye, namin kipnamsile. Anggun talima mitang usilirye, anggun malye winilulum ning batakmunba, kum kipdeipsilirye namin kipnamsile. Ati, anggun malye winimunye nang ara, tamubuka Allah el dam yanganamlulume.
Anye birye, malye ulul ning ara, ani. Diksukum kum winilul bukni, elda, isa si erekirye, opmace basam tup dilule. Tonda elce aisa ati, ‘Na ni yapu unyakce melinamniyak’ tenen, aisa si erelule. Tonda, anye birye yuk nang, sik domikce kilapu ati, yupu moupdeibuka, ‘Na ap maptininye,’ nyabuka, akil yoplyopura, malye ulilule. Atonye bira, el li teleb ulamlinye mi bukni, el tonok ara, malyeuk ulule, nyapne.
An kwit capu nang do, an yala nang do, anang arye, sik domice kilapu ap, neika kum mapnamlulume. Ubula dobuka, neika kum manamlulume. Aning winimunya deice arye, ancuk, malye kililanalama ati, Allah el kanye ara, ‘Aning winilinye bira, na dam kum yatue,’ tenamsile. Ati, “Aning nirya winina ara, pia meme,” nyapne. Akilapu nirya, pia kum yonamlume.
Tonda, “Sal arye, kilapu ap neika malum touk, yuk sal ap neika mana pia meme,” nyapsine. Aning ara, pia kum wininamlume. Ara, tonoknye birye, ‘Se, na ap, kilapu ap, neika malamap touk, yuk sal ap, na ap, neika maptiniminye,’ tenen ning ati, nyapne. Atonun winina ning ara, Allah arye, ‘Aning ara, pia na like,’ tenelule. ‘Aning winilinye bira, na dam pia kum yatue. Awinina ara, na pia like,’ tenelule.
“Anggunda, ‘Pia dipkoprob unamap’ tenen, diksukumuk wininamlulume. Ara, ‘Teleb upmak do, kum do?’ tenen, yupu talina ap, yupu bokolin talak ap nirya ara, diksukum yupu uk talibuka wininamlulume. Atalak ara, bona utotoa kum ninye ati, ‘Se, bicoe, sik malye ning daupmalye,’ tenebuka winina kume. Tonda, ‘Sik weik tonun melipnamabe,’ tenebuka winina meme. Aning atonun, bona weik talin nang babye ati, ‘Malye winipnamak bukni, sikda bona weik talin nang ati, daupmalye’ tenen, anang ati, ilil tenena pia meme. Bona utotoa kum nang babye, bona weik talin nang babye, diksukum ubuka, yupu teleb kibuka, lipsisikuka bokolinamlulume. Sik malye winibice nang ati, ‘Na kwit capu awinipmace,’ tenebuka, ‘Sik malye ning daupmalye’ tenena kume. Yuk ninye nirya ati, diksukum yupu uk, talibuka lipsisikuka bokolinamlulume,” Allah arye nyabuk.
Nyapmasiba, amalaikat elce tamubuka, nati nyapnuke. “Aseken ning ap, koupdongamuk buku noutam sekamuk ning ara, amutuku noutam nirya winipnamle ning ati, sekuk. Ara, amutuku malye unyak nang nirya ati, malye yupu nyabuka, sulongon yupu, Allah elcuk sekuka deiamuk. Ayupu ara, talye ati kum ulule. Tonok kwalin tam yupu ton, sekuka deiamuk ning ara, dan mutuku do nirya, Allah el ‘Naʼ tenen, mutuku noutam unyak nang arye, ubula donyak nang ara, Allah elcuk, anang obuka, kum kipdeipnamle. Amutuku noutam ara, pia kum unamake. Aseken ning sirik tam ara, ayupu sekdeibuk. Aning atouk ara, dan mutuku do nirya, Allah el ‘Naʼ tenen mutuku noutam unyak nang arye, ninye yupu bokolin talak ara, sikce tilila yupu nyanyak nang ara, ‘Allah el si deice arye, dip yupu uk, nyapsine,’ nyanyak bukni, sik tenina deice arye, tilila yupu uk, nyanyake. Allah elcuk, anang obuka, kum kipdeipnamle. Amutuku noutam ara, pia kum unamake. Aning-aning nirya ara, abuku deice sekeiamuk ning aulye touk, dipkoprob winipnamle.
Tonda, yatanye do, yata kil do? Ninye yala-yala nirya arye, na nong ap, na yupu peterena ap ati, sik talilamice ning batakikirye, na aminyan tam dobolyanganamniak ninye nirya ara, sikce batakikce ning atonun ning, yupa pia weik dolonamake. Ara, atalak noutam aryuk dolonamake. Ara, sik ulamice mutuku ap, sik aik ap, sik weit yapu ap, sik du yapu ap, sik weit kilapu ap, sik du kilapu ap, sik nin, sik ni yapu ap, sik bidamnye mapu ap, sik wa bun ap, anirya bataklamica ning ati ara, atalak noutam aryuk aning atonun ning, yupa weik dolonamake. Tonda, aminyan yanamle talak ara, kam pia una ati deiyok ning doprobikirye, nong bola koplobuka pia kam unamake.
Deipnyopura, na Raja unamna ati, na sirik taruk tam deipnamne ninye ati ayupu nyapnamne. Sikda na ni Allah arye talima aribukba, bico tenebuka kanye deilisilye ninye ara, na dam wekelyalulume. Allah arye aning-aning nirya min kum kwepdeiyamuk talak arye, ‘Anang aryuk talinamak’ tenen, akunum kintinibuka deiamsuk ning ara dolyalulume.
Asipdeyikura, Yesus arye ayupu tamubuka nyabuk. Ninye weika arye, “Yesus el si deice arye yanganyabe,” nyabikirye, “Mesias yanamle nyalamiknye bira, na uka. Tonda sirya talak ara akunum dam uple,” nyanamak deice arye, ninye weik atilila yupu kekebuka, diba tenenamake. Atilila nang nyanamsiak deice arye, ninye weik sik kanye talima nirya leibuka, yuk tam dobanamsiak ati, na mapu anggun kanye talima moubuka unamlulume. Atilila yupu nyanamak nang ara, sik yupu kekebuka, sik tam kum kilonamlulume.
Nyabukce ayupu ton nyabuk. “Ura akunuma, tonok yupu ton nyapnusine. Allah yupu ara, Allah el kanye aryuk nun bico ati, talye melisulul yupu ara, ayupu mikip deice arye anggun talima darapdongobuka talipsilirye, talima wisipsilyopura, Allah arye kintinipsuk ning dopdopnamabe. Ara, Allah arye kintinibuka wibuka deiamuk nang nirya, ara, anggun nang babye, Allah arye kintinipdeibuka arepnamsil ning ara, nun adib tenenyap nanguk dopdopnamabe. Ati ara, Allah ap, Allah el yupu mikip deice ap arye, sikcuk anggunti ‘Melipnamsirak’ tenen, anggun nong dobuka Allah arepsine.
Paulus arye nyanmoka ani, yupu deiyok winilye nyabuk. Tonok ning ara, ‘Allah yupu nyasilya atonun diksukumuk unyabe,’ nyabuk. Tonda, ‘Nunce malye ning patapsilye ati, malye winibibyak’ tenen, ‘Nun bidamnang aryuk kalikdanyapce, malye ning batakanyap,’ yupu ap, nyabuk. Tonda, ‘Aminyan talak Allah arye ninye weik arye lipdesilirye, yupu bokeipnamsile,’ nyabuka ayupu ap, Paulus arye laka nyanmoka ani, Feliks kekebukce ilil weik ubukura, nyabuk. “Atalak ati ara, akunuma. Yuk yupu ton kum nyapnalyame. Anda tia talak ati dabilyame. Yuk talak ara, talye lo ton upnilyopura, yukupnamkineba, yupu ton nyapnamnilame,” nyabuk.
Yata ninye do nirya, Allah elce, ‘Wininamlulume, aning ara kum wininamlulume,’ nyabuka nyasilye yupu nirya batakuka, pia malye-malye wininyak ninye arye wininyak ning ara, laka nyapnusine. Ara, yuk ninye Allah el dipkoprop yupu kekepmanto ninye unyak bukni, amalye wininyak ninye arye sik malye unyaka deice arye, yupu sekelongonyake. Wininyaka deice arye, Allah el diksukum yupu yaniltanyake. Wininyaka deice arye, yuk ninye babye, Allah el yupu moubuka kel kum bikinyake. Ati, amalye wininyak ninye nirya ara, Allah im deice ulirye, yu upliba, akunum deiyok koubuka aninye ati wenelye ning ara, akunum lakak kipnin basulule.
Ati, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Pia dipkoprop yupu nyapnusine. Ara, Allah kam bukeipsilirye, aning-aning nirya talibuka, el ap neika unamap talak, im deice ning arenamsil ning nirya ara, nun wini talak tukwak ulamap nong deice aryuk, dipkoprop kum doproptibye. Tonda, dipliba lyulamle ning arye, lyuna kum, kam pia unamle ning ara, kum doproptue. Ati, kum lyupmanto nong ap, pia kam una deiyok ning ap, arepsilyopura, aning deice aniryuk im deice welepbibirye, Allah ap, neika kam pia unamabe.
Winira yuk yupu ton nyapnusine. Se, na kayapu, sik yuk nang arye, nyapnikba, kekepse ara, pia malye yupu nyanike. Ara, “Kume, sik Korintus mutuku dib tenebik ninye kan-kan bukni, tonoknye birye kil talye yobuk ning ara, sik dib kum tenenyak ninye ababye aning atonun kum wininyake. Anye birye, el li koprop arye, domuk kil ubula yobuk,” nyapnikba, kekepse.
Ayupu nyapsise ning ara, ‘Diba tenena kum ninye, malye-malye winilamice ninye ap, neika pia kum unamlum’ tenen, kum nyapsise. Ura, aning ara, yata wiriptum deice arye winiptum do? Kume. “Dip tenena kumce, talye yoldalamak ninye ap, tonda, ‘Bona weika arye, doproptibye,’ tenenyak ninye ap, tenepce talye nyaplobuka, ubula donyak ninye ap, tonda, ‘Aning nun Ni Koprop Allah’ tenen, talye ning si erenyak ninye ap, pia ati, neika kum uptume,” nyapsitinyopura, anggun adiparyuk atukwak mutuku noutamak nirya kum uptume. “Malye wininyak ninye ap, neika una meme,” nyapsitinyopura, dan mutuku binuka uptuma ati, nyaptinye do? Kume, tukwak mutuku nirya malye winin ninye unyaka anya arye, aning ati kum nyapsise.
Bukni, wini talak nyapmasin yupu ara, ani. Ara, yatanye do, yata kil do, sikce, “Nunda, Yesus akunum dib tenebupe, Allah el mapu unyabe,” nyaltakanyak bukni, dipkoprop ara, talye yolana ap, ‘Bona weik doproptibye,’ tenena ap, talye ning ati, ‘Nun ni,’ nyabuka si erena ap, yuk ninye ak tilila yupu arye ati lululina ap, tenepce nyaplobuka, ubula dolona ap, yu mek ninye kanye wangalamak mek dena ap, wininyak ninye ara, anggun ap neika kum unamlulume. Anang ap, neika bukuka din dena ababye kume. Anang batakuka, pia memepdopnamlulume. Anggun ap neika una kume. Deiyok ara, ‘Nunda Yesus ati dib tenenyabe,’ nyaltakanyak bukni, sik wininyak ning ara, malye tuba wininyaka ati nyapsine.
Ara, ubula donyak ninye ap, ‘Bona weik doproptibye’ tenen, pia patalye ninye ap, yu mek ninye kanye wangalamak mek dilamak ninye ap, yuk nang ati tilila yupu nyabuka lululilamak ninye ap, ‘Yo bok weik dopropnamap’ tenen, tenepce talye yupu nyabuka, winilamice ninye ap, anang nirya ara, Allah lyeplirye, kum talinamle. Sik awininyak ninye ara, wenebuka bataknamle.
Na kayapu, anggun moubuka kum kel kiplum do? Anggun nong ara, Allah El Dib Kanye arye, wekuka usulula anya arye, el aik atonun ululume. Allah arye, el Dib Kanye arepsukbuk, nun talima ak wekuka usulula ati, anggunda, el aik atonun ululume nyapsine. Aning ati ara, anggun nong ara, anggun kanye aniryuk tenelulum ning, ‘Talye luparakuka winiptibye’ tenen, kum wininamlulume. Allah arye, anggun nong talisilya anya arye, anggun nong ara, anggun ninguk kume. Allah el ninguk ululume.
Na kayapu, tenipdenamlume. Sik bik-bik alamak nang ara, ‘Dekne ning dopropnamap’ tenen, ninye yupa weik arye, bik-bik abuka banyak bukni, minop menekuka bilinye binyuk, dekne ning dololule. Aning kum kel bikmalum do? Aning ati anggun babye, ‘Allah arye, dekne ning dipkoprop ning arepnamsil ning ara, dopropnamap’ tenen, pia piribuka teleb ubuka wininamlulume.
Tonda, anggunce amalye ning tuba winilamunyebuk, eipnyopura, ‘Se’ tenen, malye kanye bopnyopura, adeice arye, ‘Allah arye kanye imun kanye arepnilibuk, alye dakdanamne do?’ tenen, ilil upnile. Sik Korintus mutuku noutamak unyakce, malye-malye winilamik ning ati, “Se, nun malye wininyabe,” nyabuka, sik malye winin ning kum batakik ninye eipnyopura, malye kanye bopnirye, na talima ikin unamnile. Sik malye unyakce kum batakanyak ning ara, ani. Ara, talye ubula yolana ap, Allah el winilul ning tenena kumce, pia malye-malye winina ap ati, ‘Mambul’ tenena kumce, talye kanye bobuka wininyaka anya arye, na alye dakdanamne.
Tilila yupu kekebuka, diba kum tenenamlume. Allah arye aning-aning nirya disululnye anya arye, ‘Eipsilirye, wenepsilyak’ tenen, kum duknuptibye. “Yala arye dokikiba, aninguk dokmalyopura, lilamake,” nyalamak touk, anggun koupmunye ning atonun, aminyan talak ayalauk, nong upnin banamsile. Malye winipmunyopura, malyeuk upnin banamsile. Teleb winipmunyopura, aminyan talak telebuk upnin banamsile.
Tonda, sal tonoknye ton, yuk nang domice kil ap, neika mapmarikba, eipmunyopura, anggun anye ap, akil ap, sik bitinye adiparyuk opmunyeba, dipnamdurake. Winipmunya deice arye, amutuku noutam ara, atonun malye winin ning ara, kum wininamake. Adeice arye, malye winin ning ara, Israel nang dam arye, kum kilinamlume.
Ton yupu ara ani. Kilapu ara, ‘Sal atonun unamneʼ tenen, sal ongolamak celana do, baju do, kum ongonamnyake. Aning atonun sal arye, ‘Kilapu atonun unamneʼ tenen, kilapu ongolamak celana do, baju do kum ongonamnyake. Aning winibice ninye ara, anggunce si erelulum Allah, Yahweh arye, ‘Aning ara, na pia like, aning ara, pia malye weikʼ tenen, yu ulule.
Winipnamsil ning ati ara, anggun talye tukwak ninye malye upsilye ning nirya ara, pia batakanamlulume. Akunum diamik ninye arye, aning-aning nirya kum pataplirye, pia talye wininamak atonun, malye winin ning nirya ara, batakanamlulume. Ara, yuk kilapu talye dalubuka yolana ap, pia yuk talye kanye bobuka ninye kum winipmanto ning, pia malye-malye yolalamak ning ap, malye winin ning ati weik patana ap, aning nirya batakuka, diksukumuk wininamlulume. Amalye winin ning yala nirya ara, pia kum wininamlulume. Tonda, ‘Aning-aning nirya bona weika arye doproptinye’ tenen, weik arye patapsilyopura, ara pia malye winina ati, aning babye, kum wininamlulume. ‘Bona weik doproptinye’ tenen, kanye talima engelul nang ara, Allah batakuka yuk talye ning si erenyak atonun wininyak anya arye, aning babye kum wininamlulume.
Ura, na kayapo. Anggun nirya arye, ‘Yuk ninye nirya ap, kanye deibuka neika ubibirye, malye winina ap, olana ap, yupu deice walana ap, aning nirya pia kum diparyuk, diksukumuk unamap’ tenen, pia pi dobuka, pirilenamlulume. Malye winina ning nirya, kum batakikirye, diksukumuk kum unyak ninye ara, nun Weik Deiyoknye Allah, el ap neika ansinibuka kum unamake.
Aning atonun, anggun kan-kan noutamak ton ninye arye, ‘Ubula talye-talye neika mabicak’ tenen, moubuka kalekelanamlulume. Tonda, minop ulamuknye Esau birye, ‘Allah el ulul ning ap, diksukum un ning ap ara, mambul kume,’ tenyamukce, malye ulamuk touk, anggun kan-kan noutamak yuk nang ton tenebikirye, ‘Malye winibicak’ tenen, moubuka kalekelanamlulume. Esau bira, ‘Allah el ulul ning ara, mambul kume,’ tenyamuk. Winibuka tenyamuka anya arye, elda minyuma du mi ulamuka ati, el li birye talyamuk ning nirya dopromtu bukni, tonok sum deice aryuk el din patabukba, el weit kopropa Yakup dinmok ning dekuka doprobuka deice arye, el talipmanto ning nirya dekukba, el weit kopropa doprobuk.
Ura, kil dobuka una ati, yupu nyapnusine. Kilapu dobuka unamlum talak nirya ara, ‘Aning ara, weik mambul anya arye, malye kum wininamap’ tenen, yuk kilapu dobuka talye-talye neika kum manamlulume. Aning ara meme. “Winina meme,” nyapmasina ara, talye ati kum nyapsine. Kume. Kil akunum domlye bukni, yuk nang kilapu ubula neika malamak nang ap, tonda kam nang bukni, malye-malye winibikirye, talye kilapu ubula neika malamak nang nirya ap, Allah arye sikti, yupu lipsisikuka, wenebuka opnamle ati, nyapsine.
“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.
Bukni, anyaik noutamak pia kum wekmanto ninye, bai tam atonun unamak ninye ara, pia malye-malye ninguk talibuka wininyak ninye. Ara, kir dona ap, bai mal ona ap, isa mirye tenekirye, aning ayala-ayala nirya pil donyak ninye ap, talye yolanyak ninye ap, ninye oltakanyak ninye ap, talye ning ati, ‘Nun ni kopropa’ tenen, si erenyak ninye ap, tilila winin ning aning-aning nirya ati kanye deibuka tilila pil donyak ninye ap, sik nirya ara, Yerusalem Winiryuk mutuku pia kum weknamake.”
Sik anang nirya kanye deibuka anyaik noutam bublan tirikdongobuka wekik talak ara, amutuku noutam ulamik nang, yuk nang sik yu weik nang bikna kum talak arye yayikce, anyaik nirya warikuka aknapdongobik. Ayu nang mikip arye anyaik bublan yanuka lourum-lourum anmekce, anyaik wisinye biti nyanmek, “Ance an aik bobuka binmalamnye bira, pola dobuka, nun arepsilyame,” nyabuka moronmek. Arepsiminyopura, nunce anye nun tenepmap touk, pia malye kipdeipnamabe. Ara nun saluk unmabakuk bukni, anye ap neika mapnamabe,” nyanmek.
ကြော်ငြာတွေ