Kuna kan-kan noutamak dungnubuka ulul ning ara, Allah arye dirina weik areplyopura, aduknyamuk ning nirya, laka kililule. Tonda, Allah arye, kuna noutam dungnubuka ulul ning ara, dirina kililule. Aning atonun ton, min arye kel bikmanto kum ning ara, Allah arye laka kibuka, tukwak deiplyeba, aminyan kel biktibye.
1 Korintus 4:5 - Eipomek5 Aning ati ara, nun nirya ati nyapsine. Allah arye, ‘Yesus tamubuka tukwak yanamla ati, atalak ani’ tenen, wepdeibuk sum min kum upmalye talak nirya noutamak arye, yata winin ning do nirya ati, “Aning telebe, aning malye,” nyabuka, yupu lipsisikuka kum bokeipnamlume. Aning nirya daupmaliba, ‘Nun Deiyoknye Yesus dan talak yanamle do?’ tenen, dinauk unamlulume. El yalyopura, elcuk yupu lipsisikuka bokeipnamsile. Yesus tamubuka yalyopura, aning-aning nirya ati, yupu lipsisikuka bokeipnamsile. Yata ning do nirya, kunuknak duknulamak ning nirya ara, dirinak deibuka, lak kipdeipnamle. Ninye sik talima noutamak arye, ‘Winipnamne, winipnamne’ tenen, deiyok ning duknulamak ning nirya ara, laka kipdeipnamsile. Tonok ning babye, kum duknupmantoe. Anirya laka danamle. Winibuka akunum laka kipdeipsilyopura, atalak aniryuk, Allah arye, ninye nirya ati, sik winilamice ning auplye touk, yupu lipsisikuka bokeipnamsile. Teleb winin ning ati ara, “Telebe,” nyapnamsile. Malye ning ati ara, “Malye,” nyabuka wenepnamsile. အခန်းကိုကြည့်ပါ။ |
1 Korintus 4:5
48 ပူးပေါင်းရင်းမြစ်များ
Ninye arye pia weik kel bikne deice arye nyakiba, yuk nang kekebikirye, ‘E, anang ara, teleb yupu uk nyanyaka anya arye, anggunda teleb nanguk unyake,’ nyabuka kanye delinamake. Bukni, yuk nang ara, sik kanye talima malyeuk unyak nang ara, kwalin yupu ap, kanye bona kumce, nyanyak yupu ap nyakiba, yuk ninye arye kekebiceura, ‘E, anang ara, pia malye ninguk nyanyaka anya arye, nun lik weike. Anang ara nun lik,’ tenen, batakanamake. Amalye ning tenebuka wininyak ninye ara, teleb unyak ninye arye, batakikirye, memepropnamke.
Ati ara, anggun wel nanguk tuba ululum nang ara, anggun tuba weluk unamlum talak ara, kanye deibuka umunce, pin-pin kanye bobuka unamlume. Anggun talima noutam arye, ‘E, aning ara wininamne, aning ara, ton piripnamaneʼ tenen, teninamlum ning nirya ara, dobolbanamlume. Tonda, anggun asing arye eipmunce, ‘Se, aning ton taliptibye,’ tenelulum ning nirya babye, ‘Talipnunʼ tenen, dobolbanamlume. Wininamlum bukni, kanye moubukapmunce, teninamlume. Anggun wel tuba unamlum talak wininamlum ning nirya ara, Allah arye, anggun malye wininamlum ning nirya ati, dipdelirye, yupu bokeipsilyopura, wenepnamsile. ‘Dauplyeʼ tenen, talye luba kina kum unamle. Ati, pia moubuka teninamlume.
Ayupu nirya ara, urdem ati kum nyapsine. Nun tukwak ninye nirya arye, pil donyap ning ap, tenebuka duknunyap ning aning-aning nirya ap ati, Allah eipsilirye, kel kisulula anya arye, aning nirya ati wenebuka yupu lipsisikuka bokeipnamsile. Ara, ‘Malye winilamik ning ara ani. Teleb winilamik ning ara ani,’ tenen, wipsilirye, nun pil erebirye winilamepya touk, Allah arye dekna arepnamsile. Ayupu ara, abuku Penghotba sekamuka deiyoknye birye nyabuk.
Winipnamna deiyok ara ani. Ara, narye sik amutuku nang wininyak ning nirya ara, akunum elinune. Sik wininyak ning nirya ara, na dam arye duknupmanto kum ati, yata ning do nirya, lakauk elinune. Ati ara, anggun amutuku nang arye, pia malye ning talibuka, wininyak ning nirya ara, elinauk unune. Aning nirya ara, kum duknupmanto. Ati, narye anang nirya wenebuka opnamnarya.
Tonda, tilila yupu nyana nabi-nabi nang arye, nyanyak yupu nirya ara, akunum kekenune. Ara, sikce nyanyake, ‘Nun lengdar mabupu deice arye, Allah arye yanuka nyapdeipsukba, anggun dam yanuka nyapsiyabe,’ nyabuka, nyaltakanyake. Talye nyaplobuka, tilila yupu nyalinyak ning ara, na ton kekenune. Narye ayupu kum nyapse bukni, sik tilila nabi-nabi, nang arye, talye nyaltakanyake.
Aning kum bukni, tonda, sik Israel nang arye, ‘Allah el si erebibirye, elti, si erebuka kinamapʼ tenen, kam ning obuka, boyanuka arelyanganinyake. Tonda, kam ning boyanuka, Allah ati yanuka arepnikirye, atup kalinyaka noutam arye, bokuka dinyake. Wininyaka babye, na Allah Yahweh ara, ‘Pia na lik,’ tenenuna ati, sikce areninyak ning ara, ‘Na likʼ tenen, kum dolonune. Ati wini talak ara, narye sik malye wininyak ning nirya ati, tenepnirye wenepnamane. Adeiyok ara, sik malye unyaka ati, weik tonun wenepnamne. Ati naryuk sik tamubuka, Mesir mutuku uk dopkwetepnamne!
Aning nirya akunum winipnyeba, na mapu anggun nirya arye eipmunce, kel biknamlume. Ara, sik telebuk unyak nang ara, sik urasin laka upliba, eibuka kel biknamlume. Aning atonun, malye ninguk talibuka unyak nang babye, sik urasin laka upliba, eibuka kel biknamlume. Ara, na si erepnikirye, na amu tam unyakce, na piluk donyak nang ap, tonda na si kum ereninyak nang ap ati, narye yupu lipsisikuka bokeipnamsin talakuk, eibuka kel biknamlume. Na Allah Yahweh arye nyapsine.” Allah arye nyabuk.
Nyabukopura, ayupu ton nyabuk. “Aning ati ara, malye yupu nyabuka, anggun nong deice ikin ning deipnamsiyak nang ati, ilil kum unamlulume. Ilil una kume. Ninye mutuku-mutuku nirya sik duknubuka wininyak ning ap, duknubuka nyanyak yupu ap, aminyan talak Allah arye laka kipdeipnamle. Tonda, Allah arye minop talak duknyamuk ning nirya ara, laka kipdeipnamle. Aning nirya lakakuk danamle.
Im deice ubuk ning akunum winiplyopopura, nara Ninye Mi Koprop Atonunye, yanunye talak pitin kilin ning lakak upnamle. Winiplyopura, nara, weik mikip ap, dirina ap, urasin teleb una ap, anirya deice arye dua kan-kan yanyeba, tukwak ninye nirya arye lakak eipnamake. Eibikirye, kanye imun weik upliba, ninye mutuku-mutuku nirya weik arye engenamake.
Anyaik deiyoknye tamubuka yanamle talak ara, el pil donanye biti yupu nyabuka deibuk touk, weik kelnye ulamturye, batakna kum diparyuk, apil nirya akunum pil dolamlyopura, adeiyoknye birye tamubuka yalyopura, el pil melinanye biti, ‘Na ning nirya talipmince, deiyoknye atonun kibuka, na pil donamnilyame,’ nyabuka, adeiyoknye birye el pil donanye dobuka erepdeipnamle.
Nyabukopura, el deiyoknye birye tamubuka nyabuk. “Telebe, anda pil pia batakna kumce, teleb ubuka dolamnulume. Na mitik anunuk areamkisibuk, pil batakna kumce, teleb ubuka pil dolamnuluma ati, wini talak na talyamse ning weik arye arepnukine. Na ap, an ap, kanye deipdanimirye, teleb ubuka neika unamname,” nyabuk.
Nyabukopura, el deiyoknye birye tamubuka nyabuk. “Telebe, anda pil pia batakna kumce, teleb ubuka dolamnulume. Na mitik anunuk areamkisibuk, pil batakna kumce, teleb ubuka pil dolamnuluma ati, wini talak na talyamse ning weik arye arepnukine. Na ap, an ap, kanye deipdanimirye, teleb ubuka neika unamname,” nyabuk.
Yesus arye nyabuk. “Anggun babye, malye winin nang tenena kumce, yuk nang ati sik malye nang tenebuka, ‘Anggunda pia malye nang,’ nyabuka, lyab-lyab ana kum nyanamlulume. Anggunce yuk nang ati, pia malye yupu arye, lyab-lyab abmunyopura, aning atonun Allah arye anggunti, lyab-lyab abuka wenepnamsile. Aning atonun, anggunce yuk nang ati, ‘Allah arye anang wenebuka optue,’ kum tenepmunyopura, Allah arye anggunti atonun, kum tenenamsile. Tonda, yuk nang arye, anggunti, malye upsikce ning namin kipmunce, tonap kum tenepmunyopura, Allah arye anggun malye umunye ning ati, kum kipsilirye, tonap kum tenenamsile. Kum danipnamsile.
Yesus arye ayupu nyabuka ati ara, Yesus elce wipdeiyamuk nang kan-kan arye dipkoprop kum bukni, ‘Aning deiyok ati nyabuk do?’ tenen, talye yupu nyalamik. Ara, “Yesus arye, ‘Anye biti tenena gume,’ nyapmoknye bira, kum dipnamle. Elda pia kam unamle ati, Yesus arye ayupu nyabuk do?” nyabuka teniltonauk ulamik. Bukni, Yesus arye, ‘Anye bira dipkoprop kum dipnamle’ kum nyabuk. Aning ara, laka arye kum nyabuk. Yesus arye nyabuk ning ara, “Wini talak arye diprongobuka, otalak tamubuka yanamne talak danoutam nirya ara, narye anye biti, ‘Pia kam unamle,’ tenepnyopura, an deiyok kum ati tenena kume,” nyabuk.
Anggunce, anggun bidamnye ati, “Nunda teleb ninyeuk unyabe,” nyabuka si erelamunce, kanye talima erelalulume. Winilulum bukni, ‘Allah ara el tonok ululnye birye kanye deipsutu’ tenen, el tenesilye ninguk diksukumuk winibibyeura, Allah arye, ‘Teleb tenenamsile,’ tenebuka kum winilulume. Winimunce, malye-malyeuk winimunyopura, yata wiribuka dib tenepnutum do? Kume, kum winiptume.
Ati, anggunda yata deiyok ati, yuknye el pil melinanye biti, wenebuka yupu lepsisikuka bokeiptum do? Kume, apil melinanye el deiyoknye biryuk, “Anye bira pia teleb, anye bira malye,” nyabuka, yupu lepsisikuka bokeiptue. Sik talye nang arye yupu lipsisikuka bokolina pia meme. Ati, aning-aning nirya dilulnye babye, mula yala dilulnye babye, diba teneprikirye, kanye lamapdongobuka, dakeiyam asa neika dukdongobuka unamrake. Aning ara nun deiyoknye Allah, el mikip deice arye, melisilya ati, telebuk ubuka unamrake.
Ura yata nang do nirya, sikce yuk nang ati, “Anggun malye winilulum ning ara, ani-ani,” nyabuka, lyep-lyep abuka wenelulum ninye nirya ara, Allah arye anggun babye teleb ninye anya arye, ‘Dawaplye’ tenen, kum namin kipnamsile. Sikce yuk nang ati, “Anggunda malye ululum ninye,” nyabuka yupu bongoliluluma deice arye, anggun bidamang arye anggun bidamang ati, yupu lepsisikuka bokeipdanmalume. Deiyok ara, anggunce yuk nang ati, “Malye winipmalum ning ara atia,” nyamunye bukni, amalye winin ning ara, anggun babye atonun kibuka winiluluma anya arye, anggun bidamang ati wenebuka yupu lepsisikuka bongolilalulume.
Ura, Allah arye tenyamuk sum akunum uplyopura, tukwak ninye im sirya, mutuku sirya nirya ati, yupu lepsisikuka bokeipsilirye, wenepnamsile. Ara, Allah arye nyapliba, Yesus Kristus arye ninye nirya ati, sik kanye talima pum tam arye duknubuka tenelamice ning babye, nirya lakak kipdeipsilyopura, aning nirya Allah arye dipdelirye, yupu lepsisikuka bokeipsilirye, wenepnamsile. Ton nang ati ara, “Anggunda diksukum kibuka deipsine,” nyapnamsile. Ton nang ara, “Anggunda malye ulamlume,” nyabuka bataknamsile. Awinipnamsil ning nirya ara, narye Yesus el laka teleb yupu, ninye lyena yupu laka nyasununa deice arye peteresunune.
Nong bol deiceuk kum bukni, Allah arye, ‘Na tenenye unamle,’ tenelye ning ara ani. ‘Dipkoprop Yahudi yalanye bira aululue,’ tenelulnye bira, el talima pum tam ara teleb ubuka un ning aulule. Diksukum winilulnye biti, Allah arye, ‘Anye bira na tenenye anya arye, na mi kopropa ulule,’ tenelule. Tonda, Allah arye, ‘Na mapu koprop’ tenen, laka kilin ning dipkoprop ning ara, Allah El Dib Kanye ara, nun talima pum tam usilirye, nun urasin yuk kilisululce, teleb kibuka delisulule. Talye mem yupu ap, nong bol deice pil dolamikce nang ap, wininyaka deice arye, Allah el mapu kopropa kum unyabe. Aning ara kume. Allah El Dib Kanye arye, nun talima pum tam pil dosilya arye, nun kanye talima teleb kibuka deipsilya deice arye, winiryuk ninye atonun kilisulule. Winisilya nang nirya ati, Allah arye kanye deiplirye, ereipnamle. Bukni, talye kanye bobuka daunyak ninye arye, diksukumuk wininyak ninye ati, si kum erenamake.
Aning tonap laka nyapnusine. Yata ninye do nirya sikce, ‘Kume, Allah arye nunti, pia teleb una deiyok ning ap, kam pia una deiyok ning ap arepsutuba, elti, pia si erenamep’ tenen, patalyeba batakna kumce, pia pi dobuka, teleb winin ninguk talibuka wininyak ninye ati ara, Allah arye bol koplobuka, pia kam una deiyok ning arepnamle. Anyaripnamle ninye ara kam pia unamake.
Allah arye melyamsukba, mikip arye dib teneluluma anya arye, Allah El Dib Kanye arye ninye ati, ‘Allah el mambul pil donamak’ tenen, pil dona deiyok ning, talye aresirica ning nirya ara, anggun Korintus mutuku ululum ninye akunum dololulume. Tonok ning babye kum sukultalisulule. Aning ati ara Allah arye, ‘Nun Deiyoknye Yesus Kristus aning-aning nirya talinamla ati, laka kipdeipnamsil talak, minopce yanamle’ tenen, anggun nirya arye, kanye deibuka, dinauk umunce, dib tenebuka telebuk ululume. Ara, Allah arye arisilye ning nirya, kum sukultalisilya ati nyapne.
Ura, yuk nang arye, ‘Aning ara, kume, kisok kaluna nyapmasil yupu ara, nun like. Elce talye nyapsile’ tenen, lik upliba, yupu yuk-yuk nyaptingopura, ayupu ton nyapsine. Allah dib tenenyak ninye, mutuku-mutuku nirya ap, nun peterena deiyok nang ap, yuk-yuk kum nyanyabe. Anyapmasin touk, tonok kanye bobuka atouk tenebuka, anyapmasin touk wininyabe. Yuk ton kume.
Nyabukopura, ayupu ton nyabuk. “ ‘Winibuka aninguk wininamlulume,’ nyapmasina ara, talye ati kum nyapsine. Deiyok ara, aroti din ning ap, amek ap dinamlum talak nirya ara, aning diluluma deice arye, ‘Nun Deiyoknye Yesus arye, ninye lyena ati, nunti punupsukce lyepsuke,’ nyabuka, laka nyana atonun, wininamluma ati nyapsine. Apia winibuka ulamunya ani, aminyan ara, na tamubuka dolyanamsine,” Yesus arye, nyabuk. Yesus arye, nyapsuka ati, na Paulus arye, ayupu tuba tamubuka tonap nyapsine.
Kam bukeipnamsil bukni, Allah arye, ‘Aning ara minopce, aning ara aminyan,’ tenyamsuk touk, aninguk wininamabe. Ara, Kristus ara, wa wibuka kouamica ani, wisiplyopura, winiryuk kwaning minopce yongobuka libikirye, dilamak touk, Kristus minopce kam bukeibuk. Winibuka anya arye, Kristus sirya talak arye, tukwak mutuku tamubuka yalyopura, elce talilye ninye ara, el na tenelul ninye anya arye, aminyan Allah arye, kam bukeipsiliba, pia kam unamabe.
Wini talak ara, “Aning ara, telebe. Aning ara, malye,” tenyak touk pil donyak bukni, wini talak ara, ‘Aning ara, nong upnamle, aning ara, talye ning uka’ tenen, adiparyuk kum nyaptibye. Bukni, Yesus tamubuka yalirye, ninye nirya ati, yupu bokeipnamle talak ara, aning-aning nirya ati, lak kipdeipnamsile. Dirinarye, kunukmalyak laka kilamle touk, Allah arye yupu bokuka dipdesilirye, “Malye ning ani, teleb ning ani,” nyabuka, lak kipdeipnamsile. Ninye nirya arye dolamikce pil nong ati, ‘Teleb ning dan do, malye ning dan do’ tenen, Allah eluku buk deice arye asipdenamsile.
Anyapmasin yupu ara, talye ati kum nyapsine. Allah arye, “Anye bira dipkoprop teleb ulule,” nyabuka erepdeipnamlanye bira, ara elcuk el bidamnye ati ereipdalinye bira kum bukni, nun Deiyoknye Yesus arye, “Elda telebe,” nyabuka ereipnamlanye binyuka. Aning ati ara, kanye lon yupu nyana ara, Yesus el tonok nyana telebe nyapmasine.
Aning kum bukni, pia malye ning wininyak nang arye, ‘Yuk ninye eibuka kel biksikcak’ tenen, duknulamak ning aning-aning nirya akunum batakibirye, tenepce arye yupu nyana ap, tilila yupu ap kum nyanyabe. Tonda, Allah yupu dipkoprop nyasilye touk aninguk moubuka peterenyabe. ‘Yuk nang arye kanye deipsitinge’ tenen, nun kanye aryuk kwalibuka kum peterenyabe. Aning nirya kum wininyap bukni, Allah el dinmasilibuk, Allah el dipkoprop yupu ulye touk, aninguk dobuka laka arye peterenyabe. Peterenyaba deice arye, ninye nirya kekebikirye, sik kanye tenena noutamak arye nunti, ‘Anang ara, dipkopropuk wininyak,’ tenesinyake.
Ayupu nyapmasin ara, urdem ati kum nyapsine. Kume, ninye mutuku-mutuku nirya aminyan sirya talak ara, Kristus arye ninye nirya yupu bokona ati, weik ninye deiyok nang arye bulamak ning takta kursi bulamak ning deice buklibuk, el dam binamabe. Kristus arye, ninye nirya dipdesilirye, ninye yuk-yuk bukni, nirya, sik pil dolamak ning ap, yupu nyalamak ning ap, nirya awinilamak touk, yupu lipsisikuka bokeipnamsile. Ara, ninye nong ubuka pil dolamubu ning ati, teleb ning babye, malye ning babye dipdesilirye, yupu lipsisikuka bokeipnamsile. Ati, ‘Yata pil doptibyeba, Allah arye kanye deipsutu do?’ tenenauk unamnyape, nyapsine.
Yata ning do nirya, Allah arye kintinipdeiyamuk ning nirya ara, pia kum duknupmanto. Allah arye aning-aning nirya ati, pia dilule. Baju arye singipdongopmakce ning auplyeba, abaju dopdobikcopura, laka ulamle touk, Allah arye aning-aning nirya lak akuk dilule. Aning-aning nirya dilinye Allah ati, nun wininyap ning nirya laka nyabibyeba, elce kekebuka dipdesilirye, “Aning teleb, aning malye,” nyabuka, yupu lipsisikuka bokeipnamsile. Nun wininyap ning nirya ati, Allah el dam laka nyabibyeba, dipdesilirye, yupu lipsisikuka bokeipnamsile. Tonok ning babye kum duknuptibye.
Na kayapu nang, nun dib tenen nang unyaba anya arye, anggunce anggun kayapu nang ati, minina yupu kum nyalanamlulume. Anggun diba teneplum nang arye, yuk diba tenebik nang ati, malye yupu ap, minina yupu ap nyapmunce, sik nong deice deipmunyopura, ara Allah arye, ‘Wininamlulume, aning ara, kum wininamlulume,’ tenen, nyapsuk yupu yanina atonun ululume. Ara talye ati kume. Anggun babye diba teneplum nang arye, yuk diba tenenyak nang ati, “Anggunda malye nang ululume,” nyabuka, malye yupu nyalalulumopura, ara anggunda yupu bokolina deiyok nang atonun ululume. Aning ara, pia malye winilulume. Allah el yupu deice arye, “Malye yupu kum nyalanamlulume,” nyapsuk bukni, aning akunum winipmunyopura, el yupu akunum yaniplume. Allah arye nyapsuk yupu noutam bukni, ayupu nirya dobolbana kum arye, ton yupu yaniltana, ton yupu kekena kum umunya deice arye, yupu bokolina deiyok nang atonun akunum umunce, el yupu nirya yaniltalulume. Ati aning ara winina meme nyapsine.
Ara, na kayapu. Nun du weit atonun kipdeipsuk ninye ati nyapsine. Nun deiyoknye Yesus tamubuka kum yanmalye talak ara, teniltona kum arye, teleb kanye bobuka tunim abuka unamlulume. Winipmanto yupu ati nyapnusine. Ara, wa wibuka koulamle deiyoknye birye, ‘Na koupse ning ara teleb ubuka pablyopura, libnamanca’ tenen, tonda, ‘Dou talye manmalya ani, aminyan ara, mok yanamalca’ tenen, teleb kanye deibuka, talye luba kibuka ulamle touk, anggun babye atonun wininamlulume.
Kanye winilden ning usilye ning ara, deiyok nyapnusine. Ara, anggun diba tenebuka, Yesus talibuka umunye ning nirya ara, winilesilyebuk, talima wisipsilye, ‘Dipkoprop pia gat uk, dipkoprop ninguk unamsil’ tenen, yangalule. Dekna weik ning emas ara, ‘Malye ning ubuk ning, kum uptue’ tenen, uku dongopmacebuk, malye ning diplyopura, teleb ubuka delinyak bukni, emas babye kum uptue. Emas ara, dekna weik ning ulul bukni, mitik mambul ninguk ulule. Anggunce diba tenebuka, Yesus talibuka umunye ning nirya ara, weik dekna weik ning atonun, weik mambul ulule. Diba tenelulum ning winilesilyebuk, akunum teleb uplyopura, Allah arye nyapdeiplibuk, Yesus Kristus tamubuka lakak yanamle talak ara, Allah arye telebe nyana ap, si erena ap, weik dirina ap, weik si ap, arepsilirye, erelinamsile.
Winibuka unamlulum talak nirya ara, diksukumuk unamlulume. Ara Allah arye, ‘Aning wininamak’ tenen, el yupu deice nyasilye touk, malye una kumce arye, diksukumuk ubuka unamlulume. Tonda, ‘Asum ara, minopce yatue’ tenen, pil pia pi dobuka, palibuka donamlume. Yesus tamubuka yalyopura, im ap, im noutam ulul ning nirya ap, weik uku buk diplirye, sirya daknamle. Weik uku buk dilirye, bupu weik uplyopura, awinilya deiyok ning nirya ara, telepropnamle. Kum ubuka daneipnamle.
Sikce nalibuka nyanamsiak yupu ara ani. Sikce, “Kume, Yesus arye, ‘Tukwak mutuku tamubuka yanamne,’ nyalilamuk yupu dan do? ‘Yanamne,’ nyalilamuk bukni, min kum yanmale. Nun ni yapu diamik talak arye dibuka, dipdongobuka danoutam talak nirya ap, wini talak babye, aning-aning nirya ara, minop arye ulamuk touk tuba upnin balule.
Henok elda, minop talak ulamuk. Adam arye deibukura, dadeipdanin, balamika ani, tekbarinye Henok deibik. Allah arye atilila yupu nyanyak nang wenepnamla ati, Henok arye nyalilamuk yupu ani. “Adilulume, nun ni Allah ap, Allah arye nyapdeiplibuk el pil im deice donyak nang malaikat ap, yupa pia weik beribu-ribu yanamake.
Anggun moubuka kekenululume. Aminyan talak dua kan-kan noutamak yanamsil talak ara, ninye mutuku-mutuku nirya arye eipnamake. El obik ninye babye, eipnamake. Yesus yaliba, el obik ninye ap, yuk ninye nirya ap, sik asing eibikirye, el obikba, dibuk ning ati malye kanye bobuka engenamake. ‘Dipkoprop Yesus Kristus eibikirye engenamak’ tenen, na Yohanes arye, “Amin,” nyapsine.
Dipdesiba, sik akunum diamik ninye mambul nang babye, mambul kum nang babye yanganmekak eipse. Sik nirya aweik kurun bun ning urasin tam tikilyanganmek ak, im deice tam ulul buku-buku nirya ara, yokeibik. Tonda, tonok buku ton, el si ara Kam Pia Unamak Ninye Si Sekna Buku ton yokeibmekbuk eipse. Abuku noutamak seklamik yupu nirya dipdeyikba, sik akunum diamik ninye nirya ara, sik kam tuba ulamik talak aning-aning nirya winilamik touk, sekuka delilamika ati ara, abuku sekeiyamika noutamak awamuk touk, sik akunum diamik ninye nirya ati, yupu lepsisikuka bokeibukce, wenebuk.
ကြော်ငြာတွေ