Na ni Allah, ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu, nati bokuka, arenilyam ning ara, tukwak mutuku noutamak, talibuka unyak urasin teleb ning, el si ara emas ap, perak ap, dekna weik ulamle. Bukni, na kanye ara, adekna weik ning ara, mitik mambul uka. Ance nyanilyam yupu nirya ati ara, ‘Ayupu ara, weik mambul,’ tenenune. ‘Ayupu ara, weik dekna weik ning atonun ulule,’ tenepnirye, ayupu ati, kanye delinune.
1 Korintus 3:12 - Eipomek12 Asik nong domikce talak ara, ton nang arye, pia unamle ning, kat ning emas do, perak do, urasin pia teleb keil do, dekna weik ning arye teleb aik donyake. Ton nang ara, minopce kum danamle ning, yo do, maning do, kapce bok do, amitik ning arye donyake. အခန်းကိုကြည့်ပါ။ |
1 Korintus 3:12
33 ပူးပေါင်းရင်းမြစ်များ
Allah arye nyapdeiamsuk yupu nirya ara, dekna weik ning, emas pia urasin teleb ning atonun kume. Ninye arye, ‘Se emas ara, weik mambul dekna ning,’ tenenyak bukni, dipkoprob emas ara mitik mambul uk ulule. Allah el nyasilye yupu ara, weik mambul ulule. Tonda ninye arye mong mek dibikirye, “Se, aning ara, to weik nyasulule. Aning ara, pia telebe,” nyalamak bukni, aning babye, mitik teleb uka. Allah arye nyasilye yupu ara, weik teleb ulule. Tonda mong mek moulamlak yung arye, mek dobuka, dilamak ning ara, teleb ulamle bukni, aning babye mitik teleb uka. Allah el yupu ara, weik teleb ulule. Mong mek ara, mitik teleb uka.
Ton ninye arye, dekna weik ning el si ara emas ap, perak ap, ‘Aning weik arye dolonamap’ tenen, pataliba, pia pi dobuka elinyak bukni, aning ara mitik teleb uka. Weik teleb ning ara, ninye arye, ‘Se, weik kel bikna deiyok ning, weik arye kel biktibirye, telebuk unamap’ tenen, pia pataliba, pi deibuka, diksukum winin ninguk eldenyake. Aning ara dipkoprob weik teleb ning wininyake. Aning atonun, ‘Se, weik kel bikna ning kel kiptinirye, pia telebuk unamne’ tenen, aninguk weik arye pataplinye bira, weik telebuk ulule. Bukni, ‘Se, dekna weik ning, el si perak doproptinirye, bona utotoa talinanye unamne’ tenen, pataliba elkirikilulnye bira, teleb kum ulule.
Yatanye do nirya, Allah arye nyasilye yupu aupmal bukni, ‘Narye yupu tonap tabakuka nyapnune,’ tenena meme. Anggun bidamnye aryuk yupu tabakuka kum nyanamlulume. Winipmunce, yupu talye-talye ning ap, tabakuka nyapmunyopura, Allah arye anggunti wenenamsile. Tonda, aminyan talak yuk ninye arye sikti, “Kume sik bidamang kanye tenen ning aryuk, tabakuka nyapsika ati, sikda tilila yupu nyana nanguk unyake,” nyabuka wenemnamsiyake.
Ati ara, ton nang aryopura, utenenyake. ‘Se, dekna weik ning, el si ara perak ap, urasin pia teleb ning emas ap ara, pia patasulula ati ara, aninguk elbanamabe,’ tenenamake. Bukni, anggun pia weik kel nang ara, aning kum tenenamlulume. Pia teleb ning ara, narye anggunti, “Wininamlulume, aning ara pia kum wininamlulume. Pia teleb kibuka una ning ara ani,” nyabuka peteresinye yupu dopropmunce, aninguk talibuka unamlulume. Pia teleb ning ara akunuma.
Na Allah arye, anggun dekna ati arenamsin ning ara, mitik teleb ning kume. Teleb kat ning, el si perunggu nyalamak ninguk areptinye bukni, aning kum, pia teleb dekna weik ning, emas uk arenamsine. Aning atonun besi ning arepsitinye bukni, aning kum, el pununa ati, dekna weik ning el si perak arenamsine. Tonda mitang yo arepsitinye bukni, aning kum, el pununa ati, kat teleb ning, el si perunggu nyalamak ning arepnamsine. Atonun urasin teleb keil arepsitinye bukni, aning kum, el pununa ati, kat ning, el si ara besi arepnamsine. Arepsiniba, anggun unamlum mutuku ara, yuk nang olana kum diparyuk, pia darabuka, telebuk unamlume. Tonda, yuk yu nang arye, tapu koupsikirye, ikin pil kum arukunamsiyake. Aning kum bukni, pia diksukum kibuka, teleb ubuka winin ninguk nyapdeipsiniba, telebuk unamlume.
Ati nyapsine. Sik tilila nabi-nabi nang arye, ‘Lengdar mapsa deice, Allah arye yanuka nyapmanu yupu ara, ani,’ tenebikirye, nyapnamak nang ara, danyanamakca. Bukni, ton nabi-nabi nang ara, dipkoprob narye yupu nyapdeipniba, laka nyapnamak nabi-nabi nang ara, ‘Narye, nyanamlyame,’ nyapdeiamse touk, kum bataknamaka ati, sikce diksukum yupu uk nyalamtinge. Winipmanto ara, ninye arye dipmanto ning, el si gandum ara, talye palamle ning mutmuta atonun kum ulule. Aning bitinye atonun kum ulule. Atouk, narye nyasinye yupu ap, tilila nabi-nabi nang arye talye nyaltakanyak yupu ap, atonun kum ulule. Ati, ‘Sikce nyasikce yupu ara, dipkoprob do, tilila ning do?’ tenen, pia moubuka teninamlume. Na Allah Yahweh arye nyapsine.” Allah arye nyabuk.
Amapo, winira yuk yupu ton nyapnusine. Ura, nunce Yesus el dipkoprop yupu peterepsupuba, kel kiluluma atonun ning kum bukni, yuk nang sik malye winilamaka deice arye, adipkoprop yupu yanibikirye, anggun Roma mutuku diba tenelulum ninye noutamak ara, talima wililanauk usinyake. Sikce malye updeipsikiba, Yesus el diksukum bisik teleb ubuka kum bitume. Winibuka unyak nang ati, moubuka kel kipmunce, memelonamlulume. Sik ap neika una meme.
Deiyok ara, Allah arye nyabukba, aik ayukumna yo atonun ning akunum iksa anya arye, yuk ninye nirya arye, yuk ayukumna yo kum iktinge. Winipmanto yupu deice ayukumna yo nyapman yupu nong ara, Allah arye dipkoprop ning kintinibuk ning ara, ayukumna yo atonun ning ara, tonokuk ulule ara, Yesus Kristus el uka.
Wini talak ara, “Aning ara, telebe. Aning ara, malye,” tenyak touk pil donyak bukni, wini talak ara, ‘Aning ara, nong upnamle, aning ara, talye ning uka’ tenen, adiparyuk kum nyaptibye. Bukni, Yesus tamubuka yalirye, ninye nirya ati, yupu bokeipnamle talak ara, aning-aning nirya ati, lak kipdeipnamsile. Dirinarye, kunukmalyak laka kilamle touk, Allah arye yupu bokuka dipdesilirye, “Malye ning ani, teleb ning ani,” nyabuka, lak kipdeipnamsile. Ninye nirya arye dolamikce pil nong ati, ‘Teleb ning dan do, malye ning dan do’ tenen, Allah eluku buk deice arye asipdenamsile.
Aning nyapmasina ara, urdem aryuk kum nyanune. Ara, yuk ninye weik arye, ‘Allah yupu peterenmabya deice arye, ninye kekebikirye, yo bok weik arepsikibuk, yo bok weik doproptibye’ tenen, tenepce arye nyaltakanyake. Bukni, nunda aning atonun kum wininyabe. Aning kum bukni, nunda Allah dilesiliba, nun ap, Kristus ap, talima dukdongobuka neika ubirye, duknuna ap, tenepce arye nyana ap, kum aniryuk, dipkoprop yupu uk laka nyanyabe. Wininyaba ara, Allah arye dopdeipsuk ning unyaba atia. Tonda, Yesus el yupu nyanyap talak nirya ara, ‘Allah dam tikuka nyaptibye touk, wininyabe,’ tenenyaba anya arye, Allah arye disulula ati, aning moubuka tenebibirye, pia dipkoprop yupu uk nyanyabe.
Aning kum bukni, pia malye ning wininyak nang arye, ‘Yuk ninye eibuka kel biksikcak’ tenen, duknulamak ning aning-aning nirya akunum batakibirye, tenepce arye yupu nyana ap, tilila yupu ap kum nyanyabe. Tonda, Allah yupu dipkoprop nyasilye touk aninguk moubuka peterenyabe. ‘Yuk nang arye kanye deipsitinge’ tenen, nun kanye aryuk kwalibuka kum peterenyabe. Aning nirya kum wininyap bukni, Allah el dinmasilibuk, Allah el dipkoprop yupu ulye touk, aninguk dobuka laka arye peterenyabe. Peterenyaba deice arye, ninye nirya kekebikirye, sik kanye tenena noutamak arye nunti, ‘Anang ara, dipkopropuk wininyak,’ tenesinyake.
Yuk malye nang arye, ‘Sik talima lipdobibyeura, nun tam kipropnamsiyak’ tenen, tilila yupu peterepsica deice arye, mankau kanye arye diba tenebuka, yuk bisik bimunyak ati, anggun kanye pia moubuka unamlulume. ‘Anang arye, nong kum yupu talye peterepsicak’ tenen, anggun kanye moupnamlulume nyapsine. Atilila nang arye nyanyak yupu ara, Kristus el ulul ning deice arye kum nyanyake. ‘Sik talye tukwak ninye, sik kanye deice aryuk,’ tenenyak ning peterenyake. Tonda, ayupu deiyok ara, talye nang bol deice atonun ning, talye tukwak ninye arye, “Aning nun deipkirikdop nang dorapce winilamik touk, aninguk talibuka unamabe,” nyanyak yupu ati nyapne. Tonda sikce, ‘Aning ara, weik mambul mem ning,’ tenebuka, talye yupu aryuk nyaltakanyak yupu uk ulule. Tonda, ayupu ara, Kristus yanina atonun yupu ulule. Anirya ati ara, atilila yupu ara, talye yupu uk ulula anya arye, aning kum kekenamlulume, nyapsine.
Yatanye do nirya, tilila yupu petereplirye, nun Deiyoknye Yesus Kristus arye peterelamsuk yupu ap, Allah arye, ‘Wininamake,’ tenepsuk touk, peteren yupu ap, dib tenen kum arye, batakuka yaniltakalinye bira, maknya kintinipdakirye, ‘Nara, weiknye,’ tenelul bukni, dipkoprop ara, pia walwalnye ulule. Aning-aning nirya moubuka kum tenelule. Atonye bira, ninye arye yupu deice waldanyak yupu ap, moubuka kum laka nyapmanto yupu bukni, “Ayupu deiyok ani, ani,” nyabuka, yu uplye ati, kanye yuk-yuk wilildanyak yupu ap ati, pia patalule. Amalye yupu deice arye, ninye talima wililanyak akarye, tonye birye, yuknye biti, ‘Se, anye birye malye upnamnil do?’ tenen, ilil teneldanyake. Atonye bira, amalye yupu ati, kanye deililula ati ara, elda, uk dinanye atonun ulule. Na Paulus arye nyapkine.
Ara, Timotiuso, na Paulus arye yuk domon yupu ton nyapnukine. Weik asik dolamak noutam nirya ara, aning-aning weik deilinyake. Ton ning ati ara, ‘Aning dobuka weik mambul talak ati, mambul piluk donamape’ tenen, dekna weik ning, emas ap, perak ap, doprobikirye puturubuka deilinyake. Ton ning ati ara, ‘Aning dobuka, talye sum nirya deice arye mambul kum piluk donamabe. Aning ara, ilil kume’ tenen, talye awablye ning, yo ap, tapu ap, kat tuku ap, doprobikirye, memenyake.
Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.
“Wininalyame,” nyapmakina ara, talye ati kum nyapkine. Deiyok ara, aminyan talak ara, ninye nirya arye, ‘Allah yupu nyasilye touk nun lik’ tenen, diksukum peteren yupu kum kekepnamake. Peteren yupu dipkoprop kum bukni, ‘Nun kanye delinyap ning ap, nun patapsilye ning ap, aninguk peterepnamsiak’ tenen, “Buluplulume,” nyabikibuk, peteren nang talye-talye nanguk bulupnamake. Bulubikibuk, aninye arye, sik talye yupu peteren nang ati, “Nunce nyabipye ning uk, peterepsululume,” nyabuka moronyak yupu uk, sik talye peteren nang arye aninguk peterepnamake. Dipkoprop Allah yupu nyalye touk kum peterenamake.
Ura, sik yuk nang arye, urasin yuk peterenyak yupu, talye yupu yala-yala nirya peteresikceba, kekemunya deice arye, ‘Yuk malye bisik bobisicak’ tenen, sik yupu kekena kume. Allah bico tenesilirye, el kanye aniryuk melisilyeba, nun kanye talima mikip kilisilirye, talima kwa disulul ara, telebe uka. Aninguk talibuka unamlulume. Bukni, yuk nang arye, sik bidamang kanye aryuk, ‘Winina meme,’ nyabuka, din ning ati, mem nyabikirye, mem pil dolamaka deice arye, nun kanye talima mikip kum kilisulule. Din ning ati, “Aning ara dina meme,” nyabuka mem nyabikirye, mem pil donyak nang babye, wininyaka deice arye, dipkoprop kum melilanyake. Anang arye talye piluk donyake.
Kanye winilden ning usilye ning ara, deiyok nyapnusine. Ara, anggun diba tenebuka, Yesus talibuka umunye ning nirya ara, winilesilyebuk, talima wisipsilye, ‘Dipkoprop pia gat uk, dipkoprop ninguk unamsil’ tenen, yangalule. Dekna weik ning emas ara, ‘Malye ning ubuk ning, kum uptue’ tenen, uku dongopmacebuk, malye ning diplyopura, teleb ubuka delinyak bukni, emas babye kum uptue. Emas ara, dekna weik ning ulul bukni, mitik mambul ninguk ulule. Anggunce diba tenebuka, Yesus talibuka umunye ning nirya ara, weik dekna weik ning atonun, weik mambul ulule. Diba tenelulum ning winilesilyebuk, akunum teleb uplyopura, Allah arye nyapdeiplibuk, Yesus Kristus tamubuka lakak yanamle talak ara, Allah arye telebe nyana ap, si erena ap, weik dirina ap, weik si ap, arepsilirye, erelinamsile.
“Ikin ulamsuka babye, nati kum bataknulumce, teleb winilamlum bukni, ton ning ara, malye winiplum ning ati, wenebuka yupu bokeipnamsine. Tonok ning ara, anggun kan-kan noutamak ara, ton nang arye minopnye Bileam el nyalamuk yupu talibuka dobolbanyake. Bileam birye, yuknye el si ara, Balak biti laka nyabukba, Balak birye Israel ninye sik kanye talima lipdobukba, malye-malye winilamik. Peterebuka deice arye malye winilamik ning ara, Isa Mutuku Dongonye si erena ati, kam ning obuka arilamik ning tup dobuka dilamik. Tonda, ubula yolana ning aning-aning nirya winilamik. Bileam malye yupu peterelamuka deice arye, Israel ninye amalye ning winilamik touk, anggun Pergamus mutuku noutamak ton ninye arye atonun wininyake.”
Ati ara, narye anggunti nyapsine. Emas ning dobukapnarye, ‘Malye ning nirya kum danul’ tenen, uku dongopnaba, malye ning nirya uku dipliba, pia teleb uplye ning ara, anggunce na dam dekelyanganulum. Aning winipnumunyopura, dipkoprop bona uto-uto talin ninye atonun unamlume. Na dam yanuka pia lek kurun baju dekmunyopura, anggun talye nong demuk balamunye ninye ara, anggun nong bol lelna ati, teleb koprop kurun baju ongopmunce, teleb unamlume. Tonda, na dam yanuka asing likne obat, kweten ning dekmunyopura, anggun asing likmunyeba, teleb upsilyopura, teleb kibuka elinamlum. Wini talak ara, anggunce malyeuk winimunye ning ara, bita kum dilalulume.
ကြော်ငြာတွေ