1 Korintus 2:6 - Eipomek6 Ura, nun Allah yupu peterena deiyok nang arye, dipkoprop weik kel bikne deiyok yupu peterenyap bukni, ara sik talima akunum wisibuka, dipkoprop Allah el bisikuk banyak ninye kekebikce talakuk, ato yupu deice arye, peterenyabe. “Weik kel bikne deiyok yupu,” nyapmasina ara, atalak noutamak talye-talye unyak ninye ap, atalak noutamak aning-aning nirya talibuka, weik ninye deiyok ninye ap arye, ‘E, ayupu ara, weik kel bikne yupu,’ tenenyak yupu atonun ning ati kum nyapsine. Wini talak ara, aninye weik nang unyak bukni, aminyan talak ara, Allah arye ato ninye nirya wenena ati, malye kibuka weneplirye, sik nyanyak yupu ap, sik wininyak ning ap, kum kipdeipnamle. Sikce, sik tenenyak ning babye, nong kum upnamle. Allah arye sik nirya kum kipdeiplirye, sirya daknamle. အခန်းကိုကြည့်ပါ။ |
1 Korintus 2:6
36 ပူးပေါင်းရင်းမြစ်များ
Aning atonun ton, Allah arye sik imam-imam nang, sikti, alye un ning arelule. Sikda, ‘Allah arye nun malye winin ning kum kipdeipnamsilʼ tenen, kam ning obuka, Allah arena ati deiyok nang ulamik bukni, Allah arye, sik dam yanuka, pia amu tamuk deiplyopura, talye bona talina kum nang unyaka atonun, yan ongon ning, el si ara sepatu, ongona kumce, alye dakdanuka banyake. Tonda, sikce ninye deiyok kibuka bunyak mikip weik nang ara, Allah arye sik dam yanuka doplirye, amu tam kililule. Winipyopura, Allah arye, sik mikip weik deiyok nang ati, talye nang atonun kililule.
Tonda, sik ninye deiyok nang ara, Allah arye anang babye, malye kililule. Winiplyopura, yuk nang nirya arye, anang ati, tuba si erena kum unyak bukni, anang ati, nalibuka akutunyake. Tonda, sik mikip weik unyak nang ara, sik mikip arye, yuk nang talibuka unyak bukni, Allah elcuk sik mikip ara, alubuka dololule. Winiplyopura, talye nanguk kililule.
Ura, yata tukwak nang do nirya, dibicopura, kam una deiyok ning ara, sik kanya ara, akunum bilyopura, akunum dibinyake. Dibicopura, sik nong dobuka, tuku lukikirye weibikiba, aminyan talak ara, tuku dananyake. Tukwak mutuku dibice talak ara, sik adibice nang arye, ‘Aning ara, winipnamne, winipnamne,’ tenelamice ning nirya ara, kum daliba, nong kum upnamle.
Sik malye wininyak ninye uk, tenena meme. Teleb ning ara, sik diksukumuk wininyak ninye ati, moubuka dinamlulume. Sikda, malye winin ning, tonok ning babye kum wininyaka anya arye, yuk ninye arye, ‘E, sik malye wininyake,’ kum nyapmanto unyake. Na dipkoprob nyapsine. Kanye talima lamapdongobuka arye ululnye bira, yuk ninye nirya ati, ‘E, kanye deipdabirye, kanye talima dukdongobuka, teleb kibuka neika winiptibye,’ tenelula ati ara, Allah arye anye atonun ninye nirya ati, melilamliba, aminyan talak, sikda pia telebuk unamake.
Tonda tukwak mutuku nang arye, ‘Nun weik deiyok nang unamak’ tenen, wilinyak deiyok nang ap, Raja nang ap ara, ‘Sikda mikip weik nang, pia mambul nang,’ tenenyak bukni, na Allah arye, adeiyok nang nirya malye kipnirye, kum kibuka delinune. Tukwak mutuku ninye deiyok nang kibuka, weik mutuku talinyak nang nirya ara, na mikip aniryuk anang kum kilinune. Sikce, ‘Wininamabe,’ tenenyaka nirya ara, sirya daknirye, kum kilinune. Sik babye talye nang uka.
Ton ninye ara, Allah yupu kekebuka dolonyak bukni, yo duk tirmangka weiyang-weiyang kan-kan sakmok ning atonun wininyake. Ara, tukwak mutuku noutamak arye, ‘Aning doproptinirye teleb uptinye do? Yuk ning aupnutuba teleb uptinye do?’ tenen, teniltona ap, kanye bokoltona ap deice arye, Allah yupu batakalogonyake. Tonda, “Bona weik doproptinirye, telebuk uptinye,” nyabuka, sikce sik bidamang arye, tilila yupu talya nyaldanyake. Tonda, aning-aning nirya weik patapliba, ‘Aning ton doproptinye, aning ton winiptinye,’ tenenyak deice arye, lik upliba Allah yupu batakalogonyake. Wininyaka ara, tirmangka weiyang-weiyanga arye apamuk ning koupdongobukce, angkalung kipdongobukba, wen-wen alamuk touk, talya tukwak ning aning-aning nirya pia tenenyak deice arye, Allah yupu kekelamikce ning ara, batakiceba duk kum mouplirye, talya urdemuk bolule. Ara, teleb ubuka kum kekekirye, Allah yupu pia kum dobolbanyaka ati nyapsine.
Nyabukura, Yesus arye anye biti ayupu nyabuk. “Ati, ‘Diksukumuk utinye’ tenen, dipkoprop patapkilyopura, narye nyapnukin ning ara, winipnulyame. Ara, an talyamlum ning nirya, yuk nang dam yo bok binuka dekmince, talya bona utotoa talina kum ninye, aning-aning nirya kum talinyak ninye ati, ayo bok arenamlyame. Talyamlum ning dekuka bona utotoa talina kum ninye akunum arepminyopura, Allah arye pia teleb ning im deice deiyamkilye ning ara, aminyan binuka dopropnalame. Bona utotoa talina kum ninye akunum arepminyopura, na yupu kekebuka dobolyanamlyame.” Yesus arye abona weik talinanye biti nyabuk.
Aning ati ara, anggun ni Allah im deice ululnye birye, ninye nirya ati, bico tenebuka kanye talima talibuka melilul touk, anggun babye ninye nirya ati, kanye talima arenamsile. Anggunda, Allah el mapu ululuma anya arye, anggun ni Allah malye una kum, diparyuk diksukumuk ulye touk, anggun babye atonun, malye winina kum, diparyuk diksukumuk wininamlulume. Yesus arye nyabuk.
Nyabuk ati, aning ara, ayo bok moubuka delinanye, el weik deiyoknye birye nyabuk. “Sik ti a domik ning ati, kilibuka yuk sekuk ning ara, malye bukni, anye birye ‘Aminyan talak, na pil kum dopnilyopura, yata winipnamne do? Narye sik tia domrik nang ati, melipnyopura, aminyan talak ara, tia domrik nang arye nati, yukupnamniyake,’ tenebuk ning ara, teleb uka. Weik deiyoknye birye nyabuk.” Yesus arye winipmanto yupu deice arye, nyabuk. Yesus arye winipmanto yupu nyabukopura, ayupu dukdongobuka nyabuk. “Na dipkoprop nyapsine. Allah dirina deice arye unyak nang ara, sik pil ati yupu talibikirye, wibuka delinyaka ara, atalak un ninguk tenenyake. Sikda aminyan talak upnamle ning ati, kum tenenyake. Ati, diba tenebuka dirina noutam unyak nang ara, mitikto kel arye wininyake, nyapne. Bukni, sik dib tenena kum ninye arye, ‘Aminyan talak bona utotoa talin ninye unamap’ tenen, sik kayapu nang ak, ‘Yata wiriptibya arye, nun kayapu nang melipsikca deice arye, bona utotowa talin ninye unamap do?’ tenenyake. Tonda, sik pil ati, yupu talibikirye, wibuka deilinyaka ara, weik kel arye wininyake. Ara sikce, ‘Amenyan talak yata wiripnamsil do? Ikin unamap do, telebuk unamap do?’ tenen, moubuka tenenyaka ati, nyapsine,” Yesus arye nyabuk.
Talye ninye arye yuk nang ati, ‘Anang ara, mambul pia kume, sikda pia bona utotowa talina kum ninye anya arye, dauplye. Sik ni yapu ap, sik nin yapu ap, mambul ninye kumanya arye, nun like. Nun like,’ tenesinyak ninye ati ara, Allah arye nunto ninye ati, ‘Na mapu unamak’ tenen, wipdeiamsuke. Winipsuka deiyok ara, yata ning do, yata ninye do nirya, talye ninye arye, ‘Se, aning ara, pia mambule,’ tenenyak ning nirya ara, ‘Kum kipdeipniba, nong kum upnamle’ tenen, winibuke.
Allah El Dib Kanye arye, tonoknye biti, Allah el ulul ning ap, el laka teleb yupu deiyok noutamak ning ap laka nyana deiyok ning ariliba, anye bira weik kelnye ulule. Yuknye ati ara, Allah El Dib Kanye melipliba, Allah el yupu kekeplinye bira, “Ayupu nong noutamak ara, ani. Ati winibuka unamabe,” nyabuka, nyalina Deiyoknye usulule.
Ura, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Mitik mapu tenelamak touk tenemunya ara, bataklulume. Ura, malye ning pataplyeba, malye winina ati ara, pia mitik aling pum lin mapu arye, aning-aning kum tenebikirye, malye kum winilamak touk, anggun adiparyuk telebuk unamlulume. Bukni, anggun kanye tenen ning noutamak nirya ara, teleb nang, wisi akunum deibik ninye arye, kanye bobuka diksukum ninguk tenyak touk, anggun Korintus mutuku ululum ninye babye adiparyuk tenenamlulume. Malye winina ati ara, mitik mapu atonun unamlume. Teleb winina ati ara, wisi ninye atonun tenepmunce, telebuk wininamlume.
Na kayapo, Yesus dib teneluluma ati, nun du weit atonun ululum ninyeo, anggun sal babye, kilapu babye, kekepnululume. Narye anggun dam yasirye, Allah el laka teleb yupu, ninye lyena yupu dobuka peterelamsise talak ara, weik cang yupu ap, weik kel bikne yupu ap deice arye, kum peterelamsise. Ninye nirya kekepmanto yupu deice aryuk peterelamse. Winilamsa ara, deiyok aupmale.
Allah arye nunti, talye arisulul ning nirya ati, laka nyabuka peterenyap talak nirya ara, talye ninye arye weik kel bikne yupu peterenyaka deice arye kum nyanyabe. Aning kum bukni, Allah El Dib Kanye arye, el yupu peteresilyopura, nun kanye talima noutamak kekebibirye, ayupu deice aryuk, Allah El Dib Kanye akunum doprobik ninye ati, laka nyabuka peterenyabe.
Aunyap talak noutamak, tukwak mutuku weik ninye deiyok ninye nirya ara, Allah el weik kel bikne deiyok yupu moubuka kum kekenyake. Tonda, sik moubuka kekelamtingtoura, nun Deiyoknye Yesus dobuka, wanwanun yo deice arye kum opmatinge. Yesus ara, Allah el pia teleb weik mambulnye ulye touk, laka kilisululnye Yesus ulul bukni, atalak ninye deiyok nang arye Yesus obika anya arye, nun kele. Anang arye, Allah el weik kel bikne deiyok yupu moubuka kum kekelamikce, bita kel kum bikamike.
Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anggun mutuku peterelamsise talak noutamak ara, ‘Allah El Dib Kanye akunum talyamukba, talima akunum wisiamuk ninye unyak’ tenen, kum peterelamsitinye. Atalak ara, talye tukwak ninguk bobuka talinyak ninye atonun ulaluma ati, nong noutamak ara, kum kekepmanto ninye ulalume. Anggunda, Kristus akunum dib tenyamlum bukni, mitik mapu tenenyak kanye atonun bobuka ulalume. Ati, na ap ulamubu talak noutamak ara, ikin yupu ara, kum peterelamsitinye.
Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.
Ara, Yesus dib teneluluma ati, nun du weit atonun ululum ninyeo, anggun sal babye, kilapu ababye kekepnululume. Narye anggunti, ‘Se, winibuka, winibuka winipting’ tenen, patapnil ning ara nyapsinibuk, anggun kekebuka wininamlulume. Ara, ‘Allah arye nun malye winin ning nirya kum daneipsuturye, pia diksukumuk updeipsilibuk, kanye talima wisipnamsile’ tenen, patasilibuk, unamlulume. Tonda, tonok kanyeuk tenebuka, teleb ubuka neika unamlulume. Walana ap, oldana ap, malye winilana ap kumce, nimalye arye teleb ubuka neika unamlulume. Aning-aning nirya akunum upmunyopura, nun Ni Koprop Allah ap, anggun ap kanye talima dukdongobuka unamlulume. Anggunti bataksilirye, el Allah yuk kum unamle. Allah elda, yuk nang ati bico tenebuka melildana deiyok ning aresulule. Tonda, nun ap, yuk nang ap, kanye talima namin ubuka teleb ubuka neika una ati, deiyok ning aresulule. ‘El ap, anggun ap neika unamlum’ tenen, Allah morosunune.
Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.
Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.
Yatato ninye do, yata yala ninye do nirya, nunce anang-anang nirya ati, Kristus el yupu, ninye lyena yupu peterenyabe. Ara, ‘Mankau arye malye ubicak’ tenen, “Anggun kanye mouplulume,” nyabuka wenenyabe. Tonda, anang-anang nirya ati, weik kel arye Kristus el yupu pia moubuka peterenyabe. Wininyaba ara, urtalya ati kume. Deiyok ara, Kristus ap, kanye dukdongobuka unyak ninye nirya, Allah el dam welepnamak talak ara, ‘Sik kanye wisipliba, pia diksukum ninyeuk unamak’ tenen, el yupu moubuka peterenyabe.
Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.
Aning ati ara, na kayapo, Kristus kel kina ati, Allah yupu noutamak bukni, deiyok yupu deiyok kounamaba ara, akunum kel bikibirye, ‘Nun kanye talima wisipnamsil’ tenen, minopce kel bikuka bikatabibirye, yuk ning ton, weik mambul yupu ton kel kipnin banamabe. Ura, aik dopnuce talak ara, minyuma ayukumna yo akunum ikikirye, ila tuba tonap kum iklamak touk, Allah yupu deiyok ning bukni, deiyok kounamaba ara, ila tuba tonap tamubuka kum kel kipnin banamabe. Ayupu deiyok kouna ati nyapmasina ara, nukuka nyapnusine. Ara, ‘Malye tuba-tuba winilamibiba, Allah arye wenebuka opsilyak’ tenen, malye winin ning batakna yupu ap; Allah ati, diba tenena yupu ap;
Winin ning ara, nun ni Allah im deice arye kum arisulule. Ara Allah arye, ‘Wininamake,’ tenesilye touk winin ning kume. Ara nun babye kanye talima noutam patapsilye ning uka. Amalye usilye ning ara, sik diba tenena kum ninye ara, Allah El Dib Kanye nyasilye yupu kum kekenyakce, yaniltanauk wininyak ning ati nyapsine. Tonda aning ara, Isa Mutuku Dongonye arye nyalibuk, malye ubibyopura, malye ulisulule.
Nun nirya arye, ‘Na malye kum upnun do?’ tenen, winilebyebuk, mankau arye aning-aning yala yuk-yuk, malye wininyabe. Tonoknye birye, el nyalye yupu noutam nirya ara, tonok malye ning babye, kum nyaplyopura, anye bira dipkoprop diksukumnye winilule. Anye bira, el nyalye yupu nirya, moubuka teneplirye, teleb ninguk nyalul touk, el nong ap, el winin ning nirya ap ati, ‘Malye winipnyak’ tenen, moubuka kalikilalule.
Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.
ကြော်ငြာတွေ