1 Korintus 14:3 - Eipomek3 Allah El Dib Kanye mikip deice arye, yuk mutuku yupu nyanyak nang ara, Allah el yupu kekena ati nyanyake. Bukni, Allah arye nyapliba, el yupu lak kibuka, laka nyabuka peterena deiyoknye birye, el yupu nyalyeba, yuk ninye nirya, sik talima melina ap, mikip kilina ap, ati, ‘Melipnun’ tenen, nyalule. Ara sik dib tenen ning mikip kilina ap, sik talima melina ap, talima wisisilye ning kilina ap, sik kanye imun usilye ning, ‘Kanam upnamle’ tenena ap, ati, teleb yupu lak akarye nyalyeba, ninye nirya arye, teleb ubuka, kekenyake. အခန်းကိုကြည့်ပါ။ |
1 Korintus 14:3
42 ပူးပေါင်းရင်းမြစ်များ
Bukibuk, yuk nang arye, Allah arye, “Aning wininamlulume, aning kum wininamlulume,” nyapdeibukura, Musa sekamuk yupu mem yupu ap, tonda Allah nyapdeibukura, el yupu lak lena deiyok nang, sik nabi-nabi nang sekamik yupu ap, anyasik nang arye nyabikopura, sik Yahudi yala deiyok nang Allah yupu keken aik, deiyok nang arye yuk nang ati yupu nyabikura, anang arye Paulus ap, Barnabas ap, ati nyabik. “Nun kayapu, talima kwa din yupu ton aupmasilyeura, nun nyapsuturume,” nyabuka morobik.
Aminyan talak, amutuku winilye Listra mutuku ap, Ikonium mutuku ap, Antiokia mutuku ap, Yesus diba tenebik nang ati amutuku tamubuka peterepra balamrikce, anang kanye talima kwa dilamrik. Anang talima kwa dilamrik akarye, amutuku nang Yesus diba tenebuka pia talibik ning ara, atalibika atonun, ‘Pia kanye lamabuka unamak’ tenen, sik kanya talima kwa dilamrik. Winilamrikak arye ayupu nyaprik. “Nun diba tenenyap ninye Allah aryuk, pia talipnamsil talak ara, ikin ning pia weik ulamsilya noutamak arye Allah el dam weknamabe, talye parapkabuka kil-kil kanye bon deice aryuk kum wektibye,” nyaprik.
Winibikce, aminyan talak, sik Yudea tam ap, Galilea tam ap, Samaria tam ap, Yesus diba tenebuka ulamik nang ara, sik diba tenena kum nang arye, ikin ning kum delilamik ati, teleb kanye bobuka ulamik. Atalak ara, Allah El Dib Kanye arye, Yesus diba tenelamik nang nirya ati, sik kanye talima mikip kipdeibukce, melina ati teleb yupu nyalamukce sik talima kwa dilamuk. Yesus ati diba tenenyak ninye nirya ara, ‘Se, nun ni Allah weik mambulnye ulule’ tenen, elti, kibuka el si erebuka ulamikce, ‘Malye winibibiba wenepsilyak’ tenen, pia kanye moubuka ulamikce, Allah ati ilil ulamuk.
Allah arye yuknye biti, yuk ninye sik kanye talima melinana deiyok ning areplyopura, anye birye yuk nang ati, sik ikin unamak talak ara, elce sik kanye talima kwa dibuka melinamle. Allah arye yuknye biti, ‘Yuk ninye sik patan ning ati melibuka arenamle’ tenen, aning-aning weika arye anye arepliba, elce adeiyok ning doplyopura, anye birye yuk nang ati, kanye deibuka sik patan ning weika arye melibuka arenamle. Ura, Allah arye yuknye biti, ninye deiyoknye unamla ati, ‘Ninye deiyok talibuka unamle’ tenen, ninye deiyok nang kibuka, talibuka una deiyok ning arepliba, anye birye, pia batakna kumce, ninye deiyok piluk talibuka, teleb ubuka donamle. Atonun, Allah arye yuknye biti, ‘Anye bira, yuk nang malye winipmakca babye, adiparyuk kum wenepnamle bukni, namin kiplirye, namin asa arye melinamle,’ teneplirye, talima namin una deiyok ning arepliba, kanye deibukap, apiluk talibuka dolirye, yuk ninye ati bico tenebuka kanye talima kwa dibuka melinamle.
Anyapmasin yupu nirya ati ara, ayupu ton nyapnusine. Asum-asum nun nirya arye, ‘Yata teleb ning winiptibyeba, nun diba tenenyap nang nirya arye, kanye deibuka namin asa arye neika unamap do?’ tenen, pia pi dobuka pirilenamlulume. Tonda, anggun nirya arye, ‘Telebuk winibirye, nun kanye talima kwa dipdabiba, nun kanye talima ap, nong ap nirya ara, wisipnamsil’ tenen, pirilenamlulume.
Nun nirya arye, yuk diba tenenyak ninye ati, ‘Sik kanye talima wisipliba, weik arye diba teneanamak’ tenen, sik teleb kanye delina ning, winibibya deice arye, kanye deibuka telebuk unamake. Ati, nunce, yuk diba tenenyak ninye nirya ati, ‘Yata wiriptibya deice arye, sikti, teleb ubuka meliptibye do?’ tenen, unamabe.
Ton ninye arye nyanyake, “Yata winin ning do nirya, nun kanye aryuk tenenyap ning nirya ara, talye kanye bobuka winiptibye,” nyanyak bukni, na Paulus arye, nyapsine. Awinin ning aning-aning nirya ara, talye kanye bobuka winiptibye babye, aning nirya kum melinamsile. Teleb kum kipdeipnamsile. Teleb ubuka kum deipnamsile. Tonda ninye arye, winipting ning nirya ara, talima dukdongobuka neika unamaba ati ara, teleb kum usulule, nyapsine.
Anyapmasina atonun, anggunce anggun ap neika ululum ninye ati, Allah El Dib Kanye mikip deice arye, yuk mutuku yupu diribuka nyapmunyopura, anggunce anggun bidamang nang ati, “Sikda, yuk mutuku ninye atonun unyake,” nyalanamlulume. Anggun Korintus mutuku ninye arye, ‘Se, Allah el pil dona ati, el mikip deice arye, pil dona deiyok ning aning-aning nirya arepsutue’ tenen, patasilibuk, ululuma anya arye, ayupu nyapsine. Allah dib tenenyak ninye nirya, sik talima kwa dina ap, mikip kilina ap, ati, moubuka kel biknamting ning uk, ‘Allah arye, apil dona deiyok ninguk arepsutuba, nun neika unyap ninye ati melimdatibye’ tenen, pia patasiliba, unamlume. Yuk ninye ati kum melipmanto ning ara, patana kume.
Ara, Allah el Kanye arye, yuk mutuku yupu areplibuk, anggun ayupu deice arye, Allah ati, “Telebe,” nyabuka el si teleb kibuka ereptuma babye, anye birye moubuka kekepturye, kel kum kiptua anya arye, ayupu nyaluluma deice arye, el talima mikip kum kililulume. El moubuka kekena kum ati, ara kum winipmanto.
Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anyapmasin yupu nirya ati ara, Allah yupu keken aik binuka, el si ati erenamlum talak ara, “Teleb winin ning ani,” nyabuka kel bikna ati ara, ‘Yata nyaptibye do?’ tenena kume. Aning ara, nyapnusine. Anggun bulubuka Allah yupu kekenamlum talak nirya ara, anggun nirya yuk-yuk bukni, tonye bira, Allah arye, elti, aribuk mot nyapnamsile. Tonye birye, “Diksukum una ati, winibuka unamabe,” nyabuka peterenamsile. Tonye birye, Allah el yupu duknyamuk bukni, anye biti lak nyabukura, kel bikuk ning ara, anggun kekena ati Allah duknyamuk yupu nong noutamak ara, lak kibuka peterenamsile. Tonye birye, el kum kel bikamuk bukni, Allah El Dib Kanye arye, areplibuk yuk mutuku yupu deice nyapnamsile. Bukni, elce peterepsilyopura, tonye bira, Allah El Dib Kanye arye, “Ayupu nong ara, ani,” laka nyabuka melipsilyopura, ayupu kekebuka kel bikilinye birye, “Ayupu deiyok ani,” nyabuka, ayupu lak kibuka laka nyapnamsile. Aning-aning nirya ara, deiyok tonokuk aupnamle. Ara, Allah dib tenena ninye kekebikca deice arye, ‘Sik talima kwa baribuka mikip kilinamap’ tenen, wininamlume. Yuk ton kume. Na Paulus arye, nyapsine.
Winibuka tonok-tonok nyapra banamluma deiyok ara, sik Allah yupu peteren nang nirya nyapnin bakiba, anggun bululum ninye nirya moubuka kekepmunyopura, anggun nirya arye, moubuka kel kinamlulume. Tonda, anggun diksukum una ati, “Wininamlum, wininamlum,” nyabuka melibuka nyabikibuk, kekepmunyopura, anggun kanye talima kwa baribuka mikip kilinamsiyake. Aning ati ayupu nyapsine.
Ara, na kayapu, aning ara, talye ning bukni, anggunce, ‘Nun ni koprop anya arye, si erebuka kipnamap’ tenen, tup ning kalibuka arilamak ning ara, yupu nyapnusine. Anggun Allah ati, dib tenelulum ninye arye, “Diptibye do, kum do?” nyabuka, asipdenulum yupu ara, nyapnusine. Aning nirya ati ara, nun nirya kel bikamupe. Bukni, luba kina kume. ‘Nunda weik kel ninye unyabe,’ tenelamak ninye ara, weik kanye erebuka kwalinyake. Wininyak bukni, yuk ninye ati, ‘Bico tenebuka melilanauk unamabe,’ tenelamak ninye ara, yuk nang ati, talima kwa dibuka melibikiba, nun nirya teleb upnin banyabe.
Nun ikin usilye talak noutamak nirya ara, elce kanye talima kwa diprongobuka melisulule. Kanye Talima kwa diprongobuka melisilya deiyok ara, ‘Yuk ninye ton ikin uplye talak ara, na mapu arye anang ati, talima kwa diprongobuka melinamak’ tenen, melisulule. Yuk ninye kanye imun upliba, ‘Yata wiribuka deice arye melipsitibye do?’ tenena kume. Ara, Allah arye nunti, talima kwa diprongobuka melisilya mikip deice aryuk, nunce yuk nang ati melinyabe. Yuk ton kume.
Wini talak ati ara, anggun adiparyuk el malye winibuk ning ati namin kipmunce, el talima moubuka melipnamlulume. Wininamluma deiyok ara, elce, ‘Se, na pia malye winilamse’ tenen, pia engena ap, tenena ap, ilil kanye bobuka ulamlya deice arye, ‘El bouku tonap sukuplyak’ tenen, nyapsine. Anggunce elti, akunum wenepmunyopura, akunuma nyapsine.
Teleb pil donamak talak ara, tenebuka tilila yupu kum nyanamake. Dib yupu uk nyabuka, teleb kipdanuka pil donamake. Malye nang arye, yupu nyakibuk, yuk ninye kekenyakce, malye kanye bolamak yupu atonun yupu nirya ara, kum nyanamlulume. Aning kum bukni, anggunce yuk ninye ati, ‘Sik ikin upyle ning yata ning do? Yata teleb yupu nyaptinya deice arye, sik talima kwa diptinye do?’ tenepmunce, ninye talima kwa dina yupu uk nyanamlulume. Ara, ‘Na yupu teleb ubuka nyapnya deice arye, sik kekepnamake ninye melipnamne’ tenen, yupu moubuka nyanamlulume.
Winibuka tenebuburye, Timotius anggun dam dilyangana ati, dopdeipsupu. Timotius ara, talinye kume. Elda, nun weit atonunye ulule. Tonda, el ap, Allah ap, Kristus el laka teleb yupu dobuka, mutuku-mutuku nirya peterelbana ati, pil neiktoto dodurake. ‘Timotius arye, anggun diba tenemunya ati, kwa dakna ap, mikip kilina ap, upnamsil’ tenen, dobuka dopkwetebupu.
Telebe nun kayapu, aminyan talak Allah arye, nun nirya ati, kanye deipsilirye, ‘Anang ara, teleb nang unyake tenepnamsil’ tenen, “Wininamlulum, wininamlulum,” nyabuka peterelamsupu. Nunce anggunti peterelamsupu touk, dipkoprop akunum winilulume. Ati ara, wini talak awinimunye ning ara, weik arye tonap, pia tabakuka wininamlulume. Ara, nun Deiyoknye Yesus, el si deice arye ayupu nyapdeipsiyabe.
Aning atonun wininyak ninye nirya ati ara, nun Deiyoknye Yesus Kristus si deice arye nyanyabe. “Winina meme. Talya-talya winina ap, talye bana ap, yuk nang winin ning ati yupu nyana ap, kum wininamlulume. Dipkoprop piluk talibuka wininamlulume. Anggunce dimunye ning nirya ara, pil dopmunyeura, dekna ning arepsikcopura, adeice aryuk dina dekuka dinamlulume. Talya morona meme.” Sik talye-talyeuk unyak ninye ati, ayupu nyanyabe.
Tonda, anang arye, talye-talye nukunyak yupu, minop talak nuklamik yupu atonun nuklamik yupu ap, nong kum upnamle yupu ap, sik apu yapu nang arye dadeipdanin, yangalamik akarye nyalamik yupu ap, moubuka talinyak akarye, ayupu uk kekenyake. Anang arye kekenyak yupu ara, talye yupu anya arye, ‘Adip aryuk bataknamak’ tenen, yupu sekenalyame nyapkine. Amalye yupu pia tenebuka talinyakce, ninye kanye wililakirye, yupu deice arye walakirye, yuk-yuk kilonyake. Allah el mapu nirya ati, bico tenebuka melina ap, teleb ubuka peterena ap ara, Allah diba tenen deice aryuk wininyaba anya arye, tilila yupu deice arye kum wininyabe. Ara, kum winipmanto, ati, atalye yupu nirya ara, ance yupu sekenalyame.
An dam min kum yanamnye talak noutam nirya, batakna kum arye, pia tuba-tuba anyapnukin pil ara, donalyame. Ara, ‘Yuk ninye kekenamak’ tenen, laka ninye kekenak arye, Allah yupu yininamlyame. Tonda, Allah el yupu deice arye laka nyana ap, “Winiplulume,” nyabuka, peterena ap, “Winina meme,” nyabuka, wenena ap, pia wininamlyame.
Aning atonun, sik tilila aryuk, talye pil donyak ninye bukni, sik deiyok nang, Allah dib tenebik nang wininyakopura, sik amu tam pil dobuka unyak nang arye, ‘E, nun deiyok nang ara, Allah dib tenen nang anya arye, nun mitik nang atonun unyaba ati, mitik anun arye, si erebuka unamabe,’ tenena kume. Aning ara, pia kum bukni, apil don nang arye, sik deiyok nang dib tenebik nang ati ara, mitik anun arye kume. Pia teleb ubuka, sik pil melibuka donamake. Deiyok ara, sik pil dopbiceura, teleb winibikirye, dopropnamak nang ara, Allah dib tenen nang unyaka ati, weik arye si erebuka unamake. Tonda, amu tam ubuka, pil donyak nang arye, sik deiyok nang ati, sik adiparyuk bico tenenamak ati nyapkine. Ati, asukum deice tam nyapmakin yupu ara, urdem aryuk pil dopra unyak nang ati, mikip arye peterenalyame.
Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.
‘Allah yupu aik deiyok nang winipnamak’ tenen, wipmanto nang, sik wininyak ning ton nyapnune. Ara, Allah el dipkoprop teleb yupu, Yesus ap, nun ap, peterelamubu touk, moubuka kekebikirye, ayupu talibuka wininyak nanguk, wina telebe. Winibikce nang ara, Allah el yupu dipkoprop ulye touk, moubuka peterenyak deice arye, yuk nang kanye arye melina ap, Allah yupu yanin nang ati, “Amalye winin ning bataklulume,” nyabuka, sik yupu sekikirye, teleb ninguk lipsisikuka peterena ap, aning wininyak nanguk, wibuka delina telebe. Yuk ton kume. “Amalye winin ning bataklulume,” nyabuka, sik yupu sekikirye, diksukumuk lipsisikuka, peterena ap, aning wininyak nanguk wibuka delina telebe. Yuk malye ning, talibuka wininyak nang ton, wibuka pia kum delinamlyame. Aning winina meme.
Winipsuka ati ara, arup akunum nyapmakin yupu nirya ara, yuk ninye nirya ati, pia moubuka peterenalyame. Ninye kanye barina ap, malye winin ning lipsisikuka peterena ap, Allah arye pil deiyok ning aribkuka deice arye, mikip arye pil donalyame. Yuk nang arye, ‘Titus bira, talinye ulule’ tenen, kum kekebikirye, sik amutamuk kipkicopura, ance, ‘Se, yupu tonap kum nyapnamne’ tenen, anyapmakice ning ati, kekebuka batakana meme. Winipkiki bukni, aninye nirya ati, ‘Ayupu bataklulume,’ nyabuka, wenenamlyame. Aning yan yanibuka peterenamlyame. Na Paulus arye sekeibkine.
Arup nyapmakin touk, ance sik kam nang ati ara, melibuka peterenamlyame. Ara, sik kanye noutamak patalul ning, ‘Talye luparabuka winipnun,’ tenena kum diparyuk, ‘Malye winibibyak’ tenen, sik wininyak ning ati bita dipdandekirye, sik mining kanye atibuk, diksukumuk unamake. ‘Winibuka unamak’ tenen, ance sik kam nang ati, anyapkanin yupu peterenamlyame.
Ura, yuk nang ati peterenalam yupu ton nyapnukine. ‘Ara, pil urdem piluk donamsiyak’ tenen, yo bok deice dekekirye, ninye amuak deibuka, “Dekna ning dolona kumce, urdemuk talye pil dopnilyame,” nyabuka, pil dinyak ninye ati nyapnukine. Aurdemuk talye pil don nang ati, yata winin ning do nirya, sik deiyok nang amutamuk unyakce, sik yupu moubuka kekebikirye, kanye talima nimalye arye unamake. Tonda, sik deiyok nang arye, “Winipnamlum, winipnamlum,” nyakibuk, urdemuk talye pil don nang arye, lik tenebuka tamubuka, malye yupu nyana kume. Sik pil noutamak nirya ara, ‘Nun deiyok nang arye kanye deipnamsiak’ tenen, telebuk wininamake.
Ura, ton nang arye ara, ‘Allah yupu kekena ati, neika bulunyaba ara, nun like,’ tenekirye, Allah yupu aik kum wekenyak bukni, nunda, batakna kum arye, neika bulubuka wekelbanauk unamabe. Tonda, nun nirya arye, yuk nang nirya ati, talima kwa dibuka, melilanauk unamabe. Winibuka ulamibya ani, Yesus dolyanamsil talak, Weik Sum dam yaliba, kel kibibyopura, weika arye tonap, talima kwa baribuka melilanauk unamabe.
Allah ati, ‘Nun like’ tenen, urasin tamubuka kum bataknamlum bukni, teleb ning ara, nyapnusine. Atalak-atalak nirya, nunce, ‘Asum ani’ tenen, tuba nyaptibye talak noutamak nirya ara, talima kwa dibuka melilanamlulume. Ara, talye ati kume. Ara, anggun talima noutamak malye un ning tuba aupmalya arye, anggun talima tam usilya deice arye, malye un ninguk talibuka winipmunyak tenena ati nyapsine. Tonda, anggunce, amalye winin ning ati, ‘Deiyok ara, dauplye. Aning ara, malye kume, tenepmunyak’ tenen, nyapsine. Winibuka tenemunyopura, aminyan ara, utenepmunya deice arye, ‘Pi dobuka malye winibibyak’ tenen, anggun nirya arye talima kwa dipdanuka melipdamunce, kalekelanamlulume. Malye winin ning nirya ara, tilila ninguk ulula ati, aning talibuka umunyopura, anggun talima kat kipdeipnamsile. ‘Winipmunyak’ tenen, anggunce anggun bidamang ati, kalekelanamlulume nyapsine.
Silas melipnuka deice arye, abumang surat ara, na Peterus arye sekeipsene. Na kwit Silas ara, diba tenebuknye anya arye, nati kum batakanululce, melinululba, nun ap, neikak neika pil donyame. Elda, na weit atonun unulule. Asurat sekeipsina deiyok ara, anggun talima barina ati sekeipsene. Tonda, Allah arye, ‘Na pil donamak’ tenen, talye arisilya pil dona deiyok ning ap, Allah el kanye aniryuk talye melisilye ning ap ara, ‘Dipkoprop ninguk, akunum laka nyapsile tenenamak’ tenen, asurat ara, sekeipsene. Anyapmasin yupu nirya ara, dipkoprop anya arye, ayupu talipmunce, tunim abuka unamlulume.
ကြော်ငြာတွေ