1 Korintus 13:4 - Eipomek4 Yuk ninye ati, pia bicoe tenebuka melilamice ninye ara, sik wininyak ning ton laka nyapnusine. Ara, yuk nang ati, ‘E, sik yata ati sikcuk winimak do?’ tenen, minopce arye yu upliba kum derenyake. Yuk nang ati bico tenenyak nang arye, yuk nang ati, ‘Yata wiribuka meliptinye do?’ tenen, pia nimalye aryuk melinyake. Yuk nang ati, bico tenenyak ninye arye, yuk ninye talinyak ning ap, sik wininyak ning ap, ati, ‘Se, naryuk taliptinirye winiptinye,’ kum tenenyake. Tonda, sikce sik bidamnye ati, “Nunda weik mambul nang unyabe,” nyabuka, kanye erebuka weik yupu nyana ap, dilana ap, kum wininyake. Yuk ninye ati bico tenebikirye, talima areplibuk, unyak ninye ara, kanye talima namin ninyeuk unyake. အခန်းကိုကြည့်ပါ။ |
1 Korintus 13:4
53 ပူးပေါင်းရင်းမြစ်များ
Ance sikti, bico tenebuka, teleb una ati winilalum ning ara, luba kiyamike. Tonda, sik dam ninye winipmanto kum pil dolalum ning nirya ara, tuba kum tenilamikce, luba kiamik. An nyalalum yupu yanibikce, mandipna kanye bobikce kwalilamikce, ‘Mesir mutuku tuba tamubuka bobisiliba, sik amu tam talye pil don nang unamap’ tenen, sik bidamnye arye, ninye deiyoknye wipdeibik. Malye weik winilamik bukni, Allah anda ninye nirya malye wininyak ning namin kina deiyoknye ulyame. Min pola kum wenesilyamce, an kanye aryuk weik bico tenepsimince, weik arye melisilyame. Bico tenesiminye ning ara, weik arye bico tenesilyame. Winilyama arye, nun apu yapu kum bataklamlume.
Tonda, sikce, ‘Yo bok weik tonun dopropnamab’ tenen, pil donyak ning nirya ara, teleb kibuka winikiba, nong ara, pia weik tonun upnin balule. Nun ni koproba Allah, ance, ‘Winipnamne ning ara, ani. ‘Aning ara, pia malye, aning ara, pia telebe,’ tenepmince, yupu nyalisilyam yupu nirya ara, pia telebe. Ara, im tam atonun ulula ati, anang arye, pia moubuka kum biktinge. Tonda, ance yupu bokolisilyam ning ara, sikce moubuka kum tenenyake. Tonda, yuk nang arye, sik maknya kintininyak nang ati, ‘Anggun malye ululum ning ara bataklulume, malye winina meme!’ nyabikiba sik kwalinyak nang arye, ‘Anang ara, nun like. Dupmalye’ tenen talak dobuka, malye yupu uk nyasinyake.
Tonda, ton nang arye yuk nang ati, ‘Aning ara nun like,’ tenebikirye, kanye talima wilibuka, mal pipdacopura, yu ning kutukuka, minopce olana uk unyake. Bukni, ninye arye yuk nang ati bico tenebuka kanye deipdacopura, amalye tenenyak ning ap, yu tenen kanye ap, malye ulilanyak ning nirya ap ara, adiparyuk luba kinyake.
Kanye talima erena ap, kwalina ap, una deice arye, ninye nirya pia walana ap, olana ap, diamuk unyake. Bukni, yata ninye do nirya, yuk pia kel bikamikce nang arye, sikti, “Teleb una ara ani, malye una ara ani,” nyabuka lipsisikuka nyan yupu nyabikiba, moubuka kekebice ninye ara, sik babye pia weik kel nang unamake. ‘Aning ara teleb, aning ara malye’ tenen, kel bikinamake.
Winipmanto ara, mek bisik wakibikirye, kukdeibikiba, mek mikip arye balamle atonun, ninye arye kabul deiyok koubuka, derelana unamak talak ara, adiparyuk, adeiyok ning ati, “Dauplye,” nyabuka batakaldongonamlulume. Opdanmanto unyak ninye ati, lyelina telebe. Kumopura, ninye arye derepdakirye, ayu yupu uk tuba nyapdanin, bakibuk weik upnin balyopura, sikce nyaldanamal ning ap, oldanamak ning ap ara, min kum kum daneipnamsile. Ati, yu upliba, deiyok koubice talak aryuk, lyelina telebe. Yu yupu tuba nyaldana kume. “Dauplye,” nyabuka, batakaldongonamlulume.
Yatanye do nirya, yuk ninye arye elti, malye kipdeipmace ning nirya ati, “Se, na kayapu, talye arye winipmanuluma anya arye, dauplye. Yuk nang kekena ak binuka sikti, malye yupu nyapnirye, anggunti malye kum upra deipnamsile,” nyalulnye bira, weik arye akunum kel bikamuk. Yuk nang arye, elti, malye unyak ning luba kilirye, yupu tonap tabakuka kum nyaplyopura, el ap, sik anang ap, teleb ubuka neika unamake. Sik nirya arye bico tenebuka, kanye delilanamake. Bukni, yatanye do nirya, yuk nang arye elti, malye kipdeipmace ning ati, “Winibuka malye updeipmaniake,” nyabuka, sik nong deice malye yupu weik arye, nyapra balamliba, ayupu weik uplyopura, adeice arye yuk nang nirya kekebuka, kel kibicopura, el kayapu nang koprop ati, yupu bokipliba, kanye talima wilipdakirye, ‘Nun like,’ tenebuka, memepropnamake.
Ninye arye, ‘Se aning ayala-yala nirya doproptibirye, bona weik talin ninye unamabe’ tenen, kanye talima engena uk unyaka ara, pia malye unyake. Teleb ning ara, talye bona utotoa talina kum ninye ulamtibye. Tonda, ‘Talye bona utotoa talina kumnye unun anya arye, alye dakalanune,’ tenetibye bukni, anye birye nyalul yupu ara, tilila yupu uk nyalula anya arye, ‘Aning ara, malye un ning ara, pia weik arye ulule,’ tenetibye.
Tonda, el akil ara, yuk bona utotoa talina kum ninye ati ara, ‘Na ning kum bokuka arepnamne’ tenen, kunusa kanye bona kum kile. Elda pia kanye teleb arye yuk bona utotoa talina kum ninye ati, bico tenelirye, melibuka arelule. Tonda, yata patan ning do nirya, yuk ninye pataplye talak ara, akil arye bico tenelirye, melibuka arelule.
Aning ton bikse. Aminyan talak ara, anggun mutuku ara, ninye deiyoknye birye, anggunti yu weik upliba, wenepsilyopura, anggunce elti, melibuka pil dona ati ara, batakna kumce, tuba teleb ubuka pil dona uk unamlume. Deiyok ara, ani. Anggunce, ‘Seʼ tenen, kanye teniltona kumce, talye kanye bobuka, pil teleb ubuka tuba dolamunya ani, aminyan talak ara, elce aning eiplyopura, el yu kum upliba, anggunti tonap, kanye delinamsile. Anggunce malye weik ulamunya babye, adiparyuk mitang asa arye, “Se na malye ulamse,” nyabikirye, namin asa arye umunce, nimalyap pil donamlume. Winilamunya deice arye, elda, tuba tamubuka anggunti kanye delinamsile.
Ura, Pilatus arye ayupu nyabuk deiyok ara, ani. Ara Allah ati arena deiyok nang, ‘Sik yuk ninye arye Yesus el yupu kekebuka dobolbakirye, nun tam bataksikcak, anya arye Yesus ara nun like,’ tenelamikce, Yesus ati kanye talima erebuka wililalamik. Yesus ati sik talima wililalamik ning ara, Pilatus akunum kel bikamuka anya arye, ‘Anang arye, Yesus akunum opdeipsilyame, nyapmanika ara, deiyok anye,’ tenebukce, “Yesus opdeipsilyame,” nyabuka, el dam morolyanmek nang ati, Pilatus arye asipdeyuk. “Yahudi yala nang, anggun weik deiyoknye, Mesias nyanyaknye bira, ‘Yesus lopdeipsutu’ tenen, patanmasil ati, moropmanulum do, ‘Barabas lopdeipsutue’ tenen ati, nyanmanulum do?” nyabuka asipdeyuk.
Ura, nun apu yapu weik mambul nang sik obarye nang arye sik weit kopropa Yusuf ati, yu ulamuk ati, sik talima wilibuka delilamikce, ‘Nun weit ara, Mesir mutuku nang arye anye biti dekikce sik piluk talye dem donamle’ tenen, yuk nang dam yo bok dekikura, anang arye Yusuf dobuka Mesir mutuku bobiyik. Bobiyikura, Yusuf el ikin ning pia ulamuk bukni, Allah arye Yusuf pia meilyamuka deice arye, Allah arye lyepdeibuke.
Aninye arye pia malyeuk ulamik touk, wini talak babye aninye atonun unyak ninye arye, tuba malyeuk wininyake. Yata malye winin ning do nirya, malye winin ning aning-aning nirya talibuka wininyake. Sik kanye talima pum tam nirya ara, malye ninguk langdibukba, ninye kum winipmanto, pia malye winin ning weika arye wininyake. Tonda yuk malye wininyak ning ara ani. Yata bona ning do nirya, sikce aning-aning nirya ati, ‘Se, nuncuk aning yala-yala nirya weika arye doproptibye’ tenen, kanye talima lilolulba unyake. Tonda, yuk nang arye talinyak ning ati, ‘Se nuncuk taliptibye’ tenen, kanye talima engena ap; yu upliba ninye oltakana ap, walana ap; tenepce arye tilila yupu nyaltakana ap; yu upliba yuk ninye ati malye ulina ap; yuk nang arye wininyak ning ati, malye yupu nyabuka murmur ana ap; awininyak ning nirya ara malyeuk wininyake.
Winibibyopura, keting noutam deice arye teleb winilamak touk, ‘Talya luba kibuka winipnune,’ tenena kumce, diksukumuk wininamabe. Ara, sal ap, kilapu ap, yupa weik bulubikirye, talye yolalamak ning ap; ninye arye kanye walwalana mek dinyakba, kanye wangalamak atonun una ap; kil ubula talye-talye yolalamak ning ap; pia malye-malye ning uk, talye luparabuka winilamak ning aning-aning nirya ap; kanye talima wililanyakce, kanye tenebuka, yuk-yuk bongdalanyak ning ap; yuk nang sik ning ati, ‘Se, nara aninguk winiptinye’ tenen, kanye se tenenyak ning ap; anirya ara kum wininamabe.
Aning ara, tilila ati kum nyapsine. Deiyok ara, anggunda, dib tenena kum, talye tukwak ninguk tenenyak ninye atonun tuba ululume. Anggun kan-kan arye, yu upliba, yupu deice waldana ap, ‘Nun tam ninye ara, telebe, sik otam ninye ara, malye’ tenen, talima wililana ap, tuba winilalulume. Winilulum anya arye, talye dib tenena kum ninye atonun ululum do, kum do, nyapsine. Wini talak umunce, winimunye ning ara, dib tenena kumce, talye-talye unyak ninye winilamak touk ululum do, kum do?
Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Winiryuk nyapmasin yupu nirya ara, ‘Anggun Korintus mutuku ninye kel biknalum’ tenen, asurat noutamak arye, ‘Na Paulus ap, Apolos ap ati, nun bitinye nang arye ara, winipmanto nang unume,’ nyabuka sekeipmasine. Ara, nun peterepnuma deice arye, ‘Allah yupu deice nyasirikce yupu ara, deiyok anye,’ tenebuka kel biklulume. Nun mutuku nang arye, nyanyak yupu ara, ani. ‘Allah el yupu deice arye, nyasilye touk wininamlulume. Anggun tenena deice aryuk, yuk yupu ap, dukdongobuka tabakalongona kume.’ Ayupu nyasilye touk winilulum ning ara, yuk nang ati, “E, anye bira weik mambul bukni, anye bira talinye,” nyabuka tonye erebuka, tonye lungnupdeibuka kum kinamlulume.
Se, aning ara, aupmal bukni, anggunda weik kanye erebuka kwalinauk ululume. Anggun ton moubuka kum tenelulum do? Teleb ning ara, anggunce, ‘Se,’ tenebuka, mun tulubuk ati, el li koprop domuk kil ati talye yobuknye bira dobuka, anggun kan-kan noutamak arye, bai tam yakdongoptumopura, aning tonok ara pia telebe. Aning kum winipmunyopura, tuba malye winilulume.
Ara, na kayapu, aning ara, talye ning bukni, anggunce, ‘Nun ni koprop anya arye, si erebuka kipnamap’ tenen, tup ning kalibuka arilamak ning ara, yupu nyapnusine. Anggun Allah ati, dib tenelulum ninye arye, “Diptibye do, kum do?” nyabuka, asipdenulum yupu ara, nyapnusine. Aning nirya ati ara, nun nirya kel bikamupe. Bukni, luba kina kume. ‘Nunda weik kel ninye unyabe,’ tenelamak ninye ara, weik kanye erebuka kwalinyake. Wininyak bukni, yuk ninye ati, ‘Bico tenebuka melilanauk unamabe,’ tenelamak ninye ara, yuk nang ati, talima kwa dibuka melibikiba, nun nirya teleb upnin banyabe.
Na ilil upmanil ning ara nyapnusine. Narye anggun dam yanyopura, min arye ‘Winibuka, winibuka winiptinge,’ tenyamse touk kum upmunyopura, malye kanye donamne do? Aning atonun, anggunce nati, ‘Paulus ara, winibuka, winibuka winiptue,’ tenenululum touk kum winipnyopura, anggunce ton malye kanye bopnamnulum do? Tonda, na yanyopura, yupu deice waldana ap, kanye talima wililana ap, yu weik upliba, weik arye yupu nyana ap, yuk-yuk tenelamunce, yuk-yuk kilongona ap, lululina ap, kanye erelana ap, kwalina ap, yuk nang arye, ‘Anang ara, malye nang tenepnamak’ tenen, ‘Malye yupu nyalina ap, winipnamlum do? Na yanamne talak ara, sik Korintus mutuku ninye tuba malye winibicak’ tenen, ilil unulule.
Yuk nang nirya arye, ‘Anang ara teleb nanguk unyake, tenenamsiyak’ tenen, wininyap ning ara, ani. Nun kanye talima noutamak ara, malye winina pia kum, diksukumuk una ap; ‘Deiyok ani’ tenen, moubuka kekena ap; kel bikna ap unyabe. Tonda, ikin usilye ning do, malye winisinyak ning do, aning ati pola-pola yu una kumce, nimalye arye winina ap; yuk ninye sik patana ati melina ap wininyabe. Tonda, Allah El Dib Kanye mikip deice winina ap; tenepce arye winina kum bukni, yuk ninye ati dipkoprop bico tenebuka melina ap wininyabe.
Amalye winin ning nirya akunum batakmunyopura, anggun nirya arye, yuk ninye nirya ati, bico tenebuka melilanauk unamlume. Wininamlum talak noutamak ara, yuk nang arye, anggunti,malye usinyak ning ati ara, ‘Dauplye,’ tenebuka, namin kinamlulume. Ara, Allah arye, anggun ap, Kristus ap, kanye talima dukdongopsuka deice arye, anggun malye winin ning nirya ara, kum kipdeipsukce, namin kisilya atonun, anggunce yuk nang ati, atonun wininamlulume. Na Paulus arye, nyapsine.
Ara, ton nang ara, Kristus el yupu peterenyak bukni, nati talima wilipnikce, ‘El yupu kekenyak ninye ara, Paulus el batakuka, nun tam kepropsitinge’ tenen, tenepce arye, Yesus el yupu peterenyake. Yuk nang ara, aning atouk kum bukni, tenepce arye tenena kum, ‘Telebuk neika unamap’ tenen, talye luba kibuka, Yesus Kristus el yupu teleb ubuka peterenyake.
Tonda, Allah el weik mikip weik ulamle touk, elce anggun Kolose ninye ati, mikip weik arisilibuk, kanye imun ning weik upsilya babye, ‘Batakana pia kum arye, pia pi dobuka pil domunce, kanye teniltona kum arye, telebuk unamlume. Tonda, ikin upsilya babye, yuk nang ati, minpola arye yu uplibuk, pil kum batakanamlum bukni, nimalye aryuk unamak’ tenen, nunce anggunti Allah morosinyame.
Anyapmasin yupu atouk, yata nang do nirya sikti, “Kume, narye Allah el si erebuka ulamne ning atouk kum unyake. Ara sikce sik badamnye ati, amu tam kibuka kum yanilanyake. Tonda, Allah el im deice pil don nang, malaikat ati, si kum erenyake. Narye aning-aning ulamne touk kum unyaka ati, sikda malye ninye unyake,” nyabuka malye yupu nyapsikcopura, ‘Anggunce dib nyapsiak’ tenen, kum kekenamlulume. Ayupu atonun ning nyasikce ninye ara, sik dipkoprop kum elilamik bukni, ‘Yuk nang arye, sikda weik nang, tenepsikirye, nun diba tenepnamsiak’ tenen, “Nun eibupu ning, weik mambul ning ani, ani,” nyabuka, yupu pia weika arye lilibuka talye nyaltakanyake. Tonda, Yesus dib tenena kum arye, sik malye tenenyak ning ap, malye wininyak ning ap deice arye, sik kanye talima tapu koubuka, deililalanyakce, pia malye wininyaka ati, deiyok kum upmalyebuk, ‘Nunda, weik mambul ning,’ tenelanyakce, pia talye-talye ninguk tenebuka kanye talima erelanyake.
Aning ati ara, Allah arye anggun nirya ati, bico tenenyamsukce, ‘Aninye ara, na tenen, ninye na mapu unamak’ tenen, wibuka deiamsuka anya arye, malye una pia kum aryuk, anggun teleb-teleb ubuka wininamlum ning ara, nyapnusine. Ara, winiryuk baju ongolamaka atonun, bico tenebuka melilana ap, yuk nang ati namin kibuka melina ap, yuk nang ati kanye talima lamabuka amu tam una ap, ting-tingana kumce, namin asa arye unamlulume.
Tonda nun du weit atonun nango, mambul yupu nyalinamsiabe. Ara, sik dipkoprop pil talibuka dona kum arye, talye-talye yupu nyabuka unyak nang ati, “Kanye moupnamlulume,” nyabuka wenenalulume. Ilil-ilil asauk, ulamice nang ati, talima melibuka unamlulume. Tonda, sik mitika aryuk Allah diba tenenyak ning ara, wisina kum ninye ati, melibuka mikip kilinamlulume. Yuk nang nirya ati ning ara, pola wenena kum arye, namin kibuka nimalye arye melinamlulume.
Yuk nang arye, Allah el yupu peteren nang ati, ‘Nun lik’ tenen, el yupu yanibikirye, malye kibuka bisibikcopura, elce anang ati, teleb yupu nyabuka, nimalye arye peterenamle. Sik walwal arye wininyak ning ati lipsisikuka peterenamlyame. Ara, talye ati kume. Ara, ‘Allah arye anang ati, sik kanye noutamak pil melibuka doptubuk, sikce, “Nun malye un ning batakape,” nyaptingce, Allah el bisikuk tamubuka yanamak do?’ tenen, nimalye arye peterenamlume. ‘Sik malye ning batakikcopura, Allah el dipkoprop yupu kel biktingce, teleb uptinge,’ tenenamlame.
Sirya talak ara, sik malye ning wininamak bukni, Timotius anuk ara, aning atonun kum wininamlyame. Ance na winilamse ning nirya ara, akunum kel bikamnulume. Ara, na winilamse ning ap, na peterelamse yupu ap, narye, ‘Winipnamne’ tenen, pil dolamsa deiyok ning ap, Allah ati dib tenenun ning ap, ikin ning wamnuk bukni, wana kum, nimalye arye winilamse ning ap, yuk nang ati bico tenebuka melilamse ning ap, ikin ulamnuk bukni, batakna kum arye pia pi dobuka, pil dolamse ning ap, aning nirya an akunum kel bikamnulume.
Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.
Aning peterelamlyam deiyok ara ani. Ara, minop talak nun babye kanye bona kum arye, walwal ulamubu. Ara, malye kibuka, ninye deiyok nang yupu ap, Allah yupu ap, kum kekelamubu. Yata malye winin ning do, malye patan do, malye kanye tenena do nirya, amalye ninguk patalamsuka deice arye, yukulamsukce, nun malye ning winina deice arye, tapu kouamsukba, pia malye ulamubu. Atilila ning diba tenelamuburye, yuk nang ati, yu weik ubuka, waldana ap, oldana ap, ulamubu. Tonda, yuk nang ning ati, ‘Se sik ning ara, naryuk doproptinye’ tenen, kanye talima engena ap, ulamuburye, nun nirya arye, yuk nang nirya ati, lik upsinabuk, ‘Pia lik,’ tenelalamubu.
Allah el yupu deice arye nyasulule. “Allah arye arepsukbuk nun talima ak Dib Kanye usilya arye, ‘Anang ara na’ tenen, tenepsilirye, ‘Yuk ning pataplibuk na bataknicak’ tenen, pia kalikisulule.” Ayupu nyapsuka ara, talye yupu uk nyapsuka tenelulum do? Kume, Allah El Dib Kanye arye, ‘Yuk malye ning talibuka bicak’ tenen, pia kalikisulul ati, Allah arye, ‘Sik malye ubicak’ tenen, el mikip arisilya deice arye, pia tuba-tuba talibuka melisulule.
Allah el pia ati, upnamle yupu peterelamsika ati, malye winin ning nirya ara, batakanamlulume. Ara, yuk nang ati, yu una ap, ‘Na’ tenen arye, talye nyana ap, ‘Yuk nang ning, na ton doproptinye’ tenen, talima noutamak pataplibuk tenena ap, malye winin ning aupmalye bukni, nong bol deiceuk teleb una ap, yuk nang ati talye yupu nyabuka lulundana ap, amalye winin ning yala-yala nirya ara, batakanamlulume.
Anyapmasin yupu sirya dakna ning ati nyapnusine. Anggun nirya ara, tonok kanye bobuka, talima dukdongobuka, teleb-telebuk ubuka neika unamlulume. Anggun weitcapu silip tonok kanye tenebuka, kanye delilanyakce, neika ulamak touk, anggunce yuk nang patalye ning ati, bico tenebuka melinamlume. Anggunce, yuk nang anggun ikin usilye ning ati, ‘Se aning ara, mambule,’ tenebuka bico tenelanamlulume. Tonda yuk nang sik amu tam umunce, nimalye arye neika unamlulume.
Anyapmasin ning nirya wininamlulum bukni, weik mambul ning ara, winira nyapnusine. Anggun nirya arye, yuk diba tenena ninye nirya ati, pia dipkoprop talima arepdamunce, bico tenebuka melilanauk unamlulume. Yuk nang ati pia bico tenebuka melipmunyopura, sik anang malye wininyak ning ati ara, talye luba kibuka mangkau kipnamlulume. Yuk nang ati pia bico tenebuka, kum melipmunyopura, sikce malye updeipsikce ning ati, tuba tenenauk unamlulume.
Allah ulye touk teleb mikne un ning akunum aupmasilyopura, yuk diba tenena nang ati, bico tenebuka, nimalye arye una deiyok ning ton tabakanamlulume. Yuk diba tenena nang ati bico tenebuka nimalye arye una deiyok ning akunum aupmasilyopura, yuk ninye nirya ati, bico tenebuka melilana deiyok ning ton tabakanamlulume.
ကြော်ငြာတွေ