Ara, talye ati kume. Deiyok ara, Allah Yahweh ara, telebuk ulirye, nun ninye ati, bico tenepsilirye, pia tuba melisilya ara, pia kum bataknamsile. Allah arye, “Wininamsine,” nyabuka, nyalina yupu deice nyasilye touk, pia dipkoprob winilule. Minop talak dorapce deibikba, dadeipdanin yanganyap ninye nirya ati, tuba-tuba tenesilirye, melisulule.
1 Korintus 1:9 - Eipomek9 Allah arye anggunti, ‘Na Mi Koprop Yesus Kristus ap, aninye ap kanye dukdongobuka neika unamak’ tenen, wipdeipsuknye bira, yupu talye kum nyaltakalule. Elce, ‘Wininamne,’ nyasilye touk, dipkoprop winisulula anya arye, arup nyapmasin touk melisilyeba, sirya talak ara, diksukumuk unamlume. Yesus ara, nun Weik Deiyoknye usulule. အခန်းကိုကြည့်ပါ။ |
1 Korintus 1:9
43 ပူးပေါင်းရင်းမြစ်များ
Winipmanto ning ara, mikip weik nang arye, urasin teleb deiyating moubuka delilamak touk, el pil donamle ning ap, wininamle ning ap ara, diksukumuk wininamle. Tonda, ninye deiyok nang Raja nang arye, pia teleb namin baju, cang ning arye, deiyok deice deibuka koulongolamak touk, anye birye, ‘Wininamne, winibuka melipnamsine,’ nyabuka, nyasilye yupu nirya ara, pia dipkoprob ninguk winipnamsile. Tonok ning babye, kum bataknamle.
Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.
Allah Yahweh arye nyabuk. “Nara Israel ninye, sik Lyena Deiyoknye unune. Sik malye wininyak ning ati, talye lukparabuka opnirye, sirya daktinye bukni, sik malye ning pununa ati, narye sikti, dekuka lyepnamne. Nara weik Diksukum koprop Una Deiyoknye unirye Israel yala ninye ati pia kalikuka melinune. Pia Telebnye uniba, Israel ninye arye na si ereninyake. Na Allah arye na amu tam pil donamnuknye, na melinanye biti nyapkine. Israel yala ninye nirya arye anti, ‘Anye bira nun like’ tenen, anti malye yupu weik nyalamkike. Tonda ance ninye deiyok nang, sik amu tam pil dolalumnye biti nyapkine. Sik ninye deiyok nang ara, narye anti donamkin pil eibuka kel bikikirye, an si erena ati, tikukabikirye, an si erenamkiyake. Tonda ninye deiyok nang arye, delilamak mapu eipkikirye, an si erena ati, yanuka nong kanulongonamake. Wininamaka deiyok ara nyapnune. Ara, nara Allah Yahweh arye ‘Wininamne,’ nyanye yupu nirya ara, dipkoprob dukulongonanye ununa ati, ereipkiniba an si erena ati, an si erenamkiyake. Nara weik Diksukum koprop Una Deiyoknye unirye, Israel yala ninye ati pia kalikuka melinune. Na aryuk anti wipdeiamkisa ati, yuk-yuk mutuku deiyok nang nirya arye, an si erenamkiyake.” Allah arye nyabuk.
Allah elda, nun ninye unyaba atonun kum ulula ati, tilila yupu tonok ning babye, kum nyalule. Tonda, ninye arye, el kum deibika ati, el minopce tenelye ning nirya ara, aning nirya adiparyuk wininulule. Aning batakuka, ila tuba ton, yuk ning kum tenelule. El teneplirye ‘Winipnamne,’ nyalul touk, aninguk tenebuka winilule. El nyalul yupu, pia kum batakalule. Nun ninye sirika ara, ‘Aning winipnamasine,’ nyabuka, nyalilamepye bukni, batakuka bibirye, yuk ning nyanyabe. Wininyaba atonun, Allah elda pia kum winilule.
Naio, narye sik aminyan talak dib tenenamak ninye ati moropmakin ning ara ani. Ara, ‘Na ap, Allah an ap, nun talima dukdongobuka, tonok kanye bobuka unyam touk, sik dib tenenyak ninye ap, aminyan dib tenenamak ninye ap, sik nirya ababye atonun, talima dukdongobuka neika unamak’ tenen, moropkine. Tonda, naio, sik nirya ap, nun bitinye ap, ‘Nun nirya ara talima dukdongobuka, tonok kanye bobuka neika unamap’ tenen, moropkine. Anyapman touk, sik dib tenepnamak ninye nirya arye winiptingopura, yuk talye ninye nirya eibikirye, ‘E, dipkoprop, ninye lyena ati, Allah arye Yesus dopdeipsuk’ tenen, kel biktinge. Utenen ati moropkine, naio.” Yesus arye nyabuk.
Ura, na kayapo, winipmanto yupu tonap nyapnusine. Duk teleb moulamle yo, el si ara, Ara yo, ninye arye ayo kouamikibuk, teleb ubuka kwapu bongona kum arye, duk mouna kum diparyuk, kolupyopura, akolupmalye yo taruk ara, deiltakanyake. Ayo taruk seklobikirye, yuk talye buru mutuku palamle yo taruk dobuka, ‘Yo duk teleb ubuka moupnamle’ tenen, ayo taruk seklopmaca deice yanuka dukulongonyake. Winibikiba adukdongopmace yo, el yating ara, kum ulamle yating ap, nong ap, taruk ap arye, teleb ning doproplirye, teleb ubuka palule. ‘Min arye teleb kibuka papnamle’ tenen, kouamikiba, palamle ning ap, aminyan dukdongobice ning ap ara, tukwak teleb ubuka bongoplirye, duk moupnamle. Aning atonun, anggun Yahudi yala kum ninye ara, aminyan talak dukulongolamak yo taruk atonun ululume.
Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.
Tonda, minop talak arye akunum wibuka deiamsuk ninye ati, ‘Na damak yalulume,’ nyabuka, nun talima pum tam yukupsuke. Allah arye yukupsuk ninye ara, nun malye winin ning kilipsukce, “Sikda diksukum un ninyeuk akunum keipsine,” nyabuka, teleb kipdeipsukba, el mapu kopropa unyabe. Diksukum teleb ninye akunum teleb kipdeipsuk nang ara, aminyan sirya talak pia teleb kipdeipsilyopura, weik arye erepdeipnamsile.
Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.
Ara, ‘Aning winipnune’ tenen, pataplya deice arye, talima lilosulul ning nirya ara, ninye mutuku-mutuku nirya aning aryuk, nun talima nirya lilosulule. Bukni, Allah arye nunti, “Ura, ‘Na mapu malye winibicak’ tenen, kalekuka melinamsile,” nyalilamsuk touk, pia kum batakasulule. Elce nyalisilye atouk dipkoprop usilirye, melinauk usulule. Elce kalekuka melisilyopura, nun talima lilosulul ning, kum bisipmanto ning ton kum yanamsile. Allah melisilya deice arye, aning nirya ara, malye kibuka bisiptibye. Ati, malye winin ning tenebibirye, ‘Aning winipnun’ tenen, kanye teniptobibyopura, talima lilosulul talak nirya ara, Allah arye nunti, ‘Amalye winin ning bataktingce, diksukumuk unamak’ tenen, loplobuka diksukum balamak bisikuk laka kipdeipnamsile. Talima lilosilye ning awabsilya babye, Allah arye, kintinipsilye bisikuk bipyopura, kanye darapdongobuka telebuk unamabe.
Nun Deiyoknye Yesus el ining deice deksuka ara, ‘Pia tenepnamap’ tenen, mek makau bobuka, Allah ati, “Telebe,” nyabuka, neika dinyaba deice arye, Kristus el ining deice arye, lyepsuk ning ara, dopropbibyopura, el ap talima dukdongobuka neika unyap do, kum do? Aning atonun, Yesus el nong ara, wanwanun yo deice obikbuk dipsuka ara, ‘Pia tenepnamap’ tenen, tonok kwaning dobuka, bokibirye neika dinyaba deice arye, Kristus el nong arepsuka deice arye, lyepsuk ning ara, dopropbibyopura, el ap kanye talima dukdongobuka neika unyap do, kum do?
Kume. Allah arye, “Wininamne,” nyabuka nyasilye touk, pia batakana kumce, dipkoprop aninguk winilamle touk, nunce anggunti nyasinyap yupu ara, atonun ulule. Kanye bokoltona deice arye, tonok talak aryuk ton ning ara, “Diba,” ton ning ara, “Kume,” kum nyasinyabe. Moubuka tenebibirye, dipkoprop ninguk nyasinyabe.
Winibuka daulamse bukni, atalak noutamak ara aning kum tenelamsibuk, Allah ara na nin deipnuk talak arye, ‘Anye bira na ning,’ tenyamnukce, wipdeipnuke. Winipnuka anya arye, elce bico tenyamnukce, el kanye aniryuk yukupnukce, lyepnuke. Tonda, Allah arye nati, ‘Anye bira, na yupu dobuka, Yahudi yala kum ninye ati peterelbinamle’ tenen, el mi kopropa Yesus pil dopnuka deice arye, winiryuk kanye talima arepnuke. Winipnuk ati, el mi kopropa Yesus arye winilul ning ara, laka nyalamnukce, na talima noutamak arye pil dolamnukba, na winilamse ning deice arye laka kipdeipnuk. Winipnukopura, narye, ‘Se, yatato pil donamne do? Tonda, yatato yupu peterenamne do?’ tenen, yuk nang dam binuka kum asilamse.
Dipkoprop ara, Yesus Kristus wanwanun yo deice obika deice arye, Yesus arye na malye ulamse ning ati punupnuk anya arye, winipmanto ara na ap, Yesus ap dukdongobuka opnikba, dipse. Ara, Yesus dibuka deice arye, na babye dipna atonun winipsa ati nyapsine. Winipmanto ara, Kristus ap dukdongobuka opnika ati, wini talak ara, na babye yuk kum unun bukni, Kristus ara na talima noutamak ulule. Na ap, Yesus ap talima dukdongobuka unyame. Ati, ninye nong atonun ubuka tuba ununye talak nirya ara, Allah el Mi Kopropa Yesus ati diba tenenuna deice aryuk kam unune. Allah el Mi Kopropa arye nati bico tenepnukce, na pununa ati, el bidamang el nonguk aribukba, yu nang arye obikba, nati dibuke.
Allah arye, duknyamuk bukni, el Dib Kanye arye, laka nyasulul yupu ara, ani. Ara, Allah el laka teleb yupu, ninye lyen yupu kekebuka dib tenebikca deice arye, sik Yahudi yala kum ninye babye, Allah doproplirye, melibuka talinamle. Sik babye, el mapu unamake. Allah arye, Yahudi yala ninye, Israel ninye ati, “Wininamsine,” nyalilamuk ning nirya ara, anggun Yahudi yala kum ninye babye, dolonamlume. Anggun ap, Israel ninye ap, kanye talima dukdongobuka, nong tonok atonun akunum teleb kipdeipsuke. Tonda, Allah arye, “Kristus deice arye, winibuka wininamsine,” nyabuka nyalisilye ning nirya ara, anggun ap, nun ap, neiktotouk dolonamabe. Aning nirya dolonamaba deiyok ara, el laka teleb yupu, ninye lyen yupu dib tenenyap deice arye, arisiliba dolonyabe.
Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.
“Ati ara, anggun adiparyuk moubuka teneipdemunce, kel kipnamlulume. Pia tenenamlulume. Allah el si ara Yahweh, anggun ni koproba Allah, el tonok ulule. Yuk ton kume. Allah arye nyalilamuk yupu nirya ara, dipkoprob ulule. El nyalisilye yupu ara, tonok ning ara, kum batakalule. Yata ninye do nirya, sikce el deiceuk, sik kanye deibikirye, elce, ‘Aning wininamlulume,’ nyabuka nyasilye yupu, moubuka talibicopura, Allah arye sikti, tuba-tuba melilule. Elce sikti, ‘Wininamsine,’ nyalisulul yupu nirya ara, tonok ning babye kum bataknamle. Nirya awininamle. Ato ninye ati ara, sikce mapu deibikiba, dadeipdanin, banamak nang yupa ara, pia kum nukmanto, pia weik upre balamlya babye, pia melinamle. Sikce, mapu deibikiba, dadeipdanin banamak ninye yupa ara, ninye nel punun nang, generasi yupa weik, seribu kali lipat upre banamak ninye ati ara, Allah arye pia melinamle. Kum bataknamsile.”
Wini talak ara, na nong deice ikin ning deilinikibuk, ikin weik unulul bukni, tuba kanye deibuka unune. Ara, anggun kele, anggun ap, yuk mutuku ninye ap melina ati, Allah el laka teleb yupu peterenye ati, yuk nang arye, ‘Apil dolulnye ara, nun like’ tenen, ikin ning na nong deice delininyake. Yesus Kristus arye nati, ‘Na dib tenena ninye melina ati, Paulus ara, pil dolibuk, yuk nang arye ikin ning el nong deice delinamake,’ tenelamnukce, wipdeipnuka anya arye, apiluk do nirye sirya dakdibanamne. Kristus el nong deice ikin ning delilamikba, ikin ulamuk ning atonun, na nong deice delinamniyak ning ara, tuba aupmanila ati, sirya dakaldongonamne. Yesus diba tenebibya ati, Allah el mapu kipdeipsilye ninye ara, nunda Yesus Kristus el nong atouk unyabe. Ara, el tam ninye, el amu tam unyaba ati nyapne.
Ara, Allah arye anggunti, ‘Aninye ara, narye aning-aning ap, tukwak ninye nirya ap, talibuka unye talak, pia teleb weik dirinak unmana ara, sik ap unamabe’ tenen, yukupsuke. Allah arye anggunti, nyapsuk anya arye, ‘Aminyan talak Allah arye anggunti, kanye deipnamsil’ tenen, nunce anggunti, “Wininamlulum, wininamlulum,” nyabuka peterena ap, anggun ikin ulamsuk ning ati, kwa daklamsupu ning ap, anggun kanye imun kanye bona ati, talima mulina ap ulamsubu.
Allah arye sikti, ‘Anang lyepnamne’ tenen, wipdeiamsuka ati, ara nunce anggun Tesalonika mutuku nang ati, Allah el laka teleb yupu, ninye lyena yupu peterelamsupu deice arye, Allah arye anggunti yukupsuke. ‘Wininamak’ tenen, yukupsuka deiyok ara, ani. Ara, nun Deiyoknye Yesus Kristus ap, el yanamle talak upnamle ning ap, urasin pia teleb kibuka yanamle. Atalak ara, ninye nirya arye elti, teleb nyabuka, el si weik arye erepnamak talak ara, ‘Anggun Tesalonika nang babye, neika atonun wininamak’ tenen, yukupsuke.
Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.
‘Nunce, “Wininamabe,” nyaptibye bukni, mikip ning mitang upsilibuk, nunce pil kum dopmanto usilirye, batakibye ababye, Yesus arye, “Na mapu ati wininamsine,” nyabuka nyalilamsuk yupu dipkoprop winipnamsile. Tonok ning babye, kum bataknamle. Ara, el bidamnye arye el bidamnye ati, kum batakmanto ulula ati nyapne.’
Allah arye tilila yupu pia kum nyalule. Aning-aning kabul kum kwepdeiamuk talak ara, “Bol kobuka pia kam una deiyok ning arepnamsine,” nyabuka nyalilamsuke. Nun nirya arye, kanye teniltona kum aryuk, ‘Dipkoprop pia kam un ning arenamsil’ tenen, dib tenebuka dinauk unyabe. Wininyaba deice ara, nun dib tenen ning ap, kel bikinyap ning ap, ulule. Yuk deiyok ton kume.
Elce, “Wininamsine,” nyabuka nyalilamsuknye, Allah ara, tilila kum nyalule. Elce nyasilye touk dipkoprop ulula ati, nunce, ‘Allah ara, dipkoprop lyenamsil’ tenen, diba tenebuka dinauk unamabe. Winibuka winibirye, laka arye nyanyap yupu ara, yuk bisik kirikuka bana kum, el yupu uk talibuka pia batakna kumce, pia talibuka unamabe.
Tonda, Abraham el diba tenelamuka deice arye, aning ton winibuk. Ara, elce domuk kil Sara ara, you kil ulamuka ani, el Abraham babye, mi kum deipmantonye wisi akunum dayuk. Winibuka ulamrik bukni, Allah arye, “An mi deipnamlam,” nyabuka, nyalin yupu nyapdeibukba, Abraham kekebukce, diba tenebuke. Ara, ‘Kume, Allah el yupu nyalul touk aninguk unamle’ tenen, diba tenebuka ati, Allah arye Abraham ap, Sara ap ati, melyamukba, el mi deibuk.
Arup nyapmasin yupu nirya aning ati ara, Allah arye Yesus ati, ninye atonun ubuka deibukba, Yesus ara el weit yapu atonun ninye, tukwak ninye atonun dayuk. Ninye atonun dayuk ning deiyok ton ani. Ara, ninye malye un nang ati, bico tenyamsukce, Allah ap, ninye ap, ansinilina pil dona deiyoknye upsuke. Nun malye winin ning ati, talye luparabuka oplopsutu bukni, bico tenyamsukce, ‘Batakna kum arye, teleb ubuka lyena pil donamsin’ tenen, ninye nong atonun dayuk. Ton deiyok ara ani. Ara, Allah arye Yesus ati, ‘Ninye atonun uplirye, tukwak ninye sik malye winin ning kum kipdeiplirye, sik pununa ati, dipnamle,’ tenyamuka ati, Yesus ara, ninye nong atonun dayuk.
Arup nyapmasin yupu nirya aupmala ati, anyapnusin yupu babye kekenulume. Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba ikin asa unyap talak ara, ‘Nun du kopropa Yesus arye, melinamsil’ tenen, eltibuk diba tenebuka tenenamlume. Na kayapu, Allah arye wibsukba, elti, diba tenelulum ninye ati nyapsine. Allah arye nyapsukba, ‘Allah el dam im deice binamabe’ tenen, diba tenenyap touk, anggun yuk mutuku ton ululum ninye, aning atonun diba tenelulume. Aning ati ara, anggun kanye tenen ning nirya ara, Yesus deiceuk deipmunce, eltibuk diba tenenamlume. Yesus elti, diba tenebuka eluk talibuka unyabe. Yesus ara, Allah arye tukwak ninye lyena ati, el pia kai teleb yupu laka nyana ati, deiyok kouna deiyoknye ulule. Nun ap, Allah ap, neika una ati, ansinilina deiyoknye Yesus usulule. Yesus ati diba tenebibirye, el yupu laka nyalbanyabe.
Amambul yupu ton nyapnusine. Nunce Allah ati, winiryuk diba tenebupu talak ara, kanye bokoltona kum arye, mikip arye diba tenebupu touk, tuba-tuba diba tenepra balamibya ani, dorsirya talak babye, batakna kum arye, Allah eluk moubuka talibibirye, tuba diba tenenamabe. Winibuka winibibyopura, wini talak babye, aminyan talak babye, Kristus ap, talima dukdongobuka neika unamabe. Bukni, kanye boktopsilyeba, Allah ati batakipyopura, Yesus Kristus ap, neika kum unamabe.
Allah arye, “Wininamsine,” nyabuka, nyalilamuk yupu ap, el si kopropa deice arye nyabuk yupu ap ara, urasin yuk pia kum tamupmanto, elce nyabuk touk dipkoprop unamle. Allah arye aning bitinye ati, tilila yupu kum nyaptua anya arye, dipkoprop wininamle. Allah arye, ayupu bitinye deice nyapsuk ning deiyok ara ani. Ara, sikce, ‘Allah dipkoprop lyepnamsil’ tenen, diba tenebuka dinauk unyak ninye ara, ayupu kekebikca deice arye, talima kwa dipsilyopura, kanye teniltona kum unamake. ‘Allah arepsiliba, dopronamak ning, batakna kumce pia moubuka talibikirye unamak’ tenen, nyapsine.
Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.
Nun ap, anggun asurat eiplum nang ap, ‘Nun nirya arye kanye tonok tenebuka, ansinibuka unamap’ tenen, nun elilamubu ning ap, yupu kekelamubu ning ap ara, anggunti laka nyabuka peteresinyabe. Ura nun kanye tonok tenebuka, ansinibuka unyap nang ara, nun ni Allah ap, el Mi Yesus Kristus ap, dukdongobuka neika unyabe. Nun ap, nun ni Allah ap, el Mi Yesus ap, kanye tonok tenebuka, kanye talima dukdongobuka unyabe.
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Nyapnuk talak im deice tam, dipdesiba, im deice tam nirya lakak ubukba, eipse ning nyapnune. Tonoknye, el si ara Dipkopropnye, tonda, Batakna Kumnye bira, tonok kurun kuda balye deice bukmokak, eipse. Anye bira, urdem una kum bukni, pia diksukumuk ubuka, yupu lepsisikuka bokolilirye, malye winin ning nirya ap, Allah ati yaninyak kili sal ap, ati olbalule.
ကြော်ငြာတွေ