Zẹkaraia 8:20 - Edo Bible (E Baibol Ẹdo) Version 1996

²⁰ E Nọyaẹnmwa ne Oghodua khare wẹẹ, “Ẹghẹ dee ne emwa nibun gha na ke ẹvbo nibun gha die Jerusalẹm.

Zẹkaraia 8:20 ပူးပေါင်းရင်းမြစ်များ

I Ọba 8:41

“A deghẹ orhunmwuyẹn ne ọ rre ẹvbo ne ọ rrei họn usi ruẹ, kevbe emwi ni kọnkọn ne u he ru ne emwa ruẹn, ọ na gha dee do ga kevbe ne ọ vbe na erhunmwu vbe Ọgua Osa na,

I Ọba 8:43

u ghi họn erhunmwu iran vbe ehe ne u ye vbe ẹrinmwi, ne u vbe ru emwi ne iran wẹ ne u ru, ne emwa ne agbọn hia miẹn ehe na rẹn ruẹn ne iran vbe gha mu ohan ruẹn zẹ vbene emwa ruẹn mu ohan ruẹn. Iran ghi do rẹn wẹ Ọgua Osa na ne I bọ ẹe na ọrọre ehe ne a na ga a.

Psalm 102:22

Vbe avbe uhunmwu ẹvbo kevbe arriọba a si koko iran ghi ya uhunmwu rhanmwotọ ne Nọyaẹnmwa.

Psalm 22:27

Agbọn ẹvbo hia gha ye Nọyaẹnmwa rre, iran gha ke igienenẹ agbọn, bu ẹre rre. Ivbi ẹvbo ughughan gha rho ẹre.

Psalm 72:17

Ai ghẹ mianmian eni ọba ẹdẹ te otiti ẹre gha tọ zẹvbe owẹn, te agbọn ẹvbo hia gha tian rẹn, te iran gha wẹ ne Osanobua fiangbe iran ne iran vbe gha gualọ ọyẹnmwẹ ne ọba.

Psalm 89:9

Wẹ ọ re ọ kha yan okun ne ọ wegbe, wẹ ọ re ọ dọ uhuemwẹ ọnrẹn ne ohu mu yọ.

Aizaia 11:10

Ẹdẹ dee ne ọba ọgbọn ne ọ zọ ke uniẹn e Devid ladian, gha na gha re ama ne uhunmwu ẹvbo hia. Iran gha si koko vbe ẹvbo ọba ẹre, iran ghi gha rhie ọghọ ne ẹẹn.

Aizaia 45:14

E Nọyaẹnmwa kha ma Izrẹl wẹẹ, “Ẹfe Igipt kevbe Sudan gha khian ọwuẹ emwa ni taẹn ni rre Siẹba gha khian eviẹn ruẹn; iran gha lele uẹ vbe a ye eghan gbalọ iran, iran gha ghughẹrre nuẹn iran ghi miẹnkue wẹẹ, ‘Osanobua deba ruẹ rẹn ọkpa kẹkan ọrọre Osanobua.

Aizaia 49:6

E Nọyaẹnmwa keghi tama mwẹ wẹẹ, “I mwẹ iwinna ne ọ sẹ ọna ne I wa ye otọ khẹ ruẹ ọguọmwadia mwẹ. Ẹire ne u viọ ivbi Izrẹl ni ghi kẹe werriegbe ye ihe ukpọlọmwẹ ọkpa; sokpan, I gha vbe ya a ru uwanmwẹ, ọghe avbe uhunmwu ẹvbo ne a sẹtin miẹn otọ agbọn hia fan.”

Jerimaia 16:19

E Nọyaẹnmwa, wẹ ọrọre ọmwa ne ọ degue mwẹ kevbe ne ọ rhie ẹtin mẹ wẹ ọ re ọ yọmwẹ obọ vbe ọghe ibaro. Avbe uhunmwu ẹvbo gha ke ufomwẹ agbọn bu ruẹ rre do kha wẹẹ, “Avbe erha ima odede i mwẹ emwi rhọkpa gberra ẹbọ ohoghe, emwirhọkpa i rrọọ gberra amazẹ ne ẹ i mwẹ asa.

Hozia 1:10

Ivbi Izrẹl gha do gha yevbe ikpẹ ekhae ni rre okun, iran ghi gha re ne a i sẹtin ka ra ne a mwa rẹn. Banbanna nian Osanobua tama iran wẹẹ, “Wa i re emwa mwẹ.” Sokpan, ẹdẹ dee ne ọ gha tama iran wẹẹ, “Wa ọrọre ivbi Osanobua ne ọ rrọọ!”

Hozia 2:23

I gha gbe emwa ẹkun sotọ vbe otọe nii, I ghi vbe gie agbọn maa iran, I gha ho ẹmwẹ emwa ne a te tie ẹre “Na ma ho ẹmwẹ ọnrẹn,” iran ne a te tae da wẹẹ, “Iran-ire-emwa-mwẹ.” I ghi kha wẹẹ, “Emwa-mwẹ-wa-khin.” Iran ghi vbe wanniẹn wẹẹ, “Wẹ ọrọre Osanobua mwa.”

Emọs 9:12

Rhunmwuda ọnii, ivbi Izrẹl gha khọn mu ehe ne ọ ghi te kẹe vbe Idọm, kevbe avbe uhunmwu ẹvbo hia ni ka re ọghomwẹ dee yi vbe ẹghẹ ọkpa,” erriọ e Nọyaẹnmwa ne ọ ra gie emwi na sunu khare.

Maika 4:3

Ọ gha bu ohiẹn ẹvbo ni mwẹ egbe ẹzọ. Avbe ẹvbo ni mwẹ ẹtin, ni sikẹ emwa kevbe ni rrei, iran gha ya umozo iran gbe ẹguẹ, kevbe asoro iran, erọ ulema. Uhunmwu ẹvbo i ghi mu okuo gie egbe ọvbehe, iran i ghi vbe mu egbe okuo ọvbehe.

Zẹkaraia 2:11

Ọ gha sẹ ẹghẹ nii, uhunmwu ẹvbo nibun gha bu e Nọyaẹnmwa rre iran ghi khian emwa rẹn. Rẹn gha yin ehe ne uwa ye, wa gha vbe rẹn wẹ rẹn ọ re ọ gie mwẹ bu uwa gha dee.

Malakai 1:11

Ke ehe ne agbọn sẹe vbe obọ na ya sẹ ehe ne ọ sẹe vbe obọ nọkpa, te emwa hia ya ọghọ mẹ. Ehe hia iran na giẹn eturari mẹ, iran ghi vbe gha zọ ese ne ọ gia rhan obọ miẹn. Te iran hia wa rhie ọghọ mẹ.

Matiu 8:11

Ne I tama uwa, emwa nibun gha ke ọlarre owẹn kevbe ọlarrie owẹn rre, iran ghi gu Ebraham, kevbe Aizik kevbe Jekọb tota rri evbare vbe Arriọba ẹrinmwi.

Iwinna 15:14

Saimọn ta ẹe wan vbe ne Osanobua ka ya rhie maa hẹ ighẹ rẹn vbe zẹ ye iran ne ẹ i re Ju re vbe ekpa ne ọ na viọ emwa eso vbe uwu iran ya ru ọghe irẹn.

Iwinna 15:18

Erriọ Nọyaẹnmwa, ne ọta ẹe nẹkpo i mwẹ arria gha dee khare.’ ”

Arhie Maan 11:15

Odibosa ne ogihinrọn keghi fian okpe ọghọe re, a keghi họn urhu ni vannọ vbe ẹrinmwi kha wẹẹ, “Ẹtin ne a ya khaemwisẹ yan agbọn na, Nọyaẹnmwa kevbe Mẹzaia ẹre, ọre ọ ghi yan rẹn nian, ọ gha vbe gha khaemwisẹ ẹdẹ kevbe ẹdẹdẹmwẹdẹ.”