Zẹkaraia 6:11 - Edo Bible (E Baibol Ẹdo) Version 1996

¹¹ Ya avbe igoru kevbe esiliva ne iran viọ rre ru ẹde ne u mu ẹẹn yan e Jọsua ne ovbi e Jehozadak uhunmwu.

Zẹkaraia 6:11 ပူးပေါင်းရင်းမြစ်များ

II Samuẹl 12:30

Ẹbọ ne iran gho ne a tie ẹre Molẹk keghi mwẹ ẹde igoru ne ukhuamwẹ ọnrẹn re uwan isẹn irrọ vbe iyenẹ, ikpẹrọnmwọ ighobioye keghi vbe rre uwu ẹre. E Devid keghi mu ẹde nii hin ẹre uhunmwu rre, ọ na mu ye ọghe irẹn. Ọ keghi fu emwi ni bun vbe ẹvbo nii viọ gha rrie

Ẹzra 10:18

Eni emwa ni viọ ikhuo orhunmwuyẹn ọ re ena khin: Avbe ohẹn kevbe ẹwae ne iran ke rre: Ewae Jọsua kevbe etiọnrẹn, ivbi e Jehozadak ni rrọọ kegha re Maaseia Eliezẹ, e Jarib kevbe Gedalaia.

Ẹzra 3:2

Ẹre Jọsua ne ovbi e Jehozadak, avbe ohẹn ne ihua ẹre kevbe Zerubabẹl ne ovbi e Sitiẹl, deba avbe etiọnrẹn hia, keghi koko dọlọ Ogiukpo ọghe Osanobua Izrẹl bọ ne iran miẹn ehe na gha giẹn emwi ne a ya zọ ese zẹ vbene a mwamwa ẹẹn ye ebe Uhi e Mosis ne ọmwa Osanobua.

Psalm 21:3

U rhie afiangbe nibun bu ẹre gha dee, u ke mu ẹde igoru rhuẹ ọre uhunmwu.

Ẹksọdọs 29:6

U ghi rhie ọza uhunmwu ne u vbe de ama ne ọ huanrẹn ọghe a ya fiohan ye ọza uhunmwu nii.

Ẹksọdọs 39:30

Iran keghi ya igoru ne a ma gua ru emwi ne a ya te owa, ama ne ọ huanrẹn ọ ghe a ya fiohan, iran keghi gbẹn yan rẹn zẹ vbene a gbẹn yan ama ase wẹẹ, “A ya ẹe fi ohan ne Nọyaẹnmwa.”

Ihuan Ne Ọ Sọọ Ihuan Hia 3:11

Wa ne ikhuo e Zaiọn, wa do ghe Solomọn. Ọ mu ẹde ne iyẹe mu ye ọ re uhunmwu rhuẹ, vbe ẹdẹ ne ọ rhie ọha vbe oghọghọ kevbe ọyẹnmwẹ ọghọe.

Levitikọs 8:9

Ọ keghi mu ukugba uhunmwu yọ ọre uhunmwu, ọ keghi vbe mu emwi itegbe igoru ne a gbẹnnẹ emwi yi ya fi ohan ne Nọyaẹnmwa, ye ọre odaro zẹ vbene Nọyaẹnmwa tama rẹn.

Hagai 1:1

Vbe ukpo ne ogieva ne Dariọs ya gha re ọgbaisi e Pẹsia, vbe ikpẹdẹ ne okaro ọghe uki ne ogiehan, e Nọyaẹnmwa keghi giee Hagai ne akhasẹ uhunmwu rre, ọmwa ne a giee uhunmwu na gie kegha re e gọvina ọghe Juda ighe e Zerubabẹl ne ovbi Siatiẹl, kevbe ogiohẹn ighe Jọsua ne ovbi e Jehozadak.

Hagai 1:14

E Nọyaẹnmwa keghi rhie igiẹdu ne emwa nii ne iran ya winna vbe Ọgua Osa, avbe Zerubabẹl ne e gọvina e Juda, e Jọsua ne Ogie Ohẹn, kevbe avbe emwa ni ke iwe rre hia. Iran keghi suẹn gha winna vbe Ọgua Osa ọghe Nọyaẹnmwa ne Oghodua ne Osanobua iran.

Hagai 2:4

Sokpan, banbanna nian, wa ghẹ gie egbe wọ uwa rhọkpa, wa winna iwinna nii rhunmwuda, I rrọọ yaba uwa.

Zẹkaraia 3:1

Vbe umian ọvbehe, e Nọyaẹnmwa keghi mu Ogie Ohẹn ighe Jọsua ma mwẹ, ọ keghi mudia ye odaro odibosa e Nọyaẹnmwa. E Satan keghi vbe mudia ke Jọsua, ọ mu egbe ne ọ ba ẹre ifi ẹzọ.

Zẹkaraia 3:5

Rẹn keghi tama avbe ọkpọmwa rẹn wẹ ne iran ye ukpọn ne ọ huanrẹn gbalọ e Jọsua uhunmwu. Iran keghi ru ẹe vberriọ, iran keghi vbe sirra odibosa e Nọyaẹnmwa nii viọ ukpọn ọgbọn nii yọ e Jọsua.

Zẹkaraia 6:14

Ẹdẹ ni gha rre nẹ a ya gbe ayere vbe Ọgua Osa e Nọyaẹnmwa vbe eni e Heldai, Tobaija, Jedaia, kevbe Josaia.”

Hibru 2:9

Sokpan ma miẹn Jesu! Vbe ovbi ẹghẹ kherhe, a keghi ru ẹe ne ọ ghẹ vba avbe odibo Osa, ne a miẹn ehe na miẹn wẹ, vbe ekpa ẹsọhẹ Osanobua, ne ọ wu ne emwa hia.

Arhie Maan 19:12

Aro ẹre keghi ye vbe ọgẹn erhẹn, ọ keghi viọ erhu ẹde ni bun rhuẹ ye uhunmwu ẹnrẹn. A keghi gbẹn eni ẹnrẹn yan rẹn, ọmwa ọvbehe ne ọ rẹn emwi ne a ya ẹe kha ẹ i rrọọ gberra irẹn tobọ ẹre.

Arhie Maan 6:2

I ghi tọn aro mu, I keghi bẹghe ẹsin nọfua ọkpa. Ọmwa ne ọ hin ẹnrẹn, mu uhanbọ mwẹ, a keghi vbe mu erhu ẹde nẹẹn. Ọ keghi ladian zẹ vbe ọmwa ne ọ khọn miotọ nẹ, ọ ra vbe ya khọnmiotọ.