Zẹkaraia 14:10 - Edo Bible (E Baibol Ẹdo) Version 1996

¹⁰ A gha hẹnhẹn otọe nii hia fẹẹrẹ ke Geba vbe odẹ okuọ ya sẹ Rimọn vbe odẹ ekẹn, e Jerusalẹm ghi gha ghe avbe otọ ni lẹga ẹre adesẹ uhunmwu; ẹvbo ni gha tan vbe otọ ke urho e Bẹnjamin ya sẹ Onurho igọgọ, ehe ne onurho ka gha ye yi, kevbe ke Owa ọkhẹ e Hananẹl ya sẹ okọ ne a na minọ ayọn ọghe ọba.

Zẹkaraia 14:10 ပူးပေါင်းရင်းမြစ်များ

I Ọba 15:22

Ẹre Asa ne ọba na gie ne a tama emwa ni rre Juda hia vbene a i na vbe sẹ ọkpa rae vbọ ne iran ya la okuta ni rre Rama ke ẹe kevbe igẹdu ne Baasia te ya gha gbe ekẹn lẹga ẹre. Asa keghi ya avbe emwi na gbe ekẹn lẹga Mizpa kevbe Geba, ẹvbo ọkpa vbe otọ e Bẹnjamin.

II Ọba 14:13

E Jehoas keghi mu Amazaia oghunmwu, ọ na gha rrie Jerusalẹm, ọ na guọghọ ekẹn ọlẹga ẹvbo nii kevbe Onurho Ifreim ya sẹ Onurho Igọgọ, ehe ne ọ wa sẹ omwa ibata uri vbe utanmwẹ.

I Krọnikol 4:32

Iran yevbe yin ihe isẹn ọvbehe, ena o re: Etam, Ain, Rimọn, Tokiẹm kevbe Asian,

I Krọnikol 6:77

Iran ni ghi dekẹe vbe ẹgbẹe ni rre ẹwae Merari, a keghi viọ avbe ẹvbo na kevbe otọe ne aranmwẹ na rria ni rrọọ ne iran vbe otọe Zebulọn: Rimono kevbe Tabọ.

II Krọnikol 25:23

Obọ e Jehoas keghi vba Amezaia, ọ na mu ẹẹn gha rrie Jerusalẹm. Ọ na dunmwu ekẹn ne a gbe ga ẹvbo nii sẹ otọ ke Onurho Ifreim ya sẹ Onurho Igọgọ, ọ kegha re ọmwa ibata uri eha.

II Krọnikol 26:9

Uzaia keghi dọlegbe dọlọ odin ne a gbe lẹga e Jerusalẹm yi vbe ne ọ na bọ owa ọkhẹ ne gelete ye Urho Igọgọ, Urho ọkpẹn Iya kevbe ehe ne ekẹn ni ke mu uhunmwu da ehe ọvbehe.

Nehimaia 12:39

Ma keghi ke evba ya la Urho Ifreim gberra, Urho e Jesiana, Urho Ehẹn, Owa Ọkhẹ Ne gelete ọghe Hananẹl, kevbe Owa Ọkhẹ Ne gelete ọghe iran ne Iyisẹn ya sẹ Urho Ohuan. Ma keghi do mu ẹẹn ye otọ vbe ọkpẹn Urho Ọgua Osa.

Nehimaia 3:1

Vbene a ya dọlọ ekẹn ne ọ lẹga ẹvbo nii bọ hẹ ọ re ọna khin, Eliasib ne Ogie Ohẹn kevbe ohẹn ne ihua ẹre keghi dọlọ Onurho Ohuan bọ, iran keghi ya ẹe fi ohan iran vbe yi ẹkhu yọ. Iran na ya ekẹn ọnrẹn fi ohan ya sẹ Owa ọkhẹ iran ne iyisẹn kevbe Owa ọkhẹ ọghe Hananẹl.

Aizaia 10:29

Iran fian uwu rra nẹ, iran ra hẹwẹ la asọn ni vbe Geba! Ohan mu emwa ni rre Rama, emwa ni rre Gibea ne ẹvbo e Sọl lẹ kua.

Aizaia 2:2

Vbe ẹdẹ ne ọ dee, uhunmwu oke ne a gha bọ Ọgua Osa yi, ghi gha re uhunmwu oke ne ọ yo sẹẹ ehia ọ ghi gha ghe avbe oke hia uhunmwu. Agbọn ẹvbo nibun gha rre, iran ghi gha bi la rọ.

Jerimaia 20:2

Ọ na wẹ ne iran gbe mwẹ, ne a ye ọgiọrọ rrọ mwẹ vbe ọkpẹn Onurho e Bẹnjamin ne ọ ke Ọdọ vbe Ọgua Osa.

Jerimaia 30:18

E Nọyaẹnmwa khare wẹẹ, “I gha viọ emwa mwẹ werriegbe rri otọ iran I gha vbe mwẹ itohan ghe dọmwadẹ ẹgbẹe, a gha dọlegbe họ Jerusalẹm, a ghi rhie ẹguae ẹre dọlegbe ye ihe.

Jerimaia 37:13

Sokpan, I ghi sẹ Onurho e Bẹnjamin arowa ne ọ gbearoghe avbe ivbiyokuo ni winna vbe evba, ọmwa ne a tie eni ẹnrẹn Irigia ne ovbi Sielemia kevbe eyẹ, Hananaia, keghi mu mwẹ mudia ọ wẹẹ, “Te u lẹ bu ivbi e Babilọn khian.”

Jerimaia 38:7

Vbene ọ rhirhi a gha ye hẹ, Ẹbẹdmẹlẹk ne ovbi e Sudan ọghẹrriẹnoguan ne ọ winna vbe ẹguae, keghi họọn wẹ iran mu mwẹ fi uwu uhae. Vbe ẹghẹ ne a kha na, ọba keghi bu ohiẹn emwi vbe onurho e Bẹnjamin.

Emọs 9:11

E Nọyaẹnmwa khare wẹẹ, “Ẹdẹ dee ne I gha dọlegbe rhie arriọba e Devid ne ọ yevbe itowa nian ye ihe. I gha dọlọ ekẹn ne a gbe lẹga ẹre yi, I ghi dọlegbe rhie ẹre ye ihe. I gha dọlegbe bọ ẹe, I ghi gie ẹe do gha ye vbene ọ ka ye de yi vbe ẹghẹ nii.

Maika 4:1

Ẹdẹ dee ne a gha miẹn wẹ oke nii ne a bọ Ọgua Osa yi ọ re ọ ra yo sẹ ehia fẹẹrẹ, ọ ghi gha ghee ni dekẹe adesẹ uhunmwu. Agbọn ẹvbo nibun gha rre, iran ghi gha vẹ bu ẹre rre.

Zẹkaraia 12:6

“Ọ gha sẹ ẹghẹ nii, I gha ru ẹe ne ẹwae ni rre Juda gha ye vbe erhẹn ne ọ rre otọe ẹgbo ra ni rre ugbo ọka ne ọ wo nẹ, iran gha fuẹn avbe ẹvbo ni lẹga iran an. Ivbi e Jerusalẹm ghi gha rrọ vbe ne ẹkun na sẹ iran otọ vbe ore ẹvbo.

Zẹkaraia 2:4

Ne okaro keghi tama nọkpa wẹẹ, “Rhie ulẹ ya tama ọvbokhan ọkpia ne ọ rhie emwi ne a ya mwa emwi mwẹ obọ nii wẹ emwa kevbe ẹmila gha bun sẹrriọ vbe Jerusalẹm wẹ ọ gha digba gbe ne a gbe ekẹn gaa.

Zẹkaraia 8:3

I gha dọlegbe gha die Jerusalẹm ne ẹvbo mwẹ nọhuanrẹn ne I do yin ẹnrẹn. A gha rẹn ọnrẹn ye ẹvbo ne ọ mudia ẹse, a ghi vbe gha tie oke Nọyaẹnmwa ne Oghodua oke nọhuanrẹn.

Jọsua 15:32

Lebaot, Silhim, Ain kevbe Rimọn, ehia kegha re okpẹvbo ọkpa irrọ vbe ọgban deba avbe ẹvbo ni lẹga iran.

Jọsua 21:17

Ẹvbo ne a vbe viọ vbe ẹwae Bẹnjamin kegha re Gibiọn, Gaba.

Giọgis 20:45

Iran ni dekẹe keghi werriegbe, iran na lẹ la ato, gha rrie okuta nọkhua ọghe Rimọn. Iran kevbe gbele arriaisẹn isẹn vbe odẹ. Ivbi Izrẹl keghi khulo eni dekẹe, iran na gha hele iran ike. Iran na gbele arriaisẹn eva.

Giọgis 20:47

Sokpan, uri eha keghi fi egbe werriẹ, iran na lẹghe uwu ato gha rrie okuta nọkhua ọghe Rimọn, iran na gbe uki enẹ vbe evba.

Giọgis 21:13

Ẹre emwa ni si koko nii hia na gie emwa bu ivbie Bẹnjamin vbe okuta Rimọn, wẹ iran mu ẹmwẹ okuo fua.