Zẹkaraia 13:9 - Edo Bible (E Baibol Ẹdo) Version 1996

⁹ Mẹ gha danmwẹ obọkpa vbe uwu eha ni miẹn uhunmwu vbọ ghe. I ghi vbe kpe iran huan, vbene a kpe esiliva huan vbe erhẹn. I gha danmwẹ iran ghe vbene a danmwẹ igoru ghe. Ẹghẹ nii, iran gha na erhunmwu iran. I gha tama wẹ emwa mwẹ ọ re iran khin, iran ghi vbe miẹn kue wẹ mẹ ọrọre Osanobua iran.”

Zẹkaraia 13:9 ပူးပေါင်းရင်းမြစ်များ

II Samuẹl 7:24

Wẹ ya Izrẹl ne emwa ruẹn khian ọwuẹ nẹ ẹdẹdẹmwẹdẹ, wẹ ne Nọyaẹnmwa keghi vbe khian Osanobua iran.

Job 23:10

Sevba, Osanobua rẹn dọmwadẹ owẹ ni I zẹ vbotọ. Ọ gha danmwẹ mwẹ ghe, ọ gha miẹn wẹ, I i mwẹ iruẹn.

Job 28:1

“A miẹn uvun ne a kẹ zẹlẹ esiliva ladian vbe uwu otọ; a miẹn ehe ne a na ya erhẹn kpe igoru huan.

Psalm 144:15

Afiangbe nọ ne ẹvbo nii ne avbe emwi na na re ẹmwata vbe ekpa ẹre, afiangbe ọrọre ọghe emwa ne Osanobua ẹre re Nọyaẹnmwa.

Psalm 43:4

Ẹghẹ nii, mẹ gha na gha rriẹ Ogiukpo ruẹ Osanobua wẹ ọrọre ẹzi oghọghọ mwẹ. I gha kpe akpata mwẹ I ghi vbe gha so ihuan urhomwẹ ghe ruẹ Osanobua, Osanobua mwẹ.

Psalm 50:15

Ibaro gha rre, kpe tie mwẹ, I gha miẹn ruẹn fan wẹ ghi do gha rho mwẹ.”

Psalm 91:15

Iran gha kpe tie mwẹ, I gha yaba iran vbe iran a gha rre uwu ibaro. I gha miẹn iran fan I gha vbe ye ọghọ ne iran.

Itan 17:3

Erhẹn ọ re a ya danmwẹ igoru kevbe esiliva ghe, sokpan, e Nọyaẹnmwa ọ re ọ ghe ekhọe ọmwa ghe.

Ihuan Ne Ọ Sọọ Ihuan Hia 2:16

Mẹ ọ re ọ yan enida mwẹ rẹn ọ re ọ yan mwẹ ọ koko avbe ohuan rẹn vbe uwu iyokho ẹzẹ.

Aizaia 43:2

U gha la uwu ẹzẹ ne ọ dinmwi khian, I gha mudia kuẹ ọlọghọmwa ruẹn I ra gbuẹ uhunmwu, u gha la uwu erhẹn khian, u i ra giẹn, ibaro nọ khua ne u miẹn, ẹ i ra kuan ruẹn.

Aizaia 48:10

I danmwẹ uwa ghe nẹ vbe erhẹn irrioya zẹ vbene a kpe esiliva vbe uwu erhẹn sokpan, I keghi miẹn wẹ akpa ọmwa i rre uwa egbe hiehiere.

Aizaia 58:9

Wa gha na erhunmwu, I ghi họn. Wa gha tie mwẹ, I ghi khuẹnniẹn. “De ghẹ wa dobọ ne uwa na wọ emwa uhunmwu yi, deba uyinmwẹ ne ọ ghi khọ ọghe otilua, kevbe ẹmwẹ dan hia.

Jerimaia 24:5

“Mẹ ne Nọyaẹnmwa ne Osanobua Izrẹl rorẹe wẹ avbe emwa ne a viọ gha rrie Babilọn te iran yevbe ohọ esiesi na. I gha ya obọ itohan mu iran.

Jerimaia 31:33

Ile ọgbọn ne I ghi ra gu ivbi Izrẹl ta, enian ọ khian gha ye, I gha rhie uhi mwẹ ye uwu iran, I ghi vbe gbẹnnẹ ọẹn ye iran ekhọe. Mẹ ghi gha re Osanobua iran, iran ghi gha re emwa mwẹ.

Jerimaia 32:38

Ẹghẹ nii, iran ghi gha re emwa mwẹ, mẹ ghi vbe gha re Osanobua iran.

Ezikiẹl 11:20

Ẹghẹ nii, iran gha rhie uhi mwẹ mwẹ, iran ghi vbe ya iyi mwẹ hia ru emwi vbe ẹko ata. Iran ghi gha re emwa mwẹ, mẹ ghi vbe gha re Osanobua iran.

Ezikiẹl 14:11

I gha ru ẹe vberriọ ne ivbi Izrẹl ghẹ ghi lẹ sẹ mwẹ rae, ne iran ghẹ ghi ya gha ya orukhọ mu awua ye egbe iran egbe. Te iran ra gha re emwa mwẹ, ne imẹ vbe gha re Osanobua iran.” E Nọyaẹnmwa ne Udazi guaan nẹ.

Ezikiẹl 20:38

I gha viọ iran ni sọtẹ kevbe ni ru orukhọ. I gha viọ iran hin otọe ne iran ye na rre sokpan mẹ i ra gie iran werriegbe gha rrie otọ Izrẹl. Ẹghẹ nii, wa gha na rẹn ighe mẹ ọrọre Nọyaẹnmwa.”

Ezikiẹl 36:28

Ẹghẹ nii wa ghi yin otọe ne I mu ne avbe erha uwa odede. Wa ghi gha re emwa mwẹ, mẹ ghi vbe gha re Osanobua uwa.

Ezikiẹl 37:27

I gha gu iran gha rre evba, mẹ ghi gha re Osanobua iran, iran ghi gha re emwa mwẹ.

Daniẹl 11:35

A gha gbele eso ua vbe uwu iran ne ọkaolotu ni wan nii, sokpan, a gha la ekpa emwi vberriọ khue avbe emwa nii huan. Erriọ ọ re ọ na ra wa gha khian vbe otọ, ọ te do sẹ ufomwẹ, ẹghẹ ne Osanobua mwa mwa yọ.

Daniẹl 12:10

A gha ye emwa nibun khian nihuanrẹn. Iran ne emwa dan i ra rẹn otọ ẹre iran ghi ye gha ru emwi dan khian. Iran ni wan ọkpa ọ re ọ gha rẹn otọ ẹre.

Joẹl 2:32

Sokpan, iran hia ni kpe tie Nọyaẹnmwa, a gha miẹn iran fan. Zẹ vbene Nọyaẹnmwa khare, ‘Eso vbe iran ni rre Jerusalẹm, gha lẹ fe, iran ne imẹ hannọ zẹ gha miẹn uhunmwu.’ ”

Levitikọs 26:12

“Mẹ gha re Osanobua uwa, wa ghi vbe gha re emwa mwẹ.

Zẹkaraia 10:6

“I gha ru ẹe ne ivbi e Juda wegbe; I gha fannọ ivbi Izrẹl vbe irri, I gha tohan iran, I ghi viọ ehia werriegbe rri owa. Iran ghi do yevbe emwa ne I ma he ka he fua ẹdẹ. Mẹ ọrọre Nọyaẹnmwa ne Osanobua iran, I gha họn erhunmwu iran.

Zẹkaraia 12:10

“I gha ye orhiọn itohan kevbe orhiọn erhunmwu vuọn ivbi uniẹn e Devid ni rre Jerusalẹm kevbe ivbi Jerusalẹm ọvbehe. Iran gha ghe ọmwa ne a ya agbada bi gbe ua, iran gha vbe khiẹ ọre vbe ọmwa ne ọ khiẹ ukpọmọkpa ne ọ mwẹ. Iran gha viẹ eve orriara zẹ vbe ọmwa ne ọmọdiọn rẹn nokpia wu.

Zẹkaraia 8:8

I ghi vbe viọ iran ke odẹ ahọ kevbe orrie rre ne iran do gha rre Jerusalẹm. Iran ghi gha re emwa mwẹ mẹ ghi vbe gha re Osanobua iran. I ghi gha khaemwisẹ yan iran vbe ọghọ kevbe ute.

Iwinna 2:21

Ọmwa ne ọ rhirhi da tie eni Nọyaẹnmwa, a gha miẹn rẹn fan.’

Hibru 8:10

Banbanna nian, ile ne U ghi ra gu iran ta ọna khin. Vbe iyeke avbe ẹdẹ nii, erriọ Nọyaẹnmwa khare: I gha rhie uhi mwẹ ye ẹko iran, I ghi vbe gbẹn ọẹn ye iran ekhọe, Mẹ ghi gha re Osanobua iran, Iran ghi gha re emwa mwẹ.

Jems 1:12

Afiangbe nọ ne ọmwa ne ọ ziẹn egbe vbe a gha danmwẹ ọẹn ghe, rhunmwuda a deghẹ ọ ma rrie edanmwẹ, ọ gha miẹn arrọọ rhie zẹ vbe ne Osanobua ve iran ni ho ẹmwẹ ọnrẹn re.

I Pita 4:12

Ọse mwẹ ni ghan, wa ghẹ gie edanmwẹ nọwegbe ne uwa miẹn ẹghẹ na, yan uwa unu uan, zẹ vbe emwi ne a ma he miẹn ẹdẹ.

Arhie Maan 21:7

Ọmwa ne ọ rhirhi khọn miotọ, emwi ne I gha rhie nẹẹn ọre ọ na khin. Mẹ gha re Osanobua ẹre, rẹn ghi vbe gha re ovbi mwẹ.

Arhie Maan 8:10

Ẹre odibosa ne ogieha na kpe okpe ọghọe, orhọnmwẹ ọkpan ne ọ baa vbe ukpekhọe, keghi ke odukhunmwu de rre, ọ na de fi obọ ọkpa vbe a wa avbe ẹzẹ ye ihe eha kevbe avbe uhunmwu ẹzẹ.

Arhie Maan 8:11

(A keghi tie orhọnmwẹ nii Orriara,) obọ ọkpa vbe a wa amẹ ye ihe eha keghi khian ne ọ rriara, emwa ni bun keghi wulo vbe iran wọn amẹ nii rhunmwuda ne ọ na rriara nii.

Arhie Maan 8:12

Odibosa ne ọ ogienẹ keghi kpe ọghọe, a keghi kinmwi obọ ọkpa vbe a wa owẹn ye ihe eha, ke obọkpa vbe ihe eha ọghe uki kevbe ọghe avbe orhọnmwẹ sẹrriọ wẹ, a gha wa vbene iran te ba ye ihe eha, obọkpa keghi lahin rre vbọ, uwanmwẹ ma ghi rre vbe a wa ẹdẹ ye ihe eha, kevbe a wa asọn ye iye eha.

Arhie Maan 8:7

Odibosa ne okaro keghi kpe okpe ọghọe, erhẹn kevbe ẹyin ne a ya esagiẹn gua, keghi rhurhẹ yan otọ agbọn. Obọ ọkpa vbe a gha wa otọ agbọn ye ihe eha, keghi wa giẹn uan. Obọ ọkpa vbe a gha wa avbe erhan ye ihe eha, keghi vbe giẹn uan, ebe irunmwu hia ni rre oha na giẹn uan.

Arhie Maan 8:8

Odibosa ne ogieva keghi vbe fian okpe ọghọe re. Emwi ọkpa ne ọ ye vbe oke ne ọ yo ne ovbe zẹ ogidi erhẹn, iran keghi rrua ẹre fi uwu okun. A keghi wa ya obọ ọkpa vbe a wa okun ye ihe eha khian esagiẹn.

Arhie Maan 8:9

Obọ ọkpa vbe a wa emwi ni rre uwu okun ye ihe eha, keghi wulo, obọ ọkpa vbe a gha wa avbe okọ ni rre uwu okun ye eha na wa rẹnkhẹn uan.