Zẹkaraia 11:17 - Edo Bible (E Baibol Ẹdo) Version 1996

¹⁷ Ọghọe fo nẹ ighẹ ọsuohuan ne ọmwa oya nii. Ọ he oghẹn ohuan rẹn ye otọ nẹ. Okuo ọ re ọ ra fuẹn ẹtin ẹnrẹn uan fẹẹrẹ. Obọ ẹre gha luẹluẹ, aro obọ erha ọmwa rẹn gha rhu.”

Zẹkaraia 11:17 ပူးပေါင်းရင်းမြစ်များ

I Ọba 13:4

Ugbẹn vbe Jeroboam ne ọba ghi họn ẹmwẹ na, ọ keghi niẹn obọ da ẹre, ọ wẹẹ, “Wa mu ẹẹn ighẹ okpia nii!” Vbe ọwarọkpa nii, obọ ọba keghi zeze sẹrriọ wẹ ọ ma ghi sẹtin si ẹe werriegbe.

Aizaia 29:10

E Nọyaẹnmwa ru ẹe nẹ, ne uwa gha vbiẹhunde, te ovbe ghi ra gbele uwa kua na. Avbe akhasẹ ọ re ọ te kei ne ọ gha re aro emwa nii, sokpan, Osanobua rhu iran aro nẹ.

Aizaia 44:10

Ere ọkpa irrọ ne ọmwa ye ematọn ru amazẹ ne ọ gha gho ẹre zẹ vbe ẹbọ!

Aizaia 9:15

Avbe eniwanrẹn ne adazẹ, ọrọre avbe uhunmwu, avbe ẹrhunrhun ni rrọ keghi gha re avbe akhasẹ, ni ma emwa emwi ohoghe.

Jerimaia 22:1

E Nọyaẹnmwa keghi tama mwẹ ne I gha rrie ẹguae ọba e Juda ne ovbi uniẹn e Devid, ne I ya tama ọba vbe evba, deba ekhaẹmwẹ ọnrẹn kevbe ivbi e Jerusalẹm ne iran danmwehọ vbene Nọyaẹnmwa kha hẹ wẹẹ,

Jerimaia 23:1

U umiẹn vbe ibuohiẹn e Nọyaẹnmwa gha wegbe mu iran hẹ ighe iran ni fuẹn emwa rẹn uan, ne iran na vbe zagha iran an!

Jerimaia 23:32

Danmwehọ ẹmwẹ ne imẹ ne Nọyaẹnmwa tae! Ohu avbe akhasẹ ni ta imina iran ne ọ vuọn ne ohoghe mu mwẹ. Iran ghi gha ta avbe imina na, iran ghi gha bibi emwa mwẹ odẹ vbekpa ohoghe kevbe orhuọ ọghe iran. I ma gie iran, I ma wẹ ne iran gha khian, iran i zẹdẹ mwẹ asa ne iran ye ne emwa nii hiehiere. Mẹ ne Nọyaẹnmwa ọ re ọ tae.”

Ezikiẹl 13:3

Vbenian ọre Nọyaẹnmwa ne Udazi khare: “Ọghe avbe akhasẹ ne akpa na fo. Iran ọ tobọ iran fian ọghae ye egbe iran uhunmwu, iran ghi vbe gha zẹ ẹmwẹ akhasẹ iran ta.

Ezikiẹl 34:2

“Ovbi ọmwa, ta ku avbe ọkaolotu Izrẹl. Ta ẹmwẹ akhasẹ ma iran, ne u tama iran vbene imẹ ne Nọyaẹnmwa ne Udazi khama iran hẹ wẹẹ: ‘Wa wiri, wa ne ọsuohuan Izrẹl! Wa gha koko egbe uwa, sokpan, wa ma koko avbe ohuan.

Zẹkaraia 10:2

Emwa ghi ya gha nọ avbe amazẹ kevbe iran ni bọ, sokpan ewanniẹn ne iran miẹn ohoghe ne ọ mwamwa ọ re ehia khin. Eso ghi gha rhan otọ imina, sokpan, te iran bibi uwa odẹ kẹkan. Ọfumwegbe ne iran rhierre i mwẹ esa. Rhunmwuda ọnii, avbe emwa ni ghi gha hẹ yo hẹ rre zẹvbe ohuan ne ọ wiri. Iran rre uwu orueghe rhunmwuda, ọkaolotu i rrọọ.

Zẹkaraia 11:15

Ẹre Nọyaẹnmwa na tama mwẹ wẹẹ, “Vbe dọlegbe mu akpa ọsuohuan yọ, ẹghẹ na, ọ ghi gha re ọghe ọsuohuan ne ọmwa oya.

Matiu 23:13

“U miẹn agbọn ne uwa ye eni ma emwa Uhi kevbe Farisi, ayunukpaegbe! Wa khui urho Arriọba ẹrinmwi ke emwa yi, wa tobọ uwa ma ho ne uwa la owa, emwa ni ho ne iran la owa, wa ma kie ne iran. [

Matiu 23:16

“U miẹn agbọn ne uwa ye arọndẹ ni rhu aro, wa khare wẹẹ, ‘Ọmwa gha ye Ọgua Osa vẹn ihẹn, emwi rhọkpa i rrọ ẹre urhu sokpan deghẹ ọ ye igoru ne ọ rre Ọgua Osa vẹn ihẹn, emwi rre ọre urhu.’

Iyẹn ne ọ Maan Ọghe Jọn 12:40

“Osanobua rhu iran aro nẹ, ọ vbe gbe iran ekhọe ẹwaẹn ruan nẹ, ne aro iran ghẹ miẹn ehe na bẹghe odẹ, ne ọ ghẹ miẹn ehe na la iran ekhọe, ne iran ghẹ ya bu mwẹ rre ne imẹ mu iran egbe rran.”

Iyẹn ne ọ Maan Ọghe Jọn 9:39

Jesu khama rẹn wẹẹ, “Rhunmwuda ibuohiẹn, ọre I na gha die agbọn na. Ne iran ni rhu aro sẹtin gha bẹghe, kevbe ne iran ni bẹghe khian eni rhu aro.”

Ebe ne Pọl gbẹẹn gie emwa Rom 11:7

Vbe a ghi tae hẹ na yi? Obọ ivbi Izrẹl ma vba emwi ne iran te gualọ. Omwa ibozẹghe ne Osanobua hannọ zẹ ọre ọ miẹn ọẹn. Iran nekpa keghi yin ehọ vbe Osanobua tie iran.

I Kọrinti 8:4

Vbe ekpa ọghe wẹ deghẹ ọ kere ne a gha rri emwi ne a ya ru ẹbọ, ma rẹnrẹn wẹ, emwi ne ẹbọ mudia ye ihe ẹre keghi re emwi ne ẹ i zẹdẹ rrọọ hiehiere. Ma rẹnrẹn wẹ, Osanobua ọkpa kẹkan ọre ọ rrọọ.

I Samuẹl 2:31

Yẹrẹro nian, ẹghẹ dee ne I gha na gbele avbe igbama ni rre ẹgbẹe ruẹ kevbe ẹwae ruẹ rua sẹrriọ wẹ, a i ghi ra miẹn ọmwa ọkpa ne ọ gha ke ẹe vbe ẹgbẹe ruẹ ne ọ do khian ọmaẹn.