Zẹfanaia 2:7 - Edo Bible (E Baibol Ẹdo) Version 1996

⁷ Iran ni ghi miẹn uhunmwu vbe ivbi e Juda ọ re ọ ra mu otọe uwa gha ye, evba iran ra na gha koko emwirri iran, iran ghi vbe gha vbiẹ owa ni rre Askẹlọn. E Nọyaẹnmwa ne Osanobua iran gha yaba iran, agbọn gha vbe dọlegbe maa iran.

Zẹfanaia 2:7 ပူးပေါင်းရင်းမြစ်များ

Gẹnẹsis 50:24

Rẹn keghi tama etiọnrẹn wẹẹ, “Te i ghi ra wu na, sokpan Osanobua gha gbearoghe uwa vbe ne a i na gbe awẹawẹ, ọ ghi viọ uwa ke otọe na ladian gha rrie otọe nii ne ọ ve iran ẹre ighẹ Ebraham, Aizik kevbe Jekọb.”

Psalm 80:14

Werriegbe bu ima rre Osanobua Ne Oghodua ke ẹrinmwi gbearoghe otọ ghe mwa, larre, do miẹn emwa ruẹn fan.

Psalm 85:1

E Nọyaẹnmwa, u mobọ tohan emwa ruẹn, u gie agbọn dọlegbe ma Izrẹl.

Ẹksọdọs 4:31

Iran keghi yayi, ugbẹn vbe iran ghi họn wẹ Nọyaẹnmwa bu iran gha dee, ighẹ ọ vbe miẹn vbe iran sẹ iran usẹ hẹ, iran keghi ya uhunmwu rhanmwẹ otọ, iran na ga Osanobua.

Aizaia 11:11

Ọ gha sẹ ẹdẹ nẹdẹrriọ, e Nọyaẹnmwa gha dọlegbe lo ẹtin ẹnrẹn, ọ ghi viọ iran gha die owa ighẹ avbe emwa rẹn ni ghi dekẹe vbe Asiria kevbe Igipt, vbe otọe Patros, e Sudan, Ẹlam, e Babilọn kevbe Hamat, deba ni rre avbe eghute kevbe avbe otọe ne amẹ lẹga vbe okun.

Aizaia 11:14

Iran gha koko dekun e Filistia ni rre odẹ ọlarrie owẹn, iran ghi vbe fu iran ni rre odẹ ahọ emwi viọ. Iran gha khọn ivbi Idọm kevbe Moab, ivbi Amọn ghi gha họn ẹmwẹ ne iran.

Aizaia 11:16

Odẹ nọ vbẹe ọkpa gha la Asiria ladian ne avbe ivbi Izrẹl ni miẹn uhunmwu vbe evba, zẹẹ vbene ọ vbe gha rrọọ ne avbe erha iran odede vbe iran kpao vbe Igipt rre.

Aizaia 14:1

E Nọyaẹnmwa gha dọlegbe tohan Izrẹl ne emwa rẹn, ọ ghi hannọ iran zẹ ya ru ọghọe. Ọ gha gie iran dọlegbe gha rre otọ ẹvbo iran, avbe orhunmwuyẹn ghi deba iran gha rre evba.

Aizaia 32:14

Te a ra lẹ hin uwu avbe ẹguae rre, avbe igiogbẹ hia gha khian ne emwa na lẹkua fẹẹrẹ. Avbe owa kevbe avbe owa ọkhẹ ne a bọlọe ne a na khẹ iran, gha khian itowa ẹdẹdẹmwẹdẹ. Avbe ede ọ re ọ ghi gha gbe ọgọlọbọ vbọ, avbe ohuan ghi ya gha rria vbe evba.

Jerimaia 23:3

I gha si avbe emwa mwẹ ni dekẹe koko ke ẹvbo ne I zagha iran kui gha dee, I ghi viọ iran werriegbe gha die otọ iran. Iran gha biẹlẹ emọ nibun, iran ghi bun yọ vbe inu.

Jerimaia 29:10

“E Nọyaẹnmwa khare wẹẹ, ‘Ukpo ekigbesiyenẹ ọghe Babilọn ghẹ ghi gba nẹ, I gha do zẹ ye ẹmwẹ uwa, I gha mu eyan mwẹ sẹ wẹ I gha viọ uwa dọlegbe gha die owa.

Jerimaia 29:14

Ẹn, erriọ I tae wẹ wa gha gualọ mwẹ miẹn. Mẹ ghi viọ uwa ya ye ihe vbe otọe uwa. I gha si uwa koko ke dọmwadẹ ẹvbo, kevbe dọmwadẹ ehe ne I zagha uwa gha rrie, I ghi viọ uwa gha die otọe nii ne I ke viọ uwa kpao gha rrie iwe. Mẹ ne Nọyaẹnmwa tae nẹ.’

Jerimaia 3:18

Izrẹl gha deba e Juda, iran ghi gba ke iwe gha dee, ke ẹvbo ne ọ rre odẹ okuọ nii gha dee, iran ghi gha die ẹvbo ne I mu ne avbe erha uwa odede ne ọ gha re ọghe iran ẹdẹdẹmwẹdẹ.”

Jerimaia 30:3

Rhunmwuda ẹghẹ dee ne I gha na viọ emwa mwẹ ighe Izrẹl kevbe Juda. I ghi viọ iran dọlegbe gha di otọe nii ne I mu ne avbe erhan iran odede, iran ghi dọlegbe do yan ẹnrẹn. Mẹ ne Nọyaẹnmwa ọre ọ taa ẹe.”

Jerimaia 31:7

E Nọyaẹnmwa khare wẹẹ, “Wa ya oghọghọ so ihuan ne Izrẹl ne ọ kpọlọ sẹẹ vbe uwu avbe ẹvbo hia, wa so ihuan Urhomwẹ ọwua, ‘E Nọyaẹnmwa miẹn emwa rẹn fan nẹ, ọ fannọ iran ni ghi dekẹe werriegbe.’

Jerimaia 32:44

Emwa gha dẹlẹ ọe, a ghi vbe gbẹnnẹ ebe, a ghi gha rhie obọ yọ, a ghi vbe gha ru osẹe yọ. Ena hia gha sunu vbe otọe e Bẹnjamin, vbe avbe igue ni lẹga e Jerusalẹm, avbe okpẹvbo e Juda, avbe okpẹvbo ni rre avbe ẹvbo uhunmwu oke, ni rre odẹ ototọ oke, kevbe odẹ ekẹn e Juda. I gha dọlegbe viọ avbe emwa na gha rrie ẹvbo iran. Mẹ ne Nọyaẹnmwa tae nẹ.”

Jerimaia 33:12

E Nọyaẹnmwa ne Oghodua khare wẹẹ, “Vbe otọe na ne ọ yevbe ato, ehe ne emwa nagbọn ra aranmwẹ i ye na, a gha dọlegbe miẹn ehe ne avbe aranmwẹ na rria vbọ, ehe ne avbe ọsuohuan gha sẹtin viọ ohuan iran gha yo.

Jerimaia 33:7

I gha ya Juda kevbe Izrẹl khian ne agbọn marẹn ẹsẹse, I ghi dọlọ iran bọ ne iran do gha ye vbene iran ka gha ye ẹghẹ ne ọ gberra.

Jerimaia 47:5

Ivbi e Gaza miẹn akhiẹ nọkhua, ọgbunu gbe ivbi Askẹlọn unu an vbe Filistia ra khiẹ kpee sẹ hẹ vbe otọ yi?

Ezikiẹl 39:25

E Nọyaẹnmwa ne Udazi khare wẹẹ, “Sokpan, banbanna nian, I gha tohan ivbi uniẹn e Jekọb ighe ivbi Izrẹl, I ghi gie agbọn dọlegbe maa iran, I gha da uyi eni mwẹ nọhuanrẹn yi.

Hozia 6:11

“Zẹ vbe ọghe uwa ne ivbi Izrẹl, I rhie ẹghẹ yotọ nẹ ne I gha ya rri uwa oya ye emwi ne uwa ru na.

Obedaia 1:19

Emwa ni ke odẹ ekẹn e Juda rre gha mu Idọm, iran ni ke ototọ oke odẹ orrie rre gha mu e Filistia, ivbi Izrẹl gha yan iwewe Ifreim kevbe Sameria; ivbi e Bẹnjamin gha mu e Giliad.

Maika 2:12

“Sokpan, mẹ gha si uwa koko, wa ne ivbi Izrẹl ni ghi kẹe. I gha viọ uwa kugbe zẹ vbe ohuan ne ọsuohuan viọ di owa ohuan. Zẹ vbe otọe ne aranmwẹ na rri irunmwu, ne ọ vuọn ne ohuan, emwa gha dọlegbe vuọn otọe uwa.”

Maika 4:10

Wa gha mannọ egbe ne uwa gha rriakọn, zẹ vbe okhuo ne ọ ra biẹ, wa ne ivbi e Jerusalẹm, rhunmwuda, te uwa ghẹ ghi kpao hin adesẹ ore rre, ne uwa ya di oha ya. Te uwa ghẹ ghi yo e Babilọn nian, sokpan, evba nii ọ re Nọyaẹnmwa ra na ya fannọ uwa ye otọ vbe ohọ eghian uwa.

Maika 4:7

A kun iran use, iran vbe khian rrei vbe owa, sokpan, I gha ya iran ni ghi ke ẹe mu omuhẹn ọvbehe, iran gha vbe do khian okpẹvbo nọkhua. Mẹ ghi gha ke oke Zaiọn khaemwisẹ yan iran ke ẹghẹ nii kpao kevbe rhinrin ẹdẹdẹmwẹdẹ.”

Zẹfanaia 2:9

Omwa vbene a na miẹn wẹ mẹ ọrọre Osanobua ne ọ rrọọ ọghe Izrẹl, I vẹn ihen nẹ wẹ te a ra fuẹn Moab kevbe Amọn zẹ vbe Sọdom kevbe Gomorra. Iran gha khian otọ uye umwẹ kevbe itowa ẹdẹdẹmwẹdẹ ne ekie hinrin. Iran ni ghi miẹn uhunmwu vbe emwa mwẹ gha hẹ rhu iran, iran ghi mu otọ iran.”

Zẹfanaia 3:13

Ivbi Izrẹl ni miẹn uhunmwu vbọ i fu ọmwa, iran i ra tọlọ ọmwa, iran i ra ta ohoghe ra ne iran mu ọmwa rẹrẹ. Agbọn gha ma iran, ẹkun gha vbe sẹ iran otọ vbene iran i na mu ohan ọmwa ikọmwa.”

Zẹfanaia 3:20

Ẹghẹ dee! I gha viọ emwa ruẹn ni zagha kua rri owa, I gha ya uwa hin usi la otọ agbọn hia. I ghi gie agbọn dọlegbe maa uwa.” Erriọ e Nọyaẹnmwa khare.

Hagai 1:12

Ẹre Zerubabẹl kevbe Jọsua kevbe avbe emwa hia ni ke iwe vbe Babilọn rre, na ru zẹ vbene Nọyaẹnmwa ne Osanobua iran tama iran. Ohan mu iran, iran keghi gha họn ẹmwẹ ne Hagai ne akhasẹ ne odibo e Nọyaẹnmwa.

Hagai 2:2

Ọ tama Hagai wẹ ne ọ tama e Zerubabẹl ne gọvina ọghe Juda, kevbe Jọsua ne Ogie Ohẹn kevbe avbe emwa nii wẹẹ,

Iyẹn ne ọ Maan Ọghe Luk 1:68

“Wa gie a rho Nọyaẹnmwa Osanobua ọghe Izrẹl. Rhunmwuda ọ do ye emwa rẹn obọ, ọ keghi fan iran vbe irri.

Iyẹn ne ọ Maan Ọghe Luk 7:16

Ohan keghi mu emwa hia, iran keghi rhie uyi ne Osanobua wẹẹ, “Akhasẹ nọkhua zọ ladian vbe uwu ima,” kevbe wẹ, “Osanobua rre do miẹn emwa rẹn fan!”

Iwinna 8:26

Odibo Nọyaẹnmwa ọkpa keghi tama Filip wẹẹ, “Mu egbe ne u la odẹ ne ọ laghe odẹ okuọ, odẹ ne ọ ke Jerusalẹm rrie Gaza.” (Uwu ato ọre odẹ na la gberra.)

Iwinna 8:40

Filip ghi ghe Asdọd rẹn ghi ye, ọ keghi wa la ẹvbo ni rre eni hia gba, ọ na gha kpe orhu Iyẹn Ne ọ maa ọ te ya sẹ Sisaria.

Ebe ne Pọl gbẹẹn gie emwa Rom 11:5

Erriọ ọre ọ wa vbe ye vbe ẹghẹ na zẹẹ, ọmwa ibozẹghẹ ye rrọọ vbe uwu iran ne Osanobua ye itohan rẹn hannọ zẹ.

Ebe Rut 1:6

E Naomi keghi họn wẹ e Nọyaẹnmwa ye emwa rẹn obọ, vbene ọ na gie emwiokọ maa ne iran ẹsẹse. Rẹn keghi do mu egbe ne ọ kpao vbe Moab rre ke irẹn kevbe avbe amwẹ ivbi ẹre.