Zẹfanaia 2:11 - Edo Bible (E Baibol Ẹdo) Version 1996

¹¹ E Nọyaẹnmwa gha runran iran. Ọ gha ye avbe ẹbọ ni rre agbọn khian kẹkan fẹẹrẹ, ẹghẹ nii, avbe uhunmwu ẹvbo ghi do gha ga ẹe, dọmwadẹ ọghọe vbe ẹvbo ẹre.

Zẹfanaia 2:11 ပူးပေါင်းရင်းမြစ်များ

Gẹnẹsis 10:5

Iran ọre erha odede ọghe iran ni yin eghute kevbe otọ ne amẹ lẹga vbe okun. Iran na ọrọre uniẹn Jafẹt ni vbe rre dọmwadẹ ogbẹ iran kevbe ẹvbo iran, ne dọmwadẹ ọghọe na vbe zẹ ẹvbo iran.

Psalm 138:4

Te avbe ọba ni rre agbọn na hia ra gha rho ruẹ, Nọyaẹnmwa, rhunmwuda, iran họn ẹmwẹ eyan ruẹn nẹ.

Psalm 72:17

Ai ghẹ mianmian eni ọba ẹdẹ te otiti ẹre gha tọ zẹvbe owẹn, te agbọn ẹvbo hia gha tian rẹn, te iran gha wẹ ne Osanobua fiangbe iran ne iran vbe gha gualọ ọyẹnmwẹ ne ọba.

Psalm 86:9

Uhunmwu ẹvbo ne uwẹ he yi hia, gha rre do ya uhunmwu rhanmwẹ otọ nuẹn iran gha rho ukpọlọmwẹ ruẹn.

Aizaia 2:20

Ọ gha sẹ ẹdẹ nẹdẹrriọ, iran gha filo amazẹ igoru kevbe esiliva ne iran mannọẹn kua, iran gha sẹ ehia rae ne ofẹn oha kevbe avbe ẹguẹn.

Aizaia 42:10

Wa so ihuan ọgbọn ghe Nọyaẹnmwa wa so ihuan urhomwẹ ọnrẹn, wa ne otọ agbọn hia. Wa rho ẹre, wa ni gua khian vbe okun wa rho ẹre, wa ne emwi ni rre amẹ, wa so ihuan, wa ne otọe urria kevbe emwa ni rrọọ hia.

Aizaia 42:4

Egbe i ra wọ ẹre ra ne ẹtin fo ẹe ọ gha gbọ ẹmwata ye otọ agbọn. Avbe ẹvbo ni rre urria rhie aro ye odẹ gha khẹ iruẹemwi ẹnrẹn.”

Aizaia 49:1

Wa danmwehọ mwẹ, wa ne uhunmwu ẹvbo ni rre urria, wa ne emwa ni khian rrei! Te I he rre ẹko iyemwẹ vbe Nọyaẹnmwa hannọ mwẹ zẹ, ọ keghi vbe zẹ mwẹ ne I gha re ọguọmwadia ẹre.

Jerimaia 10:11

(Ọ kere ne uwa tama iran wẹ avbe ẹbọ ni i re ni yii otọ vbe ukhunmwu, a gha guọghọ iran an. Iran i ghi khian gha rrọ vbe ehe rhọkpa vbe agbọn na.)

Jerimaia 46:25

E Nọyaẹnmwa ne Oghodua, ne Osanobua Izrẹl wẹẹ, “I gha rria Amọn ikhi, ẹbọ ne Tẹbes gho, ke ẹe kevbe Igipt, deba avbe ẹbọ ẹre kevbe avbe ọba ẹre. I ra mu ọba Igipt kevbe iran ni mu ẹtin ya rẹn.

Daniẹl 11:18

Vbe iyeke ọnii, ọ gha mu okuo gie avbe ẹvbo ni rre ọkpẹn okun, ọ ghi khọn nibun vbọ miẹn iran otọ. Sokpan, ọkaolotu ne ọ re ọrriọvbe gha khọn miẹn irẹn otọ, ọ ghi dobọ uhiomwẹ ọnrẹn yi vbe ẹmwata, ọ gha gbe uhiomwẹ ọba e Siria ye ọre egbe.

Hozia 2:17

Mẹ i ghi ra gie ẹe dọlegbe ye so unu ye eni e Baal ọvbehe.

Joẹl 2:11

E Nọyaẹnmwa ghi davan gie ivbiyokuo ẹre uhunmwu, otu iyokuo ni ru vbene ọ khare, wa bun ẹsẹse, iran vbe wegbe. U miẹn vbe ẹdẹ e Nọyaẹnmwa mu ohan hẹ. De ọmwa ne ọ gha miẹn uhunmwu vbọ?

Zẹfanaia 1:4

“I gha rri emwa ni rre Jerusalẹm oya deba ivbi e Juda hia, I gha fuẹn ọnrẹn uan ighe iyama ọghe Baal ne iran gho vbe evba, a i ghi vbe miẹn ọmwa ne ọ gha ye avbe ohẹn ẹbọ ni gho ẹre rre ọvbehe.

Zẹfanaia 3:9

“Ẹghẹ nii, I gha fi avbe emwa ni rre uhunmwu ẹvbo werriẹ, iran ghi do gha na erhunmwu ghe imẹ ọkpa, vbene iran i ghi na na ghe ẹbọ ọvbehe. Iran hia gha vbe gha họn ẹmwẹ mẹ.

Zẹkaraia 13:2

Vbe ẹghẹ ne a kha na, I gha viọ eni avbe ẹbọ hin otọe na rre, a i ghi miẹn ọmwa ne ọ gha ye iran rre ọvbehe. I gha rhie ẹre fua ighe ọmwaikọmwa ne ọ rhirhi kha ighe akhasẹ rẹn khin, I gha vbe gbe ukhu ẹre ua ighe ne a na ho ne a gha gho ẹbọ.

Zẹkaraia 2:11

Ọ gha sẹ ẹghẹ nii, uhunmwu ẹvbo nibun gha bu e Nọyaẹnmwa rre iran ghi khian emwa rẹn. Rẹn gha yin ehe ne uwa ye, wa gha vbe rẹn wẹ rẹn ọ re ọ gie mwẹ bu uwa gha dee.

Zẹkaraia 8:20

E Nọyaẹnmwa ne Oghodua khare wẹẹ, “Ẹghẹ dee ne emwa nibun gha na ke ẹvbo nibun gha die Jerusalẹm.

Zẹkaraia 8:23

Ọ gha sẹ ẹghẹ ne a kha na, erhunmwuyẹn igbe gha bu ovbi e Ju ọkpa rre, iran ghi tama rẹn wẹẹ, ‘Ma ho ne ima vbe ghae vbe uhunmwu ne ọ maa ọghe uwa rhunmwuda ma họẹn ighe Osanobua rrọọ yaba uwa.’ ”

Malakai 1:11

Ke ehe ne agbọn sẹe vbe obọ na ya sẹ ehe ne ọ sẹe vbe obọ nọkpa, te emwa hia ya ọghọ mẹ. Ehe hia iran na giẹn eturari mẹ, iran ghi vbe gha zọ ese ne ọ gia rhan obọ miẹn. Te iran hia wa rhie ọghọ mẹ.

Malakai 1:14

Emwi ọ gha rruan ne ọ mu ọmwa ru, ne ọ ye aranmwẹ nọ ma maa zọ ese ghe mwẹ, vbe aranmwẹ esiesi ne ọ yan rẹn wẹ rẹn gha mu gunmwẹ rre uwu oghẹn ọnrẹn! Rhunmwuda, ọba nọkhua ọre imẹ, khin, te emwa ni rre uhunmwu ẹvbo hia mu ohan mwẹ.”

Diuteronomi 32:38

Wa ya ẹvbi emwi izọ ese rua ghọe iran, wa na vbe mu ayọn ne iran da, wa we ne iran do ye uwa obọ nian, gie iran do rhulẹ miẹn uwa fan.

I Timoti 2:8

I ho ne ikpia hia gha na erhunmwu vbe ehe hia, emwa ni ye egbe yan Osanobua, emwa ni gha sẹtin viọ obọ iran da odukhunmwu vbe ne a i na mu ohu kevbe ne a i na muan ẹmwẹ.

Arhie Maan 11:15

Odibosa ne ogihinrọn keghi fian okpe ọghọe re, a keghi họn urhu ni vannọ vbe ẹrinmwi kha wẹẹ, “Ẹtin ne a ya khaemwisẹ yan agbọn na, Nọyaẹnmwa kevbe Mẹzaia ẹre, ọre ọ ghi yan rẹn nian, ọ gha vbe gha khaemwisẹ ẹdẹ kevbe ẹdẹdẹmwẹdẹ.”