Taitọs 3:2 - Edo Bible (E Baibol Ẹdo) Version 1996

² Tama iran ne iran ghẹ ta ọmwaikọmwa ọtakhọ, sokpan ne iran gha re ne ọ ho ẹmwẹ ọfumwegbe, kevbe ne ọ gu emwa hia ru ọse, kevbe ne iran gha gu emwa hia yin uyinmwẹ ọmẹhẹ.

Taitọs 3:2 ပူးပေါင်းရင်းမြစ်များ

II Samuẹl 22:36

Nọyaẹnmwa, wẹ ọ re ọ rhie mwẹ lẹre, miẹn mwẹ fan. Iyobọ ruẹ ọ re ọ ya mwẹ khian enọkpọlọ.

Psalm 140:11

Ẹ i ghẹ dunna ne iran ni mu ẹmwẹ kuan ẹrrẹe, emwi dan ọ re ọ gha dekun emwa ọkhọ, ne ọ fuẹn iran an.

Itan 19:19

Adeghẹ egbe balọ ọmwa, wa giee ye egbe miẹn emwi ne a lae miẹn. U gha fan ẹn hin ọlọghọmwa rre uhukpa, u gha yevbe dọlegbe ru ẹe.

Itan 25:24

A wa ya di okpo ya ọ re ọ fu egbe sẹ ne a gu okhuo ne ọ vian gha rre owa.

Aizaia 40:11

Ọ gha gbearoghe avbe ohuan rẹn zẹvbe ne ọsuohuan ru. Ọ gha si avbe oteghe ohuan koko, ọ ghi munọ iran ye ekuaobọ ẹre ọ ghi su avbe iye iran hẹnnẹhẹnnẹ.

Matiu 11:29

Wa rhie urọnghọn mwẹ ye urhu uwa, wa do ruẹ emwi vbe ehe ne I ye rhunmwuda, ọmwa ne ọ fu kevbe ne ọ mu egberriotọ ọre imẹ khin, wa gha miotọ na hẹwẹ.

Iwinna 23:5

Pọl wanniẹn wẹ, “Etẹn, I ma rẹn ighẹ Ogie Ohẹn nọ. Rhunmwuda Ebe tae nẹ wẹ, ‘Ohan igie uwẹ ye unu sakan ọmwa ne ọ khaemwisẹ yan emwa ruẹn.’ ”

I Kọrinti 6:10

Iran ni rhaa, iran ni zuan, iran ni da ayọn gbe egbe, iran ni ta ẹrrẹe ọtakhọ, ra iran ni gbe olighi, ne Arriọba Osanobua gha sẹ ọre obọ, ẹ i rrọọ.

I Kọrinti 9:19

Egbe mwẹ ọre I gue, I i re ọviẹn ọmwarhọkpa. Sokpan I ya egbe mwẹ khian ọviẹn agbọn hia ne I miẹn ehe na silo inu ne obọ mwẹ vbare hia ba egbe.

II Kọrinti 10:1

Mẹ ne Pọl wa tobọ mwẹ rinmwian uwa, mẹ ne a wẹ re I gha gu ọmwa mudia, I ghi gha re ọmẹhẹ, sokpan I gha kpao vbe ehe ne uwa ye rre nẹ, I ghi gha khọ mu uwa, I ye ufumwẹ kevbe itohan Kristi rinmwian uwa.

II Kọrinti 12:20

Afianma fian mwẹ wẹ, I gha sẹ evba, ẹ i re vbene I ho ne uwa gha ye I ra na do vba uwa, wa tobọ uwa ghi vbe miẹn wẹ, ẹ i re emwi ne uwa te ho ne imẹ gha khin ọre I khin. Afianma fian mwẹ wẹ, I gha do vba ẹzọ, oya ọmwa da ọmwa, ọkpankpan, arẹn ne egbe mwa ọkpa, ọtakhọ, kevbe ewẹwẹwẹ, uhiomwẹ kevbe otighi.

Galatia 5:22

Sokpan Orhiọn Ne Ọ Huanrẹn ọre ọ biẹ avbe aho ẹmwẹ ọmwa, oghogho, ọfumwegbe, iziengbe, itohan, ekhọe esi, amuẹntinyan,

Galatia 6:1

Etẹn, a deghẹ a mu orhunmwu ọkpa mu orukhọ, wa ni re ọghe orhiọn vbọ, wa ghi dia ẹre ye odẹ, sokpan wa ghi ru ẹre ọghe ọghọ vbe ute. Wa tobọ uwa ghi vbe gha ba egbe, ne a ghẹ vbe danmwẹ uwa ghẹ.

Galatia 6:10

Rhunmwuda ọnii, ẹghẹikẹghẹ ne a ya miẹn otọ, wa gie a gha ru emwa hia ẹse, sokpan sẹe hia sẹẹ hia, iran ne ima gba re ọkpa vbe ẹgbẹe iyayi.

Ẹfisọs 4:2

Wa gha mu egbe rriotọ, wa vbe fu, ne uwa vbe gha mwẹ i ziengbe vbe ẹghẹ hia. Wa gha rhie maa ighẹ wa ho ẹmwẹ egbe, vbe ekpa ne a na ru iyobọ ne egbe.

Ẹfisọs 4:31

Wa gbe ukhu ẹre ua ighẹ ẹkorriaramwẹ, owowo, kevbe ohu, wa ghẹ ghi vannọ okan, ra ne a gha tie ihẹn, wa gie ẹkokhọmwẹ fo, ke ẹe kevbe emwi ni ye rriọ hia.

Filipai 4:5

Gha yin uyinmwẹ ọmẹhẹ da emwa hia, Nọyaẹnmwa dee ẹgiẹgiẹ.

I Tẹsalonaika 2:7

A gha rhe miẹn wẹ, zẹ vbe ukọ Kristi, ọ te khẹ ke mwa ne a ya nọ emwi vbe obọ uwa.

I Timoti 3:11

Amwẹ iran ghi vbe gha re emwa ni mwẹ uyinmwẹ esi, i ghẹ ẹ i re ne ọ na iyẹn ẹrrẹ, iran ghi gha re ne aro hianrẹn, kevbe ne ọ mudia ye odẹ ẹmwata vbe emwi hia.

I Timoti 3:3

Ọ ma kei ne ọ gha re ọdayọn ra ne ọ fian ọkpannike, sokpan, ọ ghi gha re ọmẹhẹ kevbe ne ẹ i ho ẹmwẹ, ọ ma ke ne ọ gha ho ẹmwẹ igho.

Jems 3:17

Sokpan ẹwaẹn ne ọ ke odukhunmwu rre, keghi re vbe okaro, ne ọ huanrẹn, ọ keghi vbe re ne ọ fu ọmwa egbe rre, ne rọkhọ kevbe ọghe ọse, ọ vuọn ne itohan, ọ keghi vbe viọ emwiorhọ iwinna esi ladian, ẹ i mwẹ ẹko ne ọkhọ ọmwa ra ẹkẹ vbe iwẹnwẹn.

Jems 4:11

Wa ghẹ gha zan egbe etẹn mwẹ, ọmwaikọmwa ne ọ zan ọtiọnrẹn ra ne ọ bu ohiẹn ọnrẹn, ọ zan nene Uhi, ọ keghi vbe gha hu ohiẹn ọnrẹn. A deghẹ wẹ bu ohiẹn nene Uhi, ẹghẹ nii, wẹ i ghi re ne ọ bu vbene nene Uhi kha re, sokpan ne ọ bu ohiẹn ọnrẹn.

I Pita 2:1

Rhunmwuda ọnii nian, wa gie a wabọ emwi dan hin ehe ne uwa ye rre, ohoghe ne a ta fo, kevbe ẹkẹ vbe iwẹnwẹn kevbe oya ọmwa da ọmwa, kevbe ẹmwẹ obi unu.

I Pita 3:10

Zẹ vbene ebe kha re, “Ọmwa ne ọ ho ne irẹn rri orhiẹnrhiẹn agbọn, ne irẹn vbe tọọ, we ne ọ ghẹ ghi ta ẹmwẹ dan, ne ọ ghẹ vbe ta ohoghe.

I Pita 3:8

Ne I ya fian ẹre ifi: wa gie vbene uwa ziro kevbe vbene emwi ye vbe ekhọe uwa, gha ya kugbe. Wa gha ho ẹmwẹ egbe, zẹ vbe etentẹn ne ikpia. Wa gha mwẹ itohan ghe egbe, ne uwa vbe gha mu egbe rri otọ ne egbe.

I Pita 4:4

Wanwanna nian, te ọ ghi yan iran ni ga ẹbọ unu uan ighẹ wa i ghi gu iran mwẹ obọ vbe uyinmwẹ akuọkan kevbe epiankhanrhan nii, iran ghi gha ye ukpẹ sakan uwa.

II Pita 2:10

Ibiba avbe emwa ni lele orriarria emwi ohọhọ egbe iran, iran na vbe yagha ẹtin Osanobua. Avbe emamwaemwi ohoghe na keghi re emwa itengbemu, ni vbe ze vbe udu. Iran i ya ọghọ ne emwi ni rrọ ni mwẹ uyi, ni rre odukhunmwu, sokpan, iran ghi gha ya ukpẹ sakan iran.

Ebe ne Jud gbẹẹn 1:10

Sokpan, iran na ghi gha ya unu salọ emwi ne iran ma rẹn otọ ẹre, avbe emwi nii ne egbe ma iran ẹre, zẹ vbe aranmwẹ oha, ọrọre emwi ne ọ vbe fuẹn iran uan.

Ebe ne Jud gbẹẹn 1:8

Erriọ ọ vbe ye, avbe emwa na miẹn umian, ne ọ ya iran ru orukhọ ghe egbe iran, iran ghi zan asẹ Osanobua, iran ghi gha ya ukpẹ sakan emwi ni mwẹ uyi ni rre odukhunmwu.