Ebe ne Pọl gbẹẹn gie emwa Rom 14:9 - Edo Bible (E Baibol Ẹdo) Version 1996

⁹ Rhunmwuda Nọyaẹnmwa Jesu wu, ọ keghi vbe rhiọkpaegbe, ne ọ miẹn ehe na gha re nọyan iran ni wu kevbe ni rrọọ.

Ebe ne Pọl gbẹẹn gie emwa Rom 14:9 ပူးပေါင်းရင်းမြစ်များ

Matiu 28:18

Jesu tama iran wẹẹ, “A rhie ẹtin hia ni rre ẹrinmwi kevbe agbọn mẹ nẹ.

Iyẹn ne ọ Maan Ọghe Luk 24:26

Ọ ma te kei ra ne Mẹzaia rrioya emwi na hia ne ọ vbe la uwu uyi ẹre?”

Iyẹn ne ọ Maan Ọghe Jọn 12:24

Ẹmwata I tama uwa, ikpe ọka ọkpa ma gberra ikpẹ ọka ọkpa a deghẹ i re te ọ de fi otọ ne ọ wu, a deghẹ ọ wu, ẹghẹ nii ọ ghi mọ ọmọ ni bun ẹsẹse.

Iwinna 10:36

Wa rẹn uhunmwu ne ọ gie gie emwa Izrẹl ne ọ na gha wewe Iyẹn Ne ọ maa ọghe ọfumwegbe la ekpa Jesu Kristi ne ọre Nọyan emwa hia.

Iwinna 10:42

Rẹn keghi yi iyi ne ima ne a ya kpe orhu Iyẹn Ne ọ maa ma emwa hia, ne a vbe sẹ osẹe ọre wẹ rẹn ọrọre ọmwa ne Osanobua zẹe ne ọ gha re ne ọbuohiẹn emwa ni rre agbọn kevbe ni wulo nẹ.

Ebe ne Pọl gbẹẹn gie emwa Rom 10:9

Deghẹ wẹ ye akhuarhamwunu ruẹn tae wẹẹ, “Nọyaẹnmwa ọre Jesu khin,” U na vbe yayi vbe ekhọe ruẹ wẹ, Osanobua huẹn ọnrẹn hin idin rre, U gha re ne amiẹnfan.

II Kọrinti 5:14

Rhunmwuda, aho ẹmwẹ ọmwa ne Kristi mwẹ ghe mwa, ọre ọ da kha yan mwa, ugbẹn vbe ima ghi do rẹn nẹ nian wẹ, orhiọnkpa wu ne emwa hia, ne ọ rhie maa wẹ, emwa hia mwẹ oghae vbe uwu ẹre.

I Tẹsalonaika 4:14

Ma yayi wẹ Jesu wu, ọ keghi vbe dọlegbe rhiọkpaegbe, rhunmwuda ọnii, ma yayi wẹ emwa ni ya Jesu yi vbe iran te wulo, Osanobua gha vbe dọlegbe viọ iran lele Jesu gha dee.

I Tẹsalonaika 5:10

Ọmwa ne ọ wu ne ima, ne ima sẹtin deba irẹn gha rrọọ vbe ẹghẹ ne ọ gha na rre, te ima rre agbọn ra te a wulo.

II Timoti 4:1

I ye ọghọ vbe ute tama ruẹn, vbe odaro Osanobua kevbe Kristi Jesu, Ọmwa ne ọ ra bu ohiẹn emwa ni rre agbọn kevbe ni wulo nẹ, rhunmwuda urremwẹ ọnrẹn kevbe Arriọba ẹre, I yi ẹre iyi nuẹn.

Hibru 12:2

Wa gie ima rhie aro da Jesu, ọmwa ne iyayi mwa ya iyeke-kọ ke omuhẹn ọnrẹn ya sẹ ufomwẹ ọnrẹn. Rẹn ma rhunmwuda ugbugbe zẹ obọ vbọ, sokpan rhunmwuda oghọghọ ne ọ diakhẹ ọre, ọ ma zẹdẹ mu ẹmwẹ efaa ne ọ rre ne a wu vbe uhunmwu ugbugbe ro. Banbanna nian, ọ tota vbe obọ erha ọmwa ọghe ẹkete Osanobua.

I Pita 1:21

ekpa ẹre ọre uwa na ya Osanobua yi, ọmwa ne ọ huẹn ọnrẹn kpao vbe orinmwi rre, ọ na rhie uyi nẹẹn, ọre a na miẹn wẹ, iyayi kevbe idaehọ uwa, Osanobua ọre a tua ẹre mu.

I Pita 4:5

Sokpan, iran gha ya ye unu iran na iyẹn egbe iran ma Osanobua, ne ọ mu egbe ne ọ ya bu ohiẹn ni wulo nẹ kevbe ni ma he wulo.

Arhie Maan 1:18

Mẹ ọrọre ọmwa ne ọ rre agbọn, I te ka wu yi, sokpan banbanna nian, I rre agbọn ẹdẹ kevbe ẹdẹdẹmwẹdẹ.” I mwẹ asẹ vbe uhunmwu uwu tobọ ẹre kevbe ẹvbo iran ne orinmwi.

Arhie Maan 2:8

“Gbẹn ebe ẹre gie odibosa esọsi ne ọ rre Smaina wẹ: “Uhunmwu ne ọ gie rre ọre ọna khin ighẹ rẹn ni ne ọ re okaro kevbe okiekie, ne ọ te ka wu, ne ọ ghi vbe dọlegbe rre agbọn nian.