Psalm 96:10 - Edo Bible (E Baibol Ẹdo) Version 1996
10 Wa tama agbọn ẹvbo hia wẹẹ, “E Nọyaẹnmwa ọrọre ọba! A mu agbọn na uhe sẹ otọ nẹ gbain vbe ihe ẹre, ai ghi sẹtin werriẹ ọe, ọ gha ye ẹmwata bu ohiẹn avbe emwa nii.”
Fuẹn iran an vbe ohu ruẹ, wa fuẹn iran an fẹẹrẹ, ẹghẹ nii, emwa hia ghi rẹn wẹ Osanobua ọ re ọ khaemwisẹ vbe Izrẹl kevbe wẹ asẹ ọ re gba otọe agbọn hia.
Gie agbọn ẹvbo hia gha ghọghọ, ne iran vbe gha so ihuan ọyẹnmwẹ rhunmwuda, wẹ ya ẹmwata bu ohiẹn emwa hia, u keghi vbe dia uhunmwu ẹvbo hia, ni rre agbọn na ye odẹ.
Osanobua ẹmwata ọ re uwẹ khin, wẹ keghi vbe bu ohiẹn iro ne ima zẹ, kevbe emwi ne ima ho. Dobọ emwi dan avbe emwa dan yi. Ne u vbe san avbe emwa esi ẹse.
E Nọyaẹnmwa keghi tama emwa rẹn wẹẹ, “Ẹghẹ gha sẹ ne a gha ya miẹn uwa fan, I gha ru uwa ẹse, I ghi vbe rhie ewanniẹn ye utumwẹ ne uwa tu ya nọ iyobọ. I gha gbearoghe uwa, I ghi vbe degue uwa, obọ uwa ọ re I gha la gu emwa hia ta ile, I gha gie uwa ya dọlegbe tota ye otọ uwa ne ọ he dihoi rua na.
U miẹn vbene ọ mose hẹ ne a bẹghe ọmwa ne a gie ẹre uhunmwu vbe ọ fian avbe oke ni rra dee do na iyẹn ne ọ maa, iyẹn ọfumwegbe! Ọ ya akhọnmiotọ wewe, ọ keghi tama Zaiọn wẹẹ, “Osanobua ọrọre ọba!”
“Vbe ẹghẹ avbe nikhaemwisẹ na, Osanobua ẹrinmwi gha mu arriọba ne ẹ i ra fo vbotọ gbọ. A i ra vbe sẹtin khọn rẹn ẹdẹ, sokpan, rẹn gha fuẹn avbe arriọba nii fẹẹrẹ, rẹn ghi gha rrọ ẹdẹdẹmwẹdẹ.
Ke ehe ne agbọn sẹe vbe obọ na ya sẹ ehe ne ọ sẹe vbe obọ nọkpa, te emwa hia ya ọghọ mẹ. Ehe hia iran na giẹn eturari mẹ, iran ghi vbe gha zọ ese ne ọ gia rhan obọ miẹn. Te iran hia wa rhie ọghọ mẹ.
Emwi ọ gha rruan ne ọ mu ọmwa ru, ne ọ ye aranmwẹ nọ ma maa zọ ese ghe mwẹ, vbe aranmwẹ esiesi ne ọ yan rẹn wẹ rẹn gha mu gunmwẹ rre uwu oghẹn ọnrẹn! Rhunmwuda, ọba nọkhua ọre imẹ, khin, te emwa ni rre uhunmwu ẹvbo hia mu ohan mwẹ.”
Rhunmwuda ọ bu ẹdẹ ọkpa ye otọ nẹ ne irẹn gha wẹ ne ọmwa ne irẹn hannọ zẹ nẹ, bu ohiẹn agbọn na hia vbe ne a i na bu eku. rẹn keghi vbe gie aro emwa da ọ na vbe ekpa ne ọna huẹn ọmwa ne a kha na kpaegbe vbe idin orinmwi!”
Ọ ghi vbe wẹ rẹn ra rhie ovbi ẹre ma mwẹ ne I miẹn ehe na ya gha kpe orhu Iyẹn Ne ọ maa vbe ekpa ẹre ma iran ne ẹ i re Ju, I ma vbe bu ọmwa rhọkpa wẹ ne ọ bu mwẹ ude,
Wa gie inian uwa dinmwi ye uwu irẹn, wa hẹnhẹn ẹdẹ agbọn uwa yan irẹn, ne uwa gha wegbe yọ vbe uwu iyayi uwa, zẹ vbene a ma uwa ẹre. Wa gie ẹko uwa vuọn ne ekpọnmwẹ.
Awanwan ọghe uyi Osanobua ọre irẹn ya fi wainwain, rẹn ọrọre ama ọghe vbene Osanobua wa ye zẹẹ, ọ keghi vbe ya ẹmwẹ unu ọghọe ne ọ mwẹ ẹtin mu agbọn vbe ẹrinmwi mwẹ. Ọ ghi kpe emwa ne agbọn huan hin orukhọ iran rre nẹ, ọ keghi ya tota vbe ẹrinmwi vbe obọ erha ọmwa Osanobua ne Ẹtin ne ọ sẹẹ ehia.
Odibosa ne ogihinrọn keghi fian okpe ọghọe re, a keghi họn urhu ni vannọ vbe ẹrinmwi kha wẹẹ, “Ẹtin ne a ya khaemwisẹ yan agbọn na, Nọyaẹnmwa kevbe Mẹzaia ẹre, ọre ọ ghi yan rẹn nian, ọ gha vbe gha khaemwisẹ ẹdẹ kevbe ẹdẹdẹmwẹdẹ.”
I keghi miẹn vbe ẹrinmwi kie ye otọ, ẹsin nọfua ọkpa kegha rrọọ, a kegha tie ọmwa ne ọ hin ẹnrẹn, Ọmwata kevbe Ne ọ ta uhunmwu ẹmwẹ. Ẹmwata ọre ọ ya bu ohiẹn kevbe ne ọ vbe ya khọn okuo ẹre.
I keghi họn emwi ne ọ ye vbe urhu emwa ni bun ẹsẹse ọ ye vbe uvanmwẹ okpamẹ ne ọ rhọ ke okuta ne ọ yo ku otọ, ọ ye vbe ne avan vannọ yan egbe. I keghi họn vbe iran khare wẹẹ, “Wa rho Osanobua! Rhunmwuda e Nọyaẹnmwa Osanobua ne Oghodua ọrọre Ọba!