Psalm 72:15 - Edo Bible (E Baibol Ẹdo) Version 1996

¹⁵ Ọba gha tọ ọ kpẹre! Te a gha ke Arebia viọ igoru gie ẹe. Ne a gha na erhunmwu nibun ne ẹẹn vbe ẹghẹ hia. Te afiangbe Osanobua gha rre ọ re uhunmwu vbe ẹghẹ hia!

Psalm 72:15 ပူးပေါင်းရင်းမြစ်များ

I Ọba 10:10

Ẹre ọba okhuo e Siẹba na viọ igoru ne ọ sẹ omwa etọni isẹn ne Solomọn, deba emwi ni winhin kevbe ikpẹrọnmwọ. Emwi ni winhin ne ọ viọ ne ẹẹn, ọrọre ne ọ he bun sẹ ne ọ he ka miẹn ẹdẹ ẹsẹse.

I Ọba 10:14

Ukpukpo ọre Solomọn ne ọba ya miẹn etọni igoru ne ọ gberra isẹn yan ugie.

II Krọnikol 9:1

Otiti e Solomọn keghi do gha sẹ ehe ne Ọba Nokhuo e Siẹba ye, rẹn kegha rrie Jerusalẹm ne ọ ya mu ibo ne ẹẹn san. Ọ keghi viọ eguọmwadia ni bun ba egbe gha dee, ke ẹe kevbe ekẹtẹkẹtẹ ni bun ne a ya kun emwi ni winhin, ikpẹrọnmwọ kevbe igoru ọrhẹnrhẹn. Rẹn vbe Solomọn ghi miẹn egbe, ọ kevbe nọ rẹn ọta hia ni ghi rre ọre ekhọe.

Psalm 21:4

Ọ nọ arrọọ, u keghi rhie ne ẹẹn, arrọọ ne ọ tọ kevbe ne ọ kpẹe.

Psalm 45:4

Gha hin ẹsin khian vbe ọba ne u ya khọnmiotọ, vbe igbinna oseghe ẹmwata, kevbe uhunmwu ẹmwẹ! Ẹtin ruẹn gha viọ akhọnmiotọ nekhua nuẹn!

Psalm 72:19

Wa rho eni ẹnrẹn ne ọ mwẹ uyi ẹdẹdẹmwẹdẹ. Te uyi ẹre gha gha otọ agbọn hia. Isẹ! Isẹ!

Aizaia 60:6

Usun lọghọọ ọghe aranmwẹ kamẹl gha la ato gberra, ke Midian kevbe Efa gha dee. Iran ke Siẹba rre, iran kevbe igoru kevbe eturari. Emwa gha na iyẹn iwinna esi ne Nọyaẹnmwa winna ẹn.

Matiu 2:11

Ugbẹn vbe iran ghi la owa, iran keghi miẹn nene ọmọ kẹe kevbe Meri ne iye ẹe. Iran keghi diguẹ ya emwi nẹẹn, igoru, eturari kevbe oziya.

Matiu 21:9

Avbe emwa ni ke odaro ne Jesu kevbe ni rre ọre odieke keghi tọn urhu mu kha wẹẹ, “Urhomwẹ nọ ne ovbi e Devid. Afiangbe Osanobua nọ ne ọmwa ne ọ dee vbe eni Nọyaẹnmwa, Uyi nọ ne Osanobua.”

Matiu 6:10

gie Arriọba ruẹ rre, gia gha ru iho ruẹ vbe agbọn vbe ne iran ru vbe ẹrinmwi.

Iyẹn ne ọ Maan Ọghe Jọn 11:25

Jesu tama rẹn wẹẹ, “Mẹ ọrọre arhiọkpaegbe kevbe arrọọ, ọmwaikọmwa ne ọ rhirhi a ya mwẹ yi, ọ gha rre agbọn, ọ gha khọn rẹn ne ọ wu.

Iyẹn ne ọ Maan Ọghe Jọn 14:19

Ọ ke ekherhe nian, agbọn na i ghi ra miẹn mwẹ ọvbehe, sokpan wa gha miẹn mwẹ, debare, rhunmwuda ighe mẹ rrọọ, wa gha vbe gha rrọọ.

Iyẹn ne ọ Maan Ọghe Jọn 5:23

Ne emwa hia miẹn ehe na gha ye ọghọ ne Ọmọ zẹ vbene avbe ya ọghọ ne Erha. Ọmwa ne ọ ma ye ọghọ ne Ọmọ ọ ma ya ọghọ ne Erha ne ọ gie ẹe.

Filipai 2:11

Ehia ghi vbe yae go vbe azagba wẹ, Jesu Kristi ọrọre Nọyaẹnmwa ne uyi ọghe Osanobua e Evbavba.

I Tẹsalonaika 3:11

Te Osanobua ne Erha mwa tobọ ẹre kevbe Nọyaẹnmwa Jesu Kristi gha kie odẹ ye otọ ne ima la bu uwa gha dee.

II Timoti 4:22

Te Nọyaẹnmwa gha yaba orhiọn uwa. Te ẹsọhẹ Osanobua gha gu uwa hia gha rrọọ.

II Pita 3:18

Sokpan, wa gha wan yọ vbe uwu ẹsọhẹ kevbe irẹnmwi Nọyaẹnmwa kevbe Ọmiọnmwafan mwa Jesu Kristi. Ọghọe ọre uyi gha khin, banbanna kevbe ẹdẹdẹmwẹdẹ. Isẹ.

I Jọn 1:2

Ugbẹn vbe arọọ na ghi khian ne a ye aro bẹghe nẹ, ma tobọ mwa miẹn ọẹn, rhunmwuda ọnii, ma keghi ta ẹmwẹ ọnrẹn, ma keghi ta ẹmwẹ arrọọ etẹbitẹ nii, ne ọ gha gu Evbavba rrọọ, ne a vbe do rhie ma ima, ma uwa.

Ebe ne Jud gbẹẹn 1:25

Ne Osanobua ọkpa kevbe Ọmiọnmwafan, la ekpa Jesu Kristi Nọyaẹnmwa, ọre uyi, ọdakha, ẹtin kevbe asẹ gha rrọọ na, ke orre ni gberra hia gha dee do sẹ wanwanna, ẹdẹ kevbe ẹdẹdẹmwẹdẹ. Isẹ.

Arhie Maan 1:18

Mẹ ọrọre ọmwa ne ọ rre agbọn, I te ka wu yi, sokpan banbanna nian, I rre agbọn ẹdẹ kevbe ẹdẹdẹmwẹdẹ.” I mwẹ asẹ vbe uhunmwu uwu tobọ ẹre kevbe ẹvbo iran ne orinmwi.