Psalm 115:4 - Edo Bible (E Baibol Ẹdo) Version 1996

⁴ Esiliva kevbe igoru ọ re a ya ru ẹbọ iran, emwi ne a ya obọ emwa nagbọn ru.

Psalm 115:4 ပူးပေါင်းရင်းမြစ်များ

I Ọba 18:26

Iran keghi mu ẹmila ne a mu gie iran, iran na mwamwa ẹẹn, iran na gha na erhunmwu ghe e Bal ya sẹ ẹghẹ ogiavan. Iran kegha go kha wẹẹ, “E Bal zẹ ẹmwẹ wanniẹn ima.” Iran na gha ku lẹga aka ne iran gba ẹe nii. Sokpan, ewanniẹn ma rre.

I Ọba 18:29

Iran na gha vannọ, iran na gha go ọ te ya sẹ ẹghẹ ogiavan, sokpan ewanniẹn ma rre, a ma họn urhu rhọkpa.

II Ọba 19:18

ọ na giẹn ẹbọ iran an, ẹbọ ne ẹ i re ẹbọ hiehie gberra avbe amazẹ erhan kevbe okuta ne emwa ne agbọn ye obọ ru.

II Krọnikol 32:19

Iran kegha ta ẹmwẹ Osanobua ọghe Jerusalẹm zẹ vbe ne iran ta ẹmwẹ avbe ẹbọ ẹvbo ọvbehe, avbe amazẹ ne emwa ya obọ mannọ.

Psalm 97:7

Ekhue mu dọmwadẹ ọghọe ne ọ gho ẹbọ, avbe ẹbọ hia ghughẹre vbe odaro Nọyaẹnmwa.

Aizaia 37:19

Ọ keghi giẹẹn avbe emwi ne iran gho ua emwi ne ọ ma sẹ ne a gho ọ re iran gha khin, amazẹ erhan kevbe okuta kẹkan ọ re iran gha khin, emwi ne emwa ya obọ ru.

Aizaia 42:17

Iran hia ni mu ẹtin yan avbe amazẹ ni tie avbe amazẹ emwi ne iran gho ekhue gha mu iran, a gha fa iran an.”

Aizaia 44:10

Ere ọkpa irrọ ne ọmwa ye ematọn ru amazẹ ne ọ gha gho ẹre zẹ vbe ẹbọ!

Aizaia 44:20

Ẹwaẹn ne ọ rre emwa ma vbe kpọlọsẹ ọghe ọmwa ne ọ rri emuẹn. Emwi akpa ne ọ rre ọre uhunmwu bibi ẹre odẹ sẹ vberriọ nẹ wẹ ẹ i ghi gia yọre obọ. Ẹ i sẹtin tae ma egbe ẹre wẹ amazẹ ne irẹn mu mwẹ obọ ighe ẹ i re Osanobua hiehiere.

Aizaia 44:9

Iran hia ni mannọ amazẹ, emwa oya iran khin avbe ẹbọ ne iran ghe gẹdẹgbẹ i zẹdẹ mwẹ esa, iran ni gho avbe ẹbọ na, emwa ni rhu aro, ni ma rẹn ne a ye, ọ re iran khin, a gha fa iran hia a.

Daniẹl 3:5

Wa gha ghi họn vbe a kpe okpe, ẹgogo na lelẹe kevbe ighẹnghan, kevbe ukusẹ kevbe akpata, deba avbe emwi ọvbehe ne a ghi kpee hia. Wa gha wa họẹn vbe ọwarọkpa vbe ọ suẹnrẹn, wa ghi ghughẹrre ya uhunmwu rhanmwẹ otọ ne amazẹ ne ọba e Nebukiadneza maẹn.

Daniẹl 5:23

U keghi ru emwi ne ẹ i yẹ e Nọyaẹnmwa ẹrinmwi, u keghi ya viọ avbe ukpu kevbe avbe ọkpan ne a viọ ye Ọgua Osa. Wẹ kevbe avbe ekhaẹmwẹ ruẹn, avbe amwẹ ọn kevbe avbe egbakhian ruẹn kegha ya iran da ayọn, wa na gha go wan avbe ẹbọ ne a ya igoru esiliva, oze, ematọn, erhan kevbe okuta ru — avbe ẹbọ ni i bẹghe kevbe ni i họn ẹmwẹ kevbe ni i sẹtin ru emwi rhọkpa. Sokpan, wẹ ma da ne Osanobua ne ọ tae a deghẹ u gha rre agbọn ra u gha wu, kevbe ne ẹmwẹ emwi ne u ru hia rre ọre obọ.

Hozia 8:6

Owinna ne ovbi Izrẹl ọ re ọ ma amazẹ nii, ẹ i vbe zẹdẹ re ẹbọ hiehiere. Iran gha rẹnkhẹn ọẹn ruan ighe ẹbọ igoru ne iran gho vbe Sameria.

Iwinna 19:26

Wa họẹn, aro uwa tobọ uwa vbe sẹ emwi ne oko na ne iran tie ẹre Pọl ru. Ọ wẹ ẹbọ ne a ya obọ ma i re ẹbọ hiehiere, obọ ẹre da otọ ne ọ ya fi emwa ekhọe werriẹ vbe Ẹfisọs mwa na, kevbe na wa kha wẹ la otọe Esia hia.

Iwinna 19:35

Vbe okiekie, Ọgbẹn ebe ẹvbo nii keghi sẹtin dọ iran yọ, ọ tama iran wẹẹ, “Ivbi Ẹfisọs, agbọn hia rẹnrẹn ighẹ Ẹfisọs ne okpẹvbo ọre ọ gbe aro ghe aro ẹbọ Atemis kevbe okuta eghẹnghẹn ne ọ ke ẹrinmwi de fi otọ.

Diuteronomi 4:28

Wa ghi vbe gha ga ẹbọ ne a ye obọ emwa ne agbọn ma, ẹbọ ne a ya erhan kevbe okuta ma, ẹbọ nẹ ẹ sẹtin bẹghe ra ne ẹ họn ẹmwẹ, nẹ ẹ i sẹtin rri evbare ra ne ọ hẹn ẹwia.