Psalm 103:8 - Edo Bible (E Baibol Ẹdo) Version 1996

⁸ E Nọyaẹnmwa mwẹ itohan ọ mwẹ aho ẹmwẹ ọmwa, ẹ i rherhe mu ohu, ọ vuọn ne aho ẹmwẹ ọmwa ne ẹ i beghe.

Psalm 103:8 ပူးပေါင်းရင်းမြစ်များ

Nehimaia 9:17

Iran ma họn ẹmwẹ ne uẹn, iran mianmian emwi hia ne u ru iran mianmian iwinna ọyunnuan, ne u he winna hia. Vbe uwu itengbemu, iran zẹ olotu ọvbehe, ne ọ viọ iran dọlegbe gha rrie Igipt; sokpan, Osanobua ne ọ yabọ ọmwa ọ re uwu khin wẹ vuọn ne ẹsọhẹ kevbe ahoẹmwọmwa itohan ruẹn kpolo, u ma he iran ye otọ.

Psalm 130:7

Izrẹl, wa mu ẹtin yan e Nọyaẹnmwa, rhunmwuda, aho ẹre i fiwerriẹ, ọ vbe mu egbe ne ọ ya miẹn ọmwa fan vbe ẹghẹ hia.

Psalm 145:8

E Nọyaẹnmwa mwẹ ahoẹmwọmwa kevbe ẹnina ẹ i rherhe mu ohu, ọ vuọn ne ahoẹmwọmwa ne ẹ i beghe.

Psalm 31:20

U viọ iran lẹre ye ẹbe fo, ọghe ehe ne uwẹ ye hin uma ne emwa si rre. U viọ iran lẹre ye irhu ne ẹi mwẹ ẹbe hin ihẹn ne avbe eghian iran tie rre.

Psalm 86:15

Sokpan Osanobua ne ọ mwẹ itohan, kevbe ne ọ ho ẹmwẹ ọmwa, ọ re uwẹ khin Nọyaẹnmwa, ne ọ ziengbe vbe ẹghẹ hia ne ọ mwẹ itohan kevbe ne ọ guobọmwa.

Psalm 86:5

Wẹ maa ne ima, u kevbe ya orukhọ bọ, u vuọn ne aho ne ẹ i beghe ne iran ni na erhunmwu ghe ruẹ.

Aizaia 55:7

Gie emwa dan fi uyinmwẹ iran werriẹ, ne iran vbe fi iziro ekhọe iran werriẹ wa gie iran bu e Nọyaẹnmwa ne Osanobua ima gha dee, ọ mwẹ itohan, ọ vbe zẹgiẹgiẹ yabọ.

Jerimaia 32:18

U rhie aho ẹmwẹ ọmwa ne ẹ i beghe ma arriaisẹn, erriọ vbe nọ, u vbe rri emwa eso oya ye orukhọ ne evbibiẹ iran ru. Osanobua nọkpọlọ kevbe ne ọ mwẹ ẹtin ọ re uwẹ khin. Wẹ ọrọre Nọyaẹnmwa ne Oghodua.

Joẹl 2:13

“Wa gie orhiọn ne ọ ma sẹ uwa otọ rhie ma vbene uwa khiẹ sẹ hẹẹ, ukpọn ne a sọ ye egbe ọmwa ẹkun, ma zẹdẹ sẹ.” Wa dọlegbe bu e Nọyaẹnmwa ne Osanobua uwa gha dee, ọ mwẹ ekhọe agiẹngiẹn, ọ vbe vuọn ne itohan, ọ mwẹ izin egbe, ọ vbe mu eyan ne ọ yanrẹn sẹ, ọ mu egbe ne ọ ya bọ vbe ẹghẹ hia, ẹ i re ne ọ gha rri emwa oya.

Jona 4:2

Rẹn keghi rhunmwuda ọnii na erhunmwu wẹẹ, “E Nọyaẹnmwa, I ma ta ẹmwẹ na vbe I te kpao vbe owa wẹ erriọ u ra ru emwi na. Ọnii ọ si ẹe ne I na hia vbe odẹikodẹ ne I lẹ gha rrie Spen. I rẹnrẹn ighe Osanobua ne ọ mwẹ aho ẹmwẹ ọmwa kevbe itohan ọre uwẹ khin, u vbe zin egbe, u vbe mwẹ ẹnina, u vbe mu egbe vbe ẹghẹ hia ne u ya fi ekhọe werriẹ ne u ghẹ rri ọmwa oya.

Nahum 1:3

Ohu i rherhe mu e Nọyaẹnmwa sokpan rẹn mwẹ ẹtin, ẹ i gie ọmwa ne ọ rria abe gha rrie vbe ne ọ ma na rri oya. Okpẹhoho guakpao, vbe ehe ne Nọyaẹnmwa khian la; okuku amẹ, ebubẹ ne owẹ ọre gbe nọ!

Nọmbas 14:18

‘Mẹ ne Nọyaẹnmwa ohu i rherhe mu mwẹ, mẹ rhie ahoẹmwọmwa kevbe ayegbe yan ọmwa maa, I ghi vbe gha ya orukhọ kevbe isọtẹ bọ ọmwa sokpan ẹ i mwẹ I ma rria ikhi erha kevbe avbe ivbi ẹre, kevbe emiwu kevbe eyẹ kevbe orre ne ogieha kevbe ne ogienẹ, rhunmwuda orukhọ evbibiẹ iran.’

Diuteronomi 5:10

Sokpan I ghi rhie ahoẹmwọmwa mwẹ ma inu arriaisẹn ne ọ khin vbe uwu iran ni ho ẹmwẹ mwẹ, ni vbe ya uhi mwẹ ru emwi.

Jems 5:11

Te ima ghi tie iran emwa ni rre oghọghọ rhunmwuda, iran zin egbe. Wa họn ẹn vbene Job ziengbe hẹ, wa vbe rẹn vbene Nọyaẹnmwa ghi fiangbẹe hẹ vbe okiekie. Rhunmwuda, Nọyaẹnmwa vuọn ne itohan kevbe ẹnina.