Nọmbas 9:13 - Edo Bible (E Baibol Ẹdo) Version 1996

¹³ Sokpan, a deghẹ ọmwa ne awua i gue nọ, ighẹ ọ ma vbe yo ehe rhọkpa, ne ọ ma ru emwiukpo Alagberra, a i ghi vbe kae ba avbe emwa mwẹ, rhunmwuda ọ ma zẹ ọhẹ ni gunmwẹ vbe ẹghẹ ne a mwa yọ. Uhunmwu ẹnrẹn ọre ọ ra ya mu emwi ne ọ gha ke orukhọ ẹre ikian.

Nọmbas 9:13 ပူးပေါင်းရင်းမြစ်များ

Gẹnẹsis 17:14

Okpia ne a ma he rhuẹ, a ghi wannọẹn hin uwe ẹbu emwa rẹn rre rhunmwuda ọ ma họn ẹmwẹ mwẹ.”

Ẹksọdọs 12:15

“Wa ghi ya ẹdẹ ihinrọn rri ebrẹd ne ọ ma hue. Vbe ikpẹdẹ ne okaro, wa ghi viọ ebrẹd ne ọ huere hin owa rua rre, rhunmwuda ọmwaikọmwa ne ọ rri ebrẹd ne ọ huere ke ikpẹdẹ nokaro ya sẹ ikpẹdẹ ne okiekie, a gha kan ẹn fua hin ọbuohiẹn emwa mwẹ rre.

Ẹksọdọs 12:19

Wa ghẹ ghi miẹn ebrẹd ne ọ huere vbe owa uwa, rhunmwuda, a deghẹ a miẹn ọmwa ne ebrẹd ne ọ huere gue, a gha kan ẹn fua hin uwu ọbuohiẹn emwa mwẹ rre, ọre ọrriọvbe nọ ra ọmọ otọ nọ. Wa ghẹ rri ebrẹd ne ọ huere hiehiere vbe owa uwa.”

Ẹksọdọs 12:47

Emwa nii re ivbi Izrẹl hia ọre ọ gha rri evbare na, sokpan a ghẹ gie ukpikolo rriọe.

Ẹksọdọs 30:33

Ọmwaikọmwa ne ọ ru ọvbehe ya ta ẹre, ra ne ọ lo vbọ ye egbe ọmwa nẹ i re ohẹn, a ghi kan ẹn fua hin uwu ẹbu emwa rẹn rre!’ ”

Ẹksọdọs 30:38

A deghẹ ọmwaikọmwa ta ẹre ya ru ne egbe ẹre a i ghi vbe ka ẹe ba avbe emwa mwẹ.”

Ezikiẹl 23:49

Kevbe uwa ne etẹn neva na, I gha rri uwa oya ye u sakanmwẹ uwa na kevbe orukhọ ne uwa ru vbekpa ẹbọ ne uwa gho. Ẹghẹ nii, wa gha na rẹn ighe mẹ ọrọre e Nọyaẹnmwa ne Udazi.”

Levitikọs 17:10

Ovbi Izrẹl ra orhunmwuyẹn ni rre uwu ẹbu iran gha rri emiowo kẹe kevbe esagiẹn, e Nọyaẹnmwa gha mu aro da ẹre, ẹ i ghi ra vbe ka ẹe ba emwa irẹn.

Levitikọs 20:20

A deghẹ okpia gu amwẹ ovbi erha erha ẹe ru emwi, te ọ yagha ovbi erha erha ẹe nii, rẹn kevbe okhuo nii ghi gba rri oya yọ, ne ọ gha miẹn ọmọ biẹ i rre uwu iran eveva.

Levitikọs 22:9

“Avbe ohẹn hia ghi lele emwamwa ne I mu ye otọ. De ghẹ ẹ i re vberriọ iran gha rrie abe, a ghi vbe gbele iran an, rhunmwuda, iran rra uhi emwamwa ne ọ huanrẹn. Mẹ ọ re Nọyaẹnmwa, mẹ ọ re ọ vbe ya iran khian ne ọ huanrẹn.

Levitikọs 24:15

Iyeke ọnii, u ghi tama ivbi Izrẹl wẹẹ ọmwa ne ọ rhirhi tie ihẹn ne Osa, uhunmwu ọ ra ya yọ,

Nọmbas 19:13

Ọmwaikọmwa ne ọ yobọ kan orinmwi, ọ na ma khuẹ egbe ẹre huan, khian ne ọma huan rhunmwuda a ma he mu amẹ akpehuan ku ọre. Ọ ru Owa Ukpọn Ile Nọyaẹnmwa awua, a i ghi vbe kae ba emwa Osanobua.

Nọmbas 19:20

Ọmwaikọmwa ne awua gue, ne ọ ma khuẹ egbe ẹre huan, awua wa ye guẹe, rhunmwuda a ma he mu amẹ akpehuan ku ọre. Ọ ru Owa Ukpọn Ile Nọyaẹnmwa awua, a i ghi vbe kae ba ivbi Osanobua.

Nọmbas 5:31

Ọdọ ẹre imwẹ abe ne a gha rhie nẹ, sokpan okhuo nii gha rri abe, a ghi rri ọre oya.

Nọmbas 9:7

Iran wẹẹ, “Awua gu ima rhunmwuda ighẹ ma yobọ kan orinmwi, sokpan vbọzẹ ne a ma na gie ima zọhẹ gie Nọyaẹnmwa vbene ivbi Izrẹl nekpa ru yi?”

Hibru 12:25

Rhunmwuda ọnii nian, wa ghi mwẹ ẹwaẹn wa ghẹ rhie obọ khiọ ehọ ne uwa ghẹ miẹn ehe na họn ẹmwẹ ọmwa ne ọ guan. Iran nọ ma danmwehọ ọmwa ne ọ kpe orhu iyẹn ne ọ huanrẹn vbe agbọn na, ma miẹn uhunmwu. Vbe ọmwa ghi ra na miẹn uhunmwu hẹ khekherriọ deghẹ ọ wẹ rẹn i danmwehọ ọmwa ne ọ guan ke ẹrinmwi rre?

Hibru 2:3

Vbe ima gha na miẹn uhunmwu hẹ khekherriọ a deghẹ ma ma zẹ ye ẹmwẹ imiẹnfan ne ọ kpọlọ sẹ vbenian na? Nọyaẹnmwa tobọ ẹre ọre ọ ka ta ẹmwẹ imiẹnfan na rre, iran ni miẹn ẹmwẹ ọnrẹn ye ehọ, keghi rhie maa ima ighẹ ẹmwata nọ.

Hibru 6:6

Vbe iyeke ọna, iran keghi lahin iyayi iran rre. Ẹ ghi gia ru ne a viọ iran werriegbe rre do roiro fi uyinmwẹ werriẹ, rhunmwuda, te iran vbe dọlegbe kan Ovbi Osanobua mu ugbugbe, iran keghi fa ẹre ua vbe sirra emwa hia.

Hibru 9:28

Erriọ vbe nọ zẹẹ, a keghi ya Kristi zọ ese uhukpa, ne ọ viọ orukhọ emwa ni bun gha rrie. Ọ gha ye vbe ya egbe ladian uhukpa, ẹ i ghi re ne ọ do guan ye ẹmwẹ orukhọ, sokpan ne Ọ do miẹn iran fan ighẹ avbe emwa ni mudia khẹ ọre.