Nọmbas 6:18 - Edo Bible (E Baibol Ẹdo) Version 1996

¹⁸ Agbihiagha nii ghi khiokhio eto ẹre vbe onurho Owa Ukpọn Ile, ọ ghi ya hẹ ọre ku erhẹn ne a na giẹn emwi ne a ya si isara.

Nọmbas 6:18 ပူးပေါင်းရင်းမြစ်များ

Nọmbas 6:17

Ọ ghi ya ogho nọ rrọọ zọ ese ghe Nọyaẹnmwa zẹ vbe isara, ke ẹe kevbe okhuae ebrẹd nii, ọ ghi vbe ya avbe ọka kevbe ayọn ni rrọọ yo imuohan.

Nọmbas 6:5

“Vbe ẹghẹ ne a na miẹn wẹẹ uwu eyan Agbihiagha ọ re ọ ye, wẹ ne ọ ghẹ gbe eto ra ne ọ zẹ ẹtu. Eyan Agbihiagha ne ọ ru nii ye muẹn la inu ẹghẹ ne a ya ẹe fi ohan ne Nọyaẹnmwa la, ọ ghi gie eto kevbe ẹtu ẹre gha sọn.

Nọmbas 6:9

“A deghẹ ọmwa wa wu vbe udomwurri vbe ehe ne agbihiagha ye ighẹ ọ mu awua ye ọre eto ne ọ ya fi ohan, ọ ghi ziengbe la ikpẹdẹ ihinrọn, ọ ghi khiokhio eto kevbe ẹtu, ẹghẹ nii, ọ ghi do gha re ne ẹi mwẹ awua.

Iyẹn ne ọ Maan Ọghe Luk 17:10

Erriọ ọre ọghe uwa ye. Wa ghẹ ghi ru emwi ne a wẹ ne uwa ru hia nẹ, wa ghi kha wẹẹ, ‘Ọguọmwadia ma khin, iwinna ne ọ kan ima ọre ima winnaẹn!’ ”

Iwinna 18:18

Pọl keghi gu avbe etẹn tota vbe ikpẹdẹ ni bun, ọ keghi kpao vbe ehe ne iran ye, ọ keghi viọ Priskila kevbe Akuila ba egbe, iran keghi la okọ gha die Siria. Vbe iran te la okọ kpao vbe Sinkra, ọ keghi ye egbe ye ulamwẹ, ọ na khiokhio eto mu otọ.

Iwinna 21:23

Emwi ne ima ra tama ruẹn u ghi ruẹe o, Ikpia enẹ rre emwa na ni ye egbe ye ulamwẹ.

Iwinna 21:24

Lele iran gha khian, ne u ya deba iran yo ulamwẹ akpehuan, ne u ha osa emwi ne iran lo ro, ẹghẹ nii, iran gha sẹtin gbẹn eto mu otọ. A gha ruẹe vberriọ, emwa hia ghi do rẹn wẹ ẹmwata i zẹdẹ rre ẹmwẹ ne iran họẹn vbe ekpa ruẹ, sokpan wẹ te uwẹ tobọ ruẹ wa ye ẹmwẹ Uhi Mosis ru emwi.

Iwinna 21:26

Ẹdẹ ghi gbe, Pọl keghi viọ emwa ni, ọ keghi de ba iran yo ulamwẹ akpehuan. Iyeke ọnii, ọ kegha rrrie uwu Ọgua Osa, ọ na ya tama iran inu ikpedẹ ne ọ khian gha khin ne ẹghẹ akpehuan gha ya gba, ne ọkpọkpa vbe uwu iran miẹn ehe na do zọ ese.

Ẹfisọs 1:6

Wa gie ima rho Osanobua ye ẹsọhẹ nọ mwẹ uyi ọghọe, kevbe emwi ọhẹ ne ọ ya ru ima ẹse, vbe uwu ovbi ẹre ne ọ ghan!