Nọmbas 27:17 - Edo Bible (E Baibol Ẹdo) Version 1996

¹⁷ Ne ọ gha vbe sẹtin gha su iran ye igbinna ne emwa ruẹn ghẹ do ye vbe ohuan ne ẹ i mwẹ ọsuohuan.”

Nọmbas 27:17 ပူးပေါင်းရင်းမြစ်များ

II Samuẹl 5:2

Ẹghẹ ne ọ gberra, vbe Sọl he re ọba ima, wẹ ọ re ọ gha viọ ivbi Izrẹl yo okuo, e Nọyaẹnmwa keghi vbe tama ruẹn wẹẹ, ‘U gha su emwa mwẹ, u ghi vbe gha re ne ọ khaemwisẹ yan iran.’ ”

I Ọba 22:17

E Makaia keghi wanniẹn wẹẹ, “I bẹghe ivbi Izrẹl hia zagha lele uhunmwu oke hia zẹ vbe ohuan ne ẹ i mwẹ nọ suẹe. E Nọyaẹnmwa keghi kha wẹẹ, ‘Iran na i mwẹ olotu, wa gie iran hẹko gha rrie owa.’ ”

I Ọba 3:7

E Nọyaẹnmwa, Osanobua, u ya mwẹ rriọba lele erha mwẹ nẹ, a gha rhe miẹn wẹ, ọvbokhan ọ re I khin, I ma vbe rẹn vbene a ya gbe aro ghe ẹvbo hẹ.

II Ọba 11:8

Wa ghi yuo umozo mwẹ obọ tan obọ ga e Joas ne ọba, wa ghi lele ẹe la ehe ne ọ rhirhi a yo hia. Ọmwaikọmwa ne ọ rhirhi sikẹ uwa, wa ghi gbe ẹe rua.”

II Krọnikol 1:10

Rhunmwuda ọnii, rhie ẹwaẹn kevbe irẹnmwi ne I gha sẹtin ya gha khaemwisẹ yan iran mẹ. A dẹghe ẹ i re vberriọ, vbe i a gha sẹtin ya rriọba emwa ruẹn na ni bun sẹrriọ hẹ?”

II Krọnikol 18:16

Mikaia ke kha wẹẹ, “I bẹghe ivbi Izrẹl vbe iran tagha gba uhunmwu oke zẹ vbe ohuan nẹi mwẹ ne ọ su ẹe. Ẹre Nọyan na kha wẹẹ, Emwa na i mwẹ ọkaolotu, gie iran hẹko gha rrie!”

Ezikiẹl 34:5

Rhunmwuda ighe nene ohuan i mwẹ ne ọ su ẹe, iran keghi zagha kua, aranmwẹ akọn kegha gbele iran re.

Zẹkaraia 10:2

Emwa ghi ya gha nọ avbe amazẹ kevbe iran ni bọ, sokpan ewanniẹn ne iran miẹn ohoghe ne ọ mwamwa ọ re ehia khin. Eso ghi gha rhan otọ imina, sokpan, te iran bibi uwa odẹ kẹkan. Ọfumwegbe ne iran rhierre i mwẹ esa. Rhunmwuda ọnii, avbe emwa ni ghi gha hẹ yo hẹ rre zẹvbe ohuan ne ọ wiri. Iran rre uwu orueghe rhunmwuda, ọkaolotu i rrọọ.

Zẹkaraia 13:7

E Nọyaẹnmwa ne Oghodua khare wẹẹ, “Umozo, rhiọrre, ne u dekun ọsuohuan ne ọ winna mẹ. Gbe ẹe rua, ne u gie avbe ohuan zagha kua, mẹ gha dekun avbe emwa mwẹ,

Matiu 10:6

Wa bu ohuan ni wiri ni rre ivbi Izrẹl gha khian.

Matiu 15:24

Jesu keghi wanniẹn wẹẹ, “Ohuan ni wiri ni rre ivbi Izrẹl ọkpa ọre a gie mwẹ bu gha dee.”

Matiu 9:36

Ugbẹn vbe ọ ghi miẹn avbe emwa ni gbe ẹbu, ekhọe ẹre keghi vuọn ne agiẹngiẹn, rhunmwuda ehia wa khọn yo khọn rre zẹ vbe ohuan ne ẹ i mwẹ nọ suẹe.

Iyẹn ne ọ Maan Ọghe Mak 6:34

Ugbẹn vbe Jesu ghi ke uwu okọ ladian, ọ miẹn emwa ni gbe ẹbu nii, ohan iran keghi to ẹe ẹsẹse rhunmwuda iran ye vbe ohuan ne ẹ i mwẹ ne ọ su ẹe. Ọ kevbe suẹn gha ma iran emwi ni bun ẹsẹse.

Iyẹn ne ọ Maan Ọghe Jọn 10:9

Mẹ ọrọre onurho. Ọmwa ne ọ la ehe ne i ye la owa, a gha miẹn rẹn fan. Ọ gha la owa, ọ ghi vbe ladian, ọ gha vbe miẹn irunmwu.

Diuteronomi 31:2

Ọ wẹẹ, “Ukpo iyehan ọ re i ghi ye na, mẹ i ghi ra sẹtin gha re olotu uwa ọvbehe. Ye vbe sẹ ọnii, e Nọyaẹnmwa tama mwẹ ne wẹ mẹ i ra fian Ẹzẹ Jọdan rra.

I Pita 2:25

Wa keghi te ye vbe avbe ohuan ni bibi odẹ, sokpan, banbanna nian, a viọ uwa bu Ọsuohuan kevbe Nọgharoghe orhiọn uwa gha dee nẹ.

I Samuẹl 18:13

Rhunmwuda ọnii, e Sọl keghi rhie ẹre ladian vbe evba, ọ keghi ya ẹe ru ọkaokuo arhin arriaisẹn. E Devid kegha viọ emwa rẹn yo okuo,

I Samuẹl 8:20

Ne ima miẹn ehe na do gha yevbe avbe ẹvbo ọvbehe ne ima gha mwẹ ọba ne ọ gbearoghe ima, ne ọ gha viọ ima yo okuo, ne ọ gha khọn okuo ne ima.