Nọmbas 25:2 - Edo Bible (E Baibol Ẹdo) Version 1996

² Avbe ikhuo na keghi wẹ ne avbe ikpia na do tuẹ iran vbe emwiukpo izọese, ehe ne iran na gho ẹbọ Moab. Avbe ivbi Izrẹl keghi rri evbare nii, iran na vbe ga nene ẹbọ,

Nọmbas 25:2 ပူးပေါင်းရင်းမြစ်များ

I Ọba 19:18

Sokpan, I gha sẹ arhiẹn arriaisẹn ihinrọn (7,000) rae vbe Izrẹl, emwa ni rhie egbe mu mwẹ, emwa ni ma he vbokho igue rre ne Bal ra ne iran ya unu soso amazẹ ẹre unu.”

Psalm 106:28

A ghi sẹ Peọ, emwa Osanobua keghi yegbe ba iran ni gho e Bal, iran keghi vbe re vbe emwi ne a ya zọ ese ghe amazẹ ne ẹ i mwẹ arrọọ.

Ẹksọdọs 20:5

Ohan i gie uwẹ ya uhunmwu rhanmwẹ otọ ne ukhurhẹ ra ne u ga ẹe rhunmwuda mẹ ọrọre Nọyaẹnmwa Osanobua ruẹ, Osanobua ne ọ ta ekpẹn mẹ khin. Emwa nii khuiwu mwẹ, I gha rria ivbi iran ikhi ya sẹ orre ne ogieha ke ne ogienẹ.

Ẹksọdọs 22:20

“Omwa gha zọ ese ghe osa ọvbehe vbe ọ gberra ne Nọyaẹnmwa wa ghi gbe ẹe rua.

Ẹksọdọs 23:24

Wa ghẹ ya uhunmwu rhanmwẹ otọ ne ẹbọ iran, wa ghẹ vbe ga iran. Wẹ ghẹ gho emwi ne avbe emwa nii gho wa ghi fuẹn avbe ẹbọ iran an fẹẹrẹ, wa ghi wa dunmwu okuta ẹbọ iran an.

Ẹksọdọs 32:6

Vbe owiẹ vbirrivbirri ẹdẹ ne ọ lele ẹe iran keghi gbele aranmwẹ ya zọ ese ne iran giẹn uan. Iran keghi vbe viọ aranmwẹ rre ne a ya zọ ese isara. Emwa nii keghi tota gha re gha da, ọ na keghi do khian ayọn ohọhọ kevbe iku okpia vbe okhuo.

Jerimaia 40:11

Vbe ẹghẹ ne a kha na avbe ivbi Izrẹl hia ni rre Moab, Amọn, Idọm kevbe avbe ẹvbo ọvbehe keghi họọn wẹ ọba e Babilọn kue ne ivbi Izrẹl eso ye gha rre Juda, kevbe wẹ ọ ya Gedalaia ru ne ọkhaemwisẹ yan iran.

Hozia 9:10

E Nọyaẹnmwa khare wẹẹ, “Ẹghẹ ne I na ka miẹn Izrẹl, ọ keghi ye vbe ne a miẹn erhan azara ne ọ zọ ye uwu ato. Ẹghẹ ne I na ka miẹn avbe erha uwa odede, ọ keghi yevbe ne a miẹn ọmọ ne ọ vbo ro ne erhan azara ka gha mọ vbe ẹghẹ ọre. Sokpan, iran ghi sẹ Oke Peọ, iran na suẹn gha gho e Baal, wanwanna, iran keghi do gha re emwi osọnnọ zẹ vbene ẹbọ ne iran ho ẹmwẹ ọnrẹn ye.

Maika 6:5

Wa ne emwa mwẹ, wa yerre emwi ne Balak ne Ọba e Moab te mwamwa ne ọ ru uwa re, kevbe ewanniẹn ne Balam ne ovbi e Beọ rhie ne ẹẹn. Wa yerre, avbe emwi ni sunu vbe odẹ ke agọ Akasia ya sẹ Gilgal. Wa ye avbe emwi na rre, wa gha vbe rẹn emwi ne I ru ne I ya miẹn uwa fan.”

I Kọrinti 10:20

Hiehiere. Emwi ne I kha ọrọre wẹ, emwi ne a ya zẹ ese vbe aro ẹbọ, esu ọre a yae ru na ighẹ ẹ i re Osanobua. Mẹ ma ho ne uwa gu esu gha mu obọ.

Diuteronomi 32:38

Wa ya ẹvbi emwi izọ ese rua ghọe iran, wa na vbe mu ayọn ne iran da, wa we ne iran do ye uwa obọ nian, gie iran do rhulẹ miẹn uwa fan.

Jọsua 22:17

Wa ye orukhọ ne a ru vbe Peọ rre, ne e Nọyaẹnmwa na ya egboghogbogho rri emwa hia oya. Te ima ye rrioya ba ẹmwẹ onii na. Orukhọ nii ma he sẹ ra?

Jọsua 23:16

Sokpan, a deghẹ wa ma rhie uhi nii ne Nọyaẹnmwa Osanobua rhie ne uwa mwẹ, a deghẹ wa ya gha gho avbe ẹbọ ọvbehe, wa na gha ya uhunmwu rhanmwẹ otọ ne iran, ọ gha rri uwa oya, a te miẹn wẹ ọkpa ma ghi kẹe vbe uwu uwa vbe otọe esiesi na ne ọ mu ne uwa.”

Jọsua 23:7

Ne uwa ghẹ ya gha gu emwa na ne a sẹrae ye uwu ẹbu uwa mu obọ, ra ne uwa gha ya unu kan eni ẹbọ iran, ra ne uwa gha ya eni iran yan eyan, ra ne uwa gha gho iran ra ne uwa gha ye uhunmwu rhanmwẹ otọ ne iran.

Arhie Maan 2:14

Sokpan, ghe ibozẹghẹ vbe uwu emwi ne I gui ẹzọ ruẹ baa, eso vbe uwu emwa ni lele iruẹmwi Balam wa guẹ rre evba, ọmwa nọ ma Balak vbene a gha ya ye ivbi izrẹl ru orukhọ hẹ, vbe ekpa ne iran na rri evbare ne a ya ru ẹbọ, kevbe ne iran na gha gbe alama oghẹ.