Nọmbas 18:7 - Edo Bible (E Baibol Ẹdo) Version 1996

⁷ Sokpan wẹ kevbe avbe ivbuẹ ọkpa ọre ọ gha winna iwinna ohẹn ne ọ dekan aka kevbe uwu ehe Ne ọ Huan Sẹẹ Ehia. Iwinna ne ọ bi yuẹ egbe ọre ena khin, rhunmwuda mẹ rhie ọhẹ ọghe ukpo ohẹn nuẹn nẹ. Ọmwa ne ọ ma kei, ne ọ sikẹ avbe emwi ne ọ huanrẹn, a ghi gbẹe rua.”

Nọmbas 18:7 ပူးပေါင်းရင်းမြစ်များ

Psalm 115:10

Wa ne avbe ohẹn Osanobua wa mu ẹtin yan e Nọyaẹnmwa. Rọẹn ọ re ọ ye uwa obọ, ne ọ vbe rhie uwa lẹre.

Ẹksọdọs 28:1

“Tama iran ne iran viọ ọtuẹn ighẹ Errọn kevbe avbe ivbi ẹre e Nadab, Abihu, Eliaza kevbe Itama ke uwu ẹbu emwa Izrẹl ladian gha dee ne iran do gha ga mwẹ zẹ vbe avbe ohẹn.

Ẹksọdọs 29:9

U ghi gbalọ iran ebuluku, u ghi dọlọ ẹrhu ye iran uhunmwu, iran ọ khian gha re ohẹn zẹ vbe ne iyi itẹbitẹ mwẹ khare. Vbene u gha ya ye Errọn kevbe ivbi ẹre ma ohẹn ọre ọna khin. Iran kevbe uniẹn iran gha ga mwẹ vbe ukpo ohẹn ẹdẹdẹmwẹdẹ.

Ezikiẹl 44:15

E Nọyaẹnmwa ne Udazi khare wẹẹ, “Sokpan, avbe ohẹn ni re ivbi ẹwae e Livai, ni rre ivbi uniẹn e Zadọk, wa ye ekhọekekhọe gha ga mwẹ vbe Ọgua Osa, vbe avbe ivbi Izrẹl nekpa fi iyeke gbe mwẹ nẹ. Rhunmwuda ọnii nian, iran ọ re ọ ghi ra gha re emwa ni gha ga mwẹ, iran ọ re ọ ghi ra vbe gha sẹ ehe ne I ye ne iran do gha ya ẹvbi aranmwẹ kevbe esagiẹn emwi ne a ya zọọ ese, zẹ ọhẹ mẹ.

Ezikiẹl 44:16

Iran ọkpa ọ re ọ ra gha la uwu Ọgua Osa mwẹ, iran ghi vbe gha winna vbe Ogiukpo mwẹ, iran ghi vbe gha ya emwa ru ugamwẹ vbe uwu Ọgua Osa.

Ezikiẹl 44:8

Iran ma gbearoghe ilele itaemwi ni rre Ọgua Osa mwẹ, sokpan, iran keghi viọ avbe erriọvbe yọ ne iran gha gbearoghe ẹre.

Levitikọs 16:2

Ọ keghi kha wẹẹ, “Tama Errọn ne ọtuẹn wẹ ẹghẹ ne ọ khẹ ke ọ re ọ gha ya gha fian ukpọn onurho gberra la uwu Ehe Nọhuansẹ hia, rhunmwuda evba nii ọre I na la uwu okuku rhiegbe ma vbe odukhunmwu ugue Ẹkpẹti Ile. Deghẹ ọ ma họn, a gha gbe ẹe rua.

Levitikọs 7:35

Ehe ne a viọ ne Nọyaẹnmwa vbe evbare nii, ne Nọyaẹnmwa ghi vbe viọ ne Errọn kevbe ivbi ẹre vbe ẹdẹ ne a ma iran ohẹn, ọre ena khin.

Nọmbas 1:51

Wa gha si kpao vbe agọ, avbe Livai ọre ọ gha fannọ Owa Ukpọn nii, iran ghi vbe ya bọ ẹe vbe agọ ne ọgbọn. Ọmwa ọvbehe rhọkpa gha sikẹ Owa Ukpọn nii, a ghi gbe ẹe rua.

Nọmbas 16:40

Ọna kegha re ne ivbi Izrẹl gha miẹn wan wẹ ọmwa ne ẹ i re ovbi uniẹn ọghe Errọn ne ọ ghẹ gha rrie aka do gha giẹn eturari vbe odaro e Nọyaẹnmwa, ne a ghẹ vbe fuẹn ọnrẹn uan zẹ vbe Kora kevbe irogho ẹre. A keghi ru emwi na hia zẹ vbene Nọyaẹnmwa gie Mosis ne ọ tama Eliaza.

Nọmbas 18:20

E Nọyaẹnmwa keghi tama Errọn wẹẹ, “Wẹ ghẹ miẹn ọmwa rhọkpa emwi ne ọ gia re vbe ukhu, a i ra vbe ghae ne uẹn vbe otọ Izrẹl. Mẹ ne Nọyaẹnmwa ọrọre emwi ne ọ ke ne uẹn.”

Nọmbas 18:3

Iran ghi winna iwinna ne ọ kan ruẹn fo kevbe emwi ne ọ bi ye iran egbe vbe ẹmwẹ Owa Ukpọn, sokpan, a ghẹ gie iran ya obọ kan avbe emwi iruemwi ni rre Ehe Ne ọ huanrẹn ra aka. Iran gha ru ẹe, a gha gbele uwẹ kevbe iran an.

Nọmbas 3:10

Sokpan, u ghi zẹ Errọn kevbe ivbi ẹre ne iran gha re ohẹn, ọmwa ọvbehe ne ọ rhirhi danmwẹ ọẹn ghe ne ọ winna iwinna iran, a ghi gbẹe rua.”

Nọmbas 3:38

E Mosis kevbe Errọn kevbe avbe ivbi ẹre ghi bu agọ iran ye asefẹn ahọ ọghe Owa Ukpọn Ile. Iran ọ yan iwinna ne a winna vbe uwu Ehe Ne ọ huanrẹn ne ivbi Izrẹl. Ọmwa ọvbehe ne ọ rhirhi danmwẹ ọẹn ghe ne ọ ru ẹe, a ghi gbẹe rua.

Matiu 10:8

Wa mu iran ni khuọnmwi egbe rran, huẹn iran ni wulo kpaegbe, wa khue avbe ekhọnmwoti huan, wa khulo avbe orhiọn esu ladian. Te a rhie ne uwa ọghe ọhẹ, ọhẹ ọre uwa vbe rhie ẹre ne emwa ọvbehe.

Iyẹn ne ọ Maan Ọghe Jọn 3:27

Jọn wanniẹn tama iran wẹẹ, “Ọmwa ọkpa ne ọ sẹtin gha mwẹ emwi rhọkpa i rrọọ vbe ẹ i re te Osanobua rhie nẹẹn.

Ẹfisọs 3:8

Mẹ kanmwa sẹ ne ọ ghi kanmwa sẹẹ vbe uwu avbe emwa Osanobua, sevba, Osanobua keghi ya ọna ru mwẹ ẹse wẹ, ne I rhie Iyẹn Ne ọ maa ọghe ẹfe Kristi ne ẹ i mwẹ okhiẹ bu iran ne ẹ i re Ju gha khian.

Diuteronomi 18:2

A ghẹ mu otọ ne iran zẹ vbene a ghae ne emwa nekpa, ukpo ohẹn nii ọrọre ọghae iran, zẹ vbe ne Nọyaẹnmwa yan rẹn.

Hibru 5:4

Orhunmwu ọkpa ne ọ tobọ ẹre mu ọghọ akpa ogie ohẹn yọ egbe ẹre, ẹ i rrọọ. Osanobua ọre ọ zẹ ọmwa ne a ya ma ogie ohẹn, zẹ vbene a zẹ Errọn.

Jọsua 18:7

Avbe e Livai i ra gu uwa nekpa gha otọe, rhunmwuda ne ọ kan iran ọrọre ne iran gha ga zẹ vbe avbe ohẹn ọghe Nọyaẹnmwa. Avbe ẹwae ọghe Gad, Riubẹn kevbe obọkpa vbe ẹwae Manasẹ mu otọ ọghe iran nẹ vbe odẹ ahọ ọghe Jọdan, otọe nii ne Mosis ne ọguọmwadia e Nọyaẹnmwa mu ne iran.”

I Pita 5:2

Wa gha re Ọsuohuan avbe oghẹn ohuan ne Osanobua viọ ne uwa, wa gha ye aho ne ọ ke uwu ekhọe rre gbe aro ghe iran, vbene Osanobua ho ne uwa gha ru ẹe, ẹ i re ne a gbe omaro omaro ru. U ghi gha winna iwinna ruẹn, ẹ i re rhunmwuda ne a miẹn ehe na ha ruẹ osa kẹkan, sokpan aho ne a winna ne ọ ke ekhọe rre.

I Pita 5:3

Ghẹ gha ho ne u gha khaemwisẹ yan iran ne a viọ nuẹn ne u gha gbe aro ghe, sokpan gha re ne a ghe ru ne oghẹn ohuan.

I Samuẹl 2:28

I keghi hannọ ẹgbẹe ọghe ọe zẹ, vbe uwu ẹwae ni rre Izrẹl hia ne iran gha re ohẹn mwẹ, ne iran gha ga vbe Ogiukpo, ne iran gha giẹn eturari kevbe ne iran gha rhuan adaghọ ya nọ mwẹ ọta. I kevbe rhie asẹ ne iran, ne iran gha ghae vbe emwi ne a giẹn uan vbe aka.