Nehimaia 9:32 - Edo Bible (E Baibol Ẹdo) Version 1996

³² “Osanobua, Osanobua mwa, a miẹn vbe u kpọlọ hẹ! ugborrirri ne ọ mwẹ ẹtin eyan ne u yan rẹn hia, u keghi ya ẹkoata mu ẹẹn sẹ ke ẹghẹ ne avbe ọba Asiria ya gha zẹ ima owẹ gha dee uhin do sẹ wanwanna, a miẹn oya ne ima he re. Avbe ọba mwa, avbe ọkaolotu, avbe ohẹn mwa kevbe avbe akhasẹ avbe erha mwa odede, kevbe emwa ima hia, ehia rri oya. Yerre vbene ima he rri oya sẹhẹ!

Nehimaia 9:32 ပူးပေါင်းရင်းမြစ်များ

I Ọba 8:23

Ọ na na erhunmwu wẹẹ, “E Nọyaẹnmwa, Osanobua Izrẹl, ọba ọkpa ne ọ yevbe ruẹ i rrọ vbe odukhunmwu vbe ẹrinmwi ra agbọn vbe ototọ! Te u ru vbene ile ne u ta ẹe khare, u ghi vbe gha mwẹ itohan ne ẹ i fiwerriẹ ghe emwa ruẹn ni ye ekhọe hia mu ẹmwẹ ruẹn sẹ.

II Ọba 15:19

E Tiglat Pailesa ne ọgbaisi Asiria, keghi mu okuo gha die Izrẹl, ẹre Menahem na viọ uwan esiliva arriaisẹn enẹ yan ọgban (34,000) ne ẹẹn, ne ọ miẹn ehe na rhie obọ ye ọ re iyeke ne obọ e Menahem miẹn ehe na gba ẹvbo ni rẹn gha khaemwisẹ yan.

II Ọba 15:29

Ẹghẹ ne Pẹka na gha re ọba, ọre Tiglat Pailesa ne ọgbaisi Asiria na khọn munọ avbe ẹvbo na, Ijọn, Ebel Bẹt, Maka, Janoa, Kedẹs kevbe Hazọ, kevbe otọ e Giliad, e Galili kevbe Naftali, ọ keghi viọ emwa ni rrọ oghunmwu gha rrie Asiria.

II Ọba 17:23

Rhinrin a te do miẹn vbe okiekie wẹ, e Nọyaẹnmwa wẹ ne a ho iran bẹkun vbe odaro irẹn, zẹ vbene ọ la unu avbe akhasẹ ne eguọmwadia ẹre ya obọ sẹ ekhae ne iran wẹ rẹn gha ru ẹe vberriọ. Ẹre a na miẹn wẹ a viọ ivbi Izrẹl gha rrie iwe vbe Asiria, ehe ne iran ye ye do sẹ ẹdẹnẹrẹ na.

II Ọba 17:3

E Siamanẹsẹ ne ọba Asiria keghi mu okuo gie ẹe. E Hosia keghi de iguẹ ne Siamanẹsẹ, ọ na gha ha igho uhunmwu gie ẹe ukpukpo.

II Ọba 17:6

ne ọ vbe re ukpo ogihinrin ne Hosia la ẹkete, ọba Asiria keghi khọn e Sameria muotọ, ọ keghi hẹ ivbi Izrẹl oghunmwu gha rrie Asiria, ọ keghi viọ eso gha rrie ẹvbo e Hala ne iran yin evba, eso kegha rre ọkpẹn Ẹzẹ Habọ vbe otọ e Gozan, eso kegha rre ẹvbo e Midia.

II Ọba 23:29

Ẹghẹ ne Josaia na gha re ọba, e Nẹko ne ọba Igipt keghi viọ ivbi iyokuo gha rrie Yufretes ne ọ ya ru iyobọ ne ọba nọkhua ọghe Asiria. E Josaia ne ọba keghi hia ne ọ degbe ivbi iyokuo Igipt odẹ vbe Mẹgido. Iran keghi gbe ẹe rua vbe okuo.

II Ọba 25:7

Vbe Sirra e Zedekaia, a keghi gbele ivbi ẹre ne ikpia a, e Nebukiadneza na wẹ ne iran wọlọ e Zedekaia aro hẹ kua, a keghi ya ọgiọrọ rrọ ẹre mu gha rrie e Babilọn.

Ẹzra 4:10

Do deba avbe emwa nekpa ne Asiọbanipal nọkhua ne ovbi udu munọ hin ẹvbo iran rre, ọ na ya viọ iran ye Sameria kevbe ehe ọvbehe vbe obọ Orrie ọghe Otọe ni lẹga Yufretes, ọ re ọ gbẹn ebe na.”

Ẹzra 4:2

Rhunmwuda ọnii iran keghi bu e Zerubabẹl kevbe avbe ọkaẹgbẹe, iran tama iran wẹẹ, “Wa gie ima yaba uwa bọ Ọgua Osa na. Osanobua ne uwa ga ọ re ima vbe ga, te ima wa vbe zọ ese ghe ẹre ke ne Esahadọn ne ọgbaisi Asiria ya wẹ ne ima gha dee do yin edinran gha dee.”

Ẹzra 9:13

“Ma rhe miẹn emwi ne ọ rruan mwa zẹ vbe emwi ne a ya rri ima oya ye orukhọ mwa, ma rẹnrẹn wẹ, we ne Osanobua mwa ma rri ima oya sẹ zẹ vbene ọ te khẹ ke mwa, ne u na gie ima ye gha rre agbọn.

Nehimaia 1:5

“E Nọyaẹnmwa, Osanobua ọghe Ẹrinmwi! Ọmwa nọkpọlọ ẹsẹse wẹ khin Ohan ruẹn vbe mu mwa. We i hiẹ ọmwa ne ọ ho ẹmwẹ ruẹn ọ na vbe gha ru vbene u khare.

Psalm 47:2

E Nọyaẹnmwa ne Ne ọ yo sẹẹ Ehia ọmwa ne a mu ohan rẹn nọ; ọba nọkhua ọ re nọ, ọmwa ne ọ khaemwisẹ yan otọ agbọn hia.

Psalm 66:3

Wa tama Osanobua wẹẹ, “A miẹn vbe emwi ne u ru hia re ọyunnuan hẹ! Ẹtin ruẹn kpọlọ sẹ vberriọ wẹ te avbe eghian ruẹn hia ye ohan defi igue vbe odaro ruẹ.

Psalm 66:5

Wa do ghe iwinna ne Osanobua winna ẹn, iwinna ọyunnuan rẹn vbe uwu ẹbu emwa.

Ẹksọdọs 18:8

E Mosis keghi na iyẹn emwi ne Nọyaẹnmwa rhunmwuda ivbi Izrẹl ru ọba Igipt kevbe ivbi Igipt re ma e Jẹtro. Ọ na iyẹn ọlọghọmwa ne iran he miẹn vbe odẹ kevbe vbene Nọyaẹnmwa miẹn iran fan hẹẹ.

Aizaia 9:6

A biẹ ọmọ ọkpa ne ima! A rhie ọmọ okpia ọkpa ne ima! Rẹn ọ ra gha re ogie mwa. Eni ne a ra gha tie ẹre ọrọre, “Ọbude Ọyunnuan.” “Osa ne Oghodua,” “Erha Etẹbitẹ,” “Okoro Ọfumwegbe.”

Daniẹl 9:4

I na erhunmwu ghe e Nọyaẹnmwa Osanobua mwẹ, I keghi miẹn orukhọ emwa mwẹ kue I keghi kha wẹẹ, “E Nọyaẹnmwa Osanobua mwẹ, wẹ kpọlọ ẹsẹse, ma vbe ya ọghọ nuẹn. Te uwẹ rhie obọ lele ile ne u tae, u keghi mwẹ aho ẹmwẹ ọmwa ne ẹ i fafaa ghe iran ni ho ẹmwẹ ruẹn, iran na vbe gha ya uhi ruẹ ru emwi.

Daniẹl 9:6

Ma ma zẹ ye avbe eguọmwadia ruẹ re, kevbe avbe akhasẹ ruẹ, ni ya eni ruẹn gu avbe ọba mwa, kevbe iran ni khaemwisẹ yan ima guan, kevbe erha mwa odede, kevbe ẹvbo mwa hia fẹẹrẹ.

Daniẹl 9:8

Avbe ọba mwa, iran ni khaemwisẹ yan ima, kevbe avbe erha mwa odede ru emwiekhue, iran keghi vbe rukhọ ghe uwẹ ne Nọyaẹnmwa.

Levitikọs 26:18

“Deghẹ a ghi miẹn wẹ vbe iyeke ena hia, wa ma ye họn ẹmwẹ mwẹ, I gha fian ukhukhu ihinrọn ba oya ne uwa gha re.

Levitikọs 26:21

“A deghẹ te uwa ye gha ze vbudu khian vbene uwa i na họn ẹmwẹ mwẹ, I gha dọlegbe fian ba oya ne I gha rri uwa ẹre ukhukhu ihinrọn.

Levitikọs 26:24

Ẹghẹ nii, I ghi werriẹ aro da uwa, I gha rri uwa oya ukhukhu ihinrọn sẹ ayọ.

Levitikọs 26:28

Ẹghẹ nii ohu gha mu mwẹ I ghi werriẹ aro da uwa, I ghi dọlegbe rhie ukhukhu ihinrọn ba oya ne I gha rri uwa re.

Diuteronomi 7:12

“Deghẹ wa gha rhie ehọ ye avbe uhi na, wa na gha ya iran ru emwi vbe ọghe ẹmwata, e Nọyaẹnmwa Osanobua gha mwẹ ahoẹmwọmwa ne ẹ i fafaa ghe uwa zẹ vbene ọ yan ma avbe erha uwa odede.

Diuteronomi 7:13

Ọ gha ho ẹmwẹ uwa, ọ gha vbe fiangbe uwa, vbene uwa gha na gha muan yọ, wa ghi vbe gha mwẹ emọ ni bun, ọ ghi fiangbe ugbo uwa vbene uwa gha na gha mwẹ ọka ni bun, kevbe ofigbọn ọliv, ọ ghi vbe fiangbe uwa viọ ẹmila kevbe ohuan ni bun ne uwa. Ọ gha rhie afiangbe na hia ne uwa vbe otọ ne ọ yan ma avbe erha uwa odede we rẹn gha mu ne uwa.

Diuteronomi 7:21

Ghẹ gie ohan emwa na mu ẹẹn. E Nọyaẹnmwa Osanobua rua rrọọ ya ba uwa. Osanobua nọkhua ne ọ kere ne a gha mu ohan rẹn nọ.

Diuteronomi 7:9

Wa yerre wẹ e Nọyaẹnmwa Osanobua uwa ọkpa ọrọre Osanobua, ọ vbe gia mu ẹtin yan. Ọ gha mu ile ọghe ọe sẹ, ọ ghi vba gha rhie ahoẹmwọmwa ne ẹ i fafaa ọghe ọe ma orre arriaisẹn vbe uwu iran ni ho ẹmwẹ ọnrẹn, iran na vbe gha ye uhi ẹre ru emwi.