Nehimaia 9:26 - Edo Bible (E Baibol Ẹdo) Version 1996

²⁶ “Sokpan, emwa ruẹn sọtẹ, iran ma họn ẹmwẹ ne uẹn iran keghi fi iyeke gbe Uhi ruẹ, iran gbele avbe akhasẹ ni bu iran ude ni tama iran ne iran dọlegbe bu ruẹ gha dee iran kegha yagha a yan egbe yan egbe.

Nehimaia 9:26 ပူးပေါင်းရင်းမြစ်များ

I Ọba 14:9

Orukhọ ne u he ru sẹ ọghe iran hia ni ka gha rriọba khẹ ruẹ ẹsẹse. U fi iyeke gbe mwẹ nẹ, u keghi gua izohu mwẹ kpao vbekpa ne u na gha mannọ amazẹ, u na dunmwu ẹbọ ematọn ne u miẹn gha gho.

I Ọba 18:13

U ma he họn wẹ ẹghẹ ne Jezibẹl na gha gbele avbe akhasẹ e Nọyaẹnmwa, I keghi ya viọ iyisẹn vbe uwu iran lẹre, ekigbesiyeha vbe uvun ọkpọkpa, I na ye amẹ vbe evbare gha koko iran.

I Ọba 18:4

ẹghẹ ne Jezibẹl na gha gbele avbe akhasẹ e Nọyaẹnmwa, Obedaia keghi viọ iyisẹn vbe uwu iran, ọ na viọ iran lẹre, ekigbesiyeha vbe uvun ọkpọkpa, ọ na gha ye amẹ vbe evbare koko iran.

I Ọba 19:10

Rẹn keghi wanniẹn wẹẹ, “E Nọyaẹnmwa, Osanobua Oghodua, wẹ ọkpa kẹkan ọre I ga ke otọ gha dee. Sokpan, ivbi Izrẹl ma ghi mu ile ne iran guẹ ta sẹ, iran dunmwu avbe ogiukpo ruẹ sotọ, iran gbele avbe akhasẹ ruẹ hia, mẹ ọkpa ọre ọ ghi ke ẹe, iran vbe ho ne iran gbe mwẹ uan!”

II Ọba 21:10

E Nọyaẹnmwa keghi gie avbe akhasẹ ne eguọmwadia ẹre wẹẹ,

II Ọba 21:11

“E Manasẹ yin avbe uyinmwẹ ni hu ẹko na, emwi ni kakabọ rhia sẹ emwi ne ivbi e Kenan ru, ọ keghi la ekpa avbe amazẹ ọre si ivbi Izrẹl obọ fi orukhọ.

II Krọnikol 36:16

Sokpan, iran kegha ya emwa ne Osanobua gie ẹre uhunmwu gbogiẹ, iran ma zẹ ye ẹmwẹ ne iran ta, iran na vbe gha giẹ avbe akhasẹ ọre, rhinrin a ke do miẹn wẹ ohu Osanobua ghe emwa rẹn kpọlọ sẹrriọ wẹ, emwi ne a gha ya rhanmwẹ ọẹn re, ẹ i ghi rrọ.

Nehimaia 9:18

Iran ma amazẹ ne ọ yevbe ẹkhuia ẹmila. Iran na wẹ ọnọna ọ re Osanobua, ne ọ viọ iran ke otọ Igipt ladian u miẹn vbene iran yagha uwẹ hẹ, Nọyaẹnmwa!

Nehimaia 9:29

U yan ma iran, ne iran gha ya emwi ne u ma iran ẹre yin, sokpan vbe uwu uhiomwẹ iran fi iyeke gbe uhi ruẹ, a gha rhe miẹn wẹ a rhie Uhi ruẹ lẹre ọkpa ọre uhunmwu agbọn ne ọ maa ye uhunmwu ibiba, kevbe ni ze vbe udu, iran he ne iran ya ẹe ru emwi.

Nehimaia 9:30

Ke ukpo dinna ukpo, u keghi ye izin egbe gha ma iran emwi u ru ẹe ne avbe akhasẹ ruẹ guan, sokpan emwa ruẹn keghi yin ehọ u keghi rhunmwuda ọnii rhie ẹghẹ ne ẹvbo ọvbehe ya khọn iran.

Psalm 50:17

Wa wẹ wa i kue ne I dia uwa, wa he iyi mwẹ ye otọ.

Jerimaia 16:11

Ẹghẹ nii u ghi tama iran wẹẹ, ‘E Nọyaẹnmwa khare wẹ, avbe erha uwa odede fi iyeke gbe mwẹ, iran ke ya gha ghoo, iran keghi ya gha gaa avbe ẹbọ ọvbehe. Iran hee mwẹ yotọ, iran ma rhie emwi ne ima iran re.

Jerimaia 2:30

I rrii uwa oya, sokpan, ọ ma gbe emwi rhọkpa, wa iho ne I gbe uwa hin ọkhọ rre. Wa gbele avbe akhasẹ uwa zẹ vbe oduma ne ọ tu.

Jerimaia 2:7

I keghi viọ iran gha die otọ ne ọ maa emwiokọ. Ne iran do gha ya emwiokọ ni rrọ ru, deba emwi ni maa ni rrọọ hia. Sokpan, ne iran gha na te ru vberriọ, iran keghi mu otọe mwẹ rhia. Iran keghi ru ẹvbo ne I mu ne iran awua.

Jerimaia 32:23

Sokpan, ugbẹn vbe iran ghi sẹ otọe na, vbe iran ghi yan ẹnrẹn nẹ, iran ma ya uhi ruẹ ru emwi ra ne iran gha yin zẹ vbene u ma iran ẹre. Iran ma ru avbe emwi ne u wẹ ne iran ru rhọkpa. Ọre u na gie ọkhọ na hia rruan iran.

Jerimaia 42:19

Ọre I na rhie te ẹe wẹẹ, “E Nọyaẹnmwa tama uwa na ne ọ ghi kẹe vbe Juda wẹ ne uwa ghẹ dọlegbe gha rrie Igipt. Rhunmwuda ọnii nian, I tama uwa yotọ nẹ o.

Eve Orriara 3:42

“Ma ru orukhọ nẹ, a keghi vbe sọtẹ wẹ ne Nọyaẹnmwa ma vbe yabọ mwa.

Ezikiẹl 20:21

Sokpan, orre nii keghi vbe yagha mwẹ. Iran rra uhi mwẹ, iran ma ya iyi mwẹ ru emwi, iyi ne ọ rhie arrọọ gie ọmwaikọmwa ne ọ ya ẹe ru emwi. Iran mu Ẹdẹ Ikẹtin rhia. Mẹ te wa mu egbe ne I gie iran họn ẹmwẹ obọ ohu mwẹ vbe egbe vbe uwu ato vba, ke ne I wa gbele iran hia a.

Matiu 21:35

Iran ni keghi munọ eviẹn ọnrẹn nii, iran mama ọkpa vbọ, iran gbe ọkpa vbọ rua fẹẹrẹ, iran keghi filo okuta gbe nọkpa.

Iwinna 7:52

Ọkpa rrọ vbe uwu iran ne akhasẹ ne avbe erha uwa odede ma kpokpo ra? Emwa ne Osanobua gie gha dee ni do kha ẹghẹ ni, ighẹ Ọguọmwadia emwata ẹre dee, iran gbele ehia a, ne a ghi ye na nian, wa ghi rhie ẹre ma an nẹ, wa keghi gbe ẹe rua.

Diuteronomi 32:14

Ẹmila kevbe ohuan iran kegha la ewẹn ẹsẹse, iran kegha mwẹ ohuan ni maa sẹẹ, ẹwe kevbe ẹmila ọka ne ọ maa sẹẹ kevbe ayọn ne ọ rhiẹnrhiẹn sẹẹ.

Diuteronomi 32:15

“Emwa e Nọyaẹnmwa keghi fe, sokpan iran keghi sọtẹ, iran kegha kpolo, evbare na gbe iran ẹko ua. Iran he Osanobua ne ọ yi iran ye otọ, iran keghi he ọmiọnmwafan iran nọkhua ye otọ.

Giọgis 10:6

Ivbi Izrẹl keghi vbe dọlegbe rukhọ ghe e Nọyaẹnmwa. Iran na gha gho e Bal kevbe Astat deba avbe ẹbọ e Siria, e Saidọn, e Moab, Amọn kevbe Filistia. Iran keghi fi iyeke gbe e Nọyaẹnmwa, iran ma gha gae.