Nehimaia 8:16 - Edo Bible (E Baibol Ẹdo) Version 1996

¹⁶ Rhunmwuda ọnii, avbe emwa ni keghi gele ya giagia ebe, iran na do gbe irhu yan owa iran kevbe ore iran, kevbe ore Ọgua Osa kevbe ughe ẹvbo vbe ọkpẹn Urho Amẹ kevbe Urho Ifreim.

Nehimaia 8:16 ပူးပေါင်းရင်းမြစ်များ

II Samuẹl 11:2

Ẹdẹ ọkpa, vbe ẹdẹ ghi ye egbe rrie odẹ ẹdogbota nẹ, e Devid keghi kpaegbe vbe ovbe avan ne ọ vbiẹre, ọ keghi hin egedege ẹguae. Ọ kegha hẹko khian lẹga vbe odukhunmwu nii, evba ọ re ọ na ya bẹghe okhuo ne ọ khuẹ. Okhuo na keghi wa mose ẹsẹse.

II Ọba 14:13

E Jehoas keghi mu Amazaia oghunmwu, ọ na gha rrie Jerusalẹm, ọ na guọghọ ekẹn ọlẹga ẹvbo nii kevbe Onurho Ifreim ya sẹ Onurho Igọgọ, ehe ne ọ wa sẹ omwa ibata uri vbe utanmwẹ.

II Krọnikol 20:5

Iran na, deba ivbi e Jerusalẹm keghi si koko ye ẹghodo nọgbọn ne ọ rre Ọgua Osa. E Jehosiafat ne ọba keghi ya mudia ye odaro iran.

II Krọnikol 33:5

Ọ keghi bọlọ ehe ne a na gho avbe orhọnmwẹ lele ọgua ore eva na ọ rre Ọgua Osa.

Nehimaia 12:37

Iran ghi sẹ Urho Uhunmwu ẹzẹ, iran keghi hin ikpawẹ ne ọ rrie Ẹvbo e Devid, iran keghi gberra ẹguae Devid, iran na dọlegbe do hin ekẹn nii vbe Urho Amẹ vbe odẹ ahọ ẹvbo nii.

Nehimaia 12:39

Ma keghi ke evba ya la Urho Ifreim gberra, Urho e Jesiana, Urho Ehẹn, Owa Ọkhẹ Ne gelete ọghe Hananẹl, kevbe Owa Ọkhẹ Ne gelete ọghe iran ne Iyisẹn ya sẹ Urho Ohuan. Ma keghi do mu ẹẹn ye otọ vbe ọkpẹn Urho Ọgua Osa.

Nehimaia 8:1

Vbe ọ ghi te sẹ uki ne ogihinrọn, ivbi Izrẹl hia keghi gbe ẹkun sotọ vbe ẹvbo edọmwadẹ ọghọe. vbe uki ne okaro ọghe, uki ni, iran hia ke do si egbe koko vbe Jerusalẹm, vbe ehe ne otọe na vbe aro vbe uwu Urho Amẹ. Iran ke wẹ ne Ẹzra ne ohẹn kevbe ne ọ rẹn uhi ne Nọyaẹnmwa rhie la obọ e Mosis gie ivbi Izrẹl ne ọ mu ebe nene uhi re.

Nehimaia 8:3

Evba nii ọ re ọ na ke owiẹ ya tie ebe nii ma iran ya sẹ ogiavan, iran hia ke wa gha kakabọ danmwehọ ẹre.

Jerimaia 19:13

Avbe owa ni rre Jerusalẹm, avbe owa avbe ọba ni rre Juda, vbe ẹmwata avbe owa hia ne a ghi na gien eturari vbe ẹrhunrhun owa ẹre ne avbe orhọnmwẹ, kevbe avbe owa ne a ghi na sa ayọn kua zẹ vbe emwi izọ ese ghe avbe ẹbọ ọvbehe, ehia ọ re ọ gha khian ne awua ye zẹ vbe Tofẹt.”

Jerimaia 32:29

Iran ghi vbe mu erhẹn yọ. Iran gha giẹn ọnrẹn sotọ, deba avbe owa nii ne emwa na ya gha ye ohu mu mwẹ vbekpa ne iran na gha giẹn eturari ne Baal vbe okpo, kevbe ne iran na gha sa ayọn imuohan kua ne avbe ẹbọ.

Diuteronomi 22:8

“U gha bọ owa ọgbọn, ghẹ mwẹ u ma ru emwi ne a dayi lẹga ehọ okhiẹ ọ re. Ẹghẹ nii, ẹ i ghi rre urhu ruẹ ọ re ọ ye a deghẹ ọmwa defua, ọ na wu.