Nehimaia 6:10 - Edo Bible (E Baibol Ẹdo) Version 1996

¹⁰ Vbe uwu ẹghẹ na I keghi ya tuẹ e Siemaia ne ovbi e Delaia, eyẹ Mehetabẹl, ne ọ ma sẹtin kpao vbe owa ẹre rre. Ọ keghi tama mwẹ wẹẹ, “Gie imẹ vbe ruẹ ya lẹre ye Ehe Nọhuanrẹn ọghe Ọgua Osa, ne a khui urho, rhunmwuda, iran de ra do gbe ua. Iran gha rre vbe asọn ne ọ rhirhi a gha khin nian ne iran do gbe ua.”

Nehimaia 6:10 ပူးပေါင်းရင်းမြစ်များ

I Ọba 6:5

A keghi vbe bọ fiante ekẹn ọnrẹn vbe orere, vbe asefẹn kevbe iyeke Ọgua Osa, ọ kegha re omuyan eha, ọkpọkpa vbọ kegha re ibata ihinrọn vbe ukhiọnmwẹ vbe uyomwẹ.

II Ọba 11:3

Ukpo ehan ọre Jehosiaba ya gha gbe aro ghe ọmọ okpia na, ọ keghi rhie ẹre lẹre ye uwu Ọgua Osa vbe Atalia rre ẹkete zẹ vbe ọba ne okhuo.

II Ọba 9:8

Ẹgbẹe Ehab hia kevbe ivbi iran, te ehia khian wulo, te I ra wa fuẹn emọ ikpia hin uniẹn ọnrẹn rre, ibiẹka kevbe eniwanrẹn.

II Krọnikol 28:24

Yevbe sẹ ọnii, ọ keghi viọ emwi ne a lo vbe Ọgua Osa hia, ọ na dunmwu ehia a. Ọ keghi khui urho Ọgua Osa, ọ na bọlọ Ogiukpo lele ehe hia vbe Jerusalẹm.

II Krọnikol 29:3

Vbe uki ne okaro ọghe ukpo ne Hẹzekaia rriọba, ọ keghi kie urho Ọgua Osa, ọ na dọlọ ẹe yi.

II Krọnikol 29:7

Iran khui urho Ọgua Osa, iran gie ukpa dọyọ, iran ma ghi giẹn eturari ra ne iran zọ ese ne a tọn ẹn vbe Ọgua Osa ọghe Osanobua Izrẹl.

Ẹzra 10:31

Ẹwae Harim: Eliezẹ, Isija, e Malkija, e Siemaia, e Simiọn, e Bẹnjamin, e Malọk kevbe Siemaria

Ẹzra 8:16

I keghi gie ne a tie ihinrin vbe uwu avbe ọkaolotu nii, ena ọ re Eliezẹ, Ariel, e Siemaia, Elnatan, e Jarib, Elnatan, e Natan, e Zẹkaraia kevbe Mẹsiulam, deba emamwaemwi eva, Joarih kevbe Elnatan.

Nehimaia 6:12

I ghi roro ẹe yo, roro ẹe rre, I keghi do miẹn wẹ, Osanobua ma zẹdẹ gu e Siemaia guan, sokpan wẹ e Tobaia kevbe Sanbọlat ọre ọ rhie igho abọtọ gie ẹe ne ọ gunmwẹ zẹ egbe iro vberriọ.

Psalm 12:2

Te iran hia wa ta ohoghe ma egbe. Iran ghi gha ye arhẹrhẹ mu egbe rẹrẹ.

Psalm 37:12

Ọmwa dan khuan khẹ ọmwa esi ọ kevbe ye ikhuiwu gha ghe ẹre kọn-ọn.

Itan 11:9

Ẹmwẹ unu emwa ne ekhọe ẹre mu rhu, sẹtin rhia ọmwa ẹdagbọn ruan, sokpan ẹwaẹn ọmwa ẹmwata sẹtin miẹn ruẹn fan.

Jerimaia 36:5

Ẹre I na ghi tama e Barọk wẹẹ, “Iran i ghi gunmwẹ la uwu Ọgua Osa sokpan,

Ezikiẹl 3:24

sokpan, orhiọn Osanobua la uwu imẹ, ọ keghi mu mwẹ mudia. E Nọyaẹnmwa keghi tama mwẹ wẹẹ, “Gha rriowa ne u ya khui urho ke egbe yi.

Malakai 1:10

E Nọyaẹnmwa ne Oghodua khare wẹẹ, “Akpawẹ a miẹn ọkpa vbe uwu uwa ne ọ gha khui urho Ọgua Osa nian ne uwa ghẹ ghi miẹn ehe na ya gha hie erhẹn nọ ma maa ye Ogiukpo mwẹ. Ẹko uwa i ma mwẹ hiehiere. I i ra rhan obọ miẹn emwi ihaoko ne uwa viọ gunmwẹ.

Matiu 7:15

“Wa gha ba avbe akhasẹ ohoghe. Iran gha mu akpa ohuan khuẹrhẹ yọ bu uwa rre, sokpan oduma dan iran wa khọ vbe uwu egbe.

Iyẹn ne ọ Maan Ọghe Jọn 3:20

Uwanmwẹ i yẹ ọmwa ne ọ ru ọkhọ, ẹ i vbe ladian idagbo, rhunmwuda ẹ i ho ne agbọn rẹn ọkhọ ne irẹn ru.

Iwinna 21:30

Adesẹ ore ẹvbo hia keghi wa tighi ua, iran hia keghi wa mu vẹ, iran gua Pọl rhie, iran na hiọrọ ẹe hin uwu Ọgua Osa rre. Vbe ọwarọkpa nii, iran na khui urho Ọgua Osa.