Nehimaia 12:43 - Edo Bible (E Baibol Ẹdo) Version 1996

⁴³ Emwi ni bun ọre a ya zẹ ese ẹdẹ ne ẹdẹrriọ, ẹko kegha sẹ emwa hia ọyẹnmwẹ, rhunmwuda, Osanobua ọ re ọ rhie ọyẹnmwẹ ne iran. Avbe ikhuo kevbe ibiẹka keghi vbe deba emwiukpo na, a keghi gha họn urhu uwemwẹ iran ya sẹ arria ọvbehe.

Nehimaia 12:43 ပူးပေါင်းရင်းမြစ်များ

II Krọnikol 20:13

Ivbi e Juda hia fẹẹrẹ, kevbe avbe amwẹ iran kevbe ivbi iran keghi wa mudia ye evba vbe odaro Ọgua Osa.

II Krọnikol 20:27

E Jehosiafat keghi ke odaro viọ ivbiyokuo ẹre zẹ okpowẹ gha rrie Jerusalẹm, rhunmwuda, e Nọyaẹnmwa khọn mu eghian iran otọ.

II Krọnikol 7:10

Vbe ikpẹdẹ ne ọ ghi lele ẹe, ne ọ re ikpẹdẹ ne ogieha yan ugie ọghe uki ne ogihinrọn, e Solomọn keghi zẹ emwa ni urrie. Ọyẹnmwẹ keghi sẹ iran ye afiangbe ne Osanobua rhie ne Izrẹl ne emwa rẹn, e Devid kevbe Solomọn.

Ẹzra 3:13

A ma ghi sẹtin rẹn ne ọ ghi re urhu eve vbọ ra ne ọre urhu oghọghọ rhunmwuda, vbene iran ya gha go, te a wa gha họn nẹẹn vbe arriavbehe.

Nehimaia 12:27

Ẹghẹ ne a na ye ekẹn ne a gbe lẹga Jerusalẹm fi ohan, a keghi ya viọ avbe Livai ke ehe ne iran a rhirhi a gha ye rre ne iran deba emwiukpo a ya fi ohan ni vbene iran gha na so ihuan ekpọnmwẹ deba isẹ kevbe akpata ne a kpee.

Nehimaia 12:42

Avbe emwa ni ghi vbe lele iran kegha re Maaseia, e Siemaia, Eliaza, Uzi, e Jehohanan, e Malkija, Ẹlam kevbe Ezẹ. Iran ni so ihuan, ne ọ viọ mwẹ obọ ighẹ Jezrahaia, keghi wa kie urhu hia ya gha so ihuan.

Job 34:29

Osanobua gha kha ighẹ rẹn i zẹdẹ guan yọ, ọmwa ne ọ ra nọ rẹn ẹ i rrọọ. Ọ gha rhie aro ẹre lẹre, ọghe emwa nagbọn fo.

Psalm 27:6

Erriọ ọ re I gha na khọnmiotọ vbe uhunmwu avbe eghian mwẹ ni lẹga mwẹ. I gha ya urhu oghọghọ ne ọ la zọ ese vbe uwu Ọgua Osa ẹre. I gha so ihuan, I gha rho e Nọyaẹnmwa.

Psalm 28:7

E Nọyaẹnmwa degue mwẹ, ọ vbe gbinna mẹ I mu ẹtin yan rẹn. Ọ yọmwẹ obọ, ọ keghi ya ọyẹnmwẹ sẹ mwẹ, I gha so ihuan oghọghọ rho ẹre.

Psalm 9:2

I gha ya oghọghọ so ihuan rhunmwuda ruẹ. I gha so ihuan urhomwẹ ghe ruẹ Osanobua ne Udazi.

Psalm 92:4

Iwinna ruẹn nekhua ya ẹko rhiẹnrhiẹn mwẹ Nọyaẹnmwa mẹ so ihuan oghọghọ rhunmwuda iwinna ne u winnaẹn.

Aizaia 61:3

ne I ya rhie ne iran ni khiẹ vbe Zaiọn oghọghọ kevbe ọyẹnmwẹ ye ihe akhiẹ. Ihuan urhomwẹ ye ihe akhiẹ. Iran gha yevbe avbe erhan, ne Nọyaẹnmwa tobọ ẹre kọ. Iran gha ru emwi ne ọ kere a gha vbe rho Osanobua ye iwinna ne ọ winna ẹn.

Jerimaia 31:13

Avbe ibiẹka ikhuo ni rrọ gha ku iran ghi vbe gha ghọghọ avbe ikpia, igbama kevbe avbe ọmaẹn gha ghọghọ. I gha fu iran ẹko rre, I ghi ye akhiẹ iran khian oghọghọ.

Jerimaia 33:11

Urhu ne ọ la ọghe oghọghọ kevbe ọyẹnmwẹ, kevbe uwemwẹ ẹko rhiẹhrhiẹn mwẹ ọghe evbare irhiọha. Wa gha họn vbe emwa na a gha sihuan viọ imuohan ekpọnmwẹ die Ọgua Osa mwẹ, iran ghi kha wẹẹ, “ ‘Wa rhie ekpọnmwẹ ne Nọyaẹnmwa ne Oghodua, rhunmwuda, rẹn maa, itẹbitẹ ọ re ahoẹmwọmwa rẹn khin.’ I gha ya otọ nii khian ne agbọn maa rẹn zẹ vbe ne ọ ka ye dee ẹdẹ. Mẹ ne Nọyaẹnmwa ọ re ọ taa ẹe.”

Nọmbas 10:10

Erriọ vbe nọ vbe ẹghẹ iku ọyẹnmwẹ, ẹghẹ Emwiukpo Uki Ọgbọn, kevbe emwiukpo ugamwẹ ọvbehe hia, wa gha viọ ese na giẹn uan ọghe uwa rre, kevbe ọghe isara, wa ghi kpe okpe na. Ẹghẹ nii, I gha yi uwa obọ. Mẹ ọ re Nọyaẹnmwa Osanobua rua.”

Matiu 21:15

Ugbẹn vbe avbe igiohẹn kevbe iran ni ma emwa Uhi ghi miẹn emwi ọyunnuan ne ọ ru deba avbe ibiẹka nọ go kevbe ni wee vbe uwu Ọgua Osa wẹẹ, “Uyi nọ ne ovbi e Devid.”

Matiu 21:9

Avbe emwa ni ke odaro ne Jesu kevbe ni rre ọre odieke keghi tọn urhu mu kha wẹẹ, “Urhomwẹ nọ ne ovbi e Devid. Afiangbe Osanobua nọ ne ọmwa ne ọ dee vbe eni Nọyaẹnmwa, Uyi nọ ne Osanobua.”

Iyẹn ne ọ Maan Ọghe Jọn 16:22

Egbe ọre ọghe uwa khin, wanwan na, wa he khiẹ nian, sokpan, I gha vbe dọlegbe miẹn uwa, ekhọe uwa ghi vuọn ne ọyẹnmwẹ, egbe ọyẹnmwẹ ne ọmwa rhọkpa i ra sẹtin gbe ye uwa egbe.

Ẹfisọs 5:19

Wa gha ya ẹmwẹ e Psalm gu egbe guan, deba ihuan kevbe ihuan ugie, wa gha so ihuan kevbe Psalm ghe Nọyaẹnmwa, deba oghọghọ vbe uwu ekhọe uwa.

Jems 5:13

Orhiọnkpa rre uwu ọlọghọmwa vbe uwu uwa ra? Wẹ ne ọ na erhunmwu.

I Samuẹl 4:5

Ugbẹn vbe ẹkpẹti Ile nii ghi wa rre, ivbi Izrẹl keghi wa mu wee sẹrriọ wẹ otọe keghi mu rueghe.